Twaleleleniho ‘Kutonda Njambi’

1. Byuma muka bitukatondo? (Mateu 5:3)

YEHOVA azibuka mwamubwa byuma bitutonda. Cakumwenako, tutonda byakulya na bizalo na mwela kwakukala mangana tutwaleleleho kuyoya. Nga kutukala nebi byuma bya seho, co buyoye bwetu bwasa kukaluwa, co lalo twasa kutsa. Yehova azibuka byuma bikwabo bitutonda. Mukemwo watutangele na lishungu lya kushaka kumuzibuka na kukulahela ngwetu atutwamenena. (Tandeni Mateu 5:3.) Nga tutonda kupwa ba kubwahelela, co tunapande kuzibuka ngwetu tutonda kututwamenena kuli Yehova, co lalo tunapande kutwalelelaho kumukulahela.

2. Baje ‘bazibuka’ ngwabo ‘batonda Njambi’ banalifu bati na muka-kulomba?

² ‘Kuzibuka’ ngwetu ‘tutonda Njambi’ kulumbununa bika? Lijwi lya Cigriki libananungulula ngwabo ‘kuzibuka’ ngwetu ‘tutonda Njambi’ litulingisa tusinganyeke hali munu uje ali na kulomba sipilitu ya Njambi. Cakumwenako, lingeni ngwe mumona muka-kulomba uje nazala bizalo bya mazilo, byakutabozoka, co lalo kesi na byakulya. Ou muka-kulomba ali mu litanya, co butsiki ajaja lisika. Banu bali na kumujenjuka mwafwa ya sholokesi yendi. Najuka manene, co lalo nazeye. Ou muka-kulomba azibuka ngwendi atonda bukwasi mangana atwaleleleho kuyoya na kukala na nzili. Mu ngila imo lika, baje bazibuka ngwabo batonda Njambi bazibuka ngwabo batonda bukwasi bwendi mu kuyoya kwabo. Ngeci balinga mwoshe mubasela mangana bawane bukwasi ku binangulo byakana Yehova banu baje bamuzema.

3. Bika bitusimutwiya muno mu cilongesa?

³ Muno mu cilongesa tusimutwiya byuma bitulilongesa kuli munakazi wa Kafonisha uje walombele Yesu bukwasi. Ou muzimbu umwesa bifwa bitatu bije bibanapande kukala nabyo baje bazibuka ngwabo batonda Njambi. Kutundaho, tusimutwiya ha mwanja waubwa wa kapositolo Pita na Paulu na Mwene Devidi baje bapwile banalume ba kuhya ku sipilitu.

BIKA BITULILONGESA KULI MUNAKAZI UJE WALOMBELE BUKWASI?

4. Munakazi wa Kafonisha watondele bika kuli Yesu?

⁴ Litangwa limo munakazi wa Kafonisha waile kuli Yesu. Munendi wa mumbanda wakele na ‘dimona uje wakele na kumuyandesa manene.’ (Mate 15:21-28) Uje munakazi watsikamene na kulomba Yesu mangana akwase munendi. Tumoneni bitulilongesa ku ngila yalombelelemo bukwasi.

5. Yesu walingililile bika munakazi wa Kafonisha, co mwafwa bika? (Taleni na cikupulo.)

⁵ Munakazi wa Kafonisha wamwesele ngwendi wapwile wa kulikehesa. Mwafwa bika twendeka ngoco? Mwafwa kalubalele kwesekesa nomu mwamukumbulwilile Yesu. Wamwesekesele ku katali wa mundondo ngecilika mwa tutali baje babakele na kulela banu baje kubapwile Bajuda. Bika bimunesi kulinga ngwe Yesu wendekele byuma bya cifweci kuli yeni? Kuma ngwe mwalubalele na kulikela kumulomba bukwasi ndi? Omu keti mukemwo mwalingile munakazi wa Kafonisha. Uje munakazi walikehesele na kutwalelelaho kulomba bukwasi kuli Yesu. Bika byamushongangeyeye alinge ngoco? Wakulahelele Yesu. Likulahelo lya kukanyama lya uje munakazi, lyalingisile Yesu amukwase. Nameme Yesu wendekele ngwendi wezile lika na kukwasa “bimanga ba kuzimbala bakunjibo ya Isalele,” wakwasele uje munakazi na kutundisa dimona yakele nayo munendi.

6. Twasa kutembwinina bati munakazi wa Kafonisha?

⁶ Nga tushaka kuwana bukwasi ku kutwamenena kwa Yehova, co tunapande kutembwinina munakazi wa Kafonisha. Tunapande kulikehesa na kutwalelelaho kulomba bukwasi na kukala na likulahelo lya kukanyama. Munu wa kulikehesa akatwalelelaho kulomba Njambi bukwasi. Tunapande kukulahela manene Kristu Yesu na kukulahela baje bali na kupangesa mu kutwamenena bandongesi bendi. (Mate 24:45-47) Yehova na Munendi Yesu babwahelela nga tulikehesa na kutwalelelaho kubalomba bukwasi na kukala na likulahelo. Nga tulinga ngoco, co batukwasa na kututwamenena. (Esekeseni Jemusi 1:5-7.) Tumoneni mwakatutwamenena Yehova na kutwana byuma bitutonda mangana tupwe ba kubwahelela. Co lalo tusimutwiya mutwasa kutembwinina kapositolo Pita na Paulu hamo lika na Mwene Devidi mangana tuwane bukwasi ku binangulo bya Yehova.

TWALELELENIHO KULILONGESA LIJWI LYA NJAMBI

7. Pita watambwile cipangi muka, co bika byapandele kulinga? Lumbununeni. (Bahebelu 5:14–6:1)

⁷ Tusimutwiyeni ha mwanja wa kapositolo Pita. Kapositolo Pita wapwile umo wa Bajuda bakulibanga baje bazibukile ngwabo Yesu wapwile Mesiya. Co wazibukile ngwendi Yehova wakele na kupangesa Yesu mu kulongesa banu bya kuyoya kwa myaka yoshe. (Iwano 6:66-68) Simbu kanda aye mwilu, Yesu wanene Pita cipangi ca ‘kulisa bimanga bendi babandondo.’ (Iwano 21:17) Pita wapangele cije cipangi mu kulongwa. Co Yehova wamupangesele mu kusoneka mikanda ibali ya mu Mbimbiliya. Oloni Pita wapandele kulilongesa Lijwi lya Njambi. Cakumwenako, walilongesele mikanda yasonekele kapositolo Paulu. Kapositolo Pita wendekele ngwendi byuma bimo byasonekele Paulu byapwile “byabikalu kubizibisisa.” (2 Pita 3:15, 16) Nameme ngoco, Pita watwaleleleleho kulilongesa ebi byuma, co wakulahelele ngwendi Yehova amukwasa kubizibisisa na kubipangesa.—Tandeni Bahebelu 5:14–6:1.

8. Pita walingile bika omwo kangelo wamulekele ngwendi atengulule bisinganyeka byendi?

⁸ Pita wamwesele ngwendi wakulahelele manene Yehova mwononokele mashiko amwanene. Cakumwenako, litangwa limo Pita wamwene cimona, co kangelo wamulekele ngwendi alye tusitu baje kubatabesele kulya kwesekesa na Lishiko lya Mosesa. Kapositolo Pita wapwile Kajuda, co walizibile ngwe kukwapandele kulinga byuma byamulekele uje kangelo. Ha kulibanga, Pita wakumbulwile ngwendi: “Embwe Mwata, mwafwa kanda njilyeho cuma ca mazilo nambe ca kujwala.” Uje kangelo wamulekele ngwendi: “Keti usane byuma byanajelesa Njambi ngwobe bya kujwala.” (Bili 10:9-15) Pita wononokele na kutengulula bisinganyeka byendi. Tuzibuka bati ngoco? Munima ya kumona cije cimona, banalume batatu baatumine Konelyasi uje kapwile Kajuda, bezile kuli Pita na kumuleka ngwabo aye kuli Konelyasi mangana akasimutwiye nendi. Bajuda bamwene banu baje kubapwile Bajuda kupwa ba kujwala. Ngeci, ngwe Pita kamwene cije cimona ngwe wabyanene kukakobela mu njibo ya Konelyasi, mwafwa Konelyasi kapwile Kajuda. (Bili 10:28, 29) Oloni Pita watengulwile bisinganyeka byendi bwasi-bwasi na kwononoka Yehova. Walingile ngoco mwafwa Yehova wamumwesele ngwendi ashaka banu boshe bazibe muzimbu waubwa. (Prov 4:18) Kapositolo Pita wambulwilile Konelyasi na bakunjibo yendi boshe, co wabwahelelele manene kubamona batambula busunga na sipilitu ya kujela na kubambwitika.—Bili 10:44-48.

9. Mu bingila muka bibali mutwasa kuwana bukwasi nga tulilongesa byuma bya kuloba?

⁹ Ngecilika mwa kapositolo Pita, netu tunapande kulilongesa bilongesa bya mashangumukilo bya mu Lijwi lya Njambi kushwa kumo. Co lalo tunapande kulizilisa kutanda byuma bya kuloba. Tunapande kulinga mwoshe mutwasela kuwana simbu ya kulilongesa mwamubwa Lijwi lya Njambi. Co kunapu kwa seho manene kweseka mwoshe mutwasela mangana tuzibisise byuma bije kutwakele na kuzibisisa kunima. Mwafwa bika? Mwafwa kulinga ngoco kutukwasa mu bingila bibali. Cakulibanga, tulilongesa byuma byabingi hali Yehova bije bitukwasa tumuzeme na kumusingimika manene. Camucibali, tulilongesa byuma byabibwa hali ikeye bije kutwazibukile. Co oku kutulingisa tukale na lishungu lya kushaka kuleka bakwetu byendi. (Loma 11:33; Kujo 4:11) Tulilongesa cilongesa cikwabo ca seho ku mwanja wa Pita. Tulilongesa ngwetu nga tutambula kuzibisisa kwakuha kwa mu bisoneka, co tunapande kutengulula bisinganyeka na bilinga byetu bwasi-bwasi. Nga tulinga ngoco, co Yehova atwalelelaho kututwamenena, co lalo tumupangela mu kulongwa.

TWALELELENIHO KUZALA BUNU BWABUHA

10. Kwesekesa na mukanda wa Kolose 3:8-10, byuma muka bitunapande kulinga mangana tuzibise Yehova kubwaha?

¹⁰ Tunapande kuzala bunu bwabuha buje buzibisa Njambi kubwaha mangana tupwe ba kubwahelela na kumutabesa atutwamenene. Yehova akatulongesa mwakuzalela obu bunu bwabuha. (Tandeni Kolose 3:8-10.) Keti kwakwasi kuzala bunu bwabuha, oloni tunapande kulinga mwoshe mutwasela mangana tuzale bunu bwabuha buje buzibisa Njambi kubwaha. Tusimutwiyeni ha mwanja wa kapositolo Paulu. Kushwa lika ku bwanike, Paulu wapangele na nzili mangana azibise Njambi kubwaha. (Gala 1:14; Filp 3:4, 5) Oloni Paulu kazibukile mwakulemesela Njambi mu ngila inapande. Co kazibukile busunga bwalongesele Yesu, co lalo wapwile wa kulyalesa. Ngeci, walingile byuma mu ngila ije kuyazibisile Njambi kubwaha. Kutundaho, Paulu wendekele ngwendi wapwile “muka-likamba.”—1 Timo 1:13.

11. Kapositolo Paulu wapandele kuhyana cifwa muka? Lumbununeni.

¹¹ Simbu kanda apwe muka-Kristu Paulu wakele na kulubala-lubala bwasi. Mukanda wa Bilinga umwesa ngwawo Paulu walubalelele manene bandongesi ba Yesu, co ‘wabajujwisile na kushaka kubatsiya.’ (Bili 9:1) Ngeci, Paulu mwapwile muka-Kristu, wapangele na nzili mangana ecele kulubala-lubala bwasi, co wakupwile munalume wa mbunge ya kubandamena na ngozi. (Efeso 4:22, 31) Nameme ngoco, Paulu wasebukile. Cakumwenako, mwonowele kulitombola na Banabasi mu byuma bimo, Paulu walubalele manene, co “balingile manene bimata.” (Bili 15:37-39) Ha simbu ije, Paulu kazibisile Njambi kubwaha. Nameme ngoco, watwaleleleleho kupanga na nzili mangana apwe munu wamubwa uje azibisa Yehova kubwaha.—1 Kori 9:27.

12. Bika byakwasele Paulu aseze tulingolingo twendi twatubi?

¹² Paulu wasele kutengulula futisi yendi na kuzala bunu bwabuha mwafwa kakulahelele nzili yendi. (Filp 4:13) Ngecilika mwa Pita, Paulu wakulahelele ‘nzili yakana Njambi.’ (1 Pita 4:11) Nameme ngoco, bisimbu bimo Paulu wakele na kuzeya mwafwa ya kusebuka kwendi. Oloni mwakele na kuzeya, wakele na kwanuka byuma byabibwa byamulingilile Yehova. Ngeci, oku kwamukwasele atwaleleleho kulinga byuma bije bizibisa Yehova kubwaha.—Loma 7:21-25.

13. Twasa kutembwinina bati Paulu?

¹³ Twasa kutembwinina bati Paulu? Twasa kumutembwinina nga tupanga na nzili mangana tuseze bunu bwa laja na kutwalelelaho kuzala bunu bwabuha nameme tunapangela Yehova ha myaka yaingi. Oku kulumbununa ngwabo tunapande kupangesa byuma byali na kutulongesa Njambi. Nga twasebuka nambe hamo tunendeka mukwetu majwi amabi nambe nga tunonwa kukwata mbunge, kutwapandele kuzeya na kusinganyeka ngwetu kutwasa kuzibisa Njambi kubwaha. Oloni tunapande kulinga mwoshe mutwasela kutengulula futisi yetu. (Loma 12:1, 2; Efeso 4:24) Omwo tulinga ngoco tunapande kwanuka ngwetu tunapande kutwalelelaho kutengulula futisi yetu na kutwalelelaho kuzibuka mwamubwa byuma byatonda Yehova ngwendi tulinge.

TABESENI YEHOVA AMINYUNGILILE

14-15. Yehova akanyungilila bati banu bendi? (Samu 27:5) (Taleni na cikupulo.)

¹⁴ Tupwa lalo ba kubwahelela nga Yehova atunyungilila. Yehova atunyungilila mu bingila muka? Co byuma muka bitunapande kulinga mangana atunyungilile?

¹⁵ Mwene Devidi wakulahelele ngwendi Yehova amunyungilila mu simbu ya bukalu. (Tandeni Samu 27:5.) Yehova akanyungilila bati banu bendi? Akabanyungilila ku banu nambe ku byuma byoshe-byoshe bije byasa kuzeyesa likulahelo lyabo. Yehova nakulahesa ngwendi kukwesi citwa cibapangela bangamba bendi cije cibahyana. (Samu 34:7; Isaya 54:17) Nameme Satana na banu bali na kupangesa bakala na nzili, kubasa kutunenela bukalu ku myaka yoshe. Nameme nga batutsiya, Yehova akatusangula. (1 Kori 15:55-57; Kujo 21:3, 4) Yehova atukwasa lalo tutwaleleleho kumupangela nameme nga tuli mu bishoti. (Prov 12:25; Mate 6:27-29) Co lalo natwana bandolome na bandokazi baje bakatushongangeya na kutukwasa mu bisimbu bya bukalu. Kutundaho, natwana bakulunu mu cikungulukilo baje bakatulongesa na kutukwasa tutwaleleleho kukanyamesa likulahelo lyetu. (Isaya 32:1, 2) Co lalo mutukalikungulwila hamo na bakwetu ku biwano, tukalilongesa bingila bikwabo mutwasa kutabesela Yehova atukwase na kutunyungilila.—Hebe 10:24, 25.

16. Yehova wanyungililile bati Devidi?

¹⁶ Devidi mwononokele Yehova, Yehova wamunyungililile ku bukalu buje bukaija mwafwa ya kulinga bubi. (Esekeseni Provebia 5:1, 2.) Oloni omwo Devidi kononokele Yehova, Yehova kamunyungililile ku bukalu bwaliwanene nabwo mwafwa ya bilinga byendi byabibi. (2 Samwe 12:9, 10) Bika byalingile Devidi omwo bakwabo bamulingile mwamubi? Devidi walombelele na kuleka Yehova mwoshe mwakele na kulizibila. Co Yehova wamuzembelekele na kumwanukisa ngwendi wamuzema manene, co lalo amunyunga.—Samu 23:1-6.

17. Twasa kutembwinina bati Devidi?

¹⁷ Twasa kutembwinina bati Devidi? Twasa kumutembwinina nga tulombela kuli Yehova na kupangesa binangulo byendi omwo twangula byakulinga. Tunapande kwanuka ngwetu nga kutwononoka Yehova, co katunyungilila ku bukalu butuliwana nabwo mwafwa ya kujeneka kwangula mwamubwa byakulinga. (Gala 6:7, 8) Nameme tukononoka Yehova, bisimbu bimo twasa kuliwana na bukalu bukaija mwafwa ya byuma byeka. Ha simbu ya bukalu, twasa kuleka Yehova bishoti byetu byoshe na kumulomba atukwase. Co atuzembeleka na kutukwasa tulizibe ngwetu watuzema.—Filp 4:6, 7.

TWALELELENIHO KUKULAHELA KUTWAMENENA KWA YEHOVA

18. Banu babangi bamona bati kutwamenena kwa Njambi, co bika bitunapande kulinga mangana Yehova atwaleleleho kututwamenena? (Taleni na bikupulo.)

¹⁸ Cisoneka ca mwaka wa 2026 cendeka ngwaco: “Banabwahelela baje bazibuka ngwabo batonda Njambi.” Kunapu kwa seho manene ano matangwa kulinga byuma byendekele Yesu na kukulahela kutwamenena kwa Yehova. Mwafwa bika? Mwafwa banu babangi kubataba ngwabo batonda Njambi na kutwamenena kwendi. Co lalo bamo bakulahela Njambi, oloni bakashaka kumulemesa kwesekesa nomwo mubatondela bakebo. Bamoco bakakulahela kutwamenena kwa banu. Ngeci oku kukabalingisa bajeneke kupwa ba kubwahelela. Kutwapandele kutabesa biyongola bya banu ba cifweci bitungumune. Co bika bitunapande kulinga mangana tutwaleleleho kukulahela Yehova? Tunapande kutwalelelaho kulilongesa Lijwi lya Njambi, kulilongesa mwakumwesela bifwa bije bimuzibisa kubwaha, kumwononoka na kumutabesa atunyungilile.