Këdii xymyëmay xymyëdäjy

BIIBLYË KYÄJPXWIJËN: “Katë mnaytyukjotmaytyunëdë” (Matewʉ 6:25).

¿Ti yˈandijpy? Jesus yëˈë duˈun jënan mä ja diskursë Sermón del Monte. Tuˈugë diksionaaryë diˈibë Biiblyë nyimaytyakypy jyënaˈany ko mä ayuk grieegë, naytyukjotmaytyuˈunëm, yëˈë yˈandijpy “wiˈixë jäˈäy nyayjawëty ko tmëmay tmëdäjy ja xon ayoˈon, ko jyaˈˈatyë yuu o ja jotmay diˈib pyatypy tuˈuk tuˈugë xëë”. Diˈib xëmë nmëmäˈäy nmëdäjëm, yëˈë ti miin këdakp. Ets kyaj wyiˈixëty ko nmëmäˈäy nmëdäjëm tijaty nyajtëgoyˈäjtëm o ja jäˈäy diˈib ntsojkëm (Filipʉs 2:20). Per ko Jesus jyënany: “Kyaj xymyëmay xymyëdäjtët”, yëˈë myaytyäˈägan ko kyaj nëgoo tijaty ndimmëmäˈäy ndimmëdäjëm axtë net xypyëjkënë tsuu mäˈäy ets kyaj nˈokjotkujkˈäjtënët (Matewʉ 6:31, 34).

¿Xypyudëjkëmë tyäˈädë käjpxwijën? Tiko këdii, tëyˈäjtën extëmë Jesus jyënany. Pes näägë liibrë diˈib yajtuundëbë doktoortëjk jyënaˈany ko tuˈugë jäˈäy tijaty tjantsy myëmay tjantsy myëdäjy, mbäät kyaj oy nyekytyuny tijaty mëët nyaymyatsyëtyë kyukoˈoxy (sistema nervioso simpático). Tyäˈädë mbäät tˈaxëktunyë niniˈkx këbäjk, mbäät tuˈugë jäˈäy pyaatyëtyë “ulsera, xyejy aduky o pyaatyëtyë päˈäm mä kyorasoon”.

Jesus ojts tuk pëky tnigajpxy tiko kyaj mbäät nëgoo nmäˈäy ndäjëm, pes kyaj ti nganaräjtëm. Yëˈë jyënany: “¿Pënë dëˈën mbäät dyajˈyony ja jyikyˈäjtën mët ko myay tyajy?” (Matewʉ 6:27). Ko yëˈëyë nmëmäˈäy nmëdäjëm tijaty xyjotmaytyuˈunëm, kyaj mbäät dyaˈoyë jukyˈäjtën ets nan kyaj mbäät dyajˈyony ni tuk segundë. Nan kyaj xëmë axëëk wyimbëtsëmy tijaty nbawinmäˈäyëm. Tuˈugë ëxpëkyjyaˈay jyënany ko nëgoobë xëë tiempë nyajtëgoˈoyëm ko nmëmäˈäy nmëdäjëm tijaty miin këdakp, pes tim näˈäty tyuny jyatyëty diˈib njëjptsëˈkëm.

¿Ti mbäät nduˈunëm parë kyaj xymyëmadakëmë mäˈäy täjën? Ndukˈijxpajtëmë Dios. Pën yëˈë yajjeˈxypyë joon jëyujk ets tsuj dyaˈity ja pëjy ujts, ¿këdii nan mbäät tkuentˈaty pënaty mëduunëp? (Matewʉ 6:25, 26, 28-30). Nan kyaj xymyëmay xymyëdäjët ti miimp këdakp, yëˈëyë wiˈix ja mxëë xyajnaxët. Jesus jyënany: “Kyaj xymyëmay xymyëdäjtët pën ti bom ëxtëjm miimp këdakp, jaˈa ko bom bom miits xymyëdattë diˈibë mmëmay mmëdäjëp”. Duˈunë duˈun, tuˈuk tuˈugë xëë yajwinguwäˈägë jotmay diˈib yajmëmääy yajmëdäjp (Matewʉ 6:34).

Pën nbanëjkxëmë Jesusë kyäjpxwijën, ta kyaj nˈaxëktuˈunëmë niniˈkx këbäjk ets nëjkxëbë Dios xymyoˈoyëmë “yˈagujkˈäjt jyotkujkˈäjtën” (Filipʉs 4:6, 7).