Të xytyuknijäˈäyëm Diˈib wyooyoˈoytyëbë Jyobaa tyestiigëty
Mëguˈuktëjk ninuˈun nˈijtëm Jyobaa tyestiigëty:
¡Jantsy jotkujkëts nnayjawëdë kots jatëgokë nmëguˈuktëjk nijayëdë diˈib jëxtujk miyonk naxy yajpattëp abëtsemy nyaxwinyëdë! ¿Wiˈix mnayjawëdë ko xyˈixyˈattë tuˈugë nmëguˈukˈäjtëm diˈib wiink paˈis tsoˈomp? ¿Këdii pojënë mëët mnaymyaaybyekyëty? (Fwank 13:34, 35.) Duˈunën nëjkx mnayjawëdë ko xykyäjpxtëdë Anuario diˈib 2012, mä yajnimaytyäˈäktë nmëguˈukˈäjtëm diˈib kanäk paˈis mä wiˈixë myëbëjkën dyaˈixëdë ets wiˈix kyaj tmastuˈuttë Dios.
Tëjëts nmëdoyˈattë ko nimay miitsëty xëmë mDiosˈawdattë mëdë mFamilyë. Ets pënaty myëdäjttëbë yˈuˈunk yˈënäˈkë mutskatypyë yˈëxtääytyëbë winmäˈäny parë yajxon tmëdooˈittët (Éfe. 6:4). Etsë kasäädë jäˈäy niˈigyë nyaymëjämoˈoyëdë mët yëˈëgyëjxm ko tˈëxpëktë tuˈugyë Biiblyë (Éfe. 5:28-33). Niˈamukë ndukˈoyˈäjtëm ko njuˈtëmë tiempë parë nˈëxpëjkëm këkpäädë Diosë yˈAyuk, duˈun naytyuˈugaty o tuk familyë (Jos. 1:8, 9).
Nan nbaˈˈayoodëbëts pënaty të yˈayoˈonbäättë ets të dyajtëgoytyë jyukyˈäjt myadakën mët ko tijaty të yˈayoˈonbëjtaˈaky. Ets mët yëˈëgyëjxmë tyäˈädë neky yajmoˈoytyë dyoskujuyëm pënaty pojënë të tpudëkë myëguˈuktëjk diˈib të yˈayoˈonbäättë (Apos. 11:28-30; Gal. 6:9, 10). Mä miitsëty, nan tamˈäjtpë nmëguˈukˈäjtëm diˈib duˈun extëmë Dorcas, diˈib jantsy oyjyaˈay “es tpudëkë ja jäˈäy diˈibë ayoodëp”, pes yˈijx tyuundëp wiˈix yajpudëkëyäˈändë ja nmëguˈukˈäjtëm (Apos. 9:36). Jamyatstë ko Jyobaa yëˈë diˈib xëmë pyejkypyë kuentë mä miitsëty mdundë ets seguurë ko yëˈë mgumayäˈänëdë (Mat. 6:3, 4).
Mä näägë paˈis, ta jäˈäy diˈib wyijtstëgäjtstëbë ley parë dyajtuˈudukäˈändë ja tuunk diˈib nduˈunëm ets mayë nmëguˈukˈäjtëm kyaj yajmëjˈixtë ja madakën diˈib myëdäjttëp (Sal. 94:20-22). Per kom nyijäˈädëp ko duˈunë Jesus ojts tnaskäjpxë ko yajtëytyunäˈändë, ta amëk jotmëk tmëmadäˈäktë ets tˈaˈoogëdë Jyobaa (Fwank 15:19, 20). Ittë seguurë ko xëmë ninuˈkxtäägëdë ets nˈamdow nbëjktsowdëts parë “jëjpˈixy mnayaˈitëdët es xyˈatsowdët pënaty myajtëëjëdëp tiko xymyëbëktë Dios, es ti mˈawijx mjëjpˈijxtëp” (1 Peed. 3:13-15).
Nan yajmëjkugäjpxëdëp miyonkˈamë nmëguˈukˈäjtëm diˈib jëmëjt jëmëjt myënëjkxtëbë jyukyˈäjtën wäˈäts, oyë Satanás tjayajmëjwindëkë mä jäˈäy axëëk yˈit tsyëënëdë. Mä tyäˈädë tiempë, mas axëëgë jäˈäyë jyukyˈäjtënë dyajnëjkxtë, per miitsëty “mëk mnaybyëjtäˈägëdët tiˈigyëˈäjtëngyëjxm mä Nintsënˈäjtëm, diˈibë niˈigyë mëkˈäjtën myëdäjtypy” (Éfe. 6:10). Ets të mnayxyoxëdë “mët diˈibë Dios myeepy ja jyaˈayëty, es dëˈën mbäät xymyëmadäˈäktë diˈibë mët ja mëjkuˈugopk mwinˈëënäˈänëdë” (Éfe. 6:11, 12). Kyaj xyjäˈäytyëgoytyët ko Jyobaa myajtuunëdëp extëmë ijxpajtën parë Satanás dyaˈˈanëgugäˈäjë (Pro. 27:11).
Ets nan ntsojkënyëˈäjttëpts ndukˈawanëyäˈändë ko mä tadë jëmëjt 2011 ja jäˈäy të tyuˈukmuktë mä të yajjamyetsyë Jesusë yˈoˈkën xëë 19,374,737. Ko duˈun nimayë jäˈäy të tyuˈukmuktë, yëˈë duˈun ko miitsëty të mdundë prekusoor ausilyaar abril poˈo. Ets ko Jyobaa mëjwiin kajaa të myëjkugäjpxëdë tyestiigëty yëˈë duˈun të tyuny parë miyonkˈamë jäˈäy të tnijawëdë Diosë yˈayuk abëtsemy nyaxwinyëdë (Rom. 10:18). Mä tadë poˈo abril, ja nmëguˈukˈäjtëm të tyundë prekusoor ausilyaar 2,657,377 ets ta may diˈib të ttundë mëjää parë niˈigyë të dyajmëjwindëkë Diosë tyuunk. Ko duˈun të ttukˈit të ttukxondë ets të tpëjtäˈäktë wyinmäˈäny, yëˈëjëts diˈib ëëtsëty xyajxondaktëp (Sal. 110:3; Kol. 3:23).
Mä tadë jëmëjt të nyaxy, ja jäˈäy të nyëbattë 263,131. Yajmoobyë dyoskujuyëmë Jyobaa ets miitsëty ko jäˈäy të xywyowdë extëm jyënaˈanyë Diˈibʉ Jatanʉp 22:17: “¡Min! Es diˈibë myëmëdeepy, waˈan nandëˈën tjënäˈäny: ¡Min! Es diˈibaty tëtsëdëp, waˈan tmindë es tˈaxäjëdët nadëˈënyë ja nëë diˈibë yajkypy ja jikyˈäjtën winë xëë winë tiempë”. Ko nanduˈun kanäk peky të yajnimaytyaˈagyë Diosë yˈAnaˈam Kyutujkën mä të tyunyëtyë asamblee tëgëk xëëbë 2011, tajëts jantsy mëk njënäˈändë “¡Yajmin ja mgutujkën!”. Nanduˈunëts njënäˈändë extëmë apostëlë Juan jyënany, ko tmëdoodääy ja Kristë jyënaˈany: “Tsojkëts nminäˈäny”. Ta yˈatsooy: “Waˈan dëˈënëty. ¡Min, Nintsënˈäjtëm Jesus!” (Diˈibʉ Jat. 22:20).
Mientrës xyˈawixtë ti tunan jatanëp, kyaj xyjäˈäytyëgoytyët ko ntsojktëp niduˈuk niduˈuk, niˈamukë miitsëty mëguˈuktëjk diˈib tsyojktëbë Jyobaa ets dyaˈixëdë mët ja tyuˈunën ets “ja tëyˈäjtën” (1 Fwank 3:18).
Yëˈë mmëguˈuktëjkëty,
Diˈib wyooyoˈoytyëbë Jyobaa tyestiigëty