Ja tim jawyiimbë iˈtsy

¿MNIJÄˈÄP ti tim jayëjpë Noˈee tyuun ko pyëtsëëmdë mä ja arkë? Yëˈë Dios tyukwintsëˈkë jëyujk animal ets tmooyë dioskujuyëm ko nety të yajtsoˈogëdë mä ja mëj ayoˈonduu. Extëm mbäät xyˈixy mä tyäˈädë dibujë abatkëˈëybyë.

Wiˈix mˈokwinmay, ¿ojtsëdaa Jyobaa tkupekyë tyäˈädë wintsëˈkënë? Ojts, ojts tkupeky. Ets päätyë Dios twandaky ko ninäˈä tkanekyyajminäˈänyë ayoˈonduu ets dyajkutëgoyëdë naxwinyëdë jäˈäy.

Ko waanë yˈijty ta tëgekyë ja nax nyitëtstutääjy, ta Noˈee mëdë yˈuˈunk yˈënäˈk dyajtsondaktë jatëgokë tsyënäˈäy jyukyˈäjtënë. Dios ojts kyunuˈxëdë ets yˈanmääyëdë: Päättë mayë mˈuˈunk mˈënäˈk axtë ko xyajtuktuktëdë Naxwinyëdë.

Per mbäädë nety ko waanë ja tiempë nyaxët ja jäˈäy tsyëˈëgëdët ko jatëgok myinëdë ayoˈonduu. Päätyë Dios tpëjtaky tuˈugë ijxwëˈëmënë diˈib tyukjamyatsëp ja jäˈäyëty ko ninäˈä tkanekyyajminäˈänyë ayoˈonduu. ¿Mnijäˈäp ti ijxwëˈëmënë pyëtak? Yëˈë tuˈugë iˈtsy.

Tyäˈädë iˈtsy ja kyëxeˈeky ko xëë pyëtsemy mä të tyuunäjxnë. Mbäät kyëxeˈeky jantsy kanäk koloor. ¿Të tëgokën xyˈokˈijxpë? ¿Mˈijxypy diˈib yam mä tyäˈädë dibujë?

Dios jyënany: Nwandakypyëts ko ninäˈä kyanekykyutëgoyëdë naxwinyëdë jäˈäy etsë jëyujk animal mëdë mëj ayoˈonduu. Tyamëts nbëjtaˈagyëtsë nˈiˈtsy yootsoty nimäˈäjoty. Ets ko pyëtsëmëdë tyäˈädë iˈtsy, tats nˈixäˈäny, ets njamyatsäˈänyëts diˈibëts të nwandaˈaky.

Pääty ko xyˈixët pyëtsemyë iˈtsy, ¿ti mbäät xyjamyetsy? Yëˈë mjamyatsëbë Diosë wyandakënë ko ninäˈä tkanekyyajkutëgoyaˈanyë naxwinyëdë jäˈäy mëdë mëj ayoˈonduu.