Pudëkëdë mˈuˈunk mˈënäˈk parë Dios mëdundët
1. Extëm jyënaˈanyë Salmo 148:12, 13, ¿ti net mbäät ttundë uˈunktääk uˈunkteety?
1 Jyobaa tsyejpy etsë ënäˈkuˈunk myëjkumayëdët (Sal. 148:12, 13). Päätyë uˈunktääk uˈunkteety diˈib Dios mëduundëp kyaj jeˈeyë ttukniˈˈixëdë yˈuˈunk yˈënäˈk ja tëyˈäjtënë diˈib yajpatp mä Biiblyë ets ja anaˈamënë diˈibë Dios yajjaˈäjtypy. Nanduˈun ttukniˈˈixëdë wiˈix yˈëwäˈkx kyäjpxwäˈkxtët. Per ¿wiˈix mbäät tpudëkëdë wanaty wanaty parë tmëdundëdë Dios?
2. ¿Wiˈix mbäädë uˈunk ënäˈk pyudëkëdë ja ijxpajtënë diˈib yäjktëbë tääk teety?
2 Oybyë ijxpajtën. Ja fes Jedeon tˈanmääy ja 300 yetyëjk: “Jattë ko xyˈixtët wiˈixëts tijaty nduny” (Jue. 7:17). Nanduˈunë ënäˈkuˈunk yëˈë jyäjttëp ets nyiˈˈijxtuttëp wiˈixë tyääk tyeety tijaty ttundë. Extëm nˈokpëjktakëm, tuˈugë nmëguˈukˈäjtëm diˈib tuump koots, mbäätxyëp jyamäˈäy sääbëdë jopy, perë tyäˈädë nmëguˈukˈäjtëm, ta twoonëjkxtäˈäy ja yˈuˈunk yˈënäˈk tëjkˈayeˈebyë oy nuˈun yˈanuˈkxë. Ni tukˈää wiˈix tkaˈˈanëëmë, mëdë yˈijxpajtën ttukˈixy ko jëjpˈamë Diosë tyuunk yajtunäˈäny (Mat. 6:33). Pääty, ¿yˈijxtëbë mˈuˈunk mˈënäˈk ko mdukxondakypyë Diosë tyuunk, extëm ko mnejkxy ëwäˈkx käjpxwäˈkxpë, mgomentaraty mä naymyujkën, mnuˈkxtaˈaky ets ko xykyajpxyë Biiblyë? Kyaj mwäˈäts jäˈäyëty, per pën yˈijxtëp ko mjotmoobyë Diosë tyuunk, mbäät ja mˈuˈunk mˈënäˈk nëjkx tmëdundë Jyobaa (Deu. 6:6, 7; Rom. 2:21, 22).
3. ¿Wiˈix mbäädë tääk teety tpudëkëdë yˈuˈunk yˈënäˈk parë tpëjktäˈäktëdë wyinmäˈäny mä Diosë tyuunk?
3 ¿Tijaty mbäät ttukniˈˈixëdë parë wyinbattët? Tääk teety kyaj tmëtsipkaˈaxtë yˈuˈunk yˈënäˈk parë tijaty ttukniˈˈixëdë extëm ko yoˈoyëˈëktë, kyäjpxëˈëktë ets axtë nyaywyit nyayxyoxëdë. Ets ko tˈixtë ko tam tuk peky të tjattë, ta netë wiinkpë tˈaktukniˈˈixëdë. Ets pën Dios mëduundëp ja tääk teety, ta tpudëkëdë yˈuˈunk yˈënäˈk parë tpëjktäˈäktëdë wyinmäˈäny ets tmëdundëdë Dios, duˈun extëm ja xyëë jyëmëjt tmëdattë etsë wyijyˈäjtën (1 Kor. 9:26). Pääty, ¿mdukniˈˈijxëbë mˈuˈunk mˈënäˈk parë kyomentarattët kyëˈëm ää kyëˈëm ayuk ets dyaˈoyëdët këˈëmë dyiskursë diˈib patëdëp mä Yajniˈëxpëkë Diosë Tyuunk? (Sal. 35:18). ¿Mdukniˈˈijxëp parë ttundët oytyim diˈibëtyë Diosë tyuunk? ¿Mˈanmaapy ets tpëjktäˈägëdë wyinmäˈäny parë nyëbatët o tmëdunëdë Dios extëmë prekusoor? ¿Mˈawoomujky mˈawijtsmujkypy mëdë Dios mëduumbë diˈib tyukˈijt tyukxoondëbë Diosë tyuunk diˈib mbäät pyudëkëdë? (Pro. 13:20.)
4. ¿Wiˈix nëjkx ttukˈoyˈattë uˈunk ënäˈk ko mutsknëm yajtukniˈˈixëdët tmëdundëdë Dios?
4 Diˈibë Salmo jyaay jyënany: “Dios, mijtsëts të xytyukniˈˈixë mäjëts nˈënäˈkˈäjty, ets axtë tyambäädëts nnigajpxy nimaytyaˈaky wiˈix jyantsy yˈoyëty tijaty mduumpy” (Sal. 71:17). Pääty, tukniˈˈijxëtsyondäˈäktë mˈuˈunk mˈënäˈk mä tyam myutskˈattë parë tmëdundëdë Dios. Ko duˈun xytyukmëyaak xytyukmëbatët, yëˈë nëjkx pyudëkëdë ko naty myëjjäˈäy myëˈˈënäˈkëndë (Pro. 22:6).