¿Axëëgëdaa ko Dios nyajtëˈëwëm tiko tijaty tyuny jyatyëty?

TA NÄÄGË jäˈäy diˈib winmääytyëp ko nyajtëgoˈoyëmë mayˈäjt wintsëˈkën mä Dios ko nyajtëˈëwëm tiko tijaty tyuny jyatyëty. ¿Waˈan nanduˈun mwinmay?

Per ¿mnijäˈäwëp ko të mayë oyjyaˈay dyajtëwdë tijatyë Dios?

Extëm nˈokpëjtakëm, Job dyajtëëy: “¿Tiko jyukyˈäjtˈadëˈëtsyë axëkjäˈäy, të myëjjäˈäyëdë, [ets] të myëkjäˈäytyäˈäktë mëjwiin kajaa?” (Job 21:7).

Ets tuˈugë Diosë kyugajpxy diˈib xyëˈäjt Habacuc, nanduˈun yˈanmääyë: “¿Tiko xyˈixy diˈib axëktuump [ets] amonyë mwëˈëmy ko tuˈugë axëkjäˈäy tjëëny diˈib mas oyjyaˈay ets kyaj dyuˈunëty yëˈë?” (Habacuc 1:13).

Axtë Jesukristë ojts tëgok tmëyaxkeˈegyë Dios: “Dios miië, Dios miië, ¿tikots mij të xymyastuˈuty?” (Matewʉ 27:46).

¿Ojtsëdaa Jyobaaa axëëk nyayjawëty ko duˈun tyäˈädë jäˈäy yajtëëwëdë? Mä Biiblyë kyaj mä tnigajpxy. Pes nnijäˈäwëm ko Dios kyaj axëëk nyayjawëty ko nˈamdoˈojëmë naybyudëkë parë xymyoˈoyëm tijaty nyajtëgoyˈäjtëm, niˈigyë xymyoˈoyëm xondaˈakyˈää xondaˈakyjyot parë nˈoyˈäjt nmëkˈäjtëm (Matewʉ 6:11, 33). Yëˈë nan kyaj axëëk nyayjawëty ko nyajtëˈëwëm tijaty nmëmäˈäy nmëdäjëm ets diˈibë xypyëjkëm ja jotkujkˈäjtën (Filipʉs 4:6, 7). Jesus nan ojts tˈanëëmë ja yˈëxpëjkpëty: “Ëxtäˈäytyë, es mbäättëp” (Matewʉ 7:7). Ko duˈunë Jesus jyënany, kyaj yëˈëyë tˈandijy ko nˈaxäjëyäˈänëm tijaty xytyëgoyˈäjtxëm, nanduˈunën parë nnijäˈäwëm wiˈix yaˈˈatsoojëmbity tijaty nnayajtëˈëwëm.

Koxyëp mijts mbäät mëdë Dios mˈokmaytyaˈaky, ¿diˈibxyëp myajtëëpy mä tyäˈädë tëgëëkpë yajtëˈëwën?

● “¿Nëgoobëtsëdaa të nminy jukyˈäjtpë?”

● “¿Wiˈixëts njatët kojëts nˈoogët?”

● “¿Tiko Dios tnasˈixë etsëts nˈayowët?”

Dios “wyinmäˈänymyooy ja jyaˈayëty es tkëxjäˈäyët tëgekyë ja Diosë jyaaybyajtën”, pääty, oy ko nˈëxtäˈäyëm mä yˈAyuk wiˈixë tyäˈädë yajtëˈëwën yaˈˈatsoojëmbity (2 Timotee 3:16). Mä artikulo diˈib ak miimp jap nnijawëyäˈänëm tiko jäˈäy duˈun nyayajtëwëdë ets wiˈixë Biiblyë tˈatsoojëmbity.

[Notë]