¿Wiˈix mbäädë jäˈäy nmëtmaytyakëm nëˈääy tuˈääy?

1. ¿Wiˈix tuk peky mbäät nbanëjkxëmë Jesusë yˈijxpajtën?

¹ Ko Jesus jyukyˈajty yä Naxwiiny myëtmaytyakë jäˈäy nëˈääy tuˈääy ets oytyimmääjëty (Luk. 9:57-61; Fwank 4:7). Yëˈë mëkën ttsojkënyëˈajty parë jäˈäy ttukmëtmaytyäˈäganyë Diosë yˈayuk ets myëtmaytyak nääk ttimpaty. Tyam, ko nˈëwäˈkx ngäjpxwäˈkxëm nëˈääy tuˈääy nan mbäädë jäˈäy nbudëjkëm parë tnijawëdë Diosë wyijyˈäjtën (Pro. 1:20). Mëjwiin kajaa yˈoybyëtsëmäˈäny ko nmëtmaytyakëmë jäˈäy mä ndimpatëm ets ko nˈëxtäˈäyëmë winmäˈäny wiˈix mbäät nduˈunëm.

2. ¿Tiko jyëjpˈamëty ets këˈëm nyajtsondakëmë maytyaˈaky nëˈääy tuˈääy?

² Yajtsondäˈäk ja maytyaˈaky. Oy ko ninëjkxëmë jäˈäy ets kyaj jamyë muum jeˈeyë ndënäˈäyëm o net naxwaˈtsëm parë nˈawijxëm aber näˈä xyˈoknimiˈinëm. Mëtxiˈigë jäˈäy, winˈijxpat ets mëtkäjpx mëtmaytyäˈäk tsuj yajxon ets mëdë oyjyot. Ets pën jamë wiinkpë mëguˈuktëjk diˈib mëët mnëjkxtë, oy ko abekyaty ja jäˈäy xymyëtmaytyäˈäktët. Pën mˈijxypy ko tsyojkënyëˈajtypy, ta ko xymyëtmaytyaktäˈäyët xyajtëwët mä mbäät jatëgok xypyaaty. Ta näägë nmëguˈukˈäjtëm diˈibë nëjkxtëp käjpxwäˈkxpë mä ja lugäär diˈib të tˈijxwëˈëmdë ets duˈuntsoo tpäättë jatëgokë jäˈäy diˈib të tˈoymyëdoyë Diosë yˈayuk.

3. ¿Wiˈix mbäät nyaˈijxëmë wijyˈäjtën ko jäˈäy nmëtmaytyakëm nëˈääy tuˈääy?

³ Nˈokˈëxtäˈäyëmë winmäˈäny. Oy ko xyˈixët mä mgäjpxwäˈkxäˈäny ets pën mëtmaytyäˈägaampy. Ix tun pënaty mbäät xymyëtmaytyaˈaky, kyaj tyimniˈamukëty. Extëm nˈokpëjtakëm, jam nˈijxëm pën jyotëgoy, oy ko kyaj nmëtmaytyakëm. Pën myëtmaytyakypyë jäˈäy muum negosyë winduuy, tsojkëp xyˈëxtäˈäyëdë winmäˈäny wiˈix kyaj xyjotmaymyoˈoyët ja diˈib nyikëjxmˈäjtypyë juy tooky. Oy ko xymyëtmaytyäˈägëdë jäˈäy ko naty të pyëtsemy mä ojts të jyuy të kyëbattë ets kyaj jyaaty mä meerë tyëkëdë. Ninëjkxë jäˈäy extëm kyaj mbäät tsyëˈëgë. Nan oy ko xypyëkëdë kuentë näˈä mbäät xyˈawanë ëxpëjkpajn. Pën mˈijxypy ko kyaj nëgoo ttsojkënyëˈaty, ta xymyoˈoyët tuˈugë trataadë ets kyaj yëˈëjëtyë rebistë.

4. ¿Wiˈix yˈoybyëtsemy ets jotkujk nayjäˈäwëm ko nëjkxëm käjpxwäˈkxpë nëˈääy tuˈääy?

⁴ Ko nˈëwäˈkx ngäjpxwäˈkxëm nëˈääy tuˈääy duˈun nyajwäˈkxëm may ja tëëm ets waanë tiempë nyajtuˈunëm (Ecl. 11:6). Ets mbäät nbatëmë jäˈäy diˈibë naty kyaj të yajpääty mä tyëjk. Jantsy jotkujk nayjäˈäwëm ets oybyëtsëëmp ko nˈëwäˈkx ngäjpxwäˈkxëm nëˈääy tuˈääy. Pääty, ¿tiko duˈun xykyatukniwitsë?