Ëxpëjkën 15

Nˈokpudëjkëmë nmëguˈukˈäjtëm ets tmëdunëdë Dios

¿Tiko mbäät xykyajxy xymyaytyaˈaky diˈib mˈëxpejkypy? (1)

¿Pënaty mbäät xytyuknijawë ja oybyë jembyë ää ayuk? (2)

¿Wiˈix mbäät tyuˈunxëtyë wiink jäˈäy ko tˈixët wiˈix mjukyˈaty? (2)

¿Näˈä mbäät mnejxy ëwäˈx käjxwäˈxpë mëdë jäˈäy diˈib mëët mnaymyukyëty? (3)

1. Mijts kajaa kujk xynyijawë oyˈäjtënë diˈib miimp mä Biiblyë. Tyäˈädë ëxpëjkënë mbäätxyëp mjapudëkëty etsë mjäˈäyˈäjtënë xyaˈoyët wanaty wanaty extëmë Dios ttsoky (Éfesʉ 4:22-24). Etsë tyäˈädë ëxpëjkënë jëjpˈam nandëˈën parë xypyäädëdë jukyˈäjtënë winë xëë winë tiempë (Fwank 17:3). Perë mëguˈuk nan tsojkëp tmëdowëdë tyäˈädë jembyë ää ayuk parë mbäät tsyoˈoky. Pääty niˈamukë pënaty jyantsy myëdunandëbë Dios tsojkëp tnigäjx tnimaytyäˈäktët. Dios yëˈë dëˈën nyiˈanaˈamëp (Romanʉs 10:10; 1 Korintʉ 9:16; 1 Timotee 4:16).

2. Mbäät ogäˈänë mwinˈixy xytyukmëmaytyaˈagyë diˈib kujk xynyijawë. Tukmëmaytyäˈägë mbajiiky mbamëguˈuk, mëtnaymyaayëbë, pënaty mëët mˈeskuelëˈattë o pënaty mëët mdundë. Mëtmaytyäˈäk mëdë oyjyaˈayˈäjtënë ets mëdë maˈxtujkën (2 Timotee 2:24, 25). Jamyats ko jäˈäy niˈigyë tˈixy ttuny wiˈix pën jyukyˈaty ets kyaj dyëˈënëty wiˈix pën kyajxy myaytyaˈaky. Pääty, ko oy mjukyˈatët mbäät tyuny etsë wiink jäˈäy tmëdooˈitëdë ää ayuk diˈib mdukmëmaytyakypy (Matewʉ 5:16; 1 Peedrʉ 3:1, 2, 16).

3. Ok ta net mijts myaˈixäˈäny pën mbäät mnëjxnë ëwäˈx käjxwäˈxpë mëdë Jyobaajë tyestiigëty diˈib mëët mnaymyukyëty. Jëjpˈam ets dëˈën xytyunët net mwinbatët mä Diosë kyäjpn (Matewʉ 24:14). ¡Wiˈixyëp ndim xondakëm koxyëp mbäät pën xyˈokpudëkë ets tmëdunëdë Jyobaa parë tpäädëdë jukyˈäjtënë winë xëë winë tiempë! (1 Tesalónikʉ 2:19, 20).