CILONGESA 23
MWASO 2 “Lizina Lyobe Yobe Yehova”
Lizina lya Yehova Lyapwa Bati lya Seho Kuli Yetu?
“Yehova nendeka ngwendi ‘Mu bakaleho bange.’”—ISAYA 43:10.
BILI MUNO MU CILONGESA
Muno mu cilongesa tusimutwiya bitwasa kulinga mangana tujelese na kwimanena lizina lya Yehova.
1-2. Tuzibuka bati ngwetu lizina lya Yehova lyapwa lya seho manene kuli Yesu?
LIZINA lya Yehova lyapwa lya seho manene kuli Yesu kutubakana cuma coshe-coshe. Co kukwesi munu washolwele mwamubwa lizina lya Yehova ngwe mwalingilile Yesu. Mu cilongesa cinahu twalilongesele ngwetu Yesu walyanene kutsa mwafwa ya kushaka kujelesa lizina lya Yehova na kumwesa ngwendi bingila bya Njambi byoshe byapwa bya kusungama. (Maki 14:36; Hebe 10:7-9) Co kumamaneselelo a Ciyulo ca Myaka 1,000, Yesu akelwisa nzili yoshe kuli Yehova mangana ajelese lizina lya Ishe. (1 Kori 15:26-28) Byoshe byanalingi Yesu bimwesa ngwabyo wazema manene Yehova.
2 Yesu wezile hano hasi mu lizina lya Ishe. (Iwano 5:43; 12:13) Washolwele lizina lya Ishe kuli bandongesi bendi. (Iwano 17:6, 26) Walongesele banu na kulinga bikomokeso kwitila mu lizina lya Yehova. (Iwano 10:25) Cakumwenako, Yesu walombele Yehova anyunge bandongesi bendi ‘mwafwa ya lizina lyendi.’ (Iwano 17:11) Yesu wamwene lizina lya Njambi kupwa lya seho manene kutubakana cuma coshe-coshe. Ngeci munu kasa kulitumbula ngwendi wapwa muka-Kristu wa busunga nga kazibuka lizina lya Yehova, co kesi kulipangesa.
3. Bika bitusimutwiya muno mu cilongesa?
3 Hakupwa baka-Kristu ba busunga tukatembwinina Yesu mu kuzema na kusingimika lizina lya Yehova. (1 Pita 2:21) Muno mu cilongesa tusimutwiya binalingisa Yehova ane lizina lyendi ku banu baje bali na kwambulula “muzimbu waubwa wa Bumwene.” (Mate 24:14) Tusimutwiya lalo omwo umo na umo wetu mwanapande kumwena lizina lya Yehova.
“BANU BABASANESA LIZINA LYENDI”
4. (a) Yesu wanene bandongesi bendi cipangi muka simbu kanda eluke kwilu? (b) Tusimutwiya ha cihula muka?
4 Simbu kanda eluke kwilu, Yesu walekele bandongesi bendi ngwendi: “Mukatambula nzili omwo sipilitu ya kujela ikaija hali yeni, co mukapwa bakaleho bange mu Jelusalema na mu Judeya mwoshe na mu Samaliya na ku mitambela ya kulako ya lifuti-libu.” (Bili 1:8) Bandongesi ba Yesu bapandele kwambulula muzimbu waubwa mu kaye koshe keti lika mu Isalele. Mu kwita kwa simbu, banu bakutunda ku mafuti oshe basele kupwa baka-kukabangeya Yesu. (Mate 28:19, 20) Yesu wendekele ngwendi: “Mukapwa bakaleho bange.” Kuma aba bandongesi babaha bapandele kuzibuka lizina lya Yehova indi bapandele kupwa lika bakaleho ba Yesu? Byuma byalingiwile bibanendeka ku mukanda wa Bilinga capita 15 bitukwasa kukumbulula eci cihula.
5. Tupositolo na bakulunu ba mu Jelusalema bamwesele bati ngwabo banu boshe banapande kuzibuka lizina lya Yehova? (Taleni na cikupulo.)
5 Mu mwaka wa 49 C.E., tupositolo na bakulunu ba mu Jelusalema baliwanene hamo mangana basimutwiye bya kutwala baje kubapwile baJuda ku mukanda mangana bapwe baka-Kristu. Mubamanesele kusimutwiya, Jemusi shongo ya Yesu wendekele ngwendi: “[Pita] natulumbunwina mwamubwa omwo Njambi watengulukililemo kuli baka-mafuti lwakulibanga, na kwambatako banu babasanesa lizina lyendi.” Jemusi wakele na kulumbununa lizina lyeya? Jemusi wapangesele majwi a kapolofweto Amose mwendekele ngwendi: “Mangana banu baje basalako batonde manene Yehova, hamolika na banu ba ku mafuti oshe, banu baje babasanesa lizina lyange, ngwendi Yehova.” (Bili 15:14-18) Ngeci aba bandongesi babaha bapandele kulilongesa bya Yehova, co bapandele ‘kubasanesa lizina lyendi.’ Oku kwalumbunwine ngwabo bapandele kusholola lizina lya Njambi ku bakwabo, co banu bazibuka ngwabo bali na kwimanena lizina lyendi.
Ha ciwano cibakele naco baka-cibunga ca kutwamenena ca mu simbu ya baka-Kristu bakulibanga, aba banalume ba kulongwa banangukile ngwabo baka-Kristu banapande kupwa banu baje babasanesa lizina lya Njambi (Taleni paragirafu 5)
6-7. (a) Bika byezilile Yesu hano hasi? (b) Cuma muka ca seho manene cezilile hano hasi?
6 Lizina lya Yesu lilumbununa ngwalyo “Yehova wapwa Mwobole,” co Yehova wapangesele Yesu mangana obole banu boshe baje bali na likulahelo muli ikeye na Munendi. Yesu wezile hano hasi na kutsila banu. (Mate 20:28) Mwalingile ngoco, wakwasele banu babakonekele bubi bwabo na kubashokolwela ngila ya kukayoya myaka yoshe.—Iwano 3:16.
7 Mwafwa bika banu batondele ndando ya kupatula? Mwafwa ya byuma byalingiwile mu lihya lya Edeni. Ngwe mutunasimutwiya mu cilongesa cinahu, bisemi betu bakulibanga, Adama na Eva batengulukilile Yehova, ngeci bazimbalesele kuyoya kwa myaka yoshe. (Gene 3:6, 24) Nameme ngoco, Yesu wezile hano hasi mangana akulinge cuma ca seho manene cije citubakana kwobola banu ku bubi. Wezile na kwimanena lizina lya Yehova mwafwa Satana wendekele byuma bya makuli hali Yehova. (Gene 3:4, 5) Ngeci banu boshe bapandele kuzibuka ngwabo Yehova kalingile byuma byabibi, co lizina lyendi lyapwa lya kujela. Yesu wafwililile kwimanena lizina lya Yehova mwafwa ikeye wapwile muka-kumwimanenako, co walingile byoshe byamulekele Yehova mu kulumbunuka.
Munu asa kulitumbula bati ngwendi wapwa muka-Kristu wa busunga okuni kazibuka lizina lya Yehova, co lalo kesi kulipangesa?
8. Bika bibapandele kuzibuka boshe baje bakulahelele Yesu?
8 Baka-kukabangeya Yesu boshe baje bapwile baJuda na baje kubapwile baJuda, bapandele kuzibuka ngwabo, Yehova Njambi, Ishe ya Yesu ikeye mwobole wabo. (Iwano 17:3) Kutundaho, bapandele kubasanesa ha lizina lya Yehova ngwe Yesu. Co lalo bapandele kuzibuka seho ya kujelesa lizina lya Yehova. Mwafwa kwoboka kwabo kwemanene ha kujelesa lizina lyendi. (Bili 2:21, 22) Ngeci baka-kukabangeya Yesu mukulongwa boshe bapandele kulilongesa bya Yehova na Yesu. Mukemwo Yesu kumaneneselelo a lilombelo lyendi lije lili ku mukanda wa Iwano 17, wendekele ngwendi: “Njinabasholwela lizina lyobe, co njilisholola lalo, mangana bazeme bakwabo ngwe muunanjizeme yange, co nange njilikwatasane nabo.”—Iwano 17:26.
“MU BAKALEHO BANGE”
9. Twasa kumwesa bati ngwetu lizina lya Yehova lyapwa lya seho kuli yetu?
9 Baka-kukabangeya Yesu ba busunga banapande kujelesa lizina lya Yehova. (Mate 6:9, 10) Banapande kumona lizina lya Yehova kupwa lya seho manene kutubakana mazina akwabo oshe. Co banapande kumwesa ngoco mu bilinga byabo. Ngeci bika bitunapande kulinga mangana tujelese lizina lya Yehova na kumwesa ngwetu Satana wendekele makuli hali ikeye?
10. Byuma muka bili ku mukanda wa Isaya capita 42 kutwala 44? (Isaya 43:9; 44:7-9) (Taleni na cikupulo.)
10 Ku mukanda wa Isaya capita 42 kutwala 44 tulilongesa bitunapande kulinga mangana tujelese lizina lya Yehova. Oku ku macapita Yehova ali na kwihula banu baje kubesi kumulemesa mangana bamwese indi binjambi babo bapwa ba busunga. Ngecilika mubakalingila mu nkuta, Yehova atonda bakaleho baje basa kwimanena aba binjambi. Oloni kukwesi mukaleho abemanena!—Tandeni Isaya 43:9; 44:7-9.
Tumwesa ngwetu Yehova ikeye lika Njambi wa busunga kwitila mu byuma bitwendeka na kulinga (Taleni paragirafu 10-11)
11. Kwesekesa na mukanda wa Isaya 43:10-12 Yehova naleke bika banu bendi?
11 Tandeni Isaya 43:10-12. Yehova nendeka kutalesa ku banu bendi ngwendi: “Mu bakaleho bange. . . co yange Njambi.” Yehova ali na kulomba banu bendi bakumbulule eci cihula: “Kuma kuli Njambi weka ndi?” (Isaya 44:8) Twabezika kukumbulula eci cihula. Kwitila mu majwi na bilinga byetu, tumwesa ngwetu Yehova ikeye lika Njambi wa busunga. Lizina lyendi lyapwa lyakama kutubakana mazina oshe. Yoyesi yetu inapande kumwesa ngwayo twazema manene Yehova, co tu bakulongwa kuli ikeye nameme Satana ashaka kutwonowesa kulinga ngoco. Nga tulinga ngoco, co tujelesa lizina lya Yehova.
12. Bupolofweto buli ku mukanda wa Isaya 40:3, 5 bwalishulisilile bati?
12 Nga tukundwiya lizina lya Yehova nambe kulimanena, co tutembwinina Yesu Kristu. Isaya wapolofwetele ngwendi, kukakala umo ‘akabwahesa [nambe ‘kujelesa’] ngila ya Yehova.’ (Isaya 40:3) Obu bupolofweto bwalishulisilile bati? Iwano Muka-kumbwitika wabwaheselele ngila Yesu uje wezile mu lizina lya Yehova na kwendeka mu lizina lya Yehova. (Mate 3:3; Maki 1:2-4; Luka 3:3-6) Bupolofweto bwakulifwa bwendekele lalo ngwabwo: “Bumpau bwa Yehova bukasholoka.” (Isaya 40:5) Mu ngila muka? Yesu mwezile hano hasi wemaneneko Yehova mu kulumbunuka ngeci kwapwile lika ngwe Yehova Ikeye wezile hano hasi.—Iwano 12:45.
13. Twasa kutembwinina bati Yesu?
13 Ngwe mwa Yesu, netu tubakaleho ba Yehova. Bakatusanesa lizina lya Yehova, co tukaleke boshe batuwana bya bipangi bya Njambi byakukomokesa. Twasa kupwa Bakaleho ba Yehova bababwa nga tuleka banu byuma byoshe byalingile Yesu mu kujelesa lizina lya Yehova. (Bili 1:8) Yesu wapwa Mukaleho wa Yehova wakama, ngeci tunapande kumukabangeya. (Kujo 1:5) Twasa kumwesa bati lalo ngwetu lizina lya Yehova lyapwa lya seho kuli yetu?
TUMWESA BATI NGWETU LIZINA LYA YEHOVA LYAPWA LYA SEHO KULI YETU?
14. Ngwe muumwesela mukanda wa Samu 105:3, tukalizibi bati ha lizina lya Yehova?
14 Tubwahelela mwafwa ya lizina lya Yehova. (Tandeni Samu 105:3.) Yehova akabwahelela mu tukalishasha mwafwa ya lizina lyendi. (Jele 9:23, 24; 1 Kori 1:31; 2 Kori 10:17) ‘Kulishashela hali Yehova’ kulumbununa kulyalesela hali Yehova ha kupwa ikeye Njambi yetu. Tukalizibi kubezika kuleka bakwetu ngwetu Yehova wapwa wakujela, co byoshe byakalingi byapwa bya kusungama. Kutwapandele kuziba shwamwa kuleka batukapanga nabo, batwakobela nabo sikola, batwatunga nabo na banu boshe ngwetu tu Bakaleho ba Yehova. Liyabolo ashaka ngwendi tulikele kuleka bakwetu bya lizina lya Yehova. (Jele 11:21; Kujo 12:17) Cakumwenako, Satana na tupolofweto bendi ba makuli bashaka kulingisa banu bebale lizina lya Yehova. (Jele 23:26, 27) Mwafwa ya kuzema lizina lya Yehova, tushaka kumushangazala simbu yoshe.—Samu 5:11; 89:16.
15. Bika byalibungila mu kusana ha lizina lya Yehova?
15 Tutwalelelaho kusana ha lizina lya Yehova. (Joele 2:32; Loma 10:13, 14) Kuli byuma byabingi byalibungila mu kusana ha lizina lya Yehova, keti lika kulizibuka na kulipangesa. Tunapande kuzibuka mwafwila Yehova, kumukulahela na kumulomba atukwase na kututwamenena. (Samu 20:7; 99:6; 116:4; 145:18) Co tunapande kuleka bakwetu lizina lya Yehova na bifwa byendi na kubakwasa batengulule futisi yabo na kushangumuka kupangela Yehova mangana bakoboke.—Isaya 12:4; Bili 2:21, 38.
16. Twasa kumwesa bati ngwetu Satana wapwa muka-makuli?
16 Tulyana kuyanda mwafwa ya lizina lya Yehova. (Yako 5:10, 11) Nga tutwalelelaho kupwa bakulongwa nameme twaliwana na tuyando, co tumwesa ngwetu Satana wapwa muka-makuli. Mu simbu ya Yombi, Satana wendekele ha bangamba ba Yehova boshe ngwendi: “Munu ana byoshe byali nabyo mwafwa ya mwonyo wendi.” (Yombi 2:4) Satana wendekele lalo ngwendi banu basa lika kupangela Yehova nga byuma bili na kubendela bwino, oloni nga baliwana na bukalu balikela kumupangela. Yombi wamwesele ngwendi Satana wendekele makuli. Netu twasa kumwesa ngwetu tutwalelelaho kupangela Yehova nameme nga tuliwana na bukalu nambe nga Satana alinga byuma bije byasa kutuzeyesa. Twasa kukulahela ngwetu Yehova atwalelelaho kutunyunga mwafwa ya lizina lyendi.—Iwano 17:11.
17. Ngwe muumwesela mukanda wa 1 Pita 2:12, mu bingila muka bikwabo mutwasa kwanena Yehova bumpau?
17 Tunapande kumwesa kasingimiko ku lizina lya Yehova. (Prov 30:9; Jele 7:8-11) Banu babangi bazibuka ngwabo tu Bakaleho ba Yehova, ngeci byuma bitulinga byasa kujelesa nambe kujwalesa lizina lyendi. (Tandeni 1 Pita 2:12.) Ngeci tunapande kulinga mwoshe mutwasela kushangazala Yehova kwitila mu majwi na bilinga byetu. Nga tulinga ngoco, co tusingimika lizina lya Yehova nameme kutwapwile bakulumbunuka.
18. Ngila muka ikwabo mutwasa kumwesela ngwetu lizina lya Yehova lyapwa lya seho kuli yetu? (Taleni na futunoti.)
18 Twamona lizina lya Yehova kupwa lya seho manene kutubakana yetu babenya. (Samu 138:2) Mwafwa bika kwapwa kwa seho manene kulinga ngoco? Mwafwa mutukalingi byuma bije bizibisa Yehova kubwaha, kakangi banu bakendeka byuma byabibi hali yetu.a Yesu mwatsile, banu bamushawile na kumumona kupwa cikenya. Nameme ngoco, Yesu walyangwilile kutsa mu ngila ei mangana Yehova bamwane bumpau. Yesu “kakele mbunge ku kumushaula,” ngeci kalishoshomwenene ha byuma byakuhenga bibakele na kwendeka banu hali ikeye. (Hebe 12:2-4) Wakele lika mbunge ku kulinga cizango ca Njambi.—Mate 26:39.
19. Muli na kuliziba bati ha lizina lya Yehova, co mwafwa bika?
19 Twabwahelela manene mwafwa ya lizina lya Yehova, co lalo twabezika manene kututumbula ngwabo tu Bakaleho ba Yehova. Ngeci tutwalelelaho kushangazala Yehova nameme banu batushaula. Twamona lizina lya Yehova kupwa lya seho manene kutubakana na lizina lyetu babenya. Ngeci tutwaleleniho kushangazala lizina lyendi nameme Satana alinga byuma bije byasa kutuzeyesa. Nga tulinga ngoco, co tumwesa ngwetu lizina lya Yehova lyapwa lya seho manene kuli yetu ngwe mulyafwila kuli Yesu Kristu.
MWASO 10 Shangazaleni Yehova Njambi Yetu!
a Banalume batatu mubendekele ngwabo Yombi nalingi bubi, Yombi uje wapwile munalume wa kulongwa washangumukile kusinganyeka manene mubakele na kumumwena banu. Ha kulibanga, bufuko bwa Yombi bwanyongele, co bana bendi boshe batsile. Nameme ngoco, “Yombi kalingile bubi nambe kwendeka ngwendi kuli cuma cimo cacibi canalingi Njambi.” (Yombi 1:22; 2:10) Oloni mubamubangeyeye ngwabo nalingi bubi, Yombi washangumukile ‘kwendeka mu kulusuka.’ Wakele mbunge ku kulimanena kutubakana kwaka mbunge ku kujelesa lizina lya Yehova.—Yombi 6:3; 13:4, 5; 32:2; 34:5.