PËNATY KYÄJPXTËBË ËXPËJKPAJN YËˈË NYIJAWËYANDËP

¿Tiko Dios tnasˈixë ets pënaty myëdäjttëbë kutujkën tˈaxëktunët diˈib kyaj tmëdatyë madakën?

Mä Biiblyë myaytyakypy näägë jäˈäy diˈib myëdäjttë kutujkën ets ttuundë axëëk diˈib kyaj tmëdatyë madakën, extëm yajtuunyë Nabot. Ja rey Acab diˈib ojts yˈaneˈemy naa jaa mä jëmëjt 940 mä kyajnëm myinyë Jesus, ojts tnasˈixë parë ja nyëdoˈoxy Jezabel, dyaˈoogëdë Nabot mëdë yˈuˈunk yˈënäˈk parë ja rey tjaˈabëkët ja yˈuubës kam (1 Reyes 21:1-16; 2 Reyes 9:26). ¿Tiko Dios tnasˈixë etsë jäˈäy axëëk dyajtunëdë kyutujkën?

Tuk pëky, yëˈko Dios kyaj mbäät yˈandaˈaky (Titʉ 1:2). Per ¿tiko Dios nmaytyakëm ets pën yëˈë yam nˈijxëm ko jäˈäy axëëk dyajtundë kyutujkën? Wenë, ko Dios ojts dyajkojˈyë naxwinyëdë jäˈäy, ta ojts tˈanëëmë ko ooktëp pën kyaj myëdowdë, ets duˈunën tyuun jyäjtë. Desde ko jyamˈäjtyë jotmay jam Edén, nituˈugë naxwinyëdë jäˈäy mbäät tkakugeˈegyë oˈk tëgoˈoyën. Ko yˈoˈkyë Abel, ja tim jawyiimbë naxwinyëdë jäˈäy, yëˈë duˈun ko Caín axëëk dyajtuunyë kyutujkën (Génesis 2:16, 17; 4:8).

Biiblyë jyënaˈany ko desde mä tadë tiempë “jäˈäy tˈaneˈemyë jäˈäy parë axëëk ttuny” (Eclesiastés 8:9). Extëm nˈokpëjtakëm, Jyobaa ojts tˈanëëmë ja israelitëty diˈibë nety kyäjpnˈäjtypy, ko myëdatandëbë yˈanaˈambëtëjk diˈib axëktunanëdëp ets ko nety duˈun jyattë, ta Dios tˈamdowäˈändë naybyudëkë (1 Samuel 8:11-18). Axtë ja rey Salomón tyëytyuun ja nax käjpn ko niˈigyë ttukˈyäjktë kyugëbety (1 Reyes 11:43; 12:3, 4). Etsë wiinkpë reyëty extëmë Acab, mas axëëk yˈadëtstë. Per okwinmayë netë tyäˈädë: koxyëbë Dios ojts tjëjpkuwäˈägë parë jäˈäy kyaj axëëgë kyutujkën dyajtundët, ¿këdii duˈunxyëbë Dios nyajxy ko andakp?

Satanás nanduˈun jyënaˈany ko jäˈäy tmëdundë Dios mët ko tijaty ttsoktë (Job 1:9, 10; 2:4). Koxyëbë Dios tkuwäˈäny pënaty mëduunëp ko jäˈäy axëëk tyunëdë diˈib myëdäjttëbë kutujkën, ¿këdii taxyëp tyëyˈäjtëndëkë extëmë Satanás jyënaˈany? Ets koxyëp tkuwäˈäny niˈamukë jäˈäy, taxyëp niˈigyë tmëbëktë ko mbäät këˈëm nyayˈanaˈamëdë ets kyaj pën pyudëkëdët. Perë Biiblyë jyënaˈany ko naxwinyëdë jäˈäy kyaj tmëdatyë madakën parë këˈëm nyayˈanaˈamëdët (Jeremías 10:23). Ntsojkëm parë myinëdë Diosë yˈAnaˈam Kyutujkën, pes yëˈëyë diˈib mbäät dyajjëjptëgoyë naytyëytyunë.

¿Yëˈë tyäˈädë yˈandijpy ko Dios kyaj ti tyam ttuny? Kyaj, ta majtsk pëky diˈib tyam tyuumpy. Tim jawyiin, kyäjpxtëˈkxypy tiko jäˈäy axëëgë kyutujkën dyajtundë. Extëm nˈokpëjtakëm, mä Biiblyë yajxon tnigajpxy wiˈixë Jezabel ttukniwinmäˈäyë ttunäˈänyë Nabot. Nan nyigajpxypy ko päätyë jäˈäy axëëk yˈadëˈëtstë, mët ko jyaajëty tuˈugë anaˈambë diˈib kumëjää diˈib kyaj nyayajnigëxëˈëgyëty (Fwank 14:30; 2 Korintʉ 11:14). Biiblyë jyënaˈany ko yëˈë Mëjkuˈu. Ko Dios tkäjpxtëˈkxy tiko jäˈäy axëëgë kyutujkën dyajtuny ets pënën duˈun tuktuunëp, ta nˈawäˈätspëtsëˈëmëm mä axëkˈäjtën. Duˈunën xypyudëjkëm parë nˈawijx njëjpˈijxëm ti miimp këdakp.

Myëmajtsk pëky, Dios xytyukwandakëm ko nipën axëëgë kyutujkën tkanekyyajtunäˈäny. Extëmë Dios ojts dyajnidëˈkxy, tpayoˈoy ets ttukumëdooyë Acab mëdë Jezabel, ets pënaty duˈun jäˈäyˈäjttëp, yëˈë xytyukˈijxëm ko mbäät nmëbëjkëm ti Dios të twandaˈaky: tkuentëwitsäˈäny niˈamukë axëkjäˈäy (Salmo 52:1-5). Nanduˈun ttukwandaˈaky pënaty tsojkëdëp, ko tim tsojk jyëjptëgoyaˈany amay jotmay diˈib jaˈäjtp.a Duˈunë duˈun, Nabot mëdë yˈuˈunk yˈënäˈk jyukyˈatäˈändë yä Naxwiiny ko nety të jyëmbity extëm tuˈugë it lugäärë tsujpë mä kyaj nyekyjaˈˈatäˈänyë naytyëytyunë (Salmo 37:34).

[Notë]

[Mä tmaytyaˈaky diˈib jëjpˈam pajina 31]

“Jäˈäy tˈaneˈemyë jäˈäy parë axëëk ttuny.” (Eclesiastés 8:9)

“Dios [...] kyaj yˈandaˈaky.” (Titʉ 1:2)