¡Të jyantsy myëjwindëkë axëkˈäjtën!

Smita,a tuˈugë toxytyëjk diˈibë jyëmëjt 35 etsë nety tsyëënë Daca (Bangladés), oypyënëty yˈixyˈäjtë ko jantsy oyjyaˈay. Niˈamukë netyë jäˈäy yˈixyˈatyëty ko jantsy agujk jotkujk yajpääty ets ko pyudëjkëbë jäˈäy parë tˈixyˈatëdë Dios. Ko pyatë tuˈugë mëk päˈäm, axëëgë fyamilyë jyantsy nyayjäˈäwëdë, pes ni jeˈeyëmë nety kyasëmäänë ko yˈoˈky.

James mëdë nyëdoˈoxy, ja netyë jyëmëjt naa 35 ets nanduˈunë nety yaˈixyˈattë extëmë Smita. Yëˈëjëty, japë nety tsyëënëdë Nueva York, diˈib wëˈëmp mä xëë pyëtsëmy. Tëgok ojts nyëjkxtë parë tkuˈixëyäˈändë myëtnaymyaayëbë diˈib tsënääytyëp Estados Unidos, jatsoo mä xëë tyëkë, per kyaj nyekyjëmbijttë mä tyëjk, pes yëˈë yaˈˈayoˈonbatëdë karrë ets yˈoˈktë, axëëk jyantsy nyayjäˈäwëdë fyamilyë etsë myëtnaymyaayëbë.

Tyam oypyënëty tpëkyë kuentë ko të myëjwindëkë ayoˈon etsë axëkˈäjtën, pes ko tyunyëtyë tsip mayë niwäˈäts jäˈäy yˈooktë etsë soldäädëtëjk. Etsë maˈtspë yajjäˈäyˈoˈkpë milˈamë jäˈäy dyaˈooktë diˈib kyaj ti ttuundëgoytyë. Nan mayë jäˈäy yˈooktë ko muum yˈayoˈonbäättë. Etsë päˈäm diˈib kyaj nyitsooy kyaj tˈixyë xëë jëmëjt etsë meeny sentääbë. Nanduˈun ko tijaty yˈayoˈonbëjtaˈaky tukëˈëyë nax käjpn dyajkutëgoy. Ets tyam niˈigyë myëjwindëkë nayˈaxëkˈixë etsë naytyëytyunë. Waˈanë duˈumbë jotmay të xypyaaty.

Pääty nnayajtëˈëwëm:

• ¿Tiko axëëk jyattë oyjyaˈay?

• ¿Yëˈë Diosë pyoky?

• ¿Ajotkumonëdaa tyuny jyatyëtyë ayoˈon, o yëˈë duˈunë naxwinyëdë jäˈäy yajjaˈäjttëp?

• ¿Waˈandaa yëˈëjëtyë karmab diˈib näägë jäˈäy myëbëjktëp?

• Pën jam tuˈugë Dios diˈib tukëˈëyë mëkˈäjtën myëdäjtypy, ¿tiko tkakuwäˈänyë oyjyaˈay?

• ¿Waˈandaa näˈä nëjkx jyëjptëgoyë axëkˈäjtën etsë ayoˈon?

Parë nnijäˈäwëm, tsojkëp jawyiinë tyäˈädë yajtëˈëwën yaˈˈatsoojëmbitët: ¿Tiko jyaˈˈatyë axëkˈäjtën? ¿Ets ti tyunaambyë Dios?