YAJTËˈËWËN DIˈIB YAˈˈATSOOJËMBIJTP MÄ BIIBLYË
¿Mbäät xypyudëjkëmë anklësëty?
Duˈun extëm tëëyëp ojts yajpudëkë Daniel diˈib Dios mëduun, nanduˈun tyamë anklës tpudëkëdë jäˈäy parë ttukˈoyˈattët ja oybyë ayuk
Dios ojts dyajkojy miyonkˈamë anklës mä nety tkayajkojynyëmë jäˈäy (Job 38:4, 7). Tyäˈädë anklësëty yëˈë myëduundëbë Dios. Ets näˈäty yajtuknigajxpë jäˈäy diˈib mëdoodëp parë ttuˈumoˈoy ets tkuwäˈäny (Salmo 91:10, 11). Mä tyäˈädë tiempë, yëˈë anklësëty pyudëjkëdëbë jäˈäy parë ttukˈoyˈattët ja oybyë ayuk diˈib kyäjpxwäˈkxtëbë Jesusë yˈëxpëjkpëty. (Käjpxë Diˈibʉ Jatanʉp [Apocalipsis] 14:6, 7.)
Per ¿mbäät nmënuˈkxtakëmë anklësëty parë xypyudëjkëm? Kyaj. Ko nuˈkxtakëm duˈunën tuk pëky nDiosˈawdäjtëm ets yëˈëyë mbäät nˈawdäjtëmë Dios (Diˈibʉ Jatanʉp 19:10). Anklësëty yëˈë myëduundëbë Dios ets yëˈëyë jeˈeyë myëmëdowdëp, kyaj yëˈëjëtyë jäˈäy. Pääty xëmë mbäät nmënuˈkxtakëmë Dios mët yëˈëgyëjxmë Jesus. (Käjpxë Salmo 103:20, 21 etsë Matewʉ 26:53.)
¿Jadaa anklësëty diˈib axëkjäˈäy?
Naxwinyëdë jäˈäy ojts kyojy parë këˈëm twinˈixët ti tyunaampy, nanduˈunë anklës, mbäät këˈëm twinˈixtë pën yëˈë tyunandëp diˈib oy o pën yëˈë diˈib axëëk. Jotmaymyëët njënäˈänëm ko mayë anklës kyaj tmëmëdoodë Dios (2 Peedrʉ 2:4). Diˈib tim jawyiin kujuundak, yëˈë Satanás; ets wiinkpë anklës nanduˈun yˈadëtstë, ta jyëmbijttë kaˈoybyëty. Ko tiempë nyajxy, ta yaˈëxkajxtë jam tsäjpotm ets yajkujëbijpnäjxtë yä Naxwiiny. (Käjpxë Diˈibʉ Jatanʉp 12:7-9.)
Desde 1914 të myëjwindëkë axëkˈäjtënë extëm ninäˈänëm duˈun kyamëjwindëkë. Tyäˈädë yëˈë xytyukˈijxëm ko tim tsojkë Dios dyajkutëgoyaˈanyë Satanás mëdë kyaˈoybyëtëjk, ets dyajjëmbitäˈänyë Naxwinyëdë extëm tuˈugë lugäärë tsujpë. (Käjpxë Diˈibʉ Jatanʉp 12:12 etsë 21:3, 4.)
Pën mˈaknijawëyaampy, ixë kapitulo 10 mä tyäˈädë liibrë ¿Ti tëyˈäjtën jantsy tukniˈijxëbë Biiblyë?, diˈib yajpëtsëëmdëbë Jyobaa tyestiigëty
Nan mbäät xyajpëtsëmy mä www.jw.org/mco