Majtsk pëky të yajtukniwitsë parë ngäjpxwäˈkxëm mä mayë jäˈäy yajpääty
1. ¿Wiˈixaty ja Dios mëduumbë ojts kyäjpxwäˈkxtë mä primer siiglë?
1 Mä primer siiglë, ojtsë Dios mëduumbëty kyäjpxwäˈkxtë tëjkmdëjkm, per nan käjpxwäˈkxtë mä nety mayë jäˈäy yajpääty (Apos. 20:20). Extëm nˈokpëjtakëm, nëjkxtëp ijty mä templë mä mbäät tpäättë mayjyaˈay (Apos. 5:42). Apostëlë Pablo jabom jabom ijty kyäjpxwaˈkxy määyoty jam Atenas (Apos. 17:17). Tyam, tëjkmdëjkm ngäjpxwäˈkxëmë oybyë ayuk. Per nan käjpxwäˈkxëm mä karrë tsyoony jyaty, mä negosyë, mä parke, nëˈääy tuˈääy mä mayë jäˈäy nyaxtë o mä jäˈäy tyim yajpääty. Të nyaˈˈanmäˈäyëm niˈamukë parë ngäjpxwäˈkxëm mä mayë jäˈäy yajpäättë, per tyam, majtsk pëky të yajtukniwitsë parë ngäjpxwäˈkxëm mä mayë jäˈäy yajpääty. Min nˈokˈijxëm.
2. ¿Ti yajtuuntsondak nobiembrë poˈo 2011?
2 Të yajtukniwitsë ngäjpxwäˈkxëm mä mëjatypyë siudad mä mayë jäˈäy yajpääty. Extëm yajnimaytyaˈaky mä Anuario 2013, pajina 16 etsë 17 ko nobiembrë poˈo 2011, yajtukniwijtsë parë nmëguˈukˈäjtëm kyäjpxwäˈkxtët mä mayë jäˈäy yajpääty jap Nueva York (Estados Unidos). Ojts tˈëxtäˈäytyë kanäk pëkyë lugäärë mä mayë jäˈäy nyax tyëkëdë, tpëjtaktë meesë ets tnaskëˈëyëdë mä dyaˈijxëdë kartel diˈib mbäädë jäˈäy tˈoyˈixtë ets tpëjtaktë ëxpëjkpajn kanäk ayuk. Milˈamë jäˈäy tˈijxtë jabom jabom axtë pënaty tsënääytyëp mä kyaj mbäät pën tyëkë ets pënaty kyaj yajpäättë mä jyëën tyëjk. Jantsy oy wyimbëtsëëmy, pes mä tuˈukpë poˈo ja ojts dyajwäˈkxtë 3,797 rebistë ets 7,986 liibrë. Mayë jäˈäy diˈib näjxtë, tˈanmääytyë nmëguˈukˈäjtëm ko yˈëxpëkandëbë Biiblyë. Ets kom päätyë nety jam të nyaybyëjtäˈägëdë, ta tkajxtë jäˈäyë dyireksion mä ja naymyujkën diˈib patëp.
3. ¿Wiˈix myëjwindëkëyaˈany mä ngäjpxwäˈkxëm mä mayë jäˈäy yajpääty?
3 Kom jantsy oy të wyimbëtsëmy, ta të yajtukniwitsë ets nanduˈun yajtunët abëtsemy nyaxwinyëdë mä mayë jäˈäy yajpääty. Tuˈuk tuˈugë Betel jawyiin tˈixäˈäny ja siudad mä mbäät duˈun yajtuny. Tyäˈädë siudad diˈib yajwinˈixäämp, yëˈë mä mayë jäˈäy yajpäättë, mbäät mët ko jamë karrë tsyoony jyaˈty o mët ko yajpääty mayë ofisinë o jëën tëjkë kanäk nikëˈëybyë. Ta netë Betel tkaxäˈänyë neky mäjaty ja naymyujkën parë tnijawëdët wiˈix tijaty ttundët. Yëˈë yajwinˈixandëbë prekursoor espesial etsë regulaar, per näˈäty, ta yëˈë yajwinˈixäˈändë prekursoor ausilyaar.
4. ¿Wiˈix kyäjpxwäˈkxtë pënaty tuundëp extëm të yajtukniwitsë?
4 Wiˈix kyäjpxwäˈkxtë. Yëˈë prekursoorëty diˈib käjpxwäˈkxtëp extëm të yajtukniwitsë, yˈawijxtëp ets ja jäˈäy këˈëm tmëwingonët ja meesë o mä të tpëjtäˈäktë ja ëxpëjkpajn, ta net tˈanëëmëdë parë tmënëjkxëdë ëxpëjkpajn diˈib tsyojktëp. Nan yˈatsoojëmbijttëp mëdë Biiblyë tijatyë jäˈäy yajtëëwdëp. Pën ja jäˈäy myënëjkxypyë ëxpëjkpajn, kyaj tˈamdowdë meeny diˈib yajˈyäjkp tsojkëngyëjxm. Per pën yajtëëpy mä meeny sentääbë yajpëky, ta ttukmëtmaytyäˈäktë ko mbäät yajkexy ja meeny mä ja direksion diˈib myëmiimpy ja ëxpëjkpajn. Ets mbäät dyajtëwdë: “¿Mtsojkënyëˈajtypy ets pën mninëjkxëdët?” o “¿Mnijäˈäwëp ko mbäät xyˈëxpëkëdë Biiblyë namayˈäjtën?”.
5. ¿Wiˈix jantsy oy tnimaytyaky tuˈugë kasäädë jäˈäy ko kyäjpxwäˈkxtë mä mayë jäˈäy yajpääty?
5 Yˈaxäjëdëbë kunuˈkxën pënaty duˈun tuundëp. Tuˈugë kasäädë jäˈäy tkujäˈäyë: “Mäjëts jam nadanëdë ëxpëjkpajn, tajëts nˈixtë nyaxy milˈamë jäˈäy, tajëts nbëktë kuentë ko mëjwiin kajaa yajtunyë mëjää parë abëtsemy nyaxwinyëdë jäˈäy yajtuknijawëdë tëyˈäjtën. Kojëts nwinmaytyë wiˈixë Jyobaa nyaytyukjotmaytyunyëty niduˈuk niduˈugë tyäˈädë jäˈäy, yëˈëjëts diˈib niˈigyë xyajwinmääytyëp ko jëjpˈam yajpëjtäˈägäˈänyë Diosë tyuunk mä jukyˈäjtën. Ko jäˈäy nyaxtë mä jam të yajpëjtaˈagyë ëxpëjkpajn, tajëts nbawinmaytyë wiˈix jamë Jyobaa tˈixyë jäˈäyë jyot kyorasoon diˈib yˈaxäjëyaambyë tëyˈäjtën. Ets jantsy tyaayëts njawëdë anklës xypyudëkëdë”.
6. 1) ¿Wiˈix të yajtukniwitsë mä mayë naymyujkën parë ngäjpxwäˈkxëm mä mayë jäˈäy yajpääty, ets wiˈix tyëgatsyëty mët diˈib käjpxwäˈkxtëp mä mëjatypyë siudad? 2) ¿Ti mbäät ttundë naymyujkën parë kyäjpxwäˈkxtët mä mayë jäˈäy yajpääty?
6 Të yajtukniwitsë mä naymyujkën parë ngäjpxwäˈkxëm mä mayë jäˈäy yajpääty. Mä mayë naymyujkën, nan të ttukniwitsëdë mëjjäˈäytyëjk parë ngäjpxwäˈkxëm mä mayë jäˈäy yajpääty. Ets yëˈë tuundëp diˈib käjpxwäˈkxtëp mä naymyujkën, per jam mä tyerritooryë, tpëjtäˈäktë meesë ets tnaskëyëdë mä dyaˈixëdë ëxpëjkpajn mä mayë jäˈäy nyaxtë. Pääty tyëgatsyëty extëm të yajtukniwitsë kyäjpxwäˈkxtët mä mëjatypyë siudad mä mayë jäˈäy yajpääty, pes yëˈë käjpxwäˈkxtëp diˈib tsoˈondëp mä kanäägë naymyujkën diˈib tsënääytyëp mä ja siudad diˈibë Betel të twinˈixy (ixë rekuäädrë “Tsojkëp tyundët yajxon”).
7. ¿Wiˈix ttukniwitsëyäˈändë mëjjäˈäytyëjk ko tˈixtë mä ja tyerritooryë ko mbäät kyäjpxwäˈkxtë mä mayë jäˈäy yajpääty?
7 Tsojkëbë mëjjäˈäytyëjkëty tˈixtët pën mä ja tyerritooryë, jamˈäjtpë lugäär mä nyaxtë mayjyaˈay ets pën mbäät ttukniwitsëdë mä naymyujkën parë kyäjpxwäˈkxtët. Mbäät tpëjtäˈäktë meesë ets tnaskëyëdë mä dyaˈixëdë ëxpëjkpajn, extëm mä karrë tsyoony jyaˈty, mä määy tyunyëty, mä parke, mä mayë jäˈäy nyax tyëkëdë, mä mëjatypyë negosyë, mä eskuelë, mä abionk kyaagëˈëky ets mäjatyë mayjyaˈay tyuˈukmuktë. Nan oy ko kyaj twijtstëgatstëdë xëë, oorë ets ja lugäär. Të yajpëkyë kuentë ko oybyëtsëëmp ko meesë yajpëjtaˈaky jap tëgoty mä kanäägë tiendë yajpääty, ets kyaj ko nyaybyëjtäˈägëdë mëj tiendë winduuy mä jäˈäy jeˈeyë nyaxy parë tyëkë juuy këbajtpë ets jyëmbijtkojnë. Ta lugäär mä mayë jäˈäy nyaxtë extëm mä banketë, pääty, oy ko yëˈë naskëˈëyëm diˈib naa mutsk mä ja ëxpëjkpajn yajpëjtaˈaky ets kyaj yëˈëjëty tuˈugë meesë. Mä Internet tapë archivos të yajpëjtaˈaky diˈib mbäät dyajjënaktë mëjjäˈäytyëjk parë yˈoyëdë kartel mä yaˈˈawanë ëxpëjkpajn. Mä tyäˈädë kartel, ja mä yaˈˈawanë rebistë Diˈib Xytyukˈawäˈänëm etsë ¡Despertad! etsë liibrë ¿Ti tukniˈijxëbë Biiblyë? Pënaty duˈun tunandëp, nanduˈun ttunäˈändë extëm pënaty käjpxwäˈkxtëp mä mëjatypyë siudad, duˈun meerë tpanëjkxtët extëm tyuˈumoˈoyëdë ja diˈib yˈijxypy wiˈix ngäjpxwäˈkxëm. Ko ja jäˈäy diˈib tsyojkënyëˈajtypy dyakëdë dyireksyionk ets kyaj tsyëënë mä ja territooryë, ta netyë dyajtuktuktëdë Sírvase visitar (S-43-S) ets tmoˈoyët ja diˈib tuump sekretaaryë.
8. Pën mä mnaymyukyëty kyaj të yajtukniwitsë mgäjpxwäˈkxët mä mayë jäˈäy yajpääty, ¿mäjaty mbäät mgäjpxwaˈkxy?
8 Wiˈix mbäät mgäjpxwaˈkxy mä mayë jäˈäy yajpääty. Pën mä mnaymyukyëty kyaj jyaˈˈatyë lugäär mä mayë jäˈäy nyaxtë parë xypyëjtäˈägët tuˈugë meesë o xynyaskëyët mä xyaˈixëdët ja ëxpëjkpajn, mbäät këˈëm xytyukniwitsë parë mgäjpxwäˈkxët mä mayë jäˈäy yajpääty. ¿Jam mä mderritooryë kanäägë negosyë, o tuˈugë tiendë mä mayë jäˈäy jyuy kyëbattë? ¿Tuˈukmujktëbë jäˈäy mä tuˈugë parke, määyoty o mä wiinkpë lugäär? ¿Tuˈukmujkp muumë jäˈäy näˈäganäˈäty? Pën duˈun, mbäät mgäjpxwaˈkxy mä mayë jäˈäy yajpääty.
9. ¿Tiko mbäät nduˈunëmë mëjää parë ngäjpxwäˈkxëm mä jäˈäy ndimpatëm?
9 Jyobaa tsyejpy ets niˈamukë jäˈäy nyitsoˈogët ets tjaygyukëdët diˈibë duˈun tëyˈäjtën (1 Tim. 2:4). Pääty, ndukmëtmaytyakëm ja oybyë ayuk ninääk ndimpatëm mä kyaminynyëm ja kutëgoˈoyën (Mat. 24:14). Tsiptakpë jäˈäy nbatëm mä jyëën tyëjk, per mbäät nmëtmaytyakëm ko ngäjpxwäˈkxëm mä mayë jäˈäy yajpääty. Pes ko duˈun nduˈunëm, mbäät ja jeˈeyë tmëdoyë oybyë ayuk. Pääty, nˈokmëtmaytyakëmë jäˈäy mä tyim yajpääty ets nˈokˈyaˈˈabëtsëˈëmëm yajxon mä nduˈunëmë Diosë tyuunk (2 Tim. 4:5).
[Dibujë mä pajina 5]
Tsojkëp tyundët yajxon
Të yajnijawë ko nmëguˈukˈäjtëm diˈib mä kanäägë naymyujkën kyäjpxwäˈkxtë mä mayë jäˈäy yajpääty, per jam jatëgok nyaxtë mä ja myëguˈuk të yˈoknäjxpë, mbäät mä tuˈugë kaye, mä karrë tsyoony jyaˈty o mäjatyë negosyë. Nan të yaˈixy ko ak jap nëjkx tnaskonëdë rebistë mä jäˈäy ti tˈawixtë ets nan ak yëˈëyëmë jäˈäy myëtmaytyaktëp diˈib toˈktëp. Ets oy kyaj tyim nnaybyäädëdë, mbäät ja jäˈäy tjawëdë ko yaˈˈatsijptëp janääm jatsojk. Pääty, pën ëwäˈkx käjpxwäˈkxëm mä mayë jäˈäy yajpääty, oy ko jamyë ngäjpxwäˈkxëm mä ja territooryë diˈib patëp ja naymyujkën.
Pën ja nmëguˈukˈäjtëm käjpxwäˈkxandëp mä mayë jäˈäy yajpääty mä wiinkpë naymyujkën, tsojkëp jawyiin myaytyäˈägët mët diˈib yˈijxypy wiˈix ngäjpxwäˈkxëm mä yëˈë nyaymyukyëty. Ta ja nmëguˈukˈäjtëm diˈib yˈijxypy wiˈix ngäjpxwäˈkxëm, tˈamdowëdë permisë diˈib nanduˈun tuump mä ja jatuˈukpë naymyujkën. Pën tyukmujktëbë territooryë kanäägë naymyujkën diˈib tëgatsyatyë ayuk kyäjpxtëp, ta yajxon nyaygyäjpxëdët ja diˈib yˈijxtëp wiˈix ngäjpxwäˈkxëm, parë këdiibë jäˈäy tjawëdë nayˈatsipë. Ko tyundët yajxon, ta mbäät tijaty yajtuny “extëm pyaatyëty” (1 Kor. 14:40).
[Dibujë diˈib mä pajina 6]
[Dibujë diˈib mä pajina 6]