Ko xykyäjpxëdë Biiblyë, ¿ti mbäät xytyuny parë mas oy xyˈëxpëkët ets xytyukxondäˈägët?

JOSUÉ wyinguwäˈkëbë nety tuˈugë jotmay: twoowˈyoˈoyët ja israelitëty axtë dyajtëkëdët mä ja Nax diˈib Yajtukwandaktë, per tsiptäˈägäämbë nety. Jyobaa ta yˈanmääyë parë yˈitët amëk jotmëk ets ko tyukˈoybyëtsëmaampy tijaty tyuumpy. Nanduˈun tˈanmääy ets tmëmëdowët ja Ley ets tkäjpxët xëëny koots parë mbäät tkuytyuundäˈäy tijaty jap ijtp kujayë ets ko pën tyuumpy duˈun, ta oy jyukyˈatäˈäny ets ttunët tijaty mëdë wijyˈäjtën (Jos. 1:7, 8).

Mä tyäˈädë tiempë diˈib “ayoˈon mëët” ak näjxp, nan nwinguwäˈkëmë amay jotmayë mëjwiin kajaabë (2 Tim. 3:1). Per oy wyimbëtsëmäˈäny, pën nduˈunëm extëmë Jyobaa tˈanmääyë Josué. Ko ngäjpxëmë Biiblyë bom bom, xypyudëkëyäˈänëmë kyäjpxwijën parë nwinguwäˈkëmë amay jotmay.

Jeˈeyë ko nimay kyaj njäjtëm nˈëxpëjkëm ets nan ta nääk diˈib kyaj tjety tsyojkënyëˈattë. Per kom jëjpˈam ets nˈëxpëjkëmë Biiblyë, pääty oy ko nˈijxëm wiˈix nyaˈˈanmäˈäyëm mä rekuäädrë, “Oktun duˈun”. Jap xypyäädäˈänyë käjpxwijën diˈib mbudëkëyanëp parë mas oy mˈëxpëkët ets xytyukxondäˈägët ko xykyäjpxëdë Biiblyë.

Niduˈuk diˈib jyaayë Salmo, duˈun yˈëëy: “Jamës woownëjkxk ma ja mˈënäˈämën mtëyajtën yajpaatyën, jäˈä ko jotkujkës jam nnäjyawëty” (Sal. 119:35, TY). Ko mijts xyˈëxpëkëdë Diosë yˈAyuk, nan mbäät mëjwiin kajaa xytyukxondaˈaky. Kanäk pëky xypyäädäˈäny diˈib tsobatp extëmë oorë platë ko niˈigyë xyˈëxpëkët.

Tyam, kyaj xywyoowˈyoˈoy tuˈugë käjpn extëmë Josué, per mwinguwäˈkëbë amay jotmay. Pääty extëm ttuunyë Josué, ëxpëk tijaty wëˈëm jääybyety ets padun. Ko duˈun xytyunët, nëjkxëp oy mjukyˈaty ets xytyunët tijaty mëdë wijyˈäjtën.