TUˈUGË JÄˈÄY MYAYTYAˈAKY MËDË JYOBAA TYESTIIGË

Jyobaa tyestiigëty, ¿myëbëjktëbë Jesus?

Diˈib yä nˈixäˈänëm, yëˈë wiˈix tuˈugë jäˈäy myaytyaˈaky mëdë Jyobaa tyestiigë. Nˈokpawinmäˈäyëm ko ja Testiigë txëˈaty Antonio ets diˈib myëtmaytyakypy txëˈaty Luis.

JËJPˈAM NMËBËJKËMË JESUS

Antonio: Wiˈix jyaty Luis.

Luis: Kyaj niwiˈix.

Antonio: Yëˈëjëts nmëmiimbyë rebistë jemyatypyë Diˈib Xytyukˈawäˈänëm etsë ¡Despertad! Seguurë ko mˈoymyëdowaampy tijaty myaytyakypy.

Luis: Dyoskujuyëm. Oy ko të miny, tam ti diˈib njayajtëwaampy.

Antonio: ¿Ets ti?

Luis: Tëgokëts ndukmetmaytyakyë nmëguˈuk diˈibëts mëët nduny ko jantsy oyë rebistë myaytyaˈaky diˈib myäjktëp. Per tajëts xyˈanmääy ko kyaj yˈoyëty etsëts ngäjpxët, mët ko Jyobaa tyestiigëty kyaj tmëbëktë Jesus. Tajëts nˈanmääy ko nyajtëwäˈäny. Ets ¿jantsy tëyˈäjtën ko kyaj xymyëbëktë Jesus?

Antonio: Oy kojëts xyajtëy. Pes parë nnijäˈäwëm ti myëbëjkypy tuˈugë jäˈäy, oy ko këˈëm nyajtëˈëwëm, ¿këdii?

Luis: Tëyˈäjtën.

Antonio: Ëëtsëty Jyobaa tyestiigëty nmëbëjktëbëtsë Jesus. Ets nan nmëbëjktëbëts ko kyaj mbäät nnitsokëm pën kyaj nmëbëjkëmë Jesus.

Luis: Nanduˈuntsë nety nwinmay. Per kom tëgatsyëts të nyaˈˈanëëmë, pääty yam nyajtëy. Etsë tyäˈädë, kyajnëm nimaytyakëm.

Antonio: Mbäät ndukˈixy tuˈuk majtskë tekstë diˈib yajpatp mä Biiblyë mä tmaytyaˈaky tiko jyëjpˈamëty nmëbëjkëmë Jesus. Tyäˈädë tekstë yëˈëjëts xëmë nyajtuundëp kojëtsë jäˈäy nmëtmaytyäˈäktë.

Luis: Aber tukˈijxkëts.

Antonio: Min jawyiin nˈokˈijxëm mä wiˈix këˈëmë Jesus tˈanmääy niduˈugë yˈëxpëjkpë. Yajpääty mä Fwank 14:6, jyënaˈany: “Ëjtsë dëˈën extëm tuˈugë tuˈu, ëjtskyëjxmë jäˈäy jyäˈttë mä Dios Teety”. Extëm jyënaˈanyë tyäˈädë tekstë, ¿wiˈix mbäät nmëwingoˈonëmë nDeetyˈäjtëm?

Luis: Mët yëˈëgyëjxmë Jesus.

Antonio: Duˈunë duˈun. Ets duˈuntsën nmëbëktë. Per kom nan mnijäˈäwëbë Biiblyë, ¿pën xyëëgyëjxm mbäät nuˈkxtakëm?

Luis: Xyëëgyëjxmë Jesus, ¿këdii?

Antonio: Duˈunë duˈun. Pääty kojëts xëmë nnuˈkxtaˈaky, ndunyëts xyëëgyëjxmë Jesus. Ets nan duˈun ttundë niˈamukë Testiigëty.

Luis: Kyajtsë nety nnijawë.

Antonio: Min nˈokˈijxëm wiˈix jyënaˈanyë Fwank 3:16. Tyäˈädë tekstë yëˈë mä wanaty tnimaytyaˈaky wiˈixë Jesus jyukyˈajty ets wiˈix ojts kyäjpxwaˈkxy yä Naxwiiny. ¿Mbäät xykyajpxy?

Luis: Oy tiko këdii. “Jaˈa ko yëˈë Dios nëgoo oj tˈoktsojknë ja naxwinyëdë jäˈäyëty, pääty ttuknigejxy ja tyuˈukˈUˈunk, es pënaty myëbëjktëp jikyˈattëp winë xëë winë tiempë es kyaj kyutëgoytyët.”

Antonio: Dyoskujuyëm. ¿Të näˈä xyˈokkäjpxpë tyäˈädë tekstë?

Luis: Tëjëts nˈokmëdoobë tsäjptëgoty.

Antonio: Mayë jäˈäy nyijäˈäwëdëbë tyäˈädë tekstë. Min nˈokˈijxëm ti yˈandijpy. Jesus jyënany ko yëˈëgyëjxm ko Dios ojts xytsyojkëm, mbäät njukyˈäjtëm winë xëë winë tiempë, per ¿ti tsojkëp?

Luis: Mëbëjkën.

Antonio: Duˈunë duˈun, tsojkëp nmëbëjkëmë Jesukristë, Diosë tyuˈukˈUˈunk. Ets mä rebistë Diˈib Xytyukˈawäˈänëm diˈib të nmoˈoy, mä pajina 2, jap jyënaˈany ko tsojkëp nmëbëjkëmë Jesus parë nbatëmë jukyˈäjtënë winë xëë winë tiempë. Ets tuk pëky jyënaˈany ko tyäˈädë rebistë pyëtsëmy parë jäˈäy tmëbëktëdë Jesukristë ja diˈib tuump Rey mä Diosë yˈAnaˈam Kyutujkën, diˈib ojts xykyuˈoˈkëm parë nbatëmë jukyˈäjtën winë xëë winë tiempë.

Luis: Jantsy taptëm tnigajpxy ko mëbëjktëbë Jesus.

Antonio: Duˈun.

Luis: Per ¿tiko jäˈäy tëgatsy mnimaytyäˈägëdë?

Antonio: Mbäädëts tëgatsy xynyimaytyäˈäktë, mët ko näägë jäˈäy yëˈëyë pyagäjpxtëp extëmë jäˈäy jyënäˈändë. O waˈan duˈun të yajtukniˈˈixëdë tsyäjptëgoty.

Luis: O waˈandaa duˈun jyënäˈändë mët ko mxëˈattë Jyobaa tyestiigëty ets kyaj Jesusë tyestiigëty.

Antonio: Pes waˈandaa.

Luis: ¿Ets tiko xëmë xynyimaytyäˈäktë Jyobaa?

“TËJËTS YËˈËJËTY NDUKNIJAWËDË MXËË”

Antonio: Yëˈko Dios txëˈaty Jyobaa, ets nmëbëjktëbëts ko jëjpˈam etsëts nyajtundët. Jesus yajtuun, njatukˈixaampy wiˈix tëgokë Tyeety tˈanmääy ko tmënuˈkxtaky. ¿Mbäät xykyajpxyë Juan 17:26, mä Traducción del Nuevo Mundo?

Luis: Oy tiko këdii. “Tëjëts yëˈëjëty nduknijawëdë mxëë ets nduknijawëyandëbëts parë ja tsojkën diˈibëts mëët të xytsyeky yˈitët mët yëˈëjëty etsëts nˈitët tuˈugyë mët yëˈëjëty”.

Antonio: Dyoskujuyëm. ¿Të xypyekyë kuentë ko Jesus ojtsë jäˈäy ttuknijawë Diosë xyëë? ¿Tiko duˈun ttuuny?

Luis: Kyajts nnijawë.

Antonio: Wenë, min nˈokkäjpxëm jatuˈugë tekstë mä Traducción del Nuevo Mundo, Hechos 2:21, jyënaˈany: “Niˈamukë pënaty yˈëxtääytyëbë naybyudëkë xyëëgyëjxmë Jyobaa nëjkxëp nyitsoˈoky”. Extëm nˈijxëm, parë nbatëmë nitsokën, tsojkëp ngäjpxëm o nyajtuˈunëmë Diosë xyëë. Seguurë ko Jesus nyijäˈäwëbë nety tyäˈädë.

Luis: Jantsy tëyˈäjtën.

Antonio: Jesus jëjpˈam tˈijxy parë ja yˈëxpëjkpëty tnijawëdët ets dyajtundëdë Tyeetyë xyëë, net tpäättët ja nitsokën. Ets päätyëts xëmë nimaytyäˈäktë Jyobaa. Parë ëëtsëty jëjpˈam etsë jäˈäy tˈixyˈattët ets dyajtundëdë Diosë xyëë.

Luis: Perë jäˈäyëty nyijäˈäwëdëp pënën Dios, oy tkanijawëdë ti txëˈaty o tkakäjpxtë xyëë.

Antonio: Waˈandaa, perë Dios të xytyuknijäˈäwëmë xyëë parë mbäät pojënë nmëwingoˈonëm.

Luis: Per kyajëts njaygyukë ti mmaytyäˈägaampy.

Antonio: Okwinmayë tyäˈädë. Kyajxyëp tyim jëjpˈamëty nnijäˈäwëm pënën Moisésˈäjt. Mbäätxyëp jeˈeyë yaˈixyˈajty extëm tuˈugë yetyëjk diˈib yajnaywyäˈkxë ja mejnyë Tsaptspë o extëm tuˈugë yetyëjk diˈib yajmooy mäjkë Mandamientë. O extëmë Noé, ¿tiko yajnijäˈäwë xyëë? Mbäätxyëp jeˈeyë ojts yajnigajpxy ko yëˈë tuˈugë yetyëjk diˈib kyoj ja arkë, yajnitsokë fyamilyë etsë jëyujk animal. Etsë Jesukristë, mbäätxyëp jeˈeyë yaˈixyˈajty extëm diˈib tsoˈon tsäjpotm parë ojts tkuˈoogë poky kaytyey, ¿këdii?

Luis: Jantsy tëyˈäjtën.

Antonio: Perë Dios të xytyuknijäˈäwëm tijatyë tyäˈädë jäˈäy txëˈäjttë. Pääty nmëbëjkëm ko jantsy jukyˈäjttë. Ëtsäjtëm, ninäˈä ojts ngaˈixyˈäjtëmë Moisés, Noé etsë Jesus. Per ko nnijäˈäwëm ti txëˈäjttë, ta nmëbëjkëm ko jantsy jukyˈäjttë.

Luis: Tëyˈäjtën extëm mjënäˈäny, kyajtsë nety duˈun nwinmay.

Antonio: Päätyëts xëmë nyajtundë Jyobaa xyëë, yëˈko ntsojktëbëts parë jäˈäy tmëbëktët. Ntsojktëbëts parë tmëbëktët ko jantsy tamën yajpäätyë Dios ets ko mbäät tmëwingondë. Per nan nmëbëjktëbëts ko nyajtëgoyˈäjtëmë Jesus parë nnitsokëm. ¿Mbäät ndukˈixyë wiinkpë tekstë mä duˈun tnimaytyaˈaky?

Luis: Oy, tiko këdii.

Antonio: Të nˈokkäjpxëmbë Fwank 14:6 mä Jesus jyënany: “Ëjtsë dëˈën extëm tuˈugë tuˈu, ëjtskyëjxmë jäˈäy jyäˈttë mä Dios Teety, ëjtskyëjxmë jäˈäy tnijawëdë ja tëyˈäjtën, ëjtskyëjxmë jäˈäy jyikyˈattë”. Per minë net nˈokkäjpxëmë Fwank 14:1. Okkäjpx mä jyëjpkëxy.

Luis: Oy, jyënaˈany: “Pëjtäˈäktë tiˈigyë mjot mwinmäˈäny mä Dios es nandëˈën mä ëj”.

Antonio: Dyoskujuyëm. Extëm jyënaˈanyë tyäˈädë tekstë, ¿mä mbäät nbëjtakëmë jot winmäˈäny, mä Dios o mä Jesus?

Luis: Jesus ojts jyënaˈany ko duˈun mä Dios ets mä yëˈë.

Antonio: Duˈunë duˈun. Seguurë ko mijts nan mwinmaapy ko kyaj jeˈeyë tsyekyëty nmëbëjkëm. Tsojkëp nyajnigëxëˈkëm mä jukyˈäjtën.

Luis: Jantsy tëyˈäjtën.

Antonio: ¿Ets wiˈix mbäät nyajnigëxëˈkëm? Wiˈix xyˈokˈixy pën ja nimaytyakëm kojëts jatëgok nminët.a

Luis: Oy tiko këdii.

¿Ja ti xynyijawëyaˈany diˈib myaytyakypyë Biiblyë? ¿Mnijawëyaampy ti diˈib myëbëjktëp o tyuundëbë Jyobaa tyestiigëty? Pën duˈun, ¿tiko xykyayajtëy ko nety jatëgok mëët mnaybyaatyëty? Yëˈëjëty mdukmëtmaytyäˈäganëdëp.

[Notë]

[Mä tmaytyaˈaky diˈib jëjpˈam pajina 29]

Kyaj mbäät nnitsokëm pën kyaj nmëbëjkëmë Jesus