“Yajminë mˈanaˈamën” ¿näˈä myinäˈäny?

“Ko xyˈixtët tëgekyë tyäˈädë, mnijawëdëp ko wingonë naty esëts nminët, extëm mbäät njënäˈänëm tëjk agëˈëybyë.” (MAT. 24:33)

¿WIˈIX MˈATSOOJËMBITÄˈÄNY?

¿Wiˈix kujk yˈadëy desde 1914 tijaty ojts yajnaskäjpxë mä Biiblyë?

¿Ti xytyukˈijxëm ko niˈigyë myëjwindëjkënë axëkˈäjtën?

¿Wiˈix mnayjawëty ko xynyijawë wyingoonë kutëgoˈoyën?

1, 2. 1) ¿Tiko näˈäty kyaj ti yajjamyetsy o yaˈijxpääty? 2) ¿Ti diˈib nnijäˈäwëm mä Diosë yˈAnaˈam Kyutujkën?

WAˈAN të xypyëkyë kuentë ko tuˈugë jäˈäy kyaj tnekyjamyajtstäˈäy wiˈix meerë doktoor të yˈanëˈëmxëty ko të yajtukmëtmaytyaˈaky ti päˈäm myëdäjtypy. O näägë jäˈäy kyaj tnekypyaatyë yˈawatsn o wyinˈijxn oy taayë jyaˈity. ¿Tiko dyuˈunëty? Ëxpëkyjyaˈay jyënäˈändë yëˈko kyaj mbäät kanäk pëky tijaty yaˈˈaduunmuky. Pes të yaˈëxpëjkpëtsëmy ko kukoˈoxy, jeˈeyë mbäät tuk pëky ti ttuny.

² Tyam, mayë jäˈäy kyaj tpëktë kuentë tijaty tuun jäjtëp abëtsemy nyaxwinyëdë. Waˈan tˈixtë ko të kajaa tyëgatsyë jukyˈäjtën desde 1914, per kyaj tjaygyukëdë tijatyë Biiblyë myaytyakypy diˈib tyam tuun jäjtëp. Ëtsäjtëm mët ko nˈëxpëjkëmë Biiblyë, ta nnijäˈäwëm ko Diosë yˈAnaˈam Kyutujkën ja nyaxkëdaky 1914 ko Jesus tyëjkë Rey jam tsäjpotm. Nan nnijäˈäwëm ko kyajnëm yaˈˈatsoojëmbijtäˈäy tyäˈädë nuˈkxtakën, “Yajminë mˈanaˈamën. Waˈan dyajtuny ja mtsojkën, duˈun extëm jam tsäjpotm nanduˈun yä Naxwiiny” (Mat. 6:10, Traducción del Nuevo Mundo [TNM]). Per parë yajtunët ja Diosë tsyojkën yä Naxwiiny duˈun extëm jam tsäjpotm, tsojkëp jawyiin jyëjptëgoyëdë axëkˈäjtën diˈib jaˈäjtp.

3. ¿Wiˈix ndukˈoyˈäjtëm ko nˈëxpëjkëmë Diosë yˈAyuk?

³ Ko xëmë nˈëxpëjkëmë Diosë Ayuk, ta nnijäˈäwëm ko ta tyam yˈadëy tijaty ojts yajnaskäjpxë. Per mayë jäˈäy kyaj tjaygyukëdë, yëˈëyë myëmääy myëdäjtëbë jyukyˈäjtën ets tijaty tsyojktëp, kyaj tpëktë kuentë ko desde 1914 Jesukristë yˈanaˈamtsondaky, ets ko tim tsojk dyajkutëgoyaˈanyë axëkjäˈäy yä Naxwiiny. Per oy kanäk jëmëjt kujk xymyëdunyë Dios, oy ko mnayajtëwëdët: “¿Duˈunyëmëts nmëbëky ko wingoonëp ja kutëgoˈoyën ets ko tijaty tuun jäjtëp yä Naxwiiny yëˈëjëts xytyukˈijxp ko jantsy wingoomp?”. Ets pën näämnëm mnëbety: “¿Mä xypyëjtaˈagyë mjot mwinmäˈäny?”. Min nˈokˈijxëm tëgëk pëky tiko njënäˈänëm ko tim tsojk tijaty ttunäˈäny ja Rey diˈibë Dios wyinˈijx parë yajtunët tukëˈëyë tsyojkën yä Naxwiiny.

KYËXËˈËKTË DIˈIB TYUKˈUNYAAYTYËBË KUÄÄY

4, 5. 1) ¿Ti Jesus tyuumpy desde 1914? (Ixë dibujë mä tsyondaˈagyë tyäˈädë artikulo.) 2) ¿Wiˈix nyikejy ja nidëgëëkpë diˈib tyukˈunyaaytyëp ja kuääy ets tpanëjkxtë Jesus? 3) ¿Wiˈix të yˈadëy extëm ojts yajnaskäjpxë?

⁴ Mä jëmëjt 1914, Jesukristë tyëjkë anaˈambë jam tsäjpotm ets kyëxëˈëky extëmxyëp ttukˈuˈunyë tuˈugë poop kuääy ets netyë tsyoˈony parë dyajkäˈpxäˈäny ja tyuunk mä dyajkutëgoyaˈany tijatyë Satanás yajjaˈäjtypy (käjpxë Diˈibʉ Jatanʉp 6:1, 2). Diˈib ojts yajnaskäjpxë mä Diˈibʉ Jatanʉp kapitulo 6 tnimaytyaˈaky ko nety të nyaxkëdaˈagyë Diosë yˈAnaˈam Kyutujkën, ta yä Naxwiiny pojënë myäˈttsondäˈägäˈänyë jukyˈäjtën. Ja tëgëëkpë kuääy diˈibë jäˈäy tyukˈunyaapy ets tpanëjkxtë Jesus, yëˈë yˈandijpy ko jyaˈˈatäˈäny tsip, yuu, päˈäm etsë oˈkën (Diˈibʉ Jat. 6:3-8).

⁵ Ojts yajnaskäjpxë ko ja tsip yëˈë diˈib yajjëgaˈagaambyë jotkujkˈäjtën, ets duˈunën tyuun jyäjtë. Oy mayë nasionk jyajënandë ko dyajjaˈˈatäˈändë tuˈugyëˈäjtën, kyaj yˈadëëy ti wyandaktë. Ko tyuunë Primera Guerra Mundial, yëˈë diˈib yajjëjptëgooyë tuˈugyëˈäjtën yä Naxwiiny. Ets oy niˈigyë jyaˈˈatyë ëxpëkyjyaˈay etsë meeny sentääbë desde 1914, duˈunyëm jyaˈˈatyë yuu mët ko jäˈäy nyaynyibëdëˈëgëdë ets tsyiptundë abëtsemy nyaxwinyëdë. Nan miyonkˈamë jäˈäy yˈooktë jëmëjt jëmëjt, mët ko jyaˈˈatyë päˈäm diˈib ninäjxp ets mët ko tijaty yˈayoˈonbëjtaˈaky. Ko duˈun tyuny jyatyëty, xyˈaxëktuˈunëm ets miyonkˈamë jäˈäy yˈooktë extëm ninäˈänëm duˈun kyatuny kyajatyëty. ¿Mnijäˈäwëp tiko duˈun jyaty?

6. ¿Pënaty pyëjktë kuentë ko yëˈë nety adëëp tijaty ojts yajnaskäjpxë, ets ti tyuundë?

⁶ Ja Dios mëduumbëty diˈib nëjkxtëp tsäjpotm yëˈë nety yˈawijxtëp ko 1914 jabäädë nety jyëjpkëxäˈäny ja “tiempë diˈibë Dios të tpëjtaˈaky”. Per mayë jäˈäy kyaj tpëjktë kuentë, mët ko yëˈëyë nety mëjˈixy mëjmëdoy jyäˈäwëdëp ja Primera Guerra Mundial ets ko myiinyë mëk jëënbäˈäm mëk xux päˈäm o gripe española (Luk. 21:24). Ja Dios mëduumbëty diˈib nëjkxtëp tsäjpotm kyaj nety yajxon tnijawëdë ti tunan jatanëp, per nyijäˈäwëdëbë nety ko 1914, tamë nety ti diˈib jëjpˈam tunan jatanëp mä Diosë yˈAnaˈam Kyutujkën. Ko tnijäˈäwëdë ko yëˈë nety adëëp tijaty ojts yajnaskäjpxë mä Biiblyë, ta amëk jotmëk ojts tkäjpxwäˈkxtë ko të nety nyaxkëdaˈagyë Diosë yˈAnaˈam Kyutujkën. Ko duˈun ttuundë, ta yajnibëdëˈktë ets axëëk yajtuundë. Ets kom kanäkˈit kanäk lugäär duˈun yajpajëdijttë, ta nyigëxëˈky ko nan yëˈë nety adëëp tijaty ojts yajnaskäjpxë. Kanäk jëmëjt yajpajëdijttë ja Dios mëduumbëty mët ko ojts yˈëwäˈkx kyäjpxwäˈkxtë, pënaty mëtsipˈäjtëdë ojts dyajnaxkëdäˈäktë ley parë axëëk yajtundët, yajpëjtäˈäktët pujxndëgoty, axtë ojts yajniˈanaˈamëdë parë yajˈyoˈktëytyët, yajtujtët o yajˈyoˈkpuxtët (Sal. 94:20; Diˈibʉ Jat. 12:15).

7. ¿Tiko mayë jäˈäy kyaj tpëktë kuentë tijaty ja tuun jäjtëp abëtsemy nyaxwinyëdë?

⁷ Yajxon nyigëxëˈëky ko Diosë yˈAnaˈam Kyutujkën të nyaxkëdaˈaky jam tsäjpotm, per ¿tiko mayë jäˈäy kyaj tpëktë kuentë? ¿Tiko kyaj tˈixtë ko tijaty tuun jäjtëp yëˈë adëëp tijatyë Biiblyë ojts tnaskäjpxë diˈibë Dios mëduumbëty kanäk jëmëjt kujk kyäjpxwäˈkxtëp? ¿Yëˈëyëdaa tyamë jäˈäy jyaygyujkëdëp diˈib jaa yˈijxtëp? (2 Kor. 5:7.) ¿Waˈan jamë jyot wyinmäˈäny tpëjtäˈäktë mä kyëˈëm jukyˈäjtën ets kyaj tpëktë kuentë ti Dios tyuumpy? (Mat. 24:37-39.) ¿Waˈandaa yëˈë yajtuˈudukëdë tijatyë Satanás yajjaˈäjtypy ets tijaty tyuknibëjtakëp? (2 Kor. 4:4.) Tsojkëp nmëdäjtëmë mëbëjkën etsë wijyˈäjtën parë nˈijxëm tijaty tuun jäjtëp ets njaygyujkëm tijaty tyuumbyë Diosë yˈAnaˈam Kyutujkën. ¡Jantsy jotkujk nnayjäˈäwëm ko ëtsäjtëm nnijäˈäwëm tijaty ja tuun jäjtëp!

NIˈIGYË MYËJWINDËKË AXËKˈÄJTËN

8-10. 1) ¿Wiˈix yˈadëyë 2 Timotee 3:1-5? 2) ¿Ti yajnigëxëˈkypy ko niˈigyë të myëjwindëkë axëkˈäjtën?

⁸ Myëmajtsk pëky tiko nnijäˈäwëm ko tim tsojkë Diosë yˈAnaˈam Kyutujkën tyuundëkëyaˈany yä Naxwiiny, yëˈko niˈigyë myëjwindëkë axëkˈäjtën. Diˈib ojts yajnaskäjpxë mä 2 Timotee 3:1-5, ja kujk duˈun tyuny jyatyëty naa tuk mëgoˈpx jëmëjtën, të myëjwindëkë ets niˈigyë nyigëxëˈknë mä tukëˈëyë Naxwinyëdë. ¿Mbëjkypyë kuentë ko ta duˈun tyuny jyatyëty? Min nˈokˈijxëm tuˈuk majtskë ijxpajtën (käjpxë 2 Timotee 3:1, 13).

⁹ Okwinmay tijaty ijtyë jäˈäy yˈaxëkˈijxtëp naa 60 jëmëjtëp o 70 jëmëjtëp ets okˈixë net ti tyamë jäˈäy tyuundëp, mä yaˈixypyëtsëmdë, mä tyundë, mä yˈëyëˈëk kyuyattë ets mä wiˈix nyaywyit nyayxyoxëdë o nyayˈoytyunëdë. Tyam, oymyääjëtyë jäˈäy axëëk nyaytyunëdë ets axëëgë jyukyˈäjtën dyajnëjkxtë. Ta nääk diˈib këxëˈëgandëp ko yëˈë duˈun mas axëkjäˈäy ets ko mas axëëk jyukyˈattë. Tijaty ijtyë jäˈäy kyaj tkupëktë diˈib näjxp mä telebisionk, tyam kyaj axëëk tnekyˈixtë. Ets mayë jäˈäy pyëjktëbë kuentë ko diˈib ak yetyëjk tsënääytyëp, yëˈë duˈun diˈib mëjpëtsëëmdëp mä jyembyëtsëmyë wit xox ets mä yaˈixypyëtsëmdë, etsë tyäˈädë yëˈë diˈibë net yajtuundëp parë jäˈäy tˈoyˈixtët extëm yëˈëjëty jyukyˈattë. Per ëtsäjtëm, jantsy jotkujk nnayjäˈäwëm ko nnijäˈäwëm wiˈixë Dios tˈixy ko duˈunë jäˈäy yˈadëˈëtstë (käjpxë Juudʉs 14, 15).

¹⁰ Min nˈokˈijxkijpxyëm wiˈix ijtyë ënäˈktëjk kyujuundäˈäktë nyaa 60 jëmëjtëp, mët tyamë ndiempëˈäjtëm. Extëm nˈokpëjtakëm, tëëyëp myëmääy myëdäjtëp ijty ja uˈunktääk uˈunkteety ko yˈuˈunk yˈënäˈk jyuˈuktët, yˈuuktët o yˈats pyuttët tim tëgatsy. Per tyam, mä notisyë nmëdoˈojëm diˈib jantsy atsëˈëk ajawë extëmë tyäˈädë: Tuˈugë mixy diˈib 15 jyëmëjt diˈib eskuelëˈäjtp, kyudujë mä myëguˈuktëjk diˈib mëët yˈeskuelëˈaty, nimajtsk dyaˈooky ets nimäjk tëgëëk dyajtsayuty. O ko tuk grupë ënäˈktëjk diˈib mukëdëp, axëëk ttundë ets dyaˈooktë tuˈugë kixyuˈunk diˈib taxtujkë jyëmëjt ets nanduˈun axëëk ttundë ja kixyuˈungë tyeety etsë myëguˈuk. Nuˈun kujk nyaxy mäjk jëmëjt, jap Asia yajnigajpxy ko mä tuˈugë pyaˈis yëˈë ënäˈktëjk diˈib kajaa nyikëjxmˈäjttëp ko jyaˈˈatyë axëkˈäjtën. ¿Mbäät pën jyënaˈany ko kyaj të myëjwindëkë axëkˈäjtën?

11. ¿Tiko mayë jäˈäy kyaj tpëktë kuentë ko niˈigyë tijaty myäˈtˈadëtsnë?

¹¹ Apostëlë Pedro duˈun ojts tnaskäjpxë: “Ko naty tyimminanë ja Jesus, mnijäˈtëdëp yëˈë jäˈäyëty diˈibë jikyˈäjttëp mëdë yˈaxëk winmäˈäny esë kyëˈëmtsojkën, es yëˈëjëty mdukxiˈigëdëp miitsëty es jyënäˈänäˈändë: Jesus wyandak ko myinäˈäny jatëgok, ¿këdii? Pes, ¿mä net? Yëˈë nˈaptëjkˈäjtëm të yˈoˈknëdë, per dëˈënyëm wyeˈemy tëgekyë nandëˈën extëmë naty ko yëˈë naxwinyëdë tsyondaky” (2 Peed. 3:3, 4). ¿Tiko näägë jäˈäy duˈun jyënäˈändë? Wenë, ko xëmë tijaty tyuny jyatyëty kyaj mëjˈixy mëjmëdoy nˈokjäˈäwënë. Per ko ajotkumonë tuˈugë mëtnaymyaayëbë dyajtëgatsyë jyaˈayˈäjtën xyajmonyˈijx xyajmonyjäˈäwëm. Tyam, wanaty wanaty myäˈtˈadëˈëtsyë jukyˈäjtën ets mbäät kyaj nbëjkëmë kuentë, per oy ko nmëjpëjtakëm, mët ko kujotmay.

12, 13. 1) ¿Tiko kyaj mbäät nˈëxtëkëwäˈkëm ko nˈijxëm tijaty tuun jäjtëp yä Naxwiiny? 2) ¿Ti mbäät nwinmäˈäyëm parë nmëmadakëm ja tiempë diˈib tsip nimëjää diˈibë Pablo ojts tnaskäjpxë?

¹² Apostëlë Pablo ojts tnigajpxy ko “mä jaˈa xëë tiempo [...] kyëxaan tyëgoyaanëjëny” tsiptäˈägäämbë nety ja jukyˈäjtën (2 Tim. 3:1, Nuevo Testamento de Mazatlán). Per kyaj jyënany ko kyaj mbäät nmëmadakëm, pääty kyaj tiko ntsëˈkëm ets nˈëxtëkëwäˈkëm. Mët yëˈëgyëjxmë Jyobaa nyaybyudëkë, yˈespiritë santë etsë naymyujkën mbäät xëmë nmëduˈunëmë Dios ets nmëmadakëm oytyim diˈibëtyë jotmay. Mët ko Dios yëˈë diˈib xymyoˈoyëmë mëkˈäjtën diˈib jantsy mëjwiin jantsy kajaa (2 Kor. 4:7-10).

¹³ Ko Pablo ojts tnaskäjpxë tijatyë nety tunan jatanëp mä xëë tiempë jyëjpkëxanë, ta dyajtuunyë tyäˈädë ayuk “nijawë”. Diˈib xytyukˈijxëm ko seguurë yˈadëwäˈäny diˈib yˈakkujäˈäyë. Tyam, niˈigyë myëjwindëkë axëkˈäjtën axtë ko Jyobaa dyajjëjptëgoyët. Okwinmay wiˈixë ëxpëkyjyaˈay tijaty tkujäˈäyëdë, yëˈë tnimaytyaktë ko mä näägë nasionk mëk axëëgë jäˈäy dyajtuˈuyoˈoynyëdë jyukyˈäjtënë, yëˈë nety yajnigëxëˈkypy ko tim tsojk kyutëgoyaˈany. Ets duˈunën tyam, niˈigyë jäˈäy axëëk jyukyˈäjnëdë. Waˈan may kyaj tmëjpëjtäˈäktë tiko duˈun tyuny jyatyëty, per ko niˈigyë myëjwindëkë axëkˈäjtën desde 1914, yëˈë yajnigëxëˈkypy ko Diosë yˈAnaˈam Kyutujkën tim tsojk dyajtëgatsäˈänyë jukyˈäjtën.

KYAJ NYAXÄˈÄNYË TYÄˈÄDË TUKNASˈYAAK TUKNASKAˈAXËBË

14-16. ¿Tiko seguurë nˈijtëm ko tim tsojk myinäˈänyë Diosë yˈAnaˈam Kyutujkën extëmë myëdëgëk pëkypyë të nˈijxëm?

¹⁴ Myëdëgëk pëky tiko mbäät nˈijtëm seguurë ko wingoonëp ja kutëgoˈoyën, yëˈko nnijäˈäwëm ti të tyuny të jyatyëty mä Diosë kyäjpn. Extëm nˈokpëjtakëm, mä netyë Diosë yˈAnaˈam Kyutujkën kyanaxkëdaˈakynyëm jam tsäjpotm, tuk grupë Dios mëduumbëty diˈib nëjkxtëp tsäjpotm tyukxoon tyukˈijttë Diosë tyuunk. ¿Per ti tyuundë ko kyaˈˈadëëy diˈibë nety yˈawijxtëp tyun jyatëdët 1914? Nimaybyë, duˈunyëmë Jyobaa tmëduundë. Ets oyë jäˈäy pyajëdijtëdë o yˈaxëkˈijxëdë, myëmadaktë, xëmë tmëduundë Dios nuˈun jyukyˈäjttë yä Naxwiiny.

¹⁵ Jesus duˈun ojts tnaskäjpxë mä tiempë jyëjpkëxäˈäny: “Tëyˈäjtën nˈanëëmëdë ko tëgekyë tyäˈädë jyatäˈänyëty määnëmë naty ja jäˈäyëty diˈibë tyam [“mä tyäˈädë tuknasˈyaak tuknaskaˈaxëbë”, TNM] kyaj yˈooktënëm” (Mat. 24:33-35). Ko Jesus jyënany “mä tyäˈädë tuknasˈyaak tuknaskaˈaxëbë”, yëˈë myaytyak majtsk grupë jäˈäyëty diˈib nëjkxtëp tsäjpotm. Ja tim jawyiimbë grupë, yëˈë diˈib yˈijxtë tijaty tuun jäjtë 1914 ets jyaygyujkëdë ko mä tadë jëmëjt, ja netyë Jesus të tyëkë anaˈambë. Mä jëmëjt 1914 o mä tkatukjäˈtynyëm, ja duˈun mä yajwinˈijxtë mët yëˈëgyëjxmë espiritë santë extëmë Diosë yˈuˈunk (Rom. 8:14-17).

¹⁶ Ja myëmajtskpë grupë diˈib “mä tyäˈädë tuknasˈyaak tuknaskaˈaxëbë”, nanduˈun yajwinˈijxtë mët yëˈëgyëjxmë espiritë santë ets ta nety yˈakjukyˈattë ja myëguˈuktëjk yä Naxwiiny diˈib tim jawyiin yajwinˈijxtë. Pääty, pënaty nëjkxtëp tsäjpotm diˈib ja akjukyˈäjttëp kyaj niˈamukë tyëkëdë mä diˈibë Jesus nyigäjpx ko jyënany “mä tyäˈädë tuknasˈyaak tuknaskaˈaxëbë”. Pes tyam, tam myëjjäˈäyëndë ja myëmajtskpë grupë diˈib yajwinˈijxtë parë nyëjkxtët tsäjpotm. Pääty ko Jesus jyënany mä Matewʉ 24:34, ko “tyäˈädë tuknasˈyaak tuknaskaˈaxëbë” kyaj nyaxäˈäny, yëˈë xytyuknijäˈäwëm ko mä kyatsondaˈakynyëm ja mëk ayoˈon, taanëmë nety yˈakjukyˈattë niduˈuk nimajtsk. Tyäˈädë, yëˈë xyaˈijtëm seguurë ko waanë tiempë yˈakwëˈëmy parë Jesukristë, ja Rey diˈib tuump mä Diosë yˈAnaˈam Kyutujkën dyajkutëgoyëdë axëkjäˈäytyëjk ets dyajminëdë jembyë jukyˈäjtën mä yajtunäˈänyë tëyˈäjtën (2 Peed. 3:13).

TIM TSOJKË JESUKRISTË MYADÄˈÄGÄˈÄNY

17. ¿Wiˈixë net xyajwinmäˈäyëm tijaty të nˈijxëm?

¹⁷ ¿Nˈijxëm tyam wiˈix yˈadëy diˈib tëgëk pëky ojts yajnaskäjpxë mä Biiblyë? Jesus ojts tnigajpxy ko kyaj nnijäˈäwëm ti xëë ti oorë myinäˈänyë kutëgoˈoyën (Mat. 24:36; 25:13). Per extëmë Pablo jyënany, nnijäˈäwëm “wiˈixë dëˈën ja tiempë yˈixyëty” (käjpxë Romanʉs 13:11). Tyam, yëˈë ndukjukyˈäjtëmë tiempë diˈib jëjpkëxanëp. Pën nˈëxpëjkëm diˈib ojts yajnaskäjpxë mä Biiblyë ets pën nˈijxëm tijatyë Jyobaa mëdë Jesus tyuundëp, yëˈë xypyudëkëyäˈänëm parë nnijäˈäwëm ko wingoomp mä jyëjpkëxäˈänyë tyäˈädë jukyˈäjtën.

18. ¿Wiˈix jyatäˈändë pënaty kyaj tpuwäˈägëdë ja Rey diˈibë Dios të tpëjtaˈaky?

¹⁸ Pënaty kyaj tkupëktë ko Jesukristë yëˈë diˈib myëdäjtypyë kutujkën diˈib tyukˈunyaapy ja poop kuääy, tim tsojk tˈëxkapäˈändë tyëgoˈoyën, ets kyaj mbäät tkugaˈaktë ja kutëgoˈoyën diˈibë Dios yajmiimpy. May jyënäˈänäˈändë mëdë tsëˈëgë: “¿Pën mbäät tmëmadaˈaky?” (Diˈibʉ Jat. 6:15-17). Mä Diˈibʉ Jatanʉp kapitulo 7 jap tˈatsoojëmbity. Pënaty nëjkxtëp tsäjpotm ets pënaty jukyˈatandëp yä Naxwiiny, yëˈë diˈib myëmadäˈägandëp mët ko të netyë Jyobaa kyupëkëdë. Ta net “tëgoy myay ja jäˈäy” ja wiinkpë borreegëty nyitsoˈogäˈändë mä ja mëk ayoˈon ets nyaxäˈändë mä ja jembyë jukyˈäjtën (Diˈibʉ Jat. 7:9, 13-15).

19. ¿Ti yˈawijx jyëjpˈijxtëp pënaty yˈëxkäjptëp ets kyupëjktëp ko wingon yˈijnë ja kutëgoˈoyën?

¹⁹ Pën nbëjtakëmë jot winmäˈäny mä wiˈix tyam yˈadëy tijaty ojts yajnaskäjpxë mä Biiblyë, ta kyaj xyajtuˈudujkëm tijatyë Satanás yajjaˈäjtypy yä Naxwiiny ets nëjkxëp nbëjkëmë kuentë tijaty tyam tuun jäjtëp abëtsemy nyaxwinyëdë. Kristë tim tsojk dyajkäˈpxäˈänyë tyuunk ets dyajjëjptëgoyaˈanyë tyäˈädë axëëkpë jukyˈäjtën ko nety tyunyëty ja tsip diˈib xyëˈäjtypy Armajedon (Diˈibʉ Jat. 19:11, 19-21). ¡Jantsy oy diˈib nˈawijx njëjpˈijxëm! (Diˈibʉ Jat. 20:1-3, 6; 21:3, 4.)

[Dibujë diˈib mä pajina 29]

Niˈigyë myäˈtˈadëˈëtsy ja tiempë ko wyingoonˈadëtsnë ja diˈib tyukˈunyaaytyëbë kuääy (Ixë parrafo 4 etsë 5)