¿Wiˈixë yetyëjk kasäädë oy jyaˈayˈatët?
¿WIˈIX mbäät tuˈugë yetyëjk dyajnayjawëty jotkujkë nyëdoˈoxy? Mayë jäˈäy jyënäˈändë ko diˈib nyikëjxmˈäjtypy, yëˈë dyakëdë meeny sentääbë parë ja nyëdoˈoxy nyayjawëdët jotkujk. Per ¿tiko jyaˈˈatyë toxytyëjk diˈib kyaj nyayjawëty jotkujk oy jyayajmoˈoyë meeny sentääbë? Rosa diˈib tsënaapy España, duˈun tnimaytyaˈaky ja yetyëjk diˈib pyëjk: “Mayjyaˈay wyindum jantsy oy ijty jyaˈayˈaty, per kojëts jeˈeyë nimajtsk nyajpäättë jantsy axëëgëts ijty xytyuny”. Etsë Joy diˈib tsënaapy Nigeria jyënaˈany: “Ko ijty kyatuˈugyëtsë nwinmäˈäny mëdëtsë nyaˈay, tajëts xyˈanëëmë: Kuanë ko xytyunët wiˈixëts njënäˈäny, yëˈkots xynyaˈayˈaty”.
¿Wiˈix mbäät tuˈugë yetyëjk kasäädë ttuny ti nyikëjxmˈäjtypy? ¿Ti mbäät ttuny ja yetyëjk parë nyëdoˈoxy tjawët ko tsyejpy, ets tˈixëdë jyëën tyëjk extëm tuˈugë lugäär mä mbäät jyotkujkˈaty? (Rut 1:9.)
WIˈIXË BIIBLYË TMAYTYAˈAGYË KUTUJKËN DIˈIBË YETYËJK MYËDÄJTYPY
Dios tuˈugyë tˈixyë yetyëjk etsë toxytyëjk, per oy dyuˈunëty, Biiblyë jyënaˈany ko niduˈuk niduˈuk tëgatsyë tuunk tnikëjxmˈattë mä familyë. Ets ko tsojkëp ja toxytyëjk twintsëˈëgët “ja anaˈamën diˈib myëdäjtypyë nyaˈay” (Romanos 7:2, Traducción del Nuevo Mundo). Duˈun extëm mä tuˈugë empresë tam diˈib nyigëbäjkˈäjtypy, Dios nan të ttuknipëkyë yetyëjk parë yëˈë ttuˈumoˈoyëdë fyamilyë. Pääty yëˈë tnigëbäjkˈatyë nyëdoˈoxy (1 Korintʉ 11:3).
¿Wiˈix mbäät tuˈugë yetyëjk dyajtunyë kutujkën diˈibë Dios të myoˈoyëty? Éfesʉ 5:25 tˈatsoojëmbity: “Mtsoktëp yëˈë mˈuˈunk mnëdoˈoxyëty”. Ta net yˈakjënäˈäny duˈun extëm ja “Kristë ttsejky pënëty myëbëjktëp”. Ets oyë Jesukristë ninäˈä kyapëjky, mbäädë yetyëjk kasäädë pyudëkëdë yˈijxpajtën. Min nˈokˈijxëm.
JESUS PYËJTAKË IJXPAJTËN PARË YETYËJK KASÄÄDË
Jesus tyuunë mëjää parë jäˈäy tjotkujkmooy ets tpudëjkë. Duˈun tˈanmääy ja diˈibë nety määy täjtëp: “Nimiindëgëts [...] es ëjtsëts miits nmoˈoytyëp ja mboˈxtakn” (Matewʉ 11:28, 29). Yaˈˈagëdak ja jäˈäyëty diˈibë nety ayoodëp mëdë yuu päˈäm ets pyudëjkë parë tmëwingondëdë Dios. ¡Päätyë jäˈäy jyantsy myëwingonanëdë!
¿Wiˈixë yetyëjk kasäädë mbäät tpanëjkxtë Jesusë yˈijxpajtën? Ëxtäˈäyë winmäˈäny wiˈixë mnëdoˈoxy xypyudëkët. Mayë toxytyëjk duˈun nyayjawëdë extëmë Rosa, diˈib jënan: “Duˈunëtsë nyaˈay xyˈijxy extëmë tuumbë mosë”. Perë Kweku, jyënaˈany: “Xëmëtsë nnëdoˈoxy nyajtëy pën yajpudëkëyäämp. Kom mëkëts ntseky, xëmëts nduny tijaty jënoty tëgoty oyëts xykyaˈˈanëëmë”.
Jesus jyaygyujkë wiˈixë jäˈäy nyayjäˈäwë ets pyaˈˈayoo. Tuˈugë toxytyëjk diˈibë nety mäjmajtsk jëmëjt kujk yaˈˈayoyëtyë yuu päˈäm, tmëdooy ko Jesus tyuumbyë mëjˈäjtën, ta wyinmääy: “Mët yëˈëyë kots nnaytyukpäädëdë yëˈë wyit, agëdäˈägëpts”. Ets tëyˈäjtënë nety jyënaˈany. Ko tmëwingoonyë Jesus ets ojts ttoonë ja wyit, ta netyë yˈagëdaky. Tamˈäjtë jäˈäy diˈib winmääytyë ko tyëjkë mä kyaj pyaatyëty, perë Jesus jyaygyujkë ko tyäˈädë toxytyëjk të netyë myaˈkxtujkënë kyëjxnë.a Pääty tˈanmääy: “Të mˈagëdaˈaky”. Tyäˈädë yëˈë xytyukˈijxëm ko Jesus yëˈë tuˈugë yetyëjk diˈib naybyëjtakë extëmxyëp yëˈë duˈun jyaty (Markʉs 5:25-34).
¿Wiˈixë yetyëjk kasäädë mbäät tpanëjkxtë Jesusë yˈijxpajtën? Ko ja mnëdoˈoxy oy kyanayjawëdët, oy ko niˈigyë xypyudëkët ets xymyëmaˈkxtukët, jaygyukë tiko duˈun jyaˈayˈaty. Ricardo jyënaˈany: “Xëmë kojëts nˈixyë nnëdoˈoxy jyotˈambëkäˈäny mët waanë ti, mëkëts nnaygyuentˈatyëty parëts kyaj nyajpëtsëmëdë ää ayuk diˈib axëëk yajnayjawëdëp”.
Jesus käjpx maytyak mëdë yˈëxpëjkpëty. Duˈun tˈijxy extëmë myëtnaymyaayëbëty ets jekyë tiempë dyajnäjxy parë mëët kyäjpx myaytyaktë. Duˈun tˈanmääytyë: “Të ndukˈixtë tëgekyë diˈibëts ja nDeety ëj të xytyukˈixy” (Fwank 15:15). Näˈätyë Jesus yajpäädan naytyuˈuk parë wyinmääy ets nyuˈkxtaky, per xëmë yajpaty mëdë yˈëxpëjkpëty parë ttuknijäˈäwë ti nety wyinmaapy. Extëm ja ux mä nety yajkëyakanë parë yˈoogët extëm tuˈugë axëkjäˈäy, ta tˈanmääy ja yˈëxpëjkpëty ko määy täjpë nety mëjwiin kajaa (Matewʉ 26:38). Ets xëmë ojts tmëtkajpxy tmëtmaytyaˈaky, oy ttuundë diˈibë nety kyaj tˈoyˈixy (Matewʉ 26:40, 41).
Ko xypyawinmayëdë Jesusë yˈijxpajtën, yëˈë mbudëkëyanëp parë mˈitët oy uˈunkteety ets xynyigëbäjkˈatët oyë mnëdoˈoxy
¿Wiˈixë yetyëjk kasäädë mbäät tpanëjkxtë Jesusë yˈijxpajtën? Mëtkäjpx mmëtmaytyäˈägë mnëdoˈoxy. Anëëmë ti mwinmaapy ets ti mjäˈäwëp. Mayë toxytyëjk jyënäˈändë ko nyaˈay jantsy agäjpx amaytyäˈäk ko yajpäättë mëdë wiink jäˈäy, per jyënoty tyëgoty uumën yˈittë. Ana jyënaˈany ko nyaˈay tyukmëtmaytyaˈagyëty ti wyinmaapy ets ti jyäˈäwëp, ta tjawë ko jantsy tsojkëp ets ko tuˈugyë yˈittë.
Ninäˈä xykyayaˈˈayowëdë mnëdoˈoxy mët ko amonyë mˈitët. Tuˈugë kasäädë toxytyëjk jyënaˈany: “Koogoots ijtyë nyaˈay xytyukjotˈambëky, kanäk xëë nyaxy ets kyajts xynyekymyëgajpxy. Duˈunëts xyajnayjäˈäwë ko ëjtsë poky nmëdäjtypy ets ko kyajts xyˈixäˈäny”. Perë Edwin, tyuumbyë mëjää parë tpanëjkxë Jesusë yˈijxpajtën, jyënaˈany: “Kojëts njotˈambëky, kyajts netyë nˈatsoy. Maˈkxtujkpëts parëts ok nyaˈoyë ja jotmay”.
Joy, diˈib të yˈokˈyajmaytyakpë, të tpëkyë kuentë ko të tyëgatsyë nyaˈay mä juˈunëm tˈëxpëjktsondakyë Biiblyë mëdë Jyobaa tyestiigëty. Jyënaˈany: “Kajaa të nyayaˈoyëty. Tyuumbyë mëjää parëts niˈigyë xytsyeky ets duˈun tpanëjkxyë Jesusë yˈijxpajtën”. Miyonkˈam kujkë kasäädë jäˈäy pyudëkëdë Biiblyë. ¿Mtsojkënyëˈajtypy ets nanduˈun mbudëkëdët? Anëëmë tuˈugë Testiigë ko mˈëxpëkaambyë Biiblyë ets namayˈäjtën xyˈëxpëkët.
a Extëm jyënaˈany ja Ley diˈibë Moisés yajmooy, tyäˈädë toxytyëjk kyaj nety wäˈäts yajpääty mët ja päˈäm diˈib myëdäjtypy, pääty ko pën tyonëdët nanduˈunë nety jyëmbitäˈäny axëëk (Levítico 15:19, 25).