Myëduˈukpë yajtëˈëwën: ¿Nëgoobëtsëdaa të nminy jukyˈäjtpë?
ROSALIND, diˈib yaˈk pajt Inglaterra, xëmë ttsojkënyëˈajty mas yˈakˈëxpëkäˈäny. Ets nan myëmääy myëdäjë ayoobë jäˈäy. Pääty ko ojts dyajkaˈpxyë yˈëxpëjkën, ta tpaty tuˈugë tyuungë oybyë ets mä tsooxë yajmëjuy, yëˈë ijty pyudëjkëbë jäˈäy diˈib kyaj ti jyëën tyëjk. Ets nan pyudëjkëp diˈib kyaj yˈoy myëkëty o diˈib tsiptakxëp tijaty tjatët. Per oy ja tyuunk tjatukxondaky, xëmë nyayajtëëwë: “¿Tiko yä nyajpatëm? ¿Nanëgoobëdaa të nmiˈinëm jukyˈäjtpë?”.
¿Tiko duˈunë jäˈäy nyayajtëwëdë? Yëˈko naxwinyëdë jäˈäy tapë jyot wyinmäˈäny, kyaj dyuˈunëty extëmë jëyujk animal. Kyaj jatëgok ttuunëmbity mä të tyëgoy, tyukniwijtsëp tijaty tyunaampy ets kyaj nanëgoobë jyukyˈatäˈäny.
¿Wiˈix nääk tˈatsoojëmbittë? May jyënäˈändë ko parë nˈijtëm agujk jotkujk, jëjpˈam ets nmëdäjtëm mayë meeny sentääbë o parë jäˈäy xyajmëjpëtsëˈëmëm.
¿Ti yˈandijpy ko duˈun yˈatsowdë? Ko kyaj jyëjpˈamëty nduˈunëm tijatyë Dios tsyejpy. Ko diˈib jëjpˈam yëˈë tijaty ëtsäjtëm ntsojkëm.
¿Wiˈixë Biiblyë tyukniˈˈixë? Ko kyaj dyakyë jotkujkˈäjtën winë xëë winë tiempë ko yëˈëyë nbaˈoˈktëˈëwëmë meeny sentääbë etsë xondakën. Duˈun xytyukˈijxëmë rey Salomóngë yˈijxpajtën. Yëˈë myëdäjtääy tukëˈëyë, per ok, ta ojts tnigajpxy ti diˈib yajkypy winë xëë jotkujkˈäjtën. Jyënany: “Tsëˈëgë Diosë tëyˈäjtënbë ets kuytyunë yˈanaˈamën. Yëˈko yëˈë duˈun patëp ttunëdë naxwinyëdë jäˈäy” (Eclesiastés 12:13). ¿Tidën yˈandijpy nguytyuˈunëm ja yˈanaˈamën?
Tuk pëky diˈibë Dios tsyejpy, yëˈë ets ndukxondakëmë jukyˈäjtën. Salomón duˈun tkujäˈäyë: “Naxwinyëdë jäˈäy, nitii duˈun tkaˈoyjyawë extëm ko kyay yˈuugët ets tˈixët ko oybyëtsëëmp ko mëk tyuny yˈayoy. Tyäˈädë nan tëjëts këˈëm nˈixy, ko tyäˈädë jam tsyoony mä Diosë kyëˈë diˈib tëyˈäjtën” (Eclesiastés 2:24).
Dios nan tsyejpy ets ntsojkëmë nfamilyëˈäjtëm ets nguentˈäjtëm, pääty xymyoˈoyëmë käjpxwijënë niduˈuk niduˈuk:
“Nidëgekyë yetyëjkëty ttsoktët ja yˈuˈunk nyëdoˈoxyëty extëm nyaytsyekyëty këˈëm.” (Éfesʉ 5:28.)
“Yëˈë kasäädë toxytyëjk twintsëˈëgëdët yëˈë nyaˈay.” (Éfesʉ 5:33.)
“Uˈunk ënäˈkëty, mëmëdowdë mdääk mdeety.” (Éfesʉ 6:1.)
Ko nguytyuˈunëmë tyäˈädë käjpxwijënë yajkypyë agujkˈäjt jotkujkˈäjtën. Per tam diˈib ak tsojkëp nduˈunëm. Jëjpˈamë ets këkpäät nˈixyˈäjtëm pën të xyajkojëm ets mëët nnaymyaˈayëm. Biiblyë xyˈanmäˈäyëm: “Mëwingondë Dios, es yëˈë nandëˈën mmëwingonëdëp miitsëty” (Santya̱ˈa̱gʉ 4:8). Pën nbaduˈunëmë tyäˈädë käjpxwijën, ta kyaj nëjkx nwinmäˈäyëm ko nanëgoobë njukyˈäjtëm.
Rosalind, diˈib të yˈokˈyajmaytyakpë, të tnijawë tiko yä të nmiˈinëm jukyˈäjtpë.
Jap niˈigyë xynyijawët wiˈix mbäät njukyˈäjtëm extëmë Dios ttseky mä liibrë ¿Ti tëyˈäjtën jantsy tukniˈijxëbë Biiblyë? kapitulo 12. Mbäät xyajjënaky mä Internet www.jw.org/mco
[Dibujë mä pajina 5]
¿Wiˈixë Jesus tyukniˈˈijxë parë kyaj nanëgoobë njukyˈäjtëm?
Jesus kyaj nanëgoobë jyukyˈajty yä Naxwiiny, tam tiko myiiny, yëˈë jyënany: “Päätyëts të nminy naxwiiny esëts nˈanëëmët ja jäˈäyëty diˈibë dën tëyˈäjtën” (Fwank 18:37). Pääty, aduˈugë wyinmäˈäny tpëjtaky parë jäˈäy ttukniˈˈixëyaˈany ja tëyˈäjtën mä pënën Dios ets tijaty tyuknibëjtakëp.
Nanduˈun ëtsäjtëm, kyaj nëjkx nanëgoobë njukyˈäjtëm pën yëˈë nbanëjkxëmë Jesusë yˈijxpajtën. Jesus xyˈanmäˈäyëm ets duˈun nduˈunëm (Matewʉ 11:29). Min nˈokˈijxëm majtsk pëky wiˈix jyënany.
Jesus jyënany mä Lukʉs 11:28 ko yëˈë ijttëp jotkujk “diˈibë myëdoodëp extëm ja Dios jyënaˈany es myëmëdoodëp”. Pääty, tsojkëp nˈixyˈäjtëm yajxon “ja tuˈukpë Diosë tëyˈäjtënbë ets nanduˈunë Jesukristë diˈib kyajx yä naxwiiny” (Fwank 17:3).
Tyukˈanaˈam ja yˈëxpëjkpëty parë tnimaytyäˈäktët tijaty të tjattë. Tˈanmääy: “Nëjx yaˈëxpëktë jäˈäyëty mä tëgekyë naxwinyëdë esëts ëj njäˈäyˈattët. Yajnëbattë xyëëgyëjxmë Dios Teety, es ëj, ja yˈUˈunk, es ja Espiritë Santë, es tukniˈixëdë es tkuytyunët tëgekyë diˈibëts ëj miits të ndukˈanaˈamdë” (Matewʉ 28:19, 20).
Pënaty myëdoodëp extëmë Dios jyënaˈany ko tˈëxpëktë Biiblyë ets tpadundë, yˈijxtëp ko oˈoyëdëbë jyukyˈäjtën. Ets nan mbäät yˈittë seguurë ko pën tyukniˈˈijxëdëbë wiink jäˈäy tijaty nyijäˈäwëdëp, ta nëjkx nyayjawëdë agujk jotkujk ets kyaj nanëgoobë jyukyˈattë.