¿MNIJÄˈÄWËBË NETY?

Ko ijty yajkudëy kepykyëjxy ja axëkjäˈäytyëjk, ¿tiko yajtëjˈyë pyuuy etsë tyeky?

Mä Juan, jap jyënaˈany ko Jesus ojts yajkudëy kepykyëjxy mët nimajtskë axëkjäˈäy, ja judiyëtëjk ta tˈanmääytyë Pilato parë yajtëjtëdë pyuuy etsë tyeky ets ko nety të yˈooktë, ta dyajjënaktët (Fwank 19:31).

Ja Ley diˈibë Moisés yajmooy, duˈun ijty tniˈanaˈamë ko pën yajkudëëpy ja axëkjäˈäy kepykyëjxy, kyaj “mëbäät wyiˈimy tuˈktsuˈumbäät këxtëy” ja nyiniˈkx kyëbäjk (Deuteronomio 21:22, 23, Mʉgoxpʉ ja̱ noky mʉdiˈibʉ jyaayʉn Moisés). Ja judiyëtëjk waˈan yëˈëyëm ojts tpanëjkxtë tyäˈädë anaˈamën ko ijty ja romanë jäˈäy dyaˈooktë ja axëkjäˈäytyëjk. Extëmë Jesus yajkëxwojpy kepykyëjxy mët nimajtskë yetyëjk, ko yajtëjtët ja pyuuy etsë tyeky yëˈë nety parë pojënë yˈooktët ets nyaxtëkëdët mä kyajnëm ja Xëë tyëkë parë tsyondäˈägäˈäny ja sääbëdë xëë.

Ja axëkjäˈäy diˈibë nety të yajtuknikäjpxpetyë oˈkën, jawyiin ijty yajkëxwopy kepykyëjxy ja kyëˈë tyeky ets ko yajkëyeˈeky, ta ja jeˈemytsyˈäjtënë tyukëdaktäˈäyëty ets mëk ja jäj jëmuˈumën dyajnaxy. Kom kudëy wyeˈemy, kyaj mbäät nyekyxyejy pën kyaj ja tyeky ttukmadakpety mä ja klääbës yˈity. Pääty ko ijty yajtëjtë pyuuy etsë tyeky, kyaj ti mbäät tnekytyukmadakpattë, ta pojënë yˈooktë ko xyejyˈaduktë o wyindäjxtäˈäytyë.

¿Wiˈix ijty tëëyëp dyajtundë tiˈpxn ko jäˈäy tsyiptundë?

David ojts dyaˈoogyë Goliat mët tuˈugë tiˈpxn. Waˈanë David ja ttukjäjty dyajtunët ko byorreegë kuentˈäjty (1 Samuel 17:40-50).

Tyäˈädë tiˈpxn kyëxëˈëky mä ja dibujë diˈib yaˈoˈoyëdëbë Egipto jäˈäy etsë Asiria mä ja tiempë diˈibë Biiblyë myaytyakypy. Ko dyaˈoyëdë tyäˈädë tiˈpxn, yëˈë yajtuundëp tuk pedasë poˈo o wit ets pëˈääy bëˈääy tkëxtsuumdë ja tejpxyny. Ja diˈib yajtuumpy ja tiˈpxn, ta tpëjtaˈaky ja tsää itkujky mä të nyigojë, ja tsää naa mutsk duˈun extëm tuˈugë narankë diˈib jeˈemtsy naa tuk kuartë. Ta ja jäˈäy tmatsy ja tejpxyny tukˈaduˈumgëˈë ets kanäkˈok tjëduuˈawdity, ko tnasmatsë tuˈugë tejpxyny jëjp, ta ja tsää amëjää nyijkxy ets tëyë jyaˈty.

Mä kanäägë paˈis diˈib myëwingonˈäjtypyë Israel, të mayë tsää yajnitäjtuˈuty diˈib ijty tëëyëbë jäˈäy yajtuundëp mëdë tiˈpxn ko tsyiptundë. Tuˈugë jäˈäy diˈib jyajtypy tsyiptunët, amëjää ijty ja tsää dyajnëjkxy, naa ja 160 ets 240 kilometrë tuk oorëbë. Kyaj yajxon yajnijawë pën ja tiˈpxn nanduˈun ijty tyuny extëm ja arkë diˈib nanduˈun yajtuktiˈpxp, per nan yaˈoˈkp ijty (Jueces 20:16).

[Dibujë mä pajina 31]

Dibujë mä asiria dyajtuundë tiˈpxn ko tnibëdëˈktë ja judiyë käjpn diˈib nabotsy

[Yëʼë të dyakyë dibujë]

© Erich Lessing/Art Resource, NY