Nˈokkäjpxwäˈkxëm amëk jotmëk mäjatyë negosyë
1. ¿Tiko kyaj mbäät wiink nnayjäˈäwëm ko xytyuktëjkëmë tsëˈëgë ngäjpxwäˈkxëm mäjatyë jäˈäyë nyegosyë?
1 ¿Xytyuktëjkëmë tsëˈëgë nˈëwäˈkx ngäjpxwäˈkxëm mäjatyë negosyë? Pën duˈun, kyaj axëëk mnayjawëdët, kyaj mijts naytyuˈuk duˈun mjaty. Axtë apostëlë Pablo diˈibë nety amëk jotmëk ëwäˈkx käjpxwäˈkxp, yajtëgoyˈäjt nanduˈunë jotmëkˈäjtën (1 Tes. 2:2). Tyä yajnigäjpxäˈäny tëgëk peky diˈib xëmë nnayajtëˈëwëm ko ngäjpxwäˈkxäˈänëm mä jäˈäy tmëdatyë negosyë ets naa wiˈix mbäät nduˈunëm.
2. ¿Tiko kyaj mbäät mwinmay ko ja tuumbëtëjk jotˈambëkëp ko xymyëtmaytyäˈägët?
2 ¿Waˈan ja tuumbëtëjk jyotˈambëktët mët ko tjawëdët kots nyajwëˈëmë? Mä mayë negosyë, ja tuumbëtëjk myastuttëp ti jam tyuundëp parë tˈixäˈändë ti ja jäˈäy tsyejpy. Ets kom mijts duˈun myaˈixäˈäny extëmë tuˈugë jäˈäy diˈib juyäämp, pes ta yˈoyjyaˈaytyäˈägäˈändë. Pën mnayxyojxëp tsuj yajxon ets myaˈijxëbë oyjyaˈayˈäjtën, mbäät ja jäˈäy tsuj yajxon mˈatsoyëty.
3. ¿Ti mbäät nduˈunëm parë kyaj axëëk nyayjawëdët ja jäˈäy diˈib juuytyëp?
3 ¿Ti jamëtsëdaa ngäjpxwäˈkxët mä mayjyaˈay jyuytyë? Oy ko nwinˈijxëm naa ti oorë mayë jäˈäy kyaj jyuytyë, extëm ko jeˈeyë yˈawäˈätsy ja negosyë. Awix koonëm ja diˈib nyiwintsënˈäjtypy o ja diˈib mëduump yajpäädët naytyuˈuk ets kyaj nëgoo jeky xymyëtmaytyäˈägët.
4. ¿Naa wiˈix mbäät xyˈanëëmë jäˈäy ko xymyëtmaytyäˈägët mä negosyë?
4 ¿Wiˈix mbäät xyˈanëëmë? Pën mä ja negosyë jam mayë tuumbëtëjk, mëtmaytyäˈäk ja jäˈäy diˈib nyiwintsënˈäjtypy. Mbäät naa duˈun xyˈanëëmë: “Diˈibë jäˈäy myëdäjtypyë negosyë kyaj nëgoo yajpäättë mä tyëjk, päätyëts ninëjkxtë mä tyundë. Kom nnijäˈäbëts ko mduump, pääty kyaj nëgoo jeky nmëtmaytyäˈägäˈäny”. Ets parë kyaj ja jäˈäy wyinmayët ko mdoˈk myäjkp, ta kyaj xyˈamdowëdë donasyonk, per pën myajtëjëëp mä meeny xypyëktë parë duˈunë tuunk xytyundë, pes ta xyˈamdowët. Mˈixëp ti negosyë ja jäˈäy myëdäjtypy, mbäät xyˈamdoyë permisë ja diˈib nyiwintsënˈäjtypy ko xymyëtmaytyäˈägäˈäny ja tyuumbëtëjk naa waanë. Mbäät jatëgokë maytyaˈaky xyajtsondaˈaky extëm të yˈokˈyajnigäjpxpë. Pën mˈijxypy ko tam tuˈuk mëk jyantsy tyuny, mmoˈoy tuˈugë trataadë ets kyaj nëgoo jeky xymyëtmaytyäˈägët. Pën kyaj mbäät pën xynyekymyëtmaytyaˈaky, yajtëw pën mbäät xynyikeˈeky ja ëxpëjkpajn mä pyoˈkxtë ja tuumbëtëjk o wiink lugäär.
5. ¿Tiko mbäät mjotmëktaˈaky parë mˈëwäˈkx mgäjpxwäˈkxët mäjatyë negosyë?
5 Jesus mëdë Pablo ojts yˈëwäˈkx kyäjpxwäˈkxtë amëk jotmëk mä jäˈäy tyundë, ets mijts nan mbäät duˈun xytyuny (Mat. 4:18-21; 9:9; Apos. 17:17). Mënuˈkxtäˈägë Jyobaa ets yëˈë mmoˈoyëdët ja jotmëkˈäjtën ets kyaj mtsëˈëk mjawët (Apos. 4:29). Ko ngäjpxwäˈkxëm mä negosyë jantsy oy wyimbëtsemy, pes xëmë nbatëmë jäˈäy. ¿Tiko duˈun xykyatuny?