¿Wiˈixë Dios dyajjëjptëgoyaˈanyë axëkˈäjtën?

Biiblyë yajxon tnigajpxy ko Jyobaa mëdë yˈUˈunk Jesukristë dyajjëjptëgoyaˈanyë ayoˈon diˈibë Satanás yajjaˈäjtypy. Päätyë Jesus yajkejxy yä Naxwiiny parë “dyajkutëgoyaˈany diˈibë ja mëjkuˈugopk tyiimpy” (1 Fwank 3:8). Jëjptëgoyäämp tijaty tyam jaˈäjtp extëm ko jäˈäy nyayˈaxëkˈixëdë, ko yˈatsoktë ets ko jyaˈˈatyë axëkˈäjtën. Jesus nanduˈun jyënaˈany ets “yajkutujkënjuudët diˈibë yä naxwiiny anaˈamp” ets kyutëgoyët (Fwank 12:31). Ko nety kyaj nyekyˈaneˈemy, ta Dios dyajtsondäˈägäˈäny tuˈugë jembyë jukyˈäjtën etsë Naxwinyëdë tyuktukäˈäny mëdë jotkujkˈäjtën etsë tuˈugyëˈäjtën (2 Peedrʉ 3:13).

Per ¿wiˈix jyatäˈändë pënaty kyaj dyajtëgatsäˈändë jyukyˈäjtën ets duˈunyëm ttuunˈadëˈëtstë axëkˈäjtën? Biiblyë tˈatsoojëmbity: “Yëˈëyë oyjyaˈay jukyˈatäämp naxwiiny, ets yëˈë wëˈëmäämp ja diˈib kyaj tyëgoˈoyën. Ja axëkjäˈäyëty, yajpoˈtëˈëgandëp naxwiiny; ets pënaty winˈëˈëndëp yajwijxëˈëgandëp” (Proverbios 2:21, 22). Duˈunë duˈun, jëjptëgoyäämp tukëˈëyë axëkˈäjtën ets jyaˈˈatäˈänyë jotkujkˈäjtën. Ta pënaty mëdoodëp nyiwäˈätsäˈänëdë poky kaytyey wanaty wanaty (Romanʉs 6:17, 18; 8:21).

Dios kyaj dyajjëjptëgoyaˈanyë axëkˈäjtën mët ko xyajjëmbitäˈänëm extëmë robot ets xypyëjkëyäˈänëm ja awäˈätstumˈäjtën diˈib nmëdäjtëm parë nwinˈijxëm ti ndunäˈänëm. Yëˈë xytyukniˈˈijxëm ja yˈanaˈamën ets xypyudëjkëm parë nmastutëm ja tuˈunën ets ja jot winmäˈäny diˈib axëktuump.

¿Ets wiˈixë Dios dyajjëjptëgoyaˈanyë ayoˈon diˈib ajotkumonë tuun jäjtëp ets mëjwiin kajaa xyaˈˈayoˈojëm? Yëˈë të twandaˈaky ko tim tsojkë yˈAnaˈam Kyutujkën tkëˈamˈatäˈänyë Naxwinyëdë, ets të twinˈixyë Jesukristë extëmë rey parë yˈanaˈamët, yëˈë diˈib myëdäjtypyë mëkˈäjtën parë dyaˈˈagëdäˈägëdë päˈäm jäˈäy (Matewʉ 14:14). Nan myëdäjtypyë mëkˈäjtën parë tjëjpkudijët tijaty ayoˈonbëjtakp (Markʉs 4:35-41). Kyaj nyekyjaˈˈatäˈäny ja tiempë mä tijaty tyuny jyatyëty “diˈib kyaj nˈawijx njëjpˈijxëm” (Eclesiastés 9:11). Ko nety yˈaneˈemyë Jesus, nitii jäˈäy kyayaˈˈayowäˈänyëty (Proverbios 1:33).

¿Ti diˈib yˈawijx jyëjpˈijxtëp miyonkˈamë jäˈäy diˈib të yˈooktë mët ko yˈayoˈonbäättë? Mä netyë Jesus tkayajukypyekynyëm ja myëtnaymyaayëbë Lázaro, ta jyënany: “Ëjtsë dëˈën ja jikypyëjkën es ja jikyˈäjtën” (Fwank 11:25). Duˈunë duˈun, Jesus myëdäjtypyë mëkˈäjtën parë dyajjukypyëkët niˈamukë jäˈäy diˈib të yˈooktë.

¿Tiko xykyaˈëxpëkyë Biiblyë pën mjukyˈatäämp mä kyaj oyjyaˈay axëëk nyekyjatäˈäny? Jap niˈigyë xynyijawët wiˈixë Diosë tëyˈäjtënbë yajnimaytyaˈaky ets tijaty tyuknibëjtakëp. Jyobaa tyestiigëty diˈib mä mnax mgäjpn, xondaˈakyˈää xondaˈakyjyot mbudëkëyäˈänëdë. Oy ko xyˈëxtäˈäytyët o xynyijayëdët pënaty yajpëtsëëmdëbë tyäˈädë rebistë.