Jäˈäyë jantsy päjkˈyenyatypyë yä Naxwiiny

KOXYËP tuˈugë jäˈäy mniminyëty jantsy päjkˈyeny diˈibë kyëbäjk jäjtp axtë mä mdëjkniˈx, ¿wiˈixyëp mˈokwinmay? ¡Pes ko yëˈë tuˈugë päjkˈyeny jyaˈay! Tëëyëp jukyˈäjttë dëˈëmbë jäˈäy yä Naxwiiny. Mä Biiblyë jyënaˈany ko yëˈë tyeetyˈäjttë anklës diˈib tsäjpotm. Per, ¿wiˈixë dëˈën ko yëˈë tteetyˈäjttë?

Jamyats ko Satanás, yëˈë diˈibë nety yajjamˈäjtypyë amay jotmay. Axtë yˈëxtääyë winmäˈäny wiˈixë Diosë yˈanklësëty jyëmbittët axëkjäˈäy. Ko waanë yˈijty ta näägë anklës tmëmëdoodë Satanás. Tmastuttë ja tuunk diˈibë netyë Dios të myoˈoyëdë jam tsäjpotm. Kyëdaktë yä Naxwiiny ets nyayajjëmbijtëdë extëmë naxwinyëdë jäˈäy. ¿Mnijäˈäp tiko?

Biiblyë jyënaˈany yëˈko tˈijxtë toxytyëjkë tsujatypyë yä Naxwiiny ets tmëttsëënëyandë. Pääty kyëdaktë ets mëët pyëjk yˈuktë. Biiblyë jyënaˈany ko axëëk dëˈën yˈadëtstë, yëˈko Dios kyaj ojts dyajkojˈyë anklës ets tsyëënëdët yä Naxwiiny.

Ko ja anklësë nyëdoˈoxy yˈuˈunkpattë, tëgatsy ja yˈuˈungëty tpattë. Waˈan kyaj nëgoo tëgatsy kyëxëˈktë ko myutskatyˈäjttë, per ko ojts yaˈktsoˈonëdë ta ojts tyëjkëndë yaˈkpë axtë ko jyäjttë jantsy päjkˈyeny jyaˈayëty, ets ta nandëˈën niˈigyë kyumëjäädaktë.

Tyäˈädë päjkˈyeny jyaˈayëty axëkjäˈäy yˈijttë, ets kom extëm tyim mëjatyˈäjnëdë ets tyim kumëjääjatyˈäjnëdë yˈaxëktuundë jäˈäyëty. Tyukˈaguanëˈäjttë niˈamukë jäˈäy ets nandëˈën ttundëdë axëkˈäjtënë dëˈën extëm yëˈëjëty.

Enok të nety yˈoˈknë, per ta nety ja tuˈugë yetyëjk yä Naxwiiny diˈib oyjyaˈay. Tyäˈädë yetyëjk txëˈäjty Noˈee. Yëˈë tyuun xëmë diˈibë Dios tsyojk ets ttunët.

Tuˈugë xëë Dios tˈanmääyë Noˈee ko të nety ja tiempë jyaˈty mä dyajkutëgoyaˈany niˈamukë axëkjäˈäy. Perë Dios yajtsoˈogambyë nety Noˈee mëdë yˈuˈunk yˈënäˈk ets mët mayë jëyujk animal. Min nˈokˈijxëm wiˈix dyajtsoky.