DIˈIB MIIMP MÄ NYIˈAK: ¿PËN MBÄÄT TNIJAWË TI DIˈIB MIIN KËDAKP?
Tijatyë jäˈäy të tnaskäjpxëdë të nääk yˈadëy, per may kyaj të yˈadëy
¿Mnijawëyaampy ti miin këdakp? Mayë jäˈäy jyanijawëyandëp. Pääty tijaty tjanaskäjpxëdë, per ta diˈib adëëp ets ta diˈib kyaj. Extëm nˈokpëjtakëm:
ËXPËKYJYAˈAYËTY kajaa dyajtundë meeny etsë oyatypyë aparatë parë tjanijawëyäˈändë, extëm wiˈixë kontaminasionk tˈaxëktunäˈänyë Naxwinyëdë ets pën tuˈujäämp jabom o kyaj.
PËNATY TIJATY MYAAYBYËTSËËM WYIJTSPËTSËËMDËP yëˈë tyuunkˈäjttëp parë tnaskäjpxëdë wiˈixë jäˈäy wyinmayäˈändë mä politikë ets diˈibë negosyë mëjwindëkëyäämp ets diˈibë kyaj. Warren Buffett, diˈib nanduˈun jantsy mëkjäˈäy abëtsemy nyaxwinyëdë, ja yaˈixyˈaty extëmë Orakëlë mët ko myaapy diˈibë negosyë mëjwindëkëyäämp. Etsë Nate Silver, yëˈë yajtuumbyë numero o informasion parë tnaskäjpxë tijaty, extëm mä politikë o pën diˈib yajmoˈoyäämbë premië diˈib të pyëtsëmy mä cine.
TIJATY TËËYËP YAJKUJÄˈÄYË të jäˈäy dyajniwij dyajnikajtë extëmxyëp yëˈëjëty diˈib të yajnaskäjpxë. Extëm mä siiglë 16, Michel de Notredame (Nostradamus) kyujäˈäyë diˈib jantsy tsip yajjaygyujkëp, per may tmëbëktë ko ta tyam yˈadëy. Nanduˈun may wyinmääytyë ko ja netyë ayoˈon tyunäˈäny jyatäˈänyëty 21 äämbë disiembrë 2012, mä kyugëjxë ja kyalendaaryë maya.
DIˈIB NYIWINTSËNˈÄJTTËBË RELIJYONK të tnaskäjpxëdë ko abëtsemy nyaxwinyëdë ayoˈon tyunäˈänyëty, per jeˈeyë parë jäˈäy tganaratäˈändë. Harold Camping diˈib nanduˈun nyaskäjpxëbë ayoˈon, oymyääjëty ojts tnigajpxy mëdë jyaˈayëty ko ja netyë Naxwinyëdë kyutëgoyaˈany 2011, per kyaj duˈun jyajty.
PËNATY JËNANDËP KO NYIJÄˈÄWËDËP TIJATY MIIN KËDAKP nyaynyigäjpxëdë ko myëdäjtëbë madakën parë tnaskäjpxët tijaty miimp. Extëm mä siiglë 20 tijaty ojts tnaskäjpxë Edgar Cayce etsë Jeane Dixon ojts yˈadëy tuˈuk majtsk, per may kyaj yˈadëëy. Extëmë Dixon ojts tnaskäjpxë ko mä jëmëjt 1958 tsyondäˈägäˈänyë Tercera Guerra Mundial, etsë Cayce jyënany ko Nueva York kyinäˈäny mejnyoty ko nety të nyaxyë jëmëjt 1970.
¿Mbäädëdaa yajxon nnijäˈäwëm ti tunan jatanëp mä tiempë myiny kyëdaˈaky? Oy ko duˈun nnayajtëˈëwëm. Koxyëp nˈoknijäˈäwëm tijaty tunan jatanëp tëgatsyxyëp njukyˈäjtëm, ¿këdii?