Nijawë Diosë yˈAyuk
¿Wiˈix xypyudëjkëmë Diosë yˈanklës ets wiˈix xyˈaxëktuˈunëmë Mëjkuˈu yˈanklës?
Tyäˈädë artikulo yëˈë mbudëkëyanëp ets mä mBiiblyë xypyäädët wiˈix yaˈˈatsoojëmbity tijaty mnayajtëëjëp. Ets pën mtsojkënyëˈajtypy mbäät mëdë Jyobaa tyestiigë xyˈëxpëktë.
1. ¿Pënatyë Dios yˈanklësˈäjtypy?
Anklës jam tsyëënëdë tsäjpotm ets kyaj mbäät nˈijxëm, ets extëmë naxwinyëdë jäˈäy jyukyˈattë kyaj tmëbäätyë anklësë jyukyˈäjtën. Yëˈë ojts yajkojëdë Dios diˈib tëyˈäjtën, diˈib kyaj nanduˈun yaˈixy, ets ja ojts dyajkojtë mä tkayajkojynyëmë Naxwinyëdë (Job 38:4, 7; Matewʉ 18:10). Miyonkˈamë anklës yajpääty mëdë Jyobaa. (Käjpxë Salmo 103:20, 21 etsë Diˈibʉ Jatanʉp [Apocalipsis] 5:11.)
2. ¿Xypyudëjkëmë Diosë yˈanklës?
Tëëyëp, ojtsë anklës tpudëkë tuˈugë yetyëjk diˈib xyëˈäjt Lot. Jamë nety tsyëënë mä tuˈugë siudad diˈibë netyë Dios yajkutëgoyaampy mët ko jantsy axëëgë nety jamë jäˈäy jyukyˈattë. Majtskë anklës ojts ttukˈawanë Lot mëdë fyamilyë ets kyaˈagët. Tamˈäjtë jäˈäy diˈib jeˈeyë xiˈiky andaˈaky tpëjktë ets kyaj tmëjpëjtaktë. Perë Lot mëdë nyëëxëty ojts tmëmëdowdë Dios extëm yˈanmääyë mët yëˈëgyëjxmë yˈanklës, ta ojts tsyoˈoktë. (Käjpxë Génesis 19:1, 13-17, 26.)
Biiblyë jyënaˈany ko mä tyäˈädë tiempë nan xypyudëjkëmë anklës. ¿Wiˈix? Ko ttuˈumoˈoy pënaty kyäjpxwäˈkxtëp ja oybyë ayuk diˈib nyimaytyakypyë Diosë Kyutujkën (Matewʉ 24:14). Tyäˈädë oybyë ayuk, nan tam tii xytyukˈawäˈänëm ets kyaj yajpëkäˈäny xiˈiky andaˈaky, pes yëˈë Dios diˈib xytyukˈawäˈänëm mët yëˈëgyëjxmë yˈanklës, duˈun extëm tyuun jyäjtë mä Lot. (Käjpxë Diˈibʉ Jatanʉp 1:1 etsë 14:6, 7.)
Dios nan yajtuumbyë yˈanklës parë xyjotmëkmoˈoyëm ko nyajnäjxëmë amay jotmay, duˈun extëm tjotmëkmooyë Jesus. (Käjpxë Lukʉs 22:41-43.)
Tim tsojkë Jyobaa dyajtunäˈänyë yˈanklëstëjk parë dyajkutëgoyaˈanyë axëkjäˈäy diˈib yaˈˈayoobyë myëguˈuk. ¡Mëjwiin kajaa yˈawäˈätspëtsëmäˈänyë naxwinyëdë jäˈäy! (Käjpxë 2 Tesalónikʉ 1:6-8.)
3. ¿Pënatyë Mëjkuˈu yˈanklësˈäjtypy ets ti tyuundëp?
Duˈun extëm mayë naxwinyëdë kyaj të tmëmëdowdë Dios, nanduˈun mayë anklës kyaj ojts tmëmëdowdë Dios jam tsäjpotm (2 Peedrʉ 2:4). Tyäˈädë anklës diˈib kyaj myëdoodë, ja yajtijtë kaˈoybyëty. Ets yëˈë wyintsënˈäjttëbë Mëjkuˈu, Satanás, ets dyajtëgoytyë naxwinyëdë jäˈäy ets twinˈëëndë. (Käjpxë Diˈibʉ Jatanʉp 12:9.)
Mëjkuˈu yëˈë yajtuumbyë gobiernëtëjk, relijyonk diˈib kyaj tyëyˈäjtënëty etsë mëjatypyë negosyë diˈib mäˈät parë naxwinyëdë jäˈäy ttukmëjagamgeˈegyë Dios. Päätyë Satanás, yëˈë nyikëjxmˈäjtypy ko jäˈäy tkatundë tëyˈäjtën, ko axëëk nyaytyunëdë ets ko jyaˈˈatyë ayoˈon tsatsyjäjtën yä naxwiiny. (Käjpxë 1 Fwank 5:19.)
4. ¿Wiˈixë kaˈoybyëtëjk twinˈëënyë naxwinyëdë jäˈäy?
Satanás tyukmëbëjkypyë jäˈäy ko mbäät mëdë oˈkpë myaytyäˈäktë. Perë Biiblyë jyënaˈany ko oˈkpë kyaj mbäät ti ttundë (Eclesiastés 9:5). Pääty, parë kaˈoybyëtëjk twinˈëënyë jäˈäy, ta kyäjpxtë extëm ja jäˈäy diˈib të yˈoˈknë (Isaías 8:19). Nan yajtuundëbë brujëtëjk, xëwëj xëmaabyë, diˈib yajnikajtëbë mëtsäˈä ets oytyim diˈibëtyë tuˈun käjpxën. Biiblyë xyˈanmäˈäyëm ets njëjpkudijëmë duˈumbë tuˈunën ets nitii ngamëdäjtëm diˈibë kaˈoybyëtëjk jyaˈäjtypy. (Käjpxë Deuteronomio 18:10, 11 etsë Apostʉlʉty 19:19.)
Pën ntsojkëmë Dios, kyaj tiko ntsëˈkëmë kaˈoybyëtëjk. Ko nˈëxpëjkëmë yˈAyuk ets nmëmëdoˈojëm, ta nmëjagamgakëmë Mëjkuˈu ets nmëwingoˈonëmë Dios. Jyobaa niˈigyë kyumëjääjëty etsë kyaj dyuˈunëtyë kaˈoybyëtëjk ets mbäät xymyëjämoˈoyëm ko nyajnäjxëmë amay jotmay mët yëˈëgyëjxmë yˈanklës. (Käjpxë Salmo 34:7 etsë Santya̱ˈa̱gʉ 4:7, 8.)
Pën mˈaknijawëyaampy, ix mä kapitulo 10 mä tyäˈädë liibrë,¿Ti tëyˈäjtën jantsy tukniˈijxëbë Biiblyë?, diˈib yajpëtsëëmdëbë Jyobaa tyestiigëty.