Abril

Tamë nety tuˈugë anklës diˈib jantsy oy naymyaayëp mëdë Jyobaa. Per tëgok, ta tˈatsojky etsë naxwinyëdë jäˈäy yëˈë yˈawdatëdët ets kyaj yëˈëjëtyë Jyobaa. Ets kom kyaj dyajjëgeky mä jyot wyinmäˈäny, ta pyokytyuuny (Sant. 1:14, 15). Nyibëdëˈkë Jyobaa ets “yëˈë yajtsondak ja andakën” (Fwank 8:44). Kyaj yajnijawë wiˈixë nety txëˈaty, per tyam ja yajtijy Satanás. Yëˈë diˈib niˈigyë myëtsipˈäjtypyë Jyobaa etsë naxwinyëdë jäˈäy. Biiblyë xytyuknijäˈäwëm nuˈunën yˈaxëkjäˈäyëty, extëm nˈokpëjtakëm ja ttijy Satanás, diˈib yˈandijpy “Mëtsip”. Pääty duˈun yajxëëwmooy mët ko kyaj ttseky etsë Jyobaa yˈanaˈamët ets mëk tmëtsipˈaty. w15 15/5 1:1, 2

Ko nˈëxpëjkëmë Biiblyë, ta nbëjkëmë kuentë mäjaty mbäät nnayaˈoˈoyëm parë niˈigyë oy nmëduˈunëmë Jyobaa. Per nan xytyuknijäˈäwëm ko Jyobaa myëdäjtypyë oybyë jäˈäyˈäjtën ets tijaty tyuumpy mët ko xytsyojkëm. Ko duˈun nnijäˈäwëm, ta niˈigyë ntsojkëmë Jyobaa ets ta nanduˈun niˈigyë xytsyojkëm. Duˈun niˈigyë kyëktëkë ja naymyayë. Parë nmëwingoˈonëmë Jyobaa, jëjpˈam ets nnijäˈäwëm tiko nˈëxpëjkëmë Biiblyë. Jesus ojts jyënaˈany ko tsojkëp yajxon nˈixyˈäjtëmë Jyobaa pën jukyˈatäˈänëm xëmëkyëjxm (Fwank 17:3). Mä Biiblyë mbäät tijaty njäjtëm. Per kyaj jeˈeyë nˈëxpëjkëm parë tijaty njatäˈänëm, diˈib jëjpˈam nnijawëyäˈänëm, yëˈë ko yajxon nˈixyˈatäˈänëmë Jyobaa (Éx. 33:13; Sal. 25:4). Pën nˈijxëmë Jyobaa extëm tuˈugë jaantsypyë mmëtnaymyaayëbë, ta kyaj tiko nmëmäˈäy nmëdäjëm ko Biiblyë tkanimaytyäˈägët tiko tijaty duˈun ttuuny. w15 15/4 3:6-8

Mä kanäägë paˈis, jantsy oy të wyimbëtsëmy extëmë mëjjäˈäytyëjk të ttukniˈˈixëdë wiinkpë wiˈix tijaty yajtuny mä tuˈukmujkën. Ets näämnëm të niganääk yaˈentrebistarattë. Ojts tyuˈugyë extëm niˈamukë jyënandë, oyë nety wiˈixëm yajpäättë. Diˈib xytyukˈijxëm ko mbäät xypyudëjkëm extëmë Biiblyë dyakyë käjpxwijën parë ndukniˈˈijxëmë wiinkpë mäjatyë tuˈukmujkën. Diˈib tim jawyiin mbäät ttundë mëjjäˈäytyëjk, yëˈë tpudëkëdët ja nmëguˈukˈäjtëm parë yajpäädët listë ets tijaty tjatäˈänët. ¿Tiko? Nˈokpëjtakëm tuˈugë ijxpajtën. Ko tuˈugë kamduumbë nyiˈibäˈäny, jawyiin ttäjˈyungë ja nax parë ja pyëjtaˈaky yonët jantsy oy. Nanduˈun jyaty ko mëjjäˈäytyëjk ttukniˈˈixëyaˈany tuˈugë nmëguˈukˈäjtëm wiˈix tijaty yajtuny, tsojkëp jawyiin tpudëkët parë yajpäädët listë ets tijaty tjatäˈänët. ¿Wiˈix mbäät tpudëkë? Ko tpanëjkxëdë yˈijxpajtën ja kugajpxy Samuel (1 Sam. 9:15-27; 10:1). w15 15/4 1:11, 12

May diˈibë naxwinyëdë jäˈäy yajjaˈäjtypy, kyutëjpyë Diosë yˈanaˈamën. Seguurë ko Satanás tsyejpy ets xytyuktëjkëmë axëëkpë tsojkën parë kyaj nmëmëdoˈowëmë Jyobaa. Yëˈë yˈëxtäˈäyaambyë winmäˈäny wiˈix mbäät niˈigyë ntsojkëm tijaty jaˈäjtp yä naxwiiny ets ninuuxëmë Diosë tyuunk (1 Fwank 2:15, 16). Duˈun jyäjttë näägë Dios mëduumbë diˈib jukyˈäjttë mä primer siiglë. Extëmë Demas diˈibë nety pyudëjkëbë Pablo, per ta nyikakë mët ko niˈigyë tˈatsojky tijaty jaˈäjtp yä naxwiiny (2 Tim. 4:10). ¿Tidën meerë Demas tsyojk? Biiblyë kyaj tnigajpxy. Waˈan yëˈë niˈigyë ttsejky ja meeny sentääbë ets kyaj dyuˈunëty ja Diosë tyuunk. Pën duˈun, yajtëgooy ja jyukyˈäjtën ets kyaj ojts ttukxondaˈaky extëm koxyëp tmëduunyë Jyobaa. Pes ninäˈä nety kyamoˈoyaˈanyëtyë jotkujkˈäjtën tijaty jaˈäjtp yä naxwiiny extëm diˈibë netyë Jyobaa awäˈänëp (Prov. 10:22). w15 15/5 2:10, 11

Ko Jesus jyukyˈajty yä Naxwiiny, jyaygyujkë wiˈix nyayjawëdë pënaty yajnaxtëbë ayoˈon jotmay, oyë netyë duˈumbë ayoˈon tkayajnaxy. Extëm nˈokpëjtakëm, nyijäˈäwëbë nety ko pënaty nyiwintsënˈäjttëp ja relijyonk, yaˈˈayoowdëp ja jäˈäy mët ko twinˈëëndë ets dyajnaxkëdäˈäktë anaˈamën diˈibë Dios kyaj të tpëjtaˈaky, ets mëk ja jäˈäy tsyëˈkëdë (Mat. 23:4; Mar. 7:1-5; Fwank 7:13). Jesus kyaj ttsëˈkë ja wintsëndëjk ets ni kyawinˈëˈënë. Per jyaygyujkë wiˈix ja jäˈäy nyayjawëdë ets mëk tpaˈˈayooy, duˈun tˈijxy “extëmë borreegë diˈibë kyajpë yˈijxˈijt kyuentˈäjtpë” (Mat. 9:36). Jesus nyiˈˈijxtutë Tyeetyë jyaˈayˈäjtën, naybyëjtakë extëm ja jäˈäy yajpääty, tsyojkë jäˈäy ets pyaˈˈayoow. ¿Tiko Jesus tpudëjkë jäˈäy diˈib pyattë ayoˈon jotmay? Mët ko ttsejky, ets yëˈë nyiˈˈijxtut wiˈixë Tyeety jyaˈayˈaty. Tëgok, kajaa nety ja yˈëxpëjkpëty të jyantsy tyuˈuyoˈoytyë mä ojts të kyäjpxwäˈkxtë. Kom të nety jyantsy yˈanuˈkxëdë, ta tˈëxtääytyë tuˈugë lugäär mä pyoˈkxtët. Perë Jesus ta tpëjkyë kuentë ko nimayë jäˈäy yˈëxtäˈäyëty, ta tˈijxy ko yajpudëkëyandëp. Ets “ta tyëjkë yaˈëxpëjkpë” ets ttukniˈˈijxë tijaty (Mar. 6:30, 31, 34). w15 15/5 4:3, 4

Diosë kyaˈaxkopkˈuˈunk yajxon dyajnigëxëˈëgyë Jyobaa wyijyˈäjtën ets yajpaty Tyeety pyëˈääy extëm “diˈib nyiwintsënˈäjtypyë tuunk”. Okwinmay wiˈixë Jesus jantsy jotkujk nyayjäˈäwë ko tˈijxy wiˈixë Tyeety ojts dyajkojˈyë tsäjp etsë Naxwinyëdë. Per diˈib niˈigyë tsyojk mä tukëˈëyë diˈibë Tyeety yajkoj, “yëˈë naxwinyëdë jäˈäy” (Prov. 8:22-31). Ok, ko Jesus myiiny yä Naxwiiny, ta dyaˈijxë ko mëk ttsekyë Tyeety ets niˈamukë naxwinyëdë jäˈäy. Ta tkëyajkyë jyukyˈäjtën parë ojts xyaˈˈawäˈätspëtsëˈëmëm mä poky ets mä oˈkën (Mat. 20:28; Filip. 2:5-8). w15 15/6 2:1, 2

¿Mmëjjäˈäwëp ti Jyobaa të mdukmëdunyëty? Pën duˈun, tukëdëkë mjukyˈäjtën ets mnëbatët. Ko mnaywyandäˈägëdët mä Jyobaa, yëˈë yˈandijpy ko xëmë xytyunäˈäny ti yëˈë tsyejpy. Ets kyaj tiko mtsëˈëgët ko duˈun xytyukwandäˈägët, pesë Jyobaa yëˈë mdukmëtsojkëp diˈib oy, ets të twandaˈaky ko kyunuˈkxaampy pënaty mëmëdoowëp (Eb. 11:6). ¡Niˈigyë yˈoyëyaˈanyë mjukyˈäjtën ko mnaywyandäˈägëdët mä Jyobaa ets ko mnëbatët! Extëm të njënäˈänëm, Jyobaa yëˈë mdukmëtsojkëbë oyˈäjtën. Perë Satanás kyaj tkuentëty oy wiˈix mjat mgëbatët mët ko jeˈeyë twinmay diˈib këˈëm tyukˈoyˈatëp. ¿Wiˈix mbäät mmoˈoyëtyë oyˈäjtënë pën nitii oyˈäjtënë tkaˈˈawanë? w16.03 2:16, 18, 19

Pën jantsy nnaymyayäˈänëm mëdë Jyobaa, tsojkëp nˈijtëm seguurë ko myëdoowˈijtypyë nuˈkxtakën. Mä netyë Jesus kyaminyëm yä Naxwiiny, ojts tˈixy wiˈixë Jyobaa tˈatsoowëmbity ko naxwinyëdë jäˈäy myënuˈkxtaˈagyëty. Ets ko myiiny yä Naxwiiny, ojts tmënuˈkxtaˈagyë Dios ets ttukmëtmaytyaky ti wyinmaapy ets wiˈix nyayjawëty. Tëgok, tuk tsuˈum nyuˈkxtaky (Luk. 6:12; 22:40-46). Nan ojts ttukniˈˈixë ja yˈëxpëjkpëty wiˈix nyuˈkxtäˈäktët. ¿Ojtsxyëp duˈun ttunyë Jesus pënë Jyobaa kyaj tmëdoowˈityë nuˈkxtakën? Kyajxyëp. Yëˈë nyijäˈäwëbë nety ko Dios myëdoowˈijtypyë nuˈkxtakën. Ets ëtsäjtëm, nan ijtëm seguurë ko Jyobaa myëdoowˈijtypy ko nmënuˈkxtakëm (Sal. 65:2). w15 15/4 3:11, 13

Ko mnuˈkxtäˈägët yëˈë duˈun parë ja mˈuˈunk mˈënäˈk tmëbëktëdë Jyobaa extëm mijts xymyëbëky, kyaj jeˈeyë parë tijaty xytyukniˈˈixët. ¿Wiˈix? Ko kyaj jeˈeyë xynyinuˈkxtäägëdët, nanduˈun mijts mnaynyinuˈkxtäägëdët. Ana, tuˈugë nmëguˈukˈäjtëm diˈib Brasil, tnimaytyaˈaky ko xëmë ijtyë tyääk tyeety tˈamdowdë Diosë naybyudëkë ko tmëdattë amay jotmay. Extëm ko ja nyanwelë tyatwelë pyäˈämbajttë, ojtsë Jyobaa tˈamdowdë jot mëjääw etsë wijyˈäjtënë wiˈix tijaty ttundët. Ets xëmë ojts dyajwëˈëmdë ja yˈamay jyotmay Dios kyëˈëjoty, axtë diˈib mëjwiin kajaa. Tyäˈädë yëˈë Ana pudëjkë parë nanduˈun tmëbëkëdë Jyobaa. Mijts nan mbäät duˈun xytyuny ko mnuˈkxtäˈägët mëdë mˈuˈunk mˈënäˈk. Extëm nˈokpëjtakëm, amdowë Jyobaa jotmëkˈäjtën parë xytyukmëtmaytyäˈägëdë Diosë yˈayuk tuˈugë mëdëjkpäˈä, o parë mwintsën xyˈamdowëdë permisë ko mnëjkxäˈänët asamblee. Ko ja mˈuˈunk mˈënäˈk tmëdowdët wiˈix mijts xymyëbëkyë Jyobaa, ta nanduˈun nëjkx tmëbëktë. w15 15/11 1:7, 8

¿Wiˈix mbäät niˈigyë xyajkëktëkë mtsojkënë mä Jyobaa? Tuk pëky, yëˈë ko xypyawinmayët ko Jesus ojts xyjyuuybyëtsëˈëmëm (2 Kor. 5:14, 15; 1 Fwank 4:9, 19). Pën mjuˈtypyë tiempë parë xypyawinmay nuˈunën myëjwiin kyajaajëty diˈibë Jyobaa të xytyukmëduˈunëm, ta niˈigyë xymyëjjawëyaˈany ets xyajjëmbitäˈänët. Okpawinmay ko tap mnëëjiˈkxy ets ta tuˈugë jäˈäy mjuutyëty. ¿Ti mdunëp? ¿Nidëyë mnëjkxët mä mdëjk nayjyaandëgäjtsëbë ets ni jeˈeyë xykyamoˈoyëdë dyoskujuyëm? Kyaj, seguurë ko winë xëëw tyäˈädë jäˈäy xykyukäjpxët. Perë Jyobaa mëdë Jesus mas niˈigyë diˈib të ttundë, ojts xyaˈˈawäˈätspëtsëˈëmëm mët ko mëk xytsyojkëm ets të xyajnitsokëm. Duˈuntsoo mbäät nˈawijx njëjpˈijxëm ja jukyˈäjtënë winë xëëbë diˈib itäämp yä Naxwiiny. ¿Këdii mëjwiin kajaa mbäät nmëjjäˈäwëm? w16.03 2:16, 17

Jesus kanäk miyonk jëmëjt yˈijty jam tsäjpotm mëdë Tyeety ets xëmë tmëmëdooy, päätyë Jyobaa yˈijty seguurë ko nan mëmëdowanëp ko yajpäädët yä Naxwiiny. Jesus mëk jyantsy yˈayooy, per ninäˈä tkamastutyë Dios axtë yˈoˈky, ets nyitsiptuun ja madakën diˈibë Tyeety myëdäjtypy parë yˈanaˈamët. ¿Wiˈix niˈamukë naxwinyëdë jäˈäy ttukˈoyˈaty ko Jesus ojts xykyuˈoˈkëm? Ko mbäät jyukyˈattë winë xëëw mä ja lugäärë tsujpë. Apostëlë Juan nanduˈun tkujäˈäyë: “Dios xytyukˈijxëm ja tsyojkën ëtsäjtëm ko tkejxy ja tyuˈukˈUˈunk yä naxwiiny es nmëdäjtëm ja njikyˈäjtënˈäjtëm mët yëˈëgyëjxmë yˈUˈunk. Kyaj yˈëtsäjtëmëty jawyiin ntsojkëm ja Dios, jawyiinˈäjtp yëˈë oj xytsyojkëm es xytyukˈijxëm mët ko xytyuknigajxëm ja yˈUˈunk es xyajpojpënitëgoˈoyëm” (1 Fwank 4:9, 10). w15 15/11 3:13, 14

Niˈamukë të xynyinäjxëm ja poky ets ja oˈkën diˈibë Adán ojts xytyukmëwëˈëmëm, pääty nipën mbäät kyajënäˈäny: “Kyajts nyajtëgoyˈatyë Jesus xykyuˈoogët”. Pes axtë mas oybyë Dios mëduumbë dyajtëgoyˈaty yajjuuybyëtsëmët. Niduˈuk niduˈuk mëjwiin kajaa nmënuˈkxyˈäjtëmë Jyobaa, per yëˈë të xynyimaˈkxëm. Pääty, ¿tixyëbë net mbäät nduˈunëm pën të nmëguˈukˈäjtëm axëëk xyajnayjäˈäwëm? Nbanëjkxëmë yˈijxpajtënë Jyobaa diˈib listë ijtp parë xypyokymyaˈkxäˈänëm (Sal. 86:5; Neh. 9:17). Pën nmëjjäˈäwëm ko Jyobaa xypyokymyaˈkxëm, ta nbokymyaˈkxëm amumduˈukjot ja nmëguˈukˈäjtëm. Pes kyaj mbäädë Jyobaa xytsyojkëm ets xypyokymyaˈkxëm, pën kyaj nbokymyaˈkxëm ja nmëguˈukˈäjtëm (Mat. 6:14, 15). Ko nbokymyaˈkxëm ja nmëguˈukˈäjtëm, kyaj mbäät dyajtëgatsy diˈib të tyuny të jyatyëty, per mbäät xypyudëjkëm parë njukyˈäjtëm agujk jotkujk. w16.01 2:5, 15-17

Jesus tsyejpyë nety ets ja Pedro mëdë myëguˈuktëjk twinmaytyët tijaty oyˈäjtën tyunandëp mä tiempë myiny kyëdaˈaky. Yëˈëjëty mbäädë nety tpawinmaytyë ko tsäjpotm yˈanaˈamäˈändë mëdë Jesukristë ets tpudëkëyäˈändë ja naxwinyëdë jäˈäy parë jyëmbittët wäˈätsjäˈäy. Pënaty tëëyëp myëduundë Jyobaa xëmë tpawinmääytyë wiˈixë Dios tkuytyunäˈänyë wyandakën, extëmë Abel, pyawinmääy ti netyë Jyobaa të twandaˈaky ets kom myëbëjk, ta jantsy oy mëët yˈijty. Abrahán pyawinmääy wiˈix yˈixˈatäˈäny ko yˈadëwët diˈibë Jyobaa tukwandakë mä ja “tyëëm yˈääts” (Gén. 3:15). Ko duˈun tpawinmääy, yëˈë pudëjkë parë tmëmëdooyë Jyobaa oy tpatyë amay jotmay. Etsë Moisés nan ojts tpawinmay ja kumäˈäyën diˈibë Jyobaa tukwandakë, diˈib pudëjkë parë niˈigyë ttsokëdë Jyobaa ets kyaj tmastuˈudët (Eb. 11:26). Pën ëtsäjtëm nbawinmäˈäyëm wiˈix yˈixˈatäˈäny ja jukyˈäjtën diˈibë Jyobaa xytyukwandakëm, ta ntsokäˈänëmë Jyobaa ets kyëktëkëyaˈany ja mëbëjkën. w15 15/5 3:17, 18

Pën jäˈtäˈänëm extëm Dios mëduumbë diˈib të myëjay, tsojkëp niˈˈijxtutëmë Jesusë yˈijxpajtën. Kyaj jeˈeyë ndukjotkujkˈäjtëm diˈib wingëjxy të nnijäˈäwëm mä Diosë yˈAyuk. Tsojkëp këkpäät nˈëxpëjkëmë Biiblyë, jaˈko nnijäˈäwëm ko ja “jeˈxyë tëˈëtspë yëˈë parë jäˈäy diˈib të yaˈknëdë” o të myëjawdë (Heb. 5:14, TNM). Tsojkëp yajxon nnijäˈäwëm tijatyë Biiblyë myaytyakypy (Éfes. 4:13). Parë duˈun nduˈunëm, tsojkëp nyaˈoˈoyëm tuˈugë programë näˈäjaty nˈëxpëkäˈänëm, extëm ko bom bom ngäjpxëmë Biiblyë, nˈëxpëjkëm naytyuˈuk ets mëdë familyë sëmään sëmään. Ko nˈëxpëjkëmë Biiblyë, nˈokˈëxtäˈäyëm tuˈuk majtskë tekstë diˈib mbäät xypyudëjkëm parë njaygyujkëm wiˈixë Jyobaa wyinmay ets wiˈix nyayjawëty. Ta net nyajtuˈunëmë tyäˈädë tekstë parë xytyuˈumoˈoyëm mä tijaty ndunäˈänëm. Pën nduˈunëm duˈun, ta niˈigyë kyëktëkëyaˈany ja naymyayë mëdë Jyobaa. w15 15/9 1:5, 9, 10

Jesus yajxon tnijawë wiˈix yajpäätyë Naxwinyëdë, ets nan nyijäˈäwëp wiˈix tjëjpkudijët tijaty ayoˈonbëjtakp, extëmë mëk poj tuu etsë mejny. Ko Jesus yˈijty yä Naxwiiny yaˈijxë mët yëˈëgyëjxmë Diosë myëjääw ko mbäät tmëmadaˈaky tijaty ayoˈonbëjtakp. Okwinmay ti tëgok tuun jäjtë: ja mejny jyantsy myëjjaˈtspety mä ja barkë ets tëgok tëgok myëjjaˈtspety, ta tyëkë ja nëë. Mëk jyantsy yˈamuˈuy ja poj ets ja barkë jyantsy yuˈkxy xitsoo yatsoo. Ja Jesus jantsy määbë nety mët ko të yˈanuˈkxë. Per ja yˈëxpëjkpëty ta yujxëdë mët ko jyantsy tsyëˈkëdë ets wyinmääytyë ko ooktëbë net, ets yˈanmääyëdë: “¡Tyap ngupaˈtsënë!” (Mat. 8:25). ¿Ti net ja Jesus tyuun? Ta pyëdëˈky ets ojts tmëgajpxy ja poj ets ja mejny: “¡Amonyë! ¡Tëmijtkë!” (Mar. 4:39). Ta ja poj ojts “wyëˈëmëtyaˈay amonyë es tëmijtkë”. Tyäˈädë yëˈë xytyukˈijxëm ko Jesus mbäät tmëmadaˈaky tijaty ayoˈonbëjtakp. w15 15/6 1:12-14

Ko Jesus tyukniˈˈijxë padrenuestro, ta net tpëjtaky tuˈugë ijxpajtën diˈib xypyudëjkëm parë kyaj nëgoo nmëmäˈäy nmëdäjëm ti nijukyˈäjtëm. Yëˈë myaytyak ja pëjy ujts diˈib kamoty, diˈib kyaj ti tmëmay tmëdäjtë mët ko Jyobaa yëˈë kuentˈäjtëdëp. Nanduˈun ëtsäjtëm, kyaj mbäät nmëmäˈäy nmëdäjtëm diˈib nyajtëgoyˈatäˈänëm mä tiempë myiny kyëdaˈaky (Mat. 6:30-34). Mët yëˈëyë mbäät njotkujkˈäjtëm ko nmëdäjtëm diˈib tyam nyajtunäˈänëm. Extëm nˈokpëjtakëm, mbäät nˈamdoˈowëmë Dios tuˈugë lugäär mä ntsënäˈäyëm, tuˈugë tuunk mä nyajpëtsëˈëmëmë käˈäy ukën ets nˈamdoˈowëmë naybyudëkë wiˈix mbäät tijaty nduˈunëm ko nyajpatëm yuumëët päˈämmëët. Per ta tuk pëky diˈib jëjpˈam ninuˈkxtakëm. Jesus jyënany: “Kyaj jyatyimˈyëˈëyëtyë tsäjkaaky mëët jyikyˈaty ja jäˈäy, tyukjikyˈatëp mët tëgekyë Diosë yˈayuk” (Mat. 4:4). Pääty jëjpˈam ets nˈamdoˈowëmë Jyobaa parë xymyoˈoyëm ja ëxpëjkën diˈib nyajtëgoyˈäjtëm ets mëët oy nˈijtëm. w15 15/6 5:4, 7, 8

¿Nˈanmäˈäyëmë Jyobaa ets xypyudëjkëm parë kyaj ngäˈäjëm mä axëëkpë ijt tsënaaky, ets niˈigyë ko xytyukmiˈinëmë duˈumbë tsojkën? Mä nety ngaˈixyˈäjtëmë Jyobaa, waˈan ijty nduˈunëmë axëkˈäjtën ets mbäät jatëgok xytyuktëjkëmë duˈumbë tsojkën. Perë Jyobaa mbäät xypyudëjkëm ets nnayajtëgäjtsëm. Extëm ja rey David, ko nety të pyokytyuny mëdë Batseba, ta jyodëmbijty ets tˈamdooyë Jyobaa parë myoˈoyëdët “tuˈugë korasoonë wäˈätspë” ets pyudëkëdët parë tmëmëdowët (Sal. 51:10, 12). Pën duˈunyëm mëk mduktëkëty ja tsojkën mä axëëkpë ijt tsënaaky, amdowë Jyobaa nyaybyudëkë. Yëˈë mbudëkëyanëp parë xymyëmëdowët, ets xyjëjpwijtsëmbitët ja mjot mwinmäˈäny ets tijaty mduumpy (Sal. 119:133). w15 15/6 3:5, 6

Ta nimayë nmëguˈukˈäjtëm diˈib jeky kujk ttukˈitëdë Diosë kyäjpn, jyamyajtsëp ko ijty mä tuˈuk tuˈugë tuˈukmujkën tap tuˈuk diˈib yajtijp siervo de congregación, ets mä tuˈuk tuˈugë sukursal, tuˈuk diˈib yajtijp siervo de sucursal ets mä kyopkë Jyobaa tyestiigëty, tuˈuk diˈib yajtijp presidente de la Sociedad Watch Tower. Oyë nety tjamëdattë pyudëjkëbë, naytyuˈuk ijty ttukniwitsëdë wiˈix tijaty yajtunäˈäny mä ja tuˈukmujkën, mä ja sukursal ets mä kyopkë Jyobaa tyestiigëty, per ta tyëgäjtsy ko nyajxyë jëmëjt 1970. Desde jaa, tuk grupë mëjjäˈäytyëjk ttukniwitsë tijaty yajtunäämp ets kyaj nyekynyaytyuˈugëty. Extëm tyam, mä tuˈuk tuˈugë tuˈukmujkën tap tuk grupë mëjjäˈäytyëjk, mä tuˈuk tuˈugë sukursal tamë Komitee, etsë Diosë kyäjpn yëˈë tuˈumooyëdëp Diˈib wyooyoˈoytyëbë Jyobaa tyestiigëty. Diosë kyäjpn tyukˈoyˈajtypy ko duˈun tijaty të yajwijtsˈoyë, ets duˈun yajtuny mët ko niˈigyë yajxon yajjaygyukë Biiblyë. Tyukˈoyˈajtypyë Diosë kyäjpn ko kyaj nyekynyaytyuˈugëtyë jäˈäy diˈib tyukniwijtsëp wiˈix tijaty yajtunäˈäny. Niˈamukë mëjjäˈäytyëjk diˈibë Jyobaa të xynyamoˈoyëm, mbäät tpudëkëdë Diosë kyäjpn mët ja oybyë jäˈäyˈäjtën diˈib myëdäjttëp (Efes. 4:8, TNM). w15 15/7 1:14, 15

Tyam kyaj mayë jäˈäy tuˈugyë nyayaˈitëdë mët ko wyinmaytyë ko niˈigyë yˈoyëty ja pyaˈis, wiˈix yˈixˈattë o ja kostumbrë diˈib myëdäjttëp. Per ëtsäjtëm Jyobaa tyestiigëty abëky nnayaˈijtëm ets kyaj 0nduktëjkëm tijatyë naxwinyëdë jäˈäy yajnaywyäˈkxëdëp. ¿Tiko? Yëˈko ntsojkëmë Jyobaa ets nmëmëdowäˈänëm (1 Fwank 5:3). Oy mä ntsoˈonëm o të nyaˈk të nbajtëm, nmëmëdoˈowëm ja yˈanaˈamën. Diˈib niˈigyë jëjpˈam parë ëtsäjtëm, yëˈë ko nbuwäˈkëmë Jyobaa etsë gyobiernë (Mat. 6:33). Pääty mbäät njënäˈänëm ko kyaj nyajpajtëm “mëdë naxwinyëdë jäˈäy” (Juan 17:11, 15, 16, TNM; Is. 2:4). Mayë jäˈäy wyinmaytyë ko niˈigyë yˈoyëty ja yˈit lyugäär o ja kyostumbrë. Nan ta diˈib winmääytyëp ko niˈigyë oy yˈëyëˈëk kyuyattë ja ekipë diˈib pyuwäˈkëdëp. Ko duˈun wyinmaytyë, ta net ttundë kompetensyë, nyayˈaxëkˈixëdë ets axtë dyaˈooktë pënaty kyaj wyinmaytyë extëm yëˈëjëty. w15 15/7 3:1, 2

Jyobaa yëˈë tuˈugë Dios diˈib wäˈäts, ets kyaj tˈoyˈixy ko tijaty yˈity ety käjy. Pääty jëjpˈam ets ja tëjk mä nˈëxpëjkëm nyaˈijtëm wäˈäts ets tsuj yajxon (1 Kor. 14:33, 40). Parë nnayaˈijtëm wäˈäts extëmë Jyobaa, tsojkëp nmëdäjtëmë jot winmäˈäny wäˈäts, njukyˈäjtëm wäˈäts ets nmëduˈunëm wäˈäts. Per nan tsojkëp nyaˈijtëm wäˈäts ja niniˈkx këbäjk (Diˈibʉ Jat. 19:8). Pën wäˈäts nyaˈijtëm ja tëjk mä nˈëxpëjkëm, ta kyaj ntsoytyuˈunëm parë nwoˈowëm ja jäˈäy. Nëjkxëp tpëktë kuentë ko ëtsäjtëm jantsy jukyˈatäˈänëm mä ja jembyë jukyˈäjtën mä kyaj nyekyjamˈatäˈänyë axëkˈäjtën. Nan yˈixandëp ko yëˈë nˈawdäjtëm tuˈugë Diosë wäˈätspë diˈib yajjëmbitaambyë Naxwinyëdë extëm tuˈugë lugäärë tsujpë (Is. 6:1-3; Diˈibʉ Jat. 11:18). Oy mä ntsënäˈäyëm ets oy wiˈixëmë jäˈäy tˈixët ja wäˈätsˈäjtën, tsojkëp wäˈäts ets tsuj yajxon nyaˈijtëm ja tëjk mä nˈëxpëjkëm. ¿Tiko? Yëˈko jap nˈawdäjtëmë Jyobaa (Deut. 23:14). w15 15/7 4:13-15

Ko ja Dios mëduumbë tjaygyujkëdë ko Jesus tyëjkë anaˈambë 1914, ta tpëjktë kuentë ko mbäädë nety myiny ajotkumonë ja kutëgoˈoyën. Pääty tpëjtaktë jëjpˈam tkäjpxwäˈkxtët ja oybyë ayuk ets duˈun ojts nyayjëjpˈixëdë. Mä Markʉs kapitulo 13 japë Jesus ojts tnigajpxy ko mbäät ja wintsën jyeky ets kyaj jyäˈtët mä yˈawixëdë ja tyuumbëtëjk. Per oyë nety tkanijawëdë näˈä jyäˈtäˈäny, tsojkëbë nety nyayaˈitëdët wijy. Tyäˈädë yëˈë xytyukˈijxëm ko pën jeky kujk nˈawijxëm, kyaj yëˈë tˈandijy ko jajkp ja kutëgoˈoyën o ko tëdën ngaˈijxëm. Tsojkëp duˈunyëm nnayaˈijtëm wijy. Ko nety nyajpatëm mä ja jembyë jukyˈäjtën, të nety nˈijxëm wiˈix të yˈadëëdäˈäy tijatyë Jyobaa nyaskäjpxë mä tiempë diˈib jëjpkëxanëp. Ta niˈigyë ja mëbëjkënë kyëktëkëyaˈany mä Jyobaa ets nˈitäˈänëm seguurë ko ak adëwäämp tijaty të twandaˈaky (Jos. 23:14). Mëjwiin kajaa nëjkx ngukäjpxëm mä Jyobaa ko të dyajminy ja kutëgoˈoyën mä meerë ttiempëty, ets mët ko të xytyukˈanaˈamëm nnayjëjpˈijxëm parë kyaj nnaygyumanäjxëm (Apos. 1:7; 1 Peed. 4:7). w15 15/8 2:10, 11, 14

Mayë jäˈäy yëˈë tyam tyukxondaktëp diˈibë Jyobaa yˈaxëkˈijxypy, tˈixtë mä jäˈäy nyaytsyiik nyaygyoxëdë, mä axëëk yˈit tsyëënëdë ets mä ttundë brujëˈäjtk. Mä telebisionk, sinë, liibrë, rebistë ets mä Internet, duˈunë tyäˈädë dyajnaxtë extëmxyëp kyaj yˈaxëëgëty. Ets mä näägë paˈis të lyey dyajtëgatstë parë tyam tkupëktë diˈib ijtyë jäˈäy axëëk yˈijxtëp. Perë Jyobaa kyaj dyajtëgatsyë yˈanaˈamën, yëˈë duˈunyëm axëëk tˈixy diˈib kyaj yˈoyëty (Rom. 1:28-32). Ja tiempë mä jyukyˈäjttë pënaty tim jawyiin pyanëjkxtë Jesus, nan yëˈë nety mayë jäˈäy tyukxondaktëp mä jäˈäy nyaytsyiik nyaygyoxëdë ets mä axëëk yˈit tsyëënëdë. Per ja Jesusë yˈëxpëjkpëty kyaj duˈun jyukyˈäjttë, mët ko yëˈë myëmëdoowdë ja Diosë yˈanaˈamën. Pääty mayë jäˈäy tëgatsy yˈijxëdë, nyëxik tyukxikëdë ets axtë pyajëdijtëdë (1 Peed. 4:4). w15 15/8 4:2, 3

Dios mëduumbë diˈib të myëjawdë tyuundëbë mëjääw parë dyajjapˈattë tuˈugyëˈäjtën mä nduˈukmujkëm (Éfes. 4:1-6, 15). Niˈamukë mbäät nduˈunëmë mëjääw ets tuˈugyë nyajpatëm mëdë nmëguˈukˈäjtëm. Parë duˈun nyajpatëm, tsojkëp njäˈäyˈäjtëm yuunk naxypy. Extëm ko tuˈugë nmëguˈukˈäjtëm tyëgoyët o xywyingäjpxpajtëm, ¿ti nduˈunëm? ¿Kyaj nˈokmëgäjpxënë? ¿O nduˈunëmë mëjääw parë mëët nnayaˈoˈoyëm? Tuˈugë Dios mëduumbë diˈib të myëjay, tyuumbyë mëjääw parë dyaˈoyët ja jotmay en lugäär niˈigyë dyajmëjwindëkët. ¿Këdii oyxyëp ko niˈamukë nbanëjkxëmë tyäˈädë nmëguˈukˈäjtëmë yˈijxpajtën? w15 15/9 1:12, 13

Jesus seguurë yˈijty ko Biiblyë jam tsyoonyë mä Dios ets ko xymyoˈoyëmë oybyë ëwij käjpxwijën. Pën nbanëjkxäˈänëmë Jesusë yˈijxpajtën tsojkëp ngäjpxëmë Biiblyë bom bom, nˈëxpëjkëm ets nmëmäˈäy nmëdäjëm tijaty të ngäjpxëm. Nan tsojkëp yajxon nbayoˈoyëm wiˈix yaˈˈatsoowëmbity diˈib kyaj oy njaygyujkëm. Extëm nˈokpëjtakëm, ¿mˈijtp seguurë ko tyam yëˈë ndukjukyˈäjtëm ja tiempë diˈib jëjpkëxanëp? Pën kyaj, niˈëxpëkë mä Biiblyë wiˈix ojts yajnaskäjpxë tijaty tunan jatanëp mä tyäˈädë tiempë. Ko duˈun xytyunët, yëˈë mbudëkëyanëp parë ja mëbëjkën mëk yˈitët. ¿Mˈijtp seguurë ko Jyobaa kyuytyunaampy tukëˈëyë diˈib të twandaˈaky? Pën kyaj, niˈëxpëkë tijaty të yˈadëy diˈib ojts yajnaskäjpxë mä Biiblyë parë ja mëbëjkën kyëktëkët. ¿Mjantsy myëbëjkypy ko Biiblyë kyäjpxwijën mbäät xypyudëjkëm? Pën kyaj, käjpx mä wiˈix yajnimaytyäˈäktë nmëguˈukˈäjtëm diˈib të dyajtëgatstë jyukyˈäjtën ko të tpanëjkxtë Biiblyë kyäjpxwijën (1 Tes. 2:13). Mbäät nbanëjkxëmë Jesus yˈijxpajtën ko nwinmäˈäyëm tijatyë Jyobaa të xytyukwandakëm. Nˈokmëmäˈäy nˈokmëdäjëm wiˈix yˈixˈatäˈäny ja jembyë jukyˈäjtën mä ja lugäärë tsujpë (Eb. 12:2). w15 15/9 3:16, 17

¿Wiˈix mbäädë Jyobaa ndukˈijxëm ko ntsojkëm? Tuk pëky, ko nnayäjkëmë meeny sentääbë parë nbudëjkëmë nmëguˈukˈäjtëm diˈib mëët nduˈukmujkëm ets nanduˈun diˈib yajpattëp abëtsemy nyaxwinyëdë. Kyaj niˈamukë nmëdäjtëm tijaty mëjwiin kajaa, per mbäät niˈamukë nˈyäjkëm diˈib nmëdäjtëm parë ndukˈijxëmë Jyobaa ko ntsojkëm (2 Kor. 8:12). Per min nˈakˈijxëm wixaty mbäät nyajnigëxëˈkëm ko ntsojkëmë Jyobaa. ¿Mjamyejtsypy wiˈixë Jesus tˈanmääy ja yˈëxpëjkpëty? Tˈanmääy ets jawyiin tˈëxtäˈäytyët ja Diosë Kyutujkën ets kyaj tmëmay tmëdäjtët ja kyaˈay yˈukën ets ja wyit xyox mët ko nDeetyˈäjtëmë Jyobaa yëˈë moˈoyanëdëp tukëˈëyë tijaty yajtëgoyˈäjttëp (Mat. 6:31-33). Tuk pëky wiˈix mbäädë Jyobaa ndukˈijxëm ko ntsojkëm, yëˈë ko nmëbëjkëm extëm twandaˈaky. Pes ko ntsojkëm tuˈugë jäˈäy, nmëbëjkëm extëm xyˈanmäˈäyëm. Mientrës mas nmëbëjkëmë Jyobaa, ta mas niˈigyë ntsojkëm (Sal. 143:8). Pääty, oyxyëp ko nnayajtëˈëwëm: “¿Ndukˈijxypyëtsë Jyobaa ko ntsejpyëts mä wiˈixëts nyajtunyë nxëëw ndiempë etsëtsë njot nmëjääw? ¿Nyajnigëxëˈkypyëts tuˈuk tuˈugë xëëw ko nmëbëjkypyëts ko xymyoˈoyäämbëts tijatyëts nyajtëgoyˈajtypy?”. w15 15/9 5:7, 8

Të näˈä mnayajtëyëty: “¿Waˈantsëdaa Jyobaa xyajtsoˈogët ko myinët ja mëk ayoˈon?”. Tsojkëp nduˈunëmë mëjääw parë mëk nyaˈijtëm ja mëbëjkën. Apostëlë Pedro jyënany ko jëjpˈam ets nmëdäjtëm ja mëbëjkën “diˈibë myëmadakypy ko yaˈijxmatsy” (1 Peed. 1:7). Kom tim tsojk tsyondäˈägäˈäny ja mëk ayoˈon, jëjpˈam ets nmëdäjtëm mëk ja mëbëjkën diˈib mbäät xyajnitsokëm (Eb. 10:39). Pääty nduˈunëmë mëjääw parë niˈigyë nyajkëktëjkëm, netë Jesus nëjkx xyajnitsokëm ko dyajkutëgoyëdë axëkjäˈäy. Tsojkëp nˈanmäˈäyëmë Jyobaa extëm tuˈugë yetyëjk tˈanmääyë Jesus: “¡Pudëjkëgëts esëts nˈakmëbëkët niˈigyë!” (Mar. 9:24). O nan mbäät nˈanmäˈäyëmë Dios extëm ja apostëlëtëjk tˈanmääytyë Jesus: “Tukmëbëjkëts waanë niˈigyë” (Luk. 17:5). w15 15/10 2:1, 2

Pablo ojts xymyoˈoyëm tuˈugë oybyë ijxpajtën. Yëˈë mbäätxyëp tniwintsënˈäjty tuˈugë relijyonk, yˈijty mëkjäˈäy ets mëjë jäˈäy yaˈitëdët. Per kyaj jamë wyinmäˈäny tpëjtaky, jam tpëjtaky mä “diˈib mas jëjpˈam” (Filip. 1:10, TNM). Jamë xyëëw tiempë dyajtuuny mä yˈëwaˈkxy kyäjpxwaˈkxy ets ojts nyijkxy mä kanäägë lugäär extëm Siria, Asia Menor, Macedonia ets Judea. Pablo jyënany: “Nˈokjäˈäytyëgoyëts diˈibë të nyäjxnë, esë nmëjää nyajtuny mabäädëts nmadaˈaky es nmëmadäˈägëdët diˈibë miimpnëm. Dëˈënëts ëj extëmë jäˈäy diˈibë mëk pëyëˈkp es jawyiin jyäˈtäˈäny mä kyugëxë ja pëyëˈkn” (Filip. 3:8, 13, 14). Ets kom naytyuˈukˈäjtpë netyë Pablo, mas awäˈätstum yajpaty parë tmëdunëdë Dios ets kyaj ti yˈatsipëdët (1 Kor. 7:32-35). Duˈun extëmë Pablo, nan taaˈäjtp tyamë Dios mëduumbëty diˈibë wyinmäˈäny të tpëjtäˈäktë ko kyaj pyëkäˈändë parë niˈigyë tmëdunäˈändë Jyobaa (Mat. 19:11, 12). Pënaty naytyuˈukˈäjttëp kyaj nëgoo tnikëjxmˈattë tuunk mä fyamilyë extëm tuˈugë kasäädë. Per oy naytyuˈuk nyajpatëm o kasäädë, niˈamukë mbäät nˈijxëm ets kyaj tii xyajtuˈuˈadujkëm mä nmëduˈunëmë Jyobaa. Extëm nääk, waˈan tyëgoyˈäjtxëdë ets dyajtëgatstëdë kyostumbrë parë niˈigyë tmëdundëdë Jyobaa ets kyaj nëgoo dyajtëgoytyëdë xyëëw tiempë. w15 15/10 3:15, 16

Extëmë naxwinyëdë jäˈäy jyukyˈattë, tëyˈäjtën extëmë Biiblyë jyënaˈany: “Naxwinyëdë jäˈäy kyaj pyaaty nyitëkëtyë nyëˈë tyuˈu. Kyaj yëˈë pyaatyëtyë naxwinyëdë jäˈäy diˈib tuˈuyeˈepy, këˈëm nyaynyëˈëmoˈoy nyaytyuˈumoˈoyëdët” (Jer. 10:23). Nuˈun kujkë naxwinyëdë jäˈäy jyukyˈaty, të nyigëxëˈëky ko Jyobaa kyaj ojts xyajkojëm parë këˈëm nnayˈanaˈamëm. ¿Tiko Jyobaa tnasˈixë etsë axëkjäˈäy jyaˈäjtˈadëˈëtsët? Jaˈko net nyigëxëˈëgët ko jeˈeyë jyaˈˈaty tuˈugë gobiernë diˈib oy tuump, ja Diosë gyobiernë. Pyäädaambyë tiempë mä Jyobaa dyajkutëgoyaˈany niˈamukë axëkjäˈäy. Ets ko nety pën tnibëdëˈëky ja madakën diˈibë Jyobaa myëdäjtypy parë yˈanaˈamët, ta pojën dyajkutëgoyaˈany. Ninäˈä tkanekynyasˈixëyaˈany ets jyaˈˈatëdë axëkjäˈäy, pes të nety yˈoknigëxëˈkpë ko tsojkëp kyutëgoyët pënaty nibëdëˈkëdëp. w15 15/11 3:5, 6

Jesus jyantsy tyukmëtmaytyäˈäganë jäˈäy ja Diosë yˈAnaˈam Kyutujkën, ets yëˈë diˈib mas jëjpˈam pyëjtak. Ko ojts kyäjpxwaˈkxy yä Naxwiiny, ja tnimaytyaky naxy mëgoˈpxˈok ja Diosë Kyutujkën. Yëˈë myaytyaˈakyˈäjt (Mat. 12:34). Ko Jesus jyukypyejky, ta nyaytyukˈijxë naxy 500 jäˈäy (1 Kor. 15:6). Waˈan yëˈëjëty ttuknipëjky parë nëjkx dyaˈëxpëktë “jäˈäyëty mä tëgekyë naxwinyëdë”. Per tsiptäˈägäämbë nety kyäjpxwäˈkxtët abëtsemy nyaxwinyëdë etsë Jesus jyënany ko jaanëm jyëjpkëxäˈänyë tyäˈädë tuunk ko nety jyëjptëgoyë tyäˈädë jukyˈäjtën. Ets ko tyam ngäjpxwäˈkxëm, yëˈë nyaˈˈadëˈëwëm extëmë Jesus jyënaˈany (Mat. 28:19, 20). Nan xypyudëjkëmë Jyobaa ko xymyoˈoyëm “tëgekyë diˈibë oy” parë mbäät ngäjpxwäˈkxëm. w15 15/11 5:1-3

Mä ayuk ebreo, Diosë xyëëw yajjäˈäy mët taxkë letrë. Tyäˈädë xëëw miimp mä mayë nekyxyaatsy diˈib tëëyëp yajjääy ebreo, extëm mä ja nekyxyaatsy diˈib yajtijp Rollos del mar Muerto. Nan miimbë Diosë xyëëw mä näägë kopyë diˈib mä Septuaginta, diˈib yajjääy ko nety tyëgoyˈaty ja 200 jëmëjt parë myinëdë Jesus ets diˈib yajjääy kyum 100 jëmëjt ko myiinyë Jesus. Mayë jäˈäy monyˈijx monyjäˈäwëdëp ko tˈixtë myinyë Diosë xyëëw mä ja nekyxyaatsy diˈib tëëyëp yajjääy. Tyäˈädë yëˈë xytyukˈijxëm ko jëjpˈam etsë Diosë xyëëw myinët mä Biiblyë. Per mä mayë Biiblyë, të yajjoˈotsyë Diosë xyëëw. Extëm nˈokpëjtakëm, mä jëmëjt 1901 ja pyëtsëëmy tuˈugë Biiblyë diˈib xyëˈäjtypy American Standard Version. Tyäˈädë Biiblyë myëmiimbyë netyë Diosë xyëëw. Per ta jatëgok tˈaˈijxëtyaaytyë ets dyajpëtsëëmdë mä jëmëjt 1952, ets kyaj tnekymyëmiinyë Diosë xyëëw. ¿Tiko? Yëˈko pënaty kyäjpxnäjxtë, wyinmääytyë ko kyaj yˈoyëty nyajtuˈunëmë tyäˈädë xëëw. Mayë Biiblyë diˈib të yajkäjpxnaxy inglés të yajjoˈotsyë Diosë xyëëw ets nanduˈun diˈib të yajkäjpxnaxy wiink ayuk. w15 15/12 2:3-5