CILONGESA 10
MWASO 31 Twendeni na Njambi!
Tembwinineni Mwakasinganyekela Yehova na Yesu
“Ha kuwana ngwe Kristu wayandele mu situ, neni libwaheseleni kukala na bisinganyeka ngwe byakele nabyo ikeye.”—1 PITA 4:1.
BILI MUNO MU CILONGESA
Muno mu cilongesa tusimutwiya byalilongesele Pita ku ngila yakasinganyekelamo Yesu, nebi bitulilongesako.
1-2. Kuzema Yehova kunambateselela bika, co Yesu wamwesele bati ngwendi wazema Yehova?
YESU wamwesele lishiko lya seho manene ku Mashiko a Yehova mwendekele ngwendi: “Unapande kuzema Yehova Njambi yobe na mbunge yobe yoshe na mwonyo wobe woshe na nzili yobe yoshe na bisinganyeka byobe byoshe.” (Luka 10:27) Twazema Yehova na mwonyo wetu woshe. Kuzema Yehova na myonyo wetu woshe kunambateselela mashungu etu, mutukalizibila na nzili yetu yoshe. Co lalo kunambateselela nomu mutukasinganyekela. Mwa busunga bene, kutwasa kuzibisisa mwakasinganyekela Yehova. Oloni twasa kuzibisisa mwakasinganyekela nga tulilongesa “bisinganyeka bya Kristu,” mwafwa Yesu akatembwinina Ishe mu kulumbunuka.—1 Kori 2:16.
2 Yesu wazemene Yehova na bisinganyeka byendi byoshe. Wazibukile cizango ca Njambi, co wayoyele mu kulitombola na cizango cendi nameme kulinga ngoco kwasele kumulingisa ayande. Yesu wamwene kulinga cizango ca Ishe kupwa cuma ca seho manene mu kuyoya kwendi, co katabesele cuma coshe-coshe cimutanganese.
3. Byuma muka byalilongesele kapositolo Pita kuli Yesu, co Pita washongangeyeye baka-Kristu balinge bika? (1 Pita 4:1)
3 Pita na tupositolo bakwabo babezikile kukala hamo na Yesu na kulilongesa mwakasinganyekela. Pita mwasonekele mukanda wendi wakulibanga, washongangeyeye baka-Kristu bakulibanga balibwahesele kukala na bisinganyeka ngwe byakele nabyo Kristu. (Tandeni 1 Pita 4:1.) Mu ndaka yakulibanga ibasonekele ou mukanda, Pita wasonekele ngwendi: “Libwaheseleni,” wapangesele ei endekesi mu kulumbununa maswalale baje banalibwahesela kuya na kulwa nzita. Nga baka-Kristu balilongesa kusinganyeka ngwe mwakasinganyekela Kristu, co bakala na byuma bibakwasa balwise mashungu amabi na kuhyana futisi yaibi ya kaye ka Satana.—2 Kori 10:3-5; Efeso 6:12.
4. Bika bitulilongesa muno mu cilongesa?
4 Muno mu cilongesa tusimutwiya mwakasinganyekela Yesu nomwo mutwasa kumutembwinina. Tulilongesa (1) mutwasa kutembwinina mwakasinganyekela Yehova mangana tusinganyeke mu ngila imolika na bakwetu. (2) Kupwa bakulikehesa na (3) kupwa baka-kusinganyeka mwamubwa ha kukulahela Yehova kwitila mu lilombelo.
TEMBWININENI MWAKASINGANYEKELA YEHOVA
5. Kapositolo Pita wonowele bati kumwesa mwakasinganyekela Yehova?
5 Tucisimutwiyeni omwo Pita mwonowele kutembwinina mwakasinganyekela Yehova. Yesu walekele tupositolo bendi ngwendi napande kuya ku Jelusalema, co kuje bantwama ba bulombelo bakamupakesa na kumutsiya. (Mate 16:21) Pita wazibukile ngwendi Yesu ikeye Mesiya ibakulahesele mangana obole banu ba Njambi. Co kwamukaluwilile kutaba ngwendi Yehova asa kwecelela Yesu bamutsiye. (Mate 16:16) Ngeci Pita wasanenene Yesu kumukulo na kumuleka ngwendi: “Mwata lizibileko ngozi, ebi byuma keti bilingiwe kuli yobe.” (Mate 16:22) Yesu na Pita kubalitombwele ha ñanda ei mwafwa Pita kakele na kusinganyeka ngwe mwakasinganyekela Yehova.
6. Yesu wamwesele bati ngwendi akasinganyeka ngwe mwakasinganyekela Yehova?
6 Yesu watembwininine Ishe mu kulumbunuka. Co walekele Pita ngwendi: “Ita kunima yange obe Satana! Unapu ucitanwiso kuli yange mwafwa bisinganyeka byobe keti bya Njambi, oloni bya banu.” (Mate 16:23) Yesu wazibukile ngwendi kulinga cizango ca Yehova kumulingisa ayande na kutsa. Ngeci Yesu wabyanene cinangulo ca Pita, nameme Pita watondele kumukwasa. Kapositolo Pita walilongesele ngwendi napande kusinganyeka ngwe mwakasinganyekela Yehova. Eci cinapu cilongesa ca seho kuli yetu.
7. Pita wamwesele bati ngwendi washakele kusinganyeka ngwe mwakasinganyekela Yehova? (Taleni na cikupulo cili ha .)
7 Mu kwita kwa simbu, Pita wamwesele ngwendi nendi washakele kusinganyeka ngwe mwakasinganyekela Yehova. Simbu ya Yehova ya kupwisa baje kubapwile baJuda bapwe banu bendi yetele. Ngeci Njambi watumine Pita akambululwile Konelyasi uje wapwile wakulibanga ku banu baje kubapwile baJuda kupwa muka-Kristu. BaJuda kubakele na kulikwatasana na baje kubapwile baJuda, ngeci Pita wapandele kutengulula mwakasinganyekela mangana ase kwambulwila baje kubapwile baJuda. Pita mwanangukile mwakamwena Yehova banu baje kubapwile baJuda, watengulwile bisinganyeka byendi. Ngeci Konelyasi mwalombele Pita mangana amwendele, Pita “kabyanene.” (Bili 10:28, 29) Pita wambulwilile Konelyasi na ba ku njibo yendi, co boshe babambwitikile.—Bili 10:21-23, 34, 35, 44-48.
Pita ali na kukobela mu njibo ya Konelyasi (Taleni paragirafu 7)
8. Twasa kumwesa bati ngwetu tuli na kusinganyeka ngwe mwakasinganyekela Yehova? (1 Pita 3:8 na futunoti)
8 Munima ya mwaka, Pita washongangeyeye baka-Kristu ngwendi ‘bakale na biyongola bimolika.’ (Tandeni 1 Pita 3:8 na futunoti.) Netu twasa kukala na biyongola bimolika na bandolome na bandokazi betu nga tutembwinina mwakasinganyekela Yehova ngwe mutukalilongesela mu Mbimbiliya. Cakumwenako, Yesu washongangeyeye baka-kumukabangeya ngwendi batwameke tahi bya Bumwene mu mutamba wakulibanga. (Mate 6:33) Munu umo mu cikungulukilo ceni nasa kulyangwila kushangumuka bupainiya bwa simbu yoshe nambe kukobela mu cipangi ca simbu yoshe. Kutubakana kumuleka anguleko cipangi ceka, mushongangeyeni na kumukwasa ashulisilile bilengo byendi.
PWENI BA KULIKEHESA
9-10. Yesu wamwesele bati ngwendi wapwa wa kulikehesa?
9 Ha butsiki bwa kwinduka litangwa libamutsiile, Yesu walongesele Pita na tupositolo bakwabo seho ya kupwa ba kulikehesa. Hakulibanga, Yesu watumine Pita na Iwano bakabwahese byakulya bibalya hamo na Yesu simbu kanda atse. Babwahesele lilonga na taulo bije bibapangesele mu kujwelesa baje bezile ku byakulya simbu kanda byalye. Oloni iya walikehesele na kukusha mendi a bakwabo?
10 Yesu kakwata-kwatele ku masinde kulinga eci cipangi. Wamwesele ngwendi wapwa wa kulikehesa. Tupositolo bakomokele manene kumona Yesu alinga cipangi cibakele na kulinga bangamba. Yesu washulwile bizalo byendi bya helu, co wambatele taulo na kulikutayo mu mbunda. Kutundaho, wakele mema mu lilonga, co washangumukile kujwelesa bandongesi bendi ku mendi. (Iwano 13:4, 5) Hamo kwamwambatelele simbu kujwelesa tupositolo bendi boshe 12 hamolika na Judasi uje wamwendele bungungu. Nameme ngoco, Yesu walikehesele na kumanesa eci cipangi. Kutundaho, Yesu walumbunwinine bandongesi bendi mu kuwa mbunge, ngwendi: “Munazibisisa byuma binjinalingi kuli yeni ndi? Muli na kunjisana ngweni ‘Mulongesi’ na ‘Mwata,’ muli na kwendeka busunga mwafwa mukemwo bene munjapwa. Ngeci, nga yange Mwata na Mulongesi njinamijwelesa ku mendi, neni lalo munapande kulijwelesa ku mendi a umo na mukwabo.”—Iwano 13:12-14.
Kulikehesa kwa busunga kunambateselela mutukalimwena nomwo mutukamwena bakwetu
11. Pita wamwesele bati ngwendi walilongesele kupwa wa kulikehesa? (1 Pita 5:5) (Taleni na cikupulo.)
11 Pita walilongesele kupwa wa kulikehesa kuli Yesu. Yesu mwelukile kwilu, Pita walingile cikomokeso ca kukangwisa munalume uje wasemukile na buyanga. (Bili 1:8, 9; 3:2, 6-8) Banu babangi bezile kuli ikeye mubamwene cikomokeso calingile. (Bili 3:11) Pita katondele ngwendi banu bamutsimanese manene, nameme kwakolelele banu bamwene kutsimana kupwa cuma ca seho manene. Pita walikehesele na kuleka banu bashangazale Yehova na Yesu ha kwendeka ngwendi: “Kwitila mu lizina lyendi [Yesu] na likulahelo lituli nalyo mu lizina lyendi, mukemwo ou munalume imuli na kumona uje imuzibuka, nakanyama.” (Bili 3:12-16) Mu kwita kwa simbu, kapositolo Pita wasonekelele baka-Kristu bya seho ya kupwa ba kulikehesa. Mu ndaka yakulibanga yasonekele ou mukanda, Pita wapangesele lijwi lije lyamwesele kuzala kulikehesa ngwe munu uje azala cizalo. Co ebi bitwanukisa byuma byalingile Yesu mwambatele taulo na kulikutayo mu mbunda na kujwelesa bandongesi bendi ku mendi.—Tandeni 1 Pita 5:5.
Pita mwalingile cikomokeso washangazalele Yehova na Yesu. Netu tumwesa ngwetu tu ba kulikehesa nga tulingila bakwetu byuma byabibwa na kujeneka kubandamena ngwetu batunanguke nambe kutwanako bimo (Taleni paragirafu 11-12)
12. Twasa kutwalelelaho bati kupwa ba kulikehesa ngwe Pita?
12 Twasa kutembwinina Pita nga tutwalelelaho kupwa ba kulikehesa. Kuli byuma byabingi byalibungila mu kupwa wa kulikehesa. Lijwi lyapangesele Pita mu kulumbununa kulikehesa linambateselela na bisinganyeka byetu byoshe. Wendekele ngwendi: “Kaleni na bisinganyeka bya kwisi.” Tukalingila bakwetu byuma byabibwa mwafwa twazema Yehova na banu keti mu kushaka lika ngwetu batushangale embwe. Tumwesa ngwetu tu ba kulikehesa nga tupangela Yehova na bandolome betu mu kubwahelela nameme banu kubesi na kumona bipangi bituli na kulinga.—Mate 6:1-4.
“SINGANYEKENI MWAMUBWA”
13. ‘Kusinganyeka mwamubwa’ kulumbununa bika?
13 Bika byalibungila mu kupwa ‘baka-kusinganyeka mwamubwa’? (1 Pita 4:7) Muka-Kristu uje akasinganyeka mwamubwa akangula mwamubwa byakulinga mu ngila ije imwesa ngwayo akatembwinina mwakasinganyekela Yehova. Muka-Kristu wa cifweci azibuka ngwendi kukwesi cuma ca seho manene mu buyoye bwendi cije citubakana busamba bwendi na Yehova. Akalimono mu ngila inapande, co kesi kulimona ngwe azibuka byuma byabingi kutubakana bakwabo. Akamwesa ngwendi nakulahela Yehova ha kulombela kuli ikeye simbu yoshe.a
14. Pita wonowele bati kukulahela Yehova?
14 Ha butsiki bwa kwinduka litangwa libamutsiile, Yesu walekele bandongesi bendi ngwendi: “Mubaboshe mutanuka mumumona byuma bilingiwa kuli yange butsiki bwa lelo” Pita wakumbulwile mu kusimpa ngwendi: “Nameme bakwetu boshe batanuka mwafwa ya byuma bilingiwa kuli yobe, oloni yange kunjitanuka!” Ha butsiki buje bene Yesu wanangwile bandongesi bendi bamo ngwendi: “Twaleleleniho kutona na kulombela simbu yoshe.” (Mate 26:31, 33, 41) Ngwe Pita wakabangeyeye eci cinangulo ca Yesu, ngwe wasimpile na kutaba ngwendi wapwa ndongesi ya Yesu. Calubinda, Pita wabyanene Yesu, co mu kwita kwa simbu walibeyele manene.—Mate 26:69-75.
15. Yesu wasele bati kutwalelelaho kusinganyeka mwamubwa ha butsiki bwa kwinduka litangwa libamutsiile?
15 Yesu wakulahelele manene Yehova. Walombelele kuli Yehova kushwa kumo nameme wapwile wa kulumbunuka. Co oku kwamulingisile apwe wa kusimpa na kulinga byuma bije bilitombola na cizango ca Yehova. (Mate 26:39, 42, 44; Iwano 18:4, 5) Pita kebalele ngwendi Yesu walombelele kushwa kumo ha butsiki bwa kwinduka litangwa libamutsiile.
16. Pita wamwesele bati ngwendi wapwile muka-kusinganyeka mwamubwa? (1 Pita 4:7)
16 Mu kwita kwa simbu, Pita wakulahelele manene Yehova na kulombela kuli ikeye kushwa kumo. Yesu mwasangukile wakulahesele Pita na bandongesi bendi bakwabo ngwendi, bakatambula sipilitu ya kujela mangana ibakwase kulinga cipangi ca kwambulula. Oloni wabalekele ngwendi babandamene mu Jelusalema kweta noho hakabatumina sipilitu ya kujela. (Luka 24:49; Bili 1:4, 5) Bika byalingile Pita ha simbu yakele na kubandamena? Pita na baka-Kristu bakwabo “batwaleleleleho kulombela.” (Bili 1:13, 14) Mu kwita kwa simbu, Pita mwasonekele mukanda wendi wakulibanga, washongangeyeye bakwabo baka-Kristu bapwe baka-kusinganyeka mwamubwa na kukulahela Yehova na kulombela kuli ikeye. (Tandeni 1 Pita 4:7.) Pita walilongesele kukulahela Yehova. Co wapwile ngunzi mu cikungulukilo.—Gala 2:9.
17. Bika bitunapande kutwalelelaho kulinga nameme nga twakala na cashu ca kulinga byuma bimo? (Taleni na cikupulo.)
17 Nga tushaka kupwa baka-kusinganyeka mwamubwa tunapande kulombela kuli Yehova kushwa kumo. Tunapande kutwalelaho kulombela kuli Yehova nameme tuliziba ngwetu twakala na cashu ca kulinga byuma bimo. Ngeci, omwo twangula byakulinga tunapande kulomba Yehova atutwamenene mwafwa ikeye azibuka byuma bitutonda.
Pita wakulahelele Yehova ha kulombela kuli Ikeye kushwa kumo. Netu twasa kupwa baka-kusinganyeka mwamubwa nga tulomba Yehova bukwasi maneneni nga tushaka kwangula byakulinga (Taleni paragirafu 17)b
18. Twasa kusinganyeka bati ngwe mwakasinganyekela Yehova?
18 Twakandelela manene kuli Yehova mwafwa watutangele na cifwa ca kwasa kutembwinina bifwa byendi. (Gene 1:26) Mwa busunga bene, kutwasa kutembwinina Yehova mu kulumbunuka. (Isaya 55:9) Nameme ngoco, ngecilika mwa Pita netu twasa kusinganyeka ngwe mwakasinganyekela Yehova. Ngeci tutwaleleleniho ku tembwinina mwakasinganyekela Njambi na kupwa ba kulikehesa na kusinganyeka mwamubwa.
MWASO 30 Njambi Yange, Tate Yange, Kabusamba Kange
b KULUMBUNUNA BIKUPULO: Ndokazi ali na kulombela mu mbunge simbu acibandamena kuliwana na baje bashaka kumukobelesa cipangi.