Nˈokˈyajtuˈunëm yajxon ja tiempë
1. ¿Wiˈix nanduˈun nyikejˈyë 1 Korintʉ 9:26 mä ngäjpxwäˈkxëm?
1 Apostëlë Pablo ojts jyënaˈany: “Ëjtsë dëˈën extëm ja oybyë pëyëˈkpë [...]. O mbäät njënäˈänëm ko kyajts ëj dëˈën extëm tuˈugë jäˈäy diˈibë koxäämp es tëgok tëgok tnixäjeˈeky, kyaj jyaˈty ja kyoxy” (1 Kor. 9:26). Ko duˈunë Pablo jyënany, yëˈë nety myaytyäˈägaampy ko të netyë wyinmäˈäny tpëjtaˈaky parë ttunäˈäny niˈigyë Diosë tyuunk. Perë tyäˈädë tekstë nan yëˈë yˈandijpy mä ngäjpxwäˈkxëm, pes tsojkëp nduˈunëmë mëjää ets oy wyimbëtsëmët ja tuunk. ¿Wiˈix mbäät nduˈunëm?
2. Parë nnijäˈäjëm mä ngäjpxwäˈkxëm ets näˈä, ¿wiˈix mbäät nbanëjkxëmë yˈijxpajtënë Pablo mët ja myëguˈuktëjk diˈib mä primer siiglë?
2 Nˈoknëjkxëm mä jäˈäy yajpääty. Pablo mët ja myëguˈuktëjk diˈib mä primer siiglë jam ijty nyëjkxtë mä tnijawëdë jäˈäy yajpääty (Apos. 5:42; 16:13; 17:17). Pën mä ngäjpxwäˈkxëm mayë jäˈäy yajpäättë koots, oyxyëp ko jaanëm nëjkxëm käjpxwäˈkxpë tëjkm dëjkm. ¿Yajpattëbëdaa mayë jäˈäy mä karrë tsyoony jyaˈty, duˈun jopyëp ko nyëjkxtë tuumbë o ko jyëmbijnëdë? ¿Ti oorë mayë jäˈäy nyëjkxtë juuy këbajtpë? Mbäät niˈigyë yˈoybyëtsemy mä ngäjpxwäˈkxëm ko nˈijxëm ti oorë jäˈäy yajpäättë nëˈääy tuˈääy.
3. ¿Ti mbäät nduˈunëm parë yajxonë jot mëjää nyajtuˈunëm ets nyaˈˈabëtsëˈëmëm ja territooryë?
3 Nˈokˈyaˈˈabëtsëˈëmëm ja territooryë. Ja tuk peky wiˈix mbäät yajxon nyajtuˈunëmë jot mëjää, yëˈë ko nˈijxëm wiˈix mbäät nyaˈˈabëtsëˈëmëm ja territooryë. Extëm nˈokpëjtakëm, ko nimayë nmëguˈukˈäjtëm ak jam yajkaxtët mä tuˈugë territooryë, tsip yajtukniwijtsëtyaˈayët ets kajaa tiempë tyëgoyaˈany. Pääty oyxyëp ko tuk grupaty yajwijtswäˈkxtë parë niˈamukë kyäjpxwäˈkxtët. Ets nan oy ko yaˈixët pën mä ja territooryë mä nyëjkxäˈändë karroty niwaanë jäˈäy tsyëënëdë, ta niwaanë nyëjkxtët, duˈun mbäät niˈigyë jäˈäy tmëtmaytyäˈäktë ets kyaj nëgoo ja tiempë dyajtëgoytyët. Ets ¿këdii nan oyxyëp ko nˈamdoˈojëm tuˈugë lugäär diˈib wingon wëˈëmp mä ntsënäˈäyëm parë ngäjpxwäˈkxëm? Net kyaj nëgoo jagam nëjkxëm etsë tiempë nyajtëgoˈoyëm.
4. ¿Ti mbäät xypyudëjkëm parë nˈëxtäˈäyëmë jäˈäy duˈun extëmë äjkxmäjtspë?
4 Jesus tˈanmääy ja yˈëxpëjkpëty ets nëjkx tˈëxtäˈäytyë jäˈäy, duˈun extëmë “äjkxmäjtspë” (Mar. 1:17, Traducción del Nuevo Mundo). Tuˈugë jäˈäy diˈib jyajtypy yˈäjkxmatsët kyaj jeˈeyë tˈajëbipë ja tsyaay nëjoty, yˈijxypyën näˈä mbäät tmatsy ja äjkx, ets mä tpäädët, taanëmë net tyëkë äjkxmäjtspë. Duˈunë duˈun, yˈijxypy wiˈix dyajtuny yajxon ja jyot myëjää. Nˈoktuˈunëm nanduˈun ja mëjää mä nˈëwäˈkx ngäjpxwäˈkxëm (Ebre. 6:11).