¿Ti jäˈäyˈäjtën myëdäjtypy diˈib jantsy oy yaˈëxpëjkp?
1. ¿Diˈibë jäˈäyˈäjtën myëdäjtypy ja diˈib oy yaˈëxpëjkp?
1 ¿Ti mbäät pyudëkëty pënaty oy yaˈëxpëkäämp? ¿Ëxpekyˈäjtën? ¿Tjatët tijaty? ¿Wijyˈäjt kejyˈäjtën? Kyaj, diˈib jëjpˈam myëdatëp yëˈë ja tsojkën. Tyäˈädë tsojkën yëˈë mëët yajpaduundäˈäy ja Ley ets yëˈë yajtukˈëxkäjp pënaty pyanëjkxtëbë Kristë, nan yëˈë tuˈugë Jyobaa jyaˈayˈäjtën diˈib wäˈkpëtsëëmp ets diˈib mas yaˈoyˈijxp (Fwank 13:35; Gal. 5:14; 1 Fwank 4:8). Duˈunë duˈun, parë oy nyaˈëxpëjkëm jëjpˈam nyaˈijxëmë tsojkën.
2. ¿Tiko jyëjpˈamëty ets ntsojkëmë jäˈäy?
2 Ntsojkëmë jäˈäy. Jesus, ja Mëj yaˈëxpëjkpë, tsyojkë jäˈäy, pääty ja jäˈäy tmëdooˈijttë wiˈix tyukniˈˈijxë (Luk. 5:12, 13; Fwank 13:1; 15:13). Pën ntsojkëmë jäˈäy, ta nmëtmaytyakëm oytyim määjëty. Kyaj xyajtuˈudujkëm ko xyˈaxëkˈijxëm o ko tkamëdowäˈändë. Nan nëjkxëp nmëdoˈoˈijtëm ti myëmääy myëdäjtëp ja jäˈäy diˈib nmëtmaytyakëm parë mbäät nbudëjkëm mëdë Diosë yˈayuk. Nan nëjkxëbë tiempë njuˈtëm parë nˈëxpëjkëm mëdë jäˈäy ets nanduˈun nikäjpxëm kontiempë ti mëët nˈëxpëkäˈänëm.
3. Ko ntsojkëm ja tëyˈäjtën diˈib mä Biiblyë, ¿wiˈix xypyudëjkëm mä ngäjpxwäˈkxëm?
3 Ntsojkëm ja tëyˈäjtën diˈib mä Biiblyë. Jesus tsyojk ja tëyˈäjtën diˈib yajpatp mä Biiblyë, ets yajtsobat (Mat. 13:52). Pën ntsojkëm ja tëyˈäjtën, ta ndukˈijt ndukxoˈonëm mä nimaytyakëm, ets nan nëjkxëp ndukninäjxëm ja xondakën pënaty nmëtmaytyakëm. Tyäˈädë tsojkën nan nëjkxëp xypyudëjkëm parë kyaj ntsëˈk njäˈäwëm, pes jam ja winmäˈäny nbëjtäˈägäˈänëm mä nuˈunën tsyobääty ja tëyˈäjtën ets kyaj nmëmäˈäy nmëdäjëm ko kyaj ti njäjt nnijäˈäjëm.
4. ¿Ti mbäät nduˈunëm parë nmëdäjtëm ja tsojkën?
4 Nˈokmëdäjtëm ja tsojkën. Parë ntsojkëmë jäˈäy jëjpˈam ets nwinmäˈäyëm wiˈix jantsy oˈktëy yajpäättë Dios windum, ets wiˈixë Jyobaa mëdë yˈUˈunk dyaktë ijxpajtënë mä dyaˈixëdë tsojkën (Mar. 6:34; 1 Fwank 4:10, 11). Parë nyajkëktëjkëm ja tsojkën mä tëyˈäjtën, jëjpˈam nˈëxpëjkëm anaytyuˈuk ets nwinmäˈäyëm. Nan ko njamyajtsëm ko tsojkën yëˈë yajkypyë Diosë myëjää (Gal. 5:22). Pääty parë nmëdäjtëmë tsojkën jëjpˈam etsë Jyobaa nmënuˈkxtakëm parë xypyudëjkëm ets xymyoˈoyëmë myëjää (Luk. 11:13; 1 Fwank 5:14). Mbäät niˈamukë jantsy oyë jäˈäy nyaˈëxpëjkëm mëdë Diosë yˈAyuk, pën nmëdäjtëm ja tsojkën, oy mëjwiin kajaa ngamëdäjtëm ja ëxpëjkën, wijyˈäjtën ets oy tijaty ngajäjt nganijäˈäjëm.