2 Dios kyaj tkuentëty wiˈix njäjt ngëbajtëm. ¿Tëyˈäjtënëdaa?

Nääk jyënäˈändë: “Koxyëbë Dios tmëmay tmëdäjˈyë naxwinyëdë jäˈäy, yajjëgekypxyëbë axëkˈäjtën etsë ayoˈon. Per oyxyëp tjamëmääy tjamëdäjpë, kyaj tkuentëty wiˈixëts ëjts njaty ngëbety”.

Biiblyë tyukniˈˈixë: Jyobaa kyaj yëˈë dyajjaˈˈatyë axëkˈäjtën (Santiago 1:13, Traducción del Nuevo Mundo). Mbäätxyëp tjayajjëgeˈegyë axëkˈäjtën näˈä ttimtseky, per nyasˈijxëp ets jyaˈˈatët parë dyaˈoyëyaˈany ja jotmay diˈib jamˈäjt ko ja naxwinyëdë jäˈäy jyukyˈäjt tsondaky. Jäˈtäämbë tiempë mä tpudëkëyaˈanyë naxwinyëdë jäˈäy ets dyaˈoyëyaˈany tijaty të dyajwindëgoy pënaty kyaj kyupëkëdë extëmë yˈanaˈambë (Génesis 3:1-6; Isaías 65:17).a

Dios kyaj jeˈeyë tmëmay tmëdäjy niˈamukë naxwinyëdë jäˈäy, nanduˈunën niduˈuk niduˈuk. Yëˈë nyijäˈäp axtë diˈib ëtsäjtëm kyaj nnijäˈäjëm, extëm jyënaˈanyë Matewʉ 10:29-31: “¿Tii kyaj yajteeky majtskë joonuˈunk mët tuˈugë meenyuˈungë? Es ni tuˈugë tadë joonuˈunk kyakäˈäy naxwiiny pën kyajpë mDeetyëty dyajkutiky. Es axtë yëˈë mwääy myëdäjtypy ja Dios maytsyoy tuˈuk tuˈuk. Katë mtsëˈëgëdë. Miitsëtyë dëˈën ja Dios mmëdäjtëdëp kumay waanë niˈigyë këdiinëm may ja joonuˈungëty”.

¿Wiˈix mbudëkëdët ko xynyijawët ja tëyˈäjtën? Ko jäˈäy jyënäˈändë ko Dios kyaj tkuentëty wiˈix njäjt ngëbajtëm, ta may kyaj tnijawëyäˈändë pënën yëˈë o jaayë tˈëxtäˈäytyë ko kyaj tnekynyijawëdë ti tyundëp. Ets duˈunë duˈun, kyaj nˈëxtäˈäyëm tuˈugë jäˈäy diˈib jantsy axëkjäˈäy o juunë kyorasoon. Per ko xynyijawët ko Jyobaa mmëmääy mmëdäjëp, yëˈë mbudëkëdëp parë xyˈixyˈatët yajxon ets mëët mnaymyayëdët.

Extëm nˈokpëjtakëm, mbäät kyaj mˈity seguurë pënë Dios myëdoopy ko xymyëgajpxy o pën yˈatsoojëmbitëp. Biiblyë xyˈanmäˈäyëm ko “myëdooˈijtypyë nuˈkxtakën” ets jyënaˈany ko pënaty ëxtääyëdëp amumduˈukjot, mbäät myëgajpxyëty näˈä ttimtseky (Salmo 65:2).

Biiblyë xyˈanmäˈäyëm: “Tukëdëkë tëgekyë Dios diˈibë mjotmayˈajtypy, mët ko yëˈë naytyukjotmaytyuunëp mët miitsëty” (1 Peedrʉ 5:7). Mbäät nmëgäjpxëmë Jyobaa ko nyajnäjxëmë amay jotmay, pesë yˈAyuk xyˈanmäˈäyëm: “Wingonë Jyobaa yˈity mä jäˈäy diˈib tsayutpëmë kyorasoon jyäˈäwëp; ets yaˈˈawäˈätspëtseempy pënaty kyaj tnekymyëdatyë jotkujkˈäjtën” (Salmo 34:18).

[Notë diˈib noky ëxˈääy]

[Letrë diˈib miimp mä dibujë mä pajina 5]

Pënë Dios kyaj tkuentëty wiˈix njäjt ngëbajtëm, ¿tiko xyˈanmäˈäyëm ets nmënuˈkxtakëm?