Diˈib nayajtëˈëjëm

◼ ¿Tijaty mbäät nduˈunëm niˈamukë parë yajxon nmëdoˈoˈijtëm tijaty näjxp mä naymyujkën? (Deu. 31:12.)

Kom nwintsëˈkëmë Jyobaa ets nmëjjäˈäjëm ja naymyujkën, ta niˈamukë njäjtëm tsojk ets nˈijtëm listë parë Jyobaa xytyukniˈˈijxëm. Oy ko nbatëmë lugäär jëjpˈam ets nyajwëˈëmëm diˈib ëxˈääy parë nmëguˈukˈäjtëm diˈib jamë yˈuˈunk yˈënäˈk o diˈib näˈäty ok jäjttëp. Ko ja ëxpëjkën tsyondäˈägët, oy ko nyajpiˈtsëm extëmë selulaar o wiinkpë aparatë parë kyaj nyaˈamët. Ko niˈamukë nyaˈijxëm ja mayˈäjt wintsëˈkën mä ja naymyujkën, ta nëjx yajxon nmëdoˈogujkëm tijaty näjxp (Ecl. 5:1; Fili. 2:4).

Ko jäˈäy myinët mä naymyujkën, oy ko tuˈugë nmëguˈukˈäjtëm diˈib yˈixyˈajtypy yˈuˈunyët mëët. Ets niˈigyë mbäät yajpudëkë pën miimp mëdë yˈuˈunk yˈënäˈkë mutskatypyë diˈib apenënëm yˈijxwëˈëmaampy. Pën apenënëm myindë mä naymyujkën, mbäät oy nyayjawëdët ko yˈuˈunyëdët ëxˈääy. Duˈun mbäät tmëbëtsëmdë ja yˈuˈunk yˈënäˈk ets ja nmëguˈukˈäjtëm tmëdooˈittët yajxon tijaty jam näjxp (Pro. 22:6, 15). Kyaj mbäädë uˈunktääk uˈunkteety yˈuˈunyëdë wiinktsoo mä ja yˈuˈunk yˈënäˈk nyayjawëdët ko mbäät nyaˈamdë. Oy ko tmëbëtsëmdët parë nëjx ttukjaygyukë o tˈixy ti naybyudëkë tsyejpy ja yˈuˈunk yˈënäˈk, ta jatëgok tmëdëkëdët mä ja ëxpëjkën nyaxy.

Yëˈë nmëguˈukˈäjtëm diˈib xymyoˈoyëmë lugäär nan tuundëp parë wintsëˈkën myëët tyuˈuyoˈoyët ja ëxpëjkën. Myooytyëbë lyugäär duˈun diˈib tsojk jäjttëp ets duˈun diˈib ok. Ets yajxon tˈixtë wiˈix twoonëjxtë mä ja lyugäär pënaty ok jäjttëp, net ja nmëguˈukˈäjtëm diˈib jam myëdooˈijttëp kyaj wiinktsoo tpëjtäˈäktët ja yˈijxkujk jyaygyujkën. Nan yajxon wyinmaytyë wiˈix tijaty ttundët ko jyapˈatët ti jotmay. Ets tsuj yajxon dyaktë naybyudëkë ko tuˈugë ënäˈkuˈunk kyaj yajxon yˈuˈunyë.

Niˈamukë mbäät nyaˈijxëmë wintsëˈkën parë yajxon nmëdoˈoˈijtëm tijaty näjxp mä naymyujkën, ets duˈun nˈixyˈäjtëmë Jyobaa ets nijäˈäjëm wiˈix dyajminäˈäny ja jembyë jukyˈäjtën mä jyamˈatäˈäny jotkujkˈäjtën (Ebre. 10:24, 25).