Reyëty etsë saserdotëty tpudëkëyäˈändë naxwinyëdë jäˈäy
“Miitsëtyë duˈun tuk grupë jäˈäy diˈib të myajwinˈixtë, reyëty diˈib tuundëp saserdotëty, tuˈugë nasionk diˈib wäˈäts, tuˈugë käjpn diˈib aduˈuk yajjaˈäjtp.” (1 PED. 2:9, Traducción del Nuevo Mundo [NM])
¿MBÄÄT XYNYIMAYTYAˈAKY?
¿Näˈä Jyobaa tim jawyiin twandaky ko jyaˈˈatäˈänyë reyëty diˈib tunandëp saserdotëty?
¿Wiˈix ja jembyë kajpxyˈatypyë dyajpëtsemyë reyëty diˈib tuundëp saserdotëty?
¿Tijaty kunuˈkxënë yajminaampy ja reyëty diˈib tuundëp saserdotëty?
1. ¿Tiko njamyajtsëmë Jesusë yˈoˈkën xëë?
MÄ JËMËJT 33, 14 äämp nisán, ja Jesukristë mët nimäjmajtskë yˈapostëlë tˈaktuundë ja Paskë aˈux diˈib ijty tyuundëp ja judiyëtëjk. Të netyë Jesus tˈëxkexy ja Judas Iscariote ko dyajtsondakyë wiinkpë xëë, diˈib ok yajtij ja “Nintsënˈäjtëmë yˈaˈux” (1 Kor. 11:20). Mä tyäˈädë koots, majtskˈokë Jesus jyënany: “Tundë dëˈën extëmtsë njamyajtsën”, duˈun ojts tniˈanaˈamë parë yajjamyatsët ja yˈoˈkën xëë (1 Kor. 11:24, 25). Jyobaa tyestiigëty myëmëdoodëbë tyäˈädë anaˈamën, jëmëjt jëmëjt tyuˈukmuktë abëtsemy nyaxwinyëdë parë tjamyatstë. Mä tyäˈädë jëmëjt, 14 äämbë nisán extëmë kyalendaaryë judiyëty, ja tpääty jueebës 5 äämbë abril ko nety ja Xëë të tyëjkënë.
2. ¿Wiˈixë Jesus jyënany mä ja tsäjpkaaky etsë binë?
2 Lucas nyimaytyakypy mä majtskë bersikulo ti Jesus tyuun ets wiˈix jyënany mä tyäˈädë koots: “Tkoneˈky tuˈugë tsäjpkaaky, dyajky ja dyoskujuyëm, ta ojts ttujkwaˈkxy ets tmooytyë, ta tˈanmääytyë: Tyäˈädë nikajp ja niniˈkx ngëbäjkëts diˈib yajkëyakäämp mijts kyëjxmëty. Tuunˈadëˈëtstë duˈunë tyäˈädë extëmëts xyjamyatstë. Nanduˈun ttuuny mët ja kopë ko nety të yˈaˈuxˈäjtäˈäytyë, ta jyënany: Tyäˈädë kopë nyikejy ja jembyë kajpxyˈatypyë mët yëˈëgyëjxm ja nneˈpynyëts diˈib yajtamäämp yajˈyokäämp mijts kyëjxmëty” (Luc. 22:19, 20, NM). ¿Wiˈixë tyäˈädë ää ayuk tjaygyujkëdë ja apostëlëtëjk?
3. ¿Wiˈix ja apostëlëtëjk ojts dyajnikajtë ja tsäjpkaaky etsë binë?
3 Kom ja apostëlëtëjk judiyëty, nyijäˈädëp ko ja saserdotëty tnoˈoktë ja jëyujk animal diˈib tyukwintsëˈkëdëbë Dios mä ja templë. Ko ijty dyaktë tyäˈädë wintsëˈkën, yëˈë parë Jyobaa tyukjotkëdäˈägëdët ets parë yajmaˈkxtët ja pyoky (Lev. 1:4; 22:17-29). Pääty ko Jesus jyënany dyakäˈäny ja nyiniˈkx ets ttamäˈäny dyokäˈäny ja nyeˈpyny, ja apostëlëtëjk jyaygyujkëdë ko yëˈë nety yˈandijaampy ko dyakäˈäny ja jyukyˈäjtënë wäˈätspë extëmë wintsëˈkën. Ja wintsëˈkënë diˈibë netyë Jesus yakaampy mas niˈigyë tsyobäädäˈäny ets kyaj dyuˈunëty ja jëyujk animal diˈib yäjktëp wintsëˈkën.
4. ¿Ti yˈandijpy ko Jesus jyënany: “Tyäˈädë kopë nyikejy ja jembyë kajpxyˈatypyë mët yëˈëgyëjxm ja nneˈpynyëts”?
4 ¿Ti yˈandijpy ko Jesus jyënany: “Tyäˈädë kopë nyikejy ja jembyë kajpxyˈatypyë mët yëˈëgyëjxm ja nneˈpynyëts”? Ja apostëlëtëjk nan nyijäˈädëbë nety ja “jembyë kajpxyˈatypyë” diˈib ojts yajnaskäjpxë mä Jeremías 31:31-33 (käjpx). Ko duˈunë Jesus jyënany, yëˈë nety yajtëjkëp ja “jembyë kajpxyˈatypyë” diˈibë nety wyingudëgatsˈataampy ja kajpxyˈatypyë diˈibë Jyobaa tyuun mëdë israelitëty ko tmooy ja Ley mët yëˈëgyëjxmë Moisés. ¿Wiˈixë nety nyaymyënëjkxyëtyë tyäˈädë majtskpë kajpxyˈatypyë?
5. ¿Ti yaˈˈawäˈänëdë ja israelitëty ko Jyobaa dyajnaxkëdaky diˈib kyajpxyˈäjt mä ja Ley?
5 Tyäˈädë majtskpë kajpxyˈatypyë naymyënëjkxëp. Ko Jyobaa dyajnaxkëdaky diˈib kyajpxyˈäjt mä ja Ley, ta tˈanmääy ja israelitëty: “Pën miitsëty mëmëdoodëp yajxonë nˈää nˈayukëts ets mjantsy pyaduundëp diˈibëts të ngajpxyˈaty, ta miitsëty jeˈeyë ngäjpnˈatët mä tukëˈëyë nax käjpn, yëˈko tukëˈëyë it naxwinyëdë ak ëjtsë njaˈa. Ets miitsëty mˈittëp parë ëjts, reyëty diˈib tundëp saserdotëty” (Éxo. 19:5, 6). ¿Wiˈix ja israelitëty tjaygyujkëdë tyäˈädë ää ayuk?
YAJWANDAˈAKY JA REYËTY DIˈIB TUNDËP SASERDOTËTY
6. ¿Ti wandakënë ojts yˈadëy mët ko tyuuny diˈib yajkajpxyˈäjt mä ja Ley?
6 Ja israelitëty jyaygyujkëdë ti yˈandijpy ko ti yajkajpxyˈaty. Pes nyijäˈäjëdëbë nety ko Jyobaa ojts tijaty tkajpxyˈaty mëdë Noé etsë Abrahán (Gén. 6:18; 9:8-17; 15:18; 17:1-9). Extëm ko ojts nyaygyajpxyëty mëdë Abrahán, ta tˈanmääy: “Tukëˈëyë yëˈë naxwinyëdë jäˈäyëty ngunuˈkxtäˈäjaamybyëts mëët mijts kyëjxmëty” (Gén. 22:18, Mʉgoxpʉ ja̱ noky mʉdiˈibʉ jyaayʉn Moisés). Diˈib yajkajpxyˈäjt mä ja Ley, yëˈë tuun parë yˈadëëyë tyäˈädë wandakën. Ets mët yëˈëgyëjxmë netyë Jyobaa tkäjpnˈatäˈäny aduˈuk ja israelitëty. ¿Tiko? Parë yˈittët “reyëty diˈib tundëp saserdotëty” parë Jyobaa.
7. ¿Ti nety yˈandijpy ko pyëtsëmäˈäny ja “reyëty diˈib tundëp saserdotëty”?
7 Ja israelitëty myëdoyˈäjttëbë nety ko yajmaytyaˈagyë reyëty ets nanduˈunë saserdotëty, per yëˈëyë myëdoyˈäjttë Melquisedec, diˈibë nety të jyukyˈaty tëëyëp, ko yˈaduunmujkë tyäˈädë tuunk mët ko Jyobaa duˈun ttsejky (Gén. 14:18). Jyobaa ojtsë net tˈanëëmë ja israelitëty ko mbäät jam pyëtsemy ja “reyëty diˈib tundëp saserdotëty”. Ok, ta yajkujäˈäyë mä Diosë jyaaybyajtën ko tyäˈädë yëˈë yˈandijpy ko jaˈˈatäämbë reyëty diˈib tunandëp saserdotëty (1 Ped. 2:9, NM).
8. ¿Tijaty tyuundëbë saserdotë diˈibë Dios të tyuunkmoˈoyëdë?
8 ¿Ti tyuumpy tuˈugë rey? Anaˈamp. Ets ¿tuˈugë saserdotë? Ebreeʉsʉty 5:1 jyënaˈany: “Yëˈë [“saserdotë wintsën”, NM] yajtukwijtstutp mä yëˈë jäˈäyëty, es yajtuknikäjxpety extëm ja jäˈäyëty ja kyudënaabyë mä Dios, es [...] twintsëˈëgët ja Dios mët jaˈagyëjxm ja jäˈäyëtyë pyojpë”. Pääty tuˈugë saserdotë diˈibë Jyobaa të tyuunkmoˈoyëty, yëˈë kyudënaabyë pokyjyaˈay Dios windum ets tnikäjpxtuˈuty mët yëˈëgyëjxm ko dyakyë wintsëˈkën. Nan kyudënaabyë Jyobaa mä ja käjpn ko ttukniˈˈixëdë ja Diosë yˈanaˈamën (Lev. 10:8-11; Mal. 2:7). Ko duˈun tyundë ja saserdotëty, ta tpudëkëdë jäˈäy parë nyaymyëˈoybyëkëdët mëdë Dios.
9. 1) ¿Ti nety mbäät ttundë ja israelitëty parë jam pyëtsëmëdë “reyëty diˈib tundëp saserdotëty”? 2) ¿Tiko Jyobaa tpëjtaky ja saserdotëty jam Israel? 3) ¿Tiko kyaj pyëtseemy ja “reyëty diˈib tundëp saserdotëty” extëmë Jyobaa tkajpxyˈajty mä ja Ley?
9 Jyobaa yëˈë kyajpxyˈäjt mä ja Ley ko ja israelitëty mbäädë nety tmëdatëdë reyëty diˈib tundëp saserdotëty ets ttukˈoyˈatët “tukëˈëyë nax käjpn”. Per net pën tyuundëp extëmë Jyobaa yˈanmääyëdë: “Pën miitsëty mëmëdoodëp yajxonë nˈää nˈayukëts ets mjantsy pyaduundëp diˈibëts të ngajpxyˈaty”. ¿Mbäädë nety ja israelitëty tmëmëdowdë yajxonë Jyobaa yˈää yˈayuk? Mbäät, per tsip tpaduundäˈäyët (Rom. 3:19, 20). Päätyë Jyobaa tpëjtaky ja saserdotëty diˈib nyoˈoktëp ja wintsëˈkën ko ja israelitë pyokytyundët. Per ja saserdotëty kyaj tyuundë rey (Lev. 4:1–6:7). Ets ko ijty këˈëm pyokytyundë, nan nyoˈktëp ja wintsëˈkën (Ebre. 5:1-3; 8:3). Jyobaa yˈaxäjëp ijtyë tyäˈädë wintsëˈkën, per kyaj mbäät nyiwatstäˈäyëdë ja poky kaytyey. Ja saserdotëty ni jeˈeyë mbäät ojts tkapudëkë ja diˈibë nety yajxon myëmëdoobyë Dios parë mëët nyaymyëˈoybyëkëdët. Duˈun extëmë Pablo jyënany: “Mët ko ja toorë neˈpyny esë tsyiip neˈpyny ninäˈä mbäät tkayajjëgeˈeky yëˈë pojpë” (Ebre. 10:1-4). Per ko ja israelitëty tkamëmëdoodë tukëˈëyë ja Ley, ta ojts yajtuknikäjpxpety ja axëkˈäjtën (Gal. 3:10). Pääty, extëmë nety yajpäättë, tsip pyëtsëmët ja “reyëty diˈib tundëp saserdotëty” diˈib pyudëkëp niˈamukë ja naxwinyëdë jäˈäy.
10. ¿Tijaty tyuun ja Ley diˈib yajkajpxyˈäjt?
10 ¿Nëgoobë netyë Jyobaa të twandaˈaky ko jam Israel pyëtsëmäˈäny ja “reyëty diˈib tundëp saserdotëty”? Kyaj, pes pën mëdoodëp, mbäädë nety jam pyëtsemy, per kyaj mët ko tmëmëdowdët ja Ley. ¿Tiko? (Käjpxë Galasyʉ 3:19-25.) Parë njaygyujkëm, tsojkëp nnijäˈäjëm tiko Jyobaa dyajky ja Ley. Tyäˈädë Ley ojts kyuwäˈänëdë parë kyaj tpanëjkxtëdë wiink dios. Nan ojts tyukˈixëdë ko pokyjyaˈay yajpäättë ets ko tsojkëp tuˈugë wintsëˈkënë mas oybyë ets kyaj dyuˈunëty diˈib ja saserdotë wintsën yajkypy. Ja Ley nan tuun extëmë uˈunkˈijxpë diˈibë nety pudëkëyanëdëp parë tˈaxäjëdët ja Kristë o Mesías, diˈib nikajp “Winˈixy”. Ja Mesías yëˈë nety yajtëkëyanëdëp mä ja jembyë kajpxyˈatypyë diˈib ojts tnaskäjpxë Jeremías. Ets pënaty axäjëdëp mbäädë nety tyëkëdë mä ja jembyë kajpxyˈatypyë ets yˈittët “reyëty diˈib tundëp saserdotëty”. Min nˈokˈijxëm wiˈix.
JEMBYË KAJPXYˈATYPYË DYAJPËTSEMYË REYËTY DIˈIB TUNDËP SASERDOTËTY
11. ¿Ti Jesus tyuun parë mbäädë jäˈäy yˈittë reyëty diˈib tundëp saserdotëty?
11 Ko Jesus nyëbejty mä jëmëjt 29, ta jyajty Mesías parë ttunäˈänyë Jyobaa tyuunk diˈibë nety të tyuknipekyëty. Netë Jyobaa jyënany: “Tyäˈädëtsë dëˈën ja nˈUˈungëts diˈibëts njantsy tsyejpy”. Ta ojts twinˈixy ko ttuknigejxyë myëjää ets kyaj ko ttukutaameˈkyë aseytë (Mat. 3:13-17; Apos. 10:38). Ta ttuunkmooy parë tyunët Saserdotë Wintsën ets mä tiempë myiny kyëdaˈaky Ryeyˈatëdët niˈamukë diˈib mëbëjkëp (Ebre. 1:8, 9; 5:5, 6). Duˈuntsoo mbäädë netyë jäˈäy yˈittë reyëty diˈib tundëp saserdotëty.
12. ¿Wiˈix ndukˈoyˈäjtëm ko Jesus nyayäjkë extëmë wintsëˈkën?
12 Extëmë Saserdotë Wintsën, ¿ti wintsëˈkënë nety mbäädë Jesus dyaky parë dyajjëgaˈagët tukëˈëyë ja poky kaytyey? Ko dyakët ja jyukyˈäjtënë wäˈätspë extëm yëˈë këˈëm jyënany ko tnastuˈunë wiˈix yajjamyatsëdë yˈoˈkën xëë (käjpxë Ebreeʉsʉty 9:11, 12). Ko Jesus yajwinˈijxy parë tyunët Saserdotë Wintsën mä jëmëjt 29, ta ojts tnasˈixë parë yaˈijxmatsët axtë ko yˈoˈky (Ebre. 4:15; 5:7-10). Ko jyukypyejky, ta pyatëjkë tsäjpotm ets Dios windum xykyudënäˈäyëm mët ja wintsëˈkën diˈib yäjk (Ebre. 9:24). Desde mä tadë tiempë, Jesus tnikäjpxtuˈuty Dios windum pënaty pyëjtaktëbë mëbëjkën mä ja wintsëˈkën diˈib yäjk ets tpudëkëdë parë tmëdundëdë Dios ets tpäättët ja jukyˈäjtënë winë xëë (Ebre. 7:25). Ko Jesus nyayäjkë extëmë wintsëˈkën, ta dyajtsodëjkë ja jembyë kajpxyˈatypyë (Ebre. 8:6; 9:15).
13. ¿Ti nety yˈawijxtëp pënaty tëjkëdë mä ja jembyë kajpxyˈatypyë?
13 Pënaty tëjkëdë mä ja jembyë kajpxyˈatypyë nan ojts yajwinˈixtë mëdë Diosë myëjää (2 Kor. 1:21). Tim jawyiin yëˈë tëjkëdë ja judiyëty diˈib xëmë mëdoodë ets ok, ta diˈib kyaj jyudiyëty (Éfe. 3:5, 6). ¿Ti nety yˈawijxtëp mä ja jembyë kajpxyˈatypyë? Yajmaˈkxtët tukëˈëyë ja pyoky kyaytyey. Jyobaa të nety twandaˈaky: “Nmaˈkxaambyëts ja tyëgoˈoyën, ets kyajts nekyjamyatsäˈäny ja pyoky” (Jer. 31:34). Ko yajmaˈkxtääytyë ja pyoky, mbäädë nety yˈittë “reyëty diˈib tundëp saserdotëty”. Pedro duˈun tˈanmääy ja Dios mëduumbëty diˈib nëjkxandëp tsäjpotm: “Miitsëtyë duˈun tuk grupë jäˈäy diˈib të myajwinˈixtë, reyëty diˈib tuundëp saserdotëty, tuˈugë nasionk diˈib wäˈäts, tuˈugë käjpn diˈib aduˈuk yajjaˈäjtp, parë xykyäjpxwäˈkxët mayjyaˈay wyinduuy ja yˈoyˈäjtënë diˈib ojts mmëgäjpxëdë mä ja kootsˈat ets myajmiinëdë mä ja tyëˈkx jyäjënë tsujpë” (1 Ped. 2:9, NM). Jyobaa yëˈë nety duˈun të tˈanëëmë ja israelitëty ko tmooy ja Ley, perë Pedro yëˈë duˈun yˈanmääy ja Dios mëduumbëty diˈib tëjkëdëp mä ja jembyë kajpxyˈatypyë (Éxo. 19:5, 6).
“REYËTY DIˈIB TUUNDËP SASERDOTËTY” PYUDËKËYANDËBË NAXWINYËDË JÄˈÄY
14. ¿Mä tyundë pënaty tëjkëdëp mä ja jembyë kajpxyˈatypyë?
14 ¿Mä nety tyunäˈändë pënaty tëjkëdëp mä ja jembyë kajpxyˈatypyë? Yä Naxwiiny extëmë saserdotëty, mä tkudanëdë Jyobaa mayjyaˈay wyinduuy ko tnimaytyäˈäktë ja yˈoyˈäjtën ets ko dyajpëtsëmdë ëxpëjkpajn (Mat. 24:45; 1 Peed. 2:4, 5). Ko yˈooktë, ta nyëjkxtë tsäjpotm parë tyundë mëdë Kristë extëmë reyëty ets saserdotëty, majtsk pekyë tyäˈädë tuunk tnikëjxmˈattë (Luk. 22:29; 1 Peed. 1:3-5; Diˈibʉ Jat. 1:6). Tyäˈädë yajnijawë mët ko apostëlë Juan yajtukˈijxy wiˈix näägë anklës yˈëwdë Jyobaa wyinduuy. Mä tuˈugë “jembyë ëy” diˈib yˈëëdëp “Borreeguˈunk wyindum” jyënäˈändë: “Es mët ja mneˈpyny xyjuuy extëm ja Diosë jyaˈayëty, pënëty jikyˈäjttë mä maygyäjpn, mä wiinkpë may ayuk käjxpëty, es mä may nyaxwinyëdë. Të xypyëjtäˈäktë yajkutujkpëty es [“saserdotëty”, NM], es tmëdundët ja Dios es yajkutuktët naxwiiny” (Diˈibʉ Jat. 5:8-10). Ok, ta jatëgokë Juan yajtukˈijxy ko tyäˈädë anaˈambëtëjk tmëdunäˈändë “ja Dios esë Kristë extëmë [“saserdotëty”, NM] es yˈanaˈamdët mët ja Kristë tuk mil jëmëjt” (Diˈibʉ Jat. 20:6). Mëdë Kristë tyundë extëmë reyëty ets saserdotëty parë tpudëkëyäˈändë naxwinyëdë jäˈäy.
15, 16. ¿Tijaty kunuˈkxënë yajminaampy ja reyëty diˈib tuundëp saserdotëty?
15 ¿Tijaty kunuˈkxënë yajminaambyë 144,000 yä Naxwiiny? Mä Diˈibʉ Jatanʉp kapitulo 21 jap yaˈijxkijpxyëdë mët tuˈugë käjpn diˈib yajpatp tsäjpotm, diˈib yajtijp ja Jembyë Jerusalén, ets nanduˈun extëm “diˈibë pyëkaampy ja Borreeguˈunk” (Diˈibʉ Jat. 21:9). Mä bersikulo 2 axtë 4 jyënaˈany: “Es nˈijxyëts nandëˈën ja jembyë Jerusalén käjpn diˈibë tsoˈomp tsäjpotm mä Dios, es kyëdaˈaky, es jantsy tsuj oytyuny extëmë pëjkpë toxytyëjk ko pyëkäˈäny. Es nmëdoogajxyëts jantsy mëk mä unyaaybyajn mä Dios yajkutiky, es jyënaˈany: Tyamë net ja Dios yˈity mët ja jäˈäyëty, es jyikyˈatäˈäny mët yëˈëjëty, es yëˈëjëty tjäˈäyˈatäˈäny. Këˈëm ja Dios yˈitäˈäny mët yëˈëjëty, es Dyiosˈatëdët. Esë Dios yajtëtsxëdët tëgekyë ja wyinnëë. Kyaj yˈokˈijnët ja oˈkën, jëˈëy yaxën o ja pëjk adoˈonën, jaˈa ko tëgekyë diˈibë të yˈity, të jaˈa nyaxy kyexy”. ¡Jantsy oyë tyäˈädë kunuˈkxën! Ko nëjkx jyëjptëgoy ja oˈkën, ta jyëgaˈagäˈänyë jëˈëy yaxën, këjx tujkën, mäˈäy täjën etsë pëjk adoˈonën. Ta naxwinyëdë jäˈäy jyëmbitanë wäˈäts jäˈäy, ets nyaymyëˈoybyëkäˈänëdë yajxon mëdë Dios.
16 Mä Diˈibʉ Jatanʉp 22:1, 2 jap mas niˈigyë yajnimaytyaˈaky tijaty kunuˈkxënë yajminaambyë tyäˈädë reyëty diˈib tuundëp saserdotëty: “Netëts ja anklës xytyukˈijxy tuˈugë mëjnëë diˈibë mujxp mä unyaaybyajn mä Dios esë Borreeguˈunk yajkutuktë. Tadë nëë jantsy wäˈäts extëmë biidrë, es yëˈë dëˈën yajkypy ja jikyˈäjtën winë xëë winë tiempë. Tadë nëë pyëyeˈeky mëj tuˈugijky mä tadë käjpn [ja Jembyë Jerusalén]. Es mëjnëëbëˈääy majtsk aduˈum yony ja kepy diˈibë yajkypy ja jikyˈäjtën es tyëëmpˈaty mäjmajtsk ok tuk jëmëjtpë, winduk poˈojëty tyëëmpˈaty. Es ja kepyˈaay yëˈë tsyooyˈatëp ja naxwinyëdë jäˈäyëty”. Diˈib yä yajtukˈijxë Juan, yëˈë xytyuknijäˈäjëm ko niˈamukë ja familyë yä Naxwiiny nyiwäˈätsäˈänëdë ja poky diˈibë Adán ojts xytyukmëwëˈëmëm. Të nety nyaxy kyexy tukëˈëyë diˈib tyam jaˈäjtp.
TYUUNGËBATTË JA REYËTY DIˈIB TUUNDËP SASERDOTËTY
17. Ko yˈabatët tuk mil jëmëjt, ¿ti nety të ttundë ja reyëty diˈib tuundëp saserdotëty?
17 Ko nety të tyundë tuk mil jëmëjt, të nety niˈamukë ja pokyjyaˈay dyajjëmbity wäˈäts jäˈäy. Ta netë Jesus diˈib tuump Saserdotë Wintsën ets Rey, ttukëdëkëyaˈanyë Jyobaa ja naxwinyëdë jäˈäy diˈibë nety të jyëmbittë wäˈäts jäˈäy (käjpxë 1 Korintʉ 15:22-26). Duˈunë nety të tyuungëbattë ja reyëty diˈib tuundëp saserdotëty.
18. Ko nety të tyuungëbattë, ¿wiˈixë Jyobaa dyajtunäˈäny diˈibë nety të tyundë reyëty ets saserdotëty mëdë Kristë?
18 Ko nety të tyuungëbattë, ¿wiˈixë Jyobaa dyajtunäˈäny diˈibë nety të tyundë reyëty ets saserdotëty mëdë Kristë? Mä Diˈibʉ Jatanʉp 22:5 jyënaˈany: “Es yajkutuktët winë xëë winë tiempë”. ¿Pënaty yˈanaˈamandëp? Biiblyë kyaj tnigajpxy. Perë Jyobaa yajtuunˈadëˈëtsanëdëp extëmë anaˈambë. Pes yëˈëjëty ninäˈä kyanekyˈoogäˈändë ets kyawindëgoyäˈändë ets nyijäˈäjëdëbë nety wiˈix të tpudëkëdë ja pokyjyaˈay parë të jyëmbittë wäˈäts jäˈäy.
19. ¿Ti mbäät niˈamukë nyaˈijtëm winmäˈänyoty ko nety njamyajtsëmë Jesusë yˈoˈkën xëë?
19 Ko nety nduˈukmujkëm jueebës 5 äämbë abril mä njamyatsäˈänëmë Jesusë yˈoˈkën xëë, oy ko nyaˈijtëm winmäˈänyoty diˈib yam të nˈëxpëjkëm. Pënaty nëjkxandëp tsäjpotm diˈib akwëˈëmdëp yä Naxwiiny, yëˈë kyayandëp ja tsäjpkaaky diˈib kyaj tmëdatyë lebaduurë ets tˈuugäˈändë ja binë, diˈib yˈandijpy ko tëjkëdëp mä ja jembyë kajpxyˈatypyë. Nan yëˈë tukjamyatsanëdëp ko mëjwiin kajaa yˈoyëty tijaty nyikëjxmˈäjttëp mä diˈibë Dios tyuknibëjtakëp. Pääty oy ko niˈamukë nyajpatëm mä yajjamyatsäˈänyë Jesusë yˈoˈkën xëë, ets nmëjjäˈäwëm mëjwiin kajaa ko Jyobaa dyajtunäˈänyë reyëty diˈib tunandëp saserdotëty parë tpudëkëyaˈany niˈamukë ja naxwinyëdë jäˈäy.
[Letrë diˈib miimp mä dibujë mä pajina 31]
Ja reyëty diˈib tuundëp saserdotëty, dyajminäˈänyë kunuˈkxënë yä Naxwiiny