BIBLIOTEKË MÄ INTERNET Watchtower
Watchtower
BIBLIOTEKË MÄ INTERNET
ayuk
Ä
  • Ä
  • ä
  • Ë
  • ë
  • Ʉ
  • ʉ
  • BIIBLYË
  • ËXPËJKPAJN
  • REUNYONK
  • w14 1/7 paj. 4-6
  • ¿Tiko axëëk jyattë oyjyaˈay?

Kyaj ti bideo.

Kyaj mbäät yaˈixyë bideo.

  • ¿Tiko axëëk jyattë oyjyaˈay?
  • Diˈib Xytyukˈawäˈänëm Yëˈë nyigajpxypyë Jyobaa yˈAnaˈamën 2014
  • Subtítulo
  • Diˈib naa duˈumbë myaytyakypy
  • KO NYAJPATËM MÄ TUˈUGË LUGÄÄR DIˈIB KUTSËˈËGË ETS MÄ KYAJXYËP MBÄÄT NYAJPATËM
  • ¿YËˈËDAA JÄˈÄY MYËDÄJTYPYË POKY?
  • ¿WAˈANDAA YËˈËJËTY KO JÄˈÄY TMËBËKTË KARMA?
  • ¿PËNËN DIˈIB NYIKËJXMˈÄJTYPY?
  • ¿Tiko nëgoo tyim jaˈäjnë ayoˈon?
    ¿Ti xytyukniˈˈijxëmë Biiblyë?
  • ¿Wiˈixë Dios dyajjëjptëgoyaˈanyë axëkˈäjtën?
    Diˈib Xytyukˈawäˈänëm Yëˈë nyigajpxypyë Jyobaa yˈAnaˈamën 2014
  • ¿Tiko Dios tnasˈixë ets jyaˈˈatëdë ayoˈon tsäätsyjäjtën?
    ¿Ti tëyˈäjtën jantsy tukniˈˈijxëbë Biiblyë?
  • ¿Tiko nëgoo tyim jaˈäjnë axëkˈäjtën etsë ayoˈon?
    ¡Jukyˈat agujk jotkujk winë xëëw winë tiempë! Nijawë tijatyë Biiblyë tukniˈˈijxëp
Akˈixë wiinkpë
Diˈib Xytyukˈawäˈänëm Yëˈë nyigajpxypyë Jyobaa yˈAnaˈamën 2014
w14 1/7 paj. 4-6

DIˈIB MIIMP MÄ NYIˈAK

¿Tiko axëëk jyattë oyjyaˈay?

Jyobaaa yëˈë tukëˈëyë tijaty të dyajkojtäˈäy ets yëˈë tukëˈëyë mëkˈäjtën myëdäjtypy, pääty mayë jäˈäy yëˈë tyuknikëjxmˈäjttëp tijaty tuun jäjtëp yä Naxwiiny, axtë tukëˈëyë axëkˈäjtën. Perë Biiblyë nyigajpxypy wiˈixë Dios jyaˈayˈaty:

  • “Jyobaa tëyˈäjtën myëët tijaty ttuny mä tukëˈëyë nyëˈë tyuˈu.” (Salmo 145:17.)

  • “Ak oy yëˈë winë ttuny, ko tii ttuny ak yëˈë mëdiˈibë mëdëyën. Yëˈë Diosˈäjtp, ets yëˈë tëyˈäjtënˈäjtp, yëˈë nijënäˈä winë tëgaty tkatuny, ak yëˈë duˈun tyuumpy, mëdiˈibë oyën ets mëdiˈibë mëdëyën.” (Deuteronomio 32:4, Mʉgoxpʉ ja̱ noky mʉdiˈibʉ jyaayʉn Moisés [MNM].)

  • “Jyantsy pyaˈˈayoy yëˈë Nintsënˈäjtëm [Jyobaa].” (Santya̱ˈa̱gʉ 5:11.)

Tyäˈädë yëˈë xytyukˈijxëm ko Dios kyaj tijaty ttuny axëëk. Per ta diˈib winmaapy ko yëˈë jäˈäy tyuktuumbyë axëkˈäjtën. ¿Waˈan tyëyˈäjtënëty? Kyaj. Biiblyë jyënaˈany ko kyaj pën “jyënäˈänët ko Dios myoˈoyëtyë tadë winmäˈäny, mët ko kyaj pën mbäät ttuny esë Dios pyekytyunët, es kyaj Dios ti ttuny es ja jäˈäy pyekytyunët” (Santya̱ˈa̱gʉ 1:13). Dios kyaj jäˈäy tˈijxmatsy mët ko ttuktunyë axëkˈäjtën, kyaj tijaty axëëk ttuny ets ni yëˈë jäˈäy tijaty axëëk tkatuktuny. Pën kyaj yëˈëjëty, ¿pën mbäät nbokyˈijxëm?

KO NYAJPATËM MÄ TUˈUGË LUGÄÄR DIˈIB KUTSËˈËGË ETS MÄ KYAJXYËP MBÄÄT NYAJPATËM

Biiblyë nyigajpxypy tuk pëky tiko naxwinyëdë jäˈäy yˈayoy, jyënaˈany: “Mët ko tiempë ets tijaty tuun jäjtëp diˈib kyaj nˈawijx njëjpˈijxëm niˈamukë xytyukjäjtëm” (Eclesiastés 9:11). Ko tuˈugë ayoˈon tyuny jyatyëty o diˈib kyaj pën tˈawijx tjëjpˈixy, mbäät pën yˈayoˈonbääty pën yajpatp mä ja lugäär o mä ja tiempë mä ja ayoˈon meerë tyuny jyatyëty. Tam nyëjkxkojnë majtsk mil jëmëjt, ko Jesus tnimaytyaky tuˈugë potsy diˈib ojts kyëday ets 18 jäˈäy yˈoˈktë (Lukʉs 13:1-5). Kyaj yˈoˈktë mët ko axëëgë nety të jyukyˈattë, yëˈë duˈun mët ko wingon yajpattë mä ja potsy kyëdääy. Tyää näämnëm, eneerë mä jëmëjt 2010, nyajxy tuˈugë mëk ujx jap Haití ets jaa yˈoˈktë 300 milë jäˈäy extëmë gobiernë të twijtspëtsëmdë, mëj mutsk yˈoˈktë. Yuu päˈäm nan mbäät oypyënëty pyaatyëty ets oy nyäˈäjëty.

Mbäät pën nyayajtëyëty: “¿Tiko Dios ojts tkajëjpkuwäˈägë tyäˈädë ayoˈon? ¿Tiko ojts tkakuwäˈänyë oyjyaˈay mä ja ayoˈon?”. Parë Dios tjëjpkuwäˈägët, tsojkëp jawyiin tnijawët näˈä duˈun tyunäˈäny jyatäˈänyëty. Ets oy tjamëdatyë madakën parë tnijawët kontiempë tijaty miin këdakp, oy ko nnayajtëˈëwëm: ¿yajtuumbyë myëkˈäjtën parë tnigäjpxët tukëˈëyë tijaty tunan jatanëp? (Isaías 42:9.)

Biiblyë jyënaˈany: “NDiosˈäjtëm yajpääty tsäjpotm; Yëˈë tyuumpy tukëˈëyë diˈibë tsyojkënyëˈajtypy” (Salmo 115:3). Duˈunë duˈun, Jyobaa tyuumpy diˈib yˈijxypy ko tëgoyˈäjtp, per kyaj tukëˈëyë ttuny oy ja madakën tjamëdaty. Yëˈë kyaj näˈäty kontiempë tnijawëyaˈany ti diˈib miin këdakp oy tjamëdatyë madakën. Extëm ko Sodoma etsë Gomorra tyuktujky mëdë axëkˈäjtën, ta Dios tˈanmääyë Abrahán: “Tyamëts njënakäˈäny parëts nˈixäˈäny pën jantsy duˈunën jap yˈadëˈëtstë extëmëts xymyëjëˈëy xymyëyäˈäxtë. Ets pën kyaj, nëjkxëbëts nnijawë” (Génesis 18:20, 21). Tuk tiempë, Jyobaa kyaj tnijawëyany nuˈunë nety të myëjwindëkë axëkˈäjtën mä ja käjpn, tyäˈädë yëˈë xytyukˈijxëm ko Jyobaa kyaj tukëˈëyë tijaty tnijawëyaˈany kontiempë (Génesis 22:12). Per kyaj yëˈë tˈandijy ko Dios kyaj wyäˈäts jäˈäyëty o ko amääy amutsk yajpääty. Biiblyë jyënaˈany: “Ak oy yëˈë winë ttuny”, Jyobaa myëdäjtypyë madakën parë tnijawët tijaty kontiempë, per duˈun tijaty ttuny extëm yˈadëwët tijaty të ttuknibëjtäägë. Kyaj pën ttukˈaguanëˈaty parë yajmëmëdowëdë yˈanaˈamën (Deuteronomio 32:4, MNM).b Yajxonë net njaygyujkëm ko Jyobaa yëˈë diˈib wyinmaapy tijaty kontiempë nyigäjpxaampy ets tijaty kyaj.

¿YËˈËDAA JÄˈÄY MYËDÄJTYPYË POKY?

Ko jyaˈˈatyë axëkˈäjtën nan yëˈë naxwinyëdë jäˈäyë pyoky. Biiblyë nyimaytyakypy wiˈixë axëkˈäjtën tsyondaˈaky axtë ko jäˈäy pyokytyuny, jyënaˈany: “Jaˈagyëjxmë jäˈäy pyekytyunäˈändë ko ja yˈatsojkën nyaytyukwinˈëënëdë, es mët ja kyëˈëmtsojkën nyayajtëgoyëty. Ko jäˈäy ttsoktë diˈibë kyaj yˈoyëty, jaa myiny ja pojpë; es ko tyäˈädë pojpë myëjwindaknë, jaa myiinnë ja oˈkën” (Santya̱ˈa̱gʉ 1:14, 15). Duˈunë duˈun, ko jäˈäy ttunyë axëkˈäjtën diˈib tsyojkënyëˈajtypy, mbäät mëjwiin kajaa yˈaxëktunyëty. Ets mët ko pyokyjyaˈayëty mbäät dyajmëjwindëkë axëëkpë tsojkën ets dyajjaˈˈaty mëjwiin kajaa jotmay (Romanʉs 7:21-23). Duˈunën yaˈixy nuˈun kujkë tiempë nyaxy, ko jäˈäy ttundë mëjwiin kajaa axëkˈäjtën, ta dyajjaˈˈaty mëjwiin kajaa ayoˈon. Ets kyaj yëˈëyëty, nanduˈunë axëkjäˈäy ttuktundë tijatyë myëguˈuktëjk, ta nanduˈun jyaˈayˈattë axëëk ets pääty kyaj nyekyjëjptëgoy (Proverbios 1:10-16).

Ko jäˈäy mëjwiin kajaa ttundë axëkˈäjtën, ta dyajjaˈˈaty mëjwiin kajaa ayoˈon

¿Mbäädëdaa Dios tjëjpkuwäˈägë ets kyaj jäˈäy tnekytyunëdë axëkˈäjtën? Wenë, nˈokwinmäˈäyëm wiˈixë Dios të xyajkojëm. Biiblyë jyënaˈany ko të xyajkojëm extëm yëˈë ets pääty mbäät duˈun njäˈäyˈäjtëm (Génesis 1:26). Nan të xymyoˈoyëm tuˈugë regalë: ja awäˈätstumˈäjtën parë nwinˈijxëm ti ndunäˈänëm. Mbäät nwinˈijxëm pën ntsokäˈänëmë Jyobaa ets pën nmëmëdowäˈänëmë yˈanaˈamën (Deuteronomio 30:19, 20). Koxyëp aguanë ti xytyuktunäˈänëm, ¿këdii yëˈëxyëp xypyëjkëm ja regalë diˈib të xymyoˈoyëm? ¿Këdii duˈunxyëp nyajpatëm extëmë robot diˈib yajtuknibaˈanëp ti tyunëp? Nanduˈunxyëp jyaty koxyëp të yajtuknibëjtäägë ti diˈib ndunäˈänëm ets wiˈix njatäˈänëm. Oy ko nmëjjäˈäwëm ko Dios tnasˈixë parë këˈëm nwinˈijxëm diˈibë nëˈë tuˈu nbanëjkxäˈänëm. Perë tyäˈädë kyaj yëˈë tˈandijy ko xëmë nˈayowäˈänëm mët ko ndëgoˈoyëm ets mët ko jäˈäy kyaj oy tijaty ttundë.

¿WAˈANDAA YËˈËJËTY KO JÄˈÄY TMËBËKTË KARMA?

Koxyëp nyajtëˈëwëm tuˈugë hindú o tuˈugë budista diˈib miimp mä tyäˈädë rebistë nyiˈak, seguurë ko yˈatsowäˈäny: “Ja oyjyaˈay axëëk jyat kyëbattë mët ko duˈun tniˈanaˈamë karma, ko yëˈë kyumëdoodëp tijaty të ttundë extëm të yˈokjukyˈäjtpëdë”.c

Parë yajxon njaygyujkëm, min nˈokˈijxëm wiˈixë Biiblyë tnimaytyaˈaky tiko jäˈäy yˈooky. Mä ja it lugäärë tsujpë, Edén, jam mä naxwinyëdë jäˈäy jyukyˈäjttsondaky. Ko Dios ojts dyajkojˈyë Adán, ja tim jawyiimbë yetyëjk, ta tˈanmääy: “Mijts mjëgyejpy xyjyëˈkxëty oy tyim mëdiˈibë ujts tsäˈämëty mëdiˈibë jap kamjotyën, mëdiˈibë tëy, käˈäp xyjyëˈkxëty yëˈë mëdiˈibë myëëtˈäjtypyën ja jot winmäˈäny oybyë ets ëxëëkpë, këdii xyjyëˈkxëty yëˈë tyëˈëm taabë kepy. Jaˈa ko pën mjëˈkxypy kopkpëky ko nëjkx mˈooky” (Génesis 2:16, 17, MNM). Koxyëbë Adán ojts tmëmëdoyë Dios ets koxyëp kyapokytyuuny, taxyëp jyukyˈaty winë xëë winë tiempë. Tyamë jäˈäy yˈooky mët ko Adán kyamëdooy. Ko tpattë yˈuˈunk yˈënäˈk ta nanduˈun yˈoˈktë ets axtë tyambäät “nidëgekyë ja jäˈäyëty yˈooktë” (Romanʉs 5:12). Pääty mbäät njënäˈänëm ko jäˈäy pyokytyuny, ta tkumëdoy mëdë oˈkën (Romanʉs 6:23). Biiblyë nanduˈun jyënaˈany: “Ko pën yˈooky, niˈiwaatsep jaˈa pyoky” (Romanos 6:7, Nuevo Testamento de Mazatlán). O ja tuk pëky njënäˈänëm, jaa jäˈäy tkumëdoodäˈäyë pyoky kyaytyey ko yˈoˈknë.

Mayë jäˈäy tmëbëktë karma ets pääty jyënäˈändë ko naxwinyëdë jäˈäy yˈayowdë. Pënaty duˈun myëbëjktëp, kyupëjktëbë yˈayoˈon jyotmay ets ko wiink jäˈäy yˈayoy ets kyaj tnekymyëmay tnekymyëdäjtë. Perë tyäˈädë tukniˈˈijxën kyaj jäˈäy tjotkujkmoˈoy ko kyaj nyekyjaˈˈatäˈänyë ayoˈon. Wyinmaytyë ko diˈib jeˈeyë jotkujkmooyëdëp, yëˈë ko pën myëdäjttëp oyë jot winmäˈäny ets tuˈugë oybyë ëxpëjkën, ta kyaj wiinktsoo nyekyjyukyˈäjttëgatstët. Perë tyäˈädë tukniˈˈijxën kyaj tyuˈugyë mëdë Biiblyë.d

¿PËNËN DIˈIB NYIKËJXMˈÄJTYPY?

[Dibujë diˈib mä pajina 6]

¿Mnijäˈäwëp ko diˈib nyikëjxmˈäjtypyë ayoˈon yëˈë Satanás “diˈibë anaˈamp yä naxwiiny”? (Fwank 14:30, OTJ)

Perë Satanás yëˈë mas niˈigyë nyikëjxmˈäjtypyë axëkˈäjtën, kyaj yëˈëjëtyë naxwinyëdë jäˈäy. Yëˈë tuˈugë anklës diˈibë nety myëmëdoobyë Dios, per kyaj ttuuny “diˈibë tëyˈäjtën” ets yëˈë diˈib yajtëjkë poky yä Naxwiiny (Fwank 8:44). ¿Ti tyuun? Nyiwinmäˈäyë tuˈugë tsip jam Edén (Génesis 3:1-5). Jesukristë ojts ttijy, “ja kaˈoybyë” ets “diˈibë anaˈamp yä naxwiiny” (Matewʉ 6:13; Fwank 14:30, Ja Oibyʉ Tʉiˈya̱jtʉn [OTJ]). Mayë jäˈäy yëˈë pyanëjkxtëbë Satanás. ¿Wiˈix? Ko yëˈëyë tmëjpëjtäˈäktë tijaty tsyojkënyëˈäjttëp ets kyaj tmëmëdowdë Jyobaa yˈanaˈamën (1 Fwank 2:15, 16). Biiblyë nanduˈun jyënaˈany ko “naxwinyëdë jäˈäy yˈity mä ja axëkjäˈäy dyajtunyë myëkˈäjtën” (1 Juan 5:19, Traducción del Nuevo Mundo). Per ta wiinkpë anklësëty diˈib nanduˈun të tyuundëgoytyë ets të tpuwäˈägëdë Satanás. Biiblyë jyënaˈany ko Satanás yëˈë “diˈibë wyinˈiˈimpy nidëgekyë ja naxwinyëdë jäˈäy” mëdë kyaˈoybyëtëjk ets yëˈë diˈib xymyoˈoyëm mëjwiin kajaa jäj jëmuˈumën (Diˈibʉ Jatanʉp [Apocalipsis] 12:9, 12). Päätyë Mëjkuˈu yëˈë duˈun diˈib niˈigyë nyikëjxmˈäjtypyë axëkˈäjtën.

Të yajxon nˈijxëm ko Dios kyaj yëˈë tpokyëty ko jäˈäy axëëk jyat kyëbattë. Nan kyaj yëˈë dyaˈˈayoyë jäˈäy. Niˈigyë të twandaˈaky ko dyajjëjptëgoyaˈanyë axëkˈäjtën extëm nˈixäˈänëm mä ja tuˈukpë artikulo.

a Biiblyë jyënaˈany ko Dios txëˈaty Jyobaa.

b Parë niˈigyë njaygyujkëm tiko Dios tnasˈixë ets jyaˈˈatëdë axëkˈäjtën, ixë liibrë ¿Ti tëyˈäjtën jantsy tukniˈijxëbë Biiblyë? kapitulo 11, diˈib yajpëtsëëmdëbë Jyobaa tyestiigëty.

c Parë niˈigyë xynyijawët mä tsyonëˈky tsyondakyë tyäˈädë tukniˈˈijxën diˈib mä karma, ixë foyetë ¿Qué nos sucede cuando morimos? pajina 8 axtë 12, diˈib yajpëtsëëmdëbë Jyobaa tyestiigëty.

d Parë niˈigyë xynyijawët wiˈixë Biiblyë jyënaˈany mä wiˈixë oˈkpë yajpäättë ets ti yˈawijx jyëjpˈijxtëp, ixë liibrë ¿Ti tëyˈäjtën jantsy tukniˈijxëbë Biiblyë? kapitulo 6 etsë 7.

    Ayuk ëxpëjkpajn (2004-2025)
    Yaˈˈadukë mguentë
    Tëkë mä mguentë
    • ayuk
    • Mbäädë wiinkpë xytyuknigexy
    • Configuración
    • Copyright © 2025 Watch Tower Bible and Tract Society of Pennsylvania
    • Wiˈix mbäät jeˈeyë tyuny
    • Wiˈix yajkuwäˈäny
    • Ix pën mgupëjkypy
    • JW.ORG
    • Tëkë mä mguentë
    Mbäädë wiinkpë xytyuknigexy