¿Ijttëp listë mˈuˈunk mˈënäˈk?
1. ¿Tiko jyëjpˈamëty etsë mˈuˈunk mˈënäˈk yˈittët listë?
1 Ta jatëgokë ënäˈk tyëkëyäˈändë eskuelë. Seguurë ko tëgatsy ja jotmay diˈib pyäädandëp o diˈib yajtuktunandëp, per ja mä nanduˈun mbäät tnimaytyäˈäktë “diˈibë dëˈën tëyˈäjtën” (Fwank 18:37). ¿Ijttëp listë mˈuˈunk mˈënäˈk?
2. ¿Tijaty mbäädë mˈuˈunk mˈënäˈk tnijawëdë parë yˈittët listë?
2 ¿Nyijäˈädëp yajxonë mˈuˈunk mˈënäˈk tijaty xëë tsoˈomp mä relijyonk diˈib kyaj tyëyˈäjtënëty o wiingatypyë xëë extëm nˈokpëjtakëm ko yajnixëdunyë bandeerë? ¿Jyaygyujkëdëp tiko kyaj yˈoyëty? ¿Nyijäˈädëp wiˈix yˈatsowdët ko pën yˈanëˈëmxëdët ets yˈakˈëxpëktët mä unibersidad o nyoobyë tmëdattët, yˈuugët o tjëˈxëdë droogë? ¿Nyijäˈädëp wiˈix tnimaytyäˈäktëdë myëbëjkën o jeˈeyë jyënäˈändë ko yajkubojkypyë ryelijyonk? (1 Peed. 3:15.)
3. ¿Wiˈix mbäät ja uˈunktääk uˈunkteety tpudëkëdë yˈuˈunk yˈënäˈk mä Diosˈawdattë mëdë Fyamilyë?
3 Tundë duˈun mä mDiosˈawdattë mëdë mFamilyë. Seguurë ko mbudëkëyaambyë mˈuˈunk mˈënäˈk ko net tpäättëdë amay jotmay mä eskuelë. Per pën mbudëjkëdëp mä kyatëkëdënëm, ta tnijawëdët ti tyundëp. Pääty, ¿tiko tiempë xykyajuuttë mä mDiosˈawdattë mëdë mFamilyë parë xyˈixtët wiˈix xypyudëkëdët? Mbäät xyajtëwdë mˈuˈunk mˈënäˈk ti mas jotmaytyuunëdëp ko jatëgok tyëkëyäˈändë eskuelë. Nan oy ko jatëgok xytyukjamyatstët diˈib ojts mëët xyˈokmaytyakpëdë, jaˈko ënäˈkuˈunk yaˈktëp ets niˈigyë wyinmäˈäny tyëkëdë (Sal. 119:95). Mbäät axtë xyˈadunaxtë, extëm mijts mnayajnaxëdët maˈestrë o ja myëguˈuk diˈib mëët yˈeskuelëˈattë. Tukniˈˈixëdë ja mˈuˈunk mˈënäˈk wiˈix dyajtundëdë Biiblyë, liibrë Razonamiento etsë volúmenes Los jóvenes preguntan ko pën ti yajtëwëdët. Tuˈugë uˈunktääk duˈun ijty ttuundaˈaky mëdë yˈuˈunk yˈënäˈk mä kyajnëm tyëkëdë eskuelë. Yëˈë ijty tyukniˈˈijxëp wiˈix ttukmëtmaytyäˈäktët ja jembyë myaˈestrëty ko yëˈë Testiigë. (Ixë La Atalaya 15 de diciembre 2010, pajina 3 axtë 5.)
4. ¿Ti tyuundëbë uˈunktääk uˈunkteety diˈib kuwijy?
4 Mä tyäˈädë tiempë diˈib jëjpkëxanëp niˈigyë ënäˈktëjk twinguwäˈägë amay jotmay ets niˈigyë tsyiptaˈaky (2 Tim. 3:1). Perë uˈunktääk uˈunkteety diˈib kuwijy, yˈijxtëp ti jotmay mbäät tpäättë yˈuˈunk yˈënäˈk ets ta net tpudëkëdë (Pro. 22:3). Pääty, pudëkëdë mˈuˈunk mˈënäˈk mä kyatëkë eskuelë ets yajxon tnijawëdët ti mbäät ttundë.