¿Mbäät tsuu nbëtsëˈëmëm käjpxwäˈkxpë?
1. Extëm tuˈugë liibrë jyënaˈany, ¿ti oorë ijtyë apostëlë Pablo nyijkxy käjpxwäˈkxpë?
1 Tuˈugë liibrë jyënaˈany ko apostëlë Pablo ja ijty nyijkxy käjpxwäˈkxpë tsuu “desde a las 4 axtë kootspäät” (Daily Life in Bible Times). Kyaj tyim yajnijawë ti oorë ijty xëmë nyijkxy käjpxwäˈkxpë, per diˈib nnijäˈäwëm yëˈë ko Pablo tyuundaapy ijty oytyim tiijëty “mët yëˈëgyëjxm ja oybyë ayuk” (1 Kor. 9:19-23). Seguurë ko tyukniwijtsëp ijty parë mbäät nyijkxy käjpxwäˈkxpë tëjkmdëjkm ti oorë jäˈäy yajpäättë.
2. ¿Tiko yˈoyëty ets nëjkxëm käjpxwäˈkxpë tsuu?
2 Mä mayë lugäär, jopy jopyë nmëguˈukˈäjtëm të tkostumbrëpëktë nyëjkxtë tëjkmdëjkm käjpxwäˈkxpë. Per ¿jeˈeyë jäˈäy yajpääty jopyëp mä ngäjpxwäˈkxëm? Tuˈugë prekursoor jyënaˈany: “Kyajts nëgoo jäˈäy nbäättë jopyëp, niˈigyëts nbäättë koots”. Ko tsyuˈujënë kyaj nëgoo ti jäˈäy tnekytyundë ets käjpxan maytyäˈägandëp. Ets nan yajpattëbë yetyëjk parë ndukmëtmaytyakëmë Diosë yˈayuk. Yëˈë mëjjäˈäytyëjk mbäät tˈixtë pën mbäät duˈun yajtuny, parë ttukniwitsëdët näˈä mbäädë nmëguˈukˈäjtëm nyaymyukëdë ets nyëjkxtët kyäjpxwäˈkxtët tsuu.
3. ¿Tijaty mbäät nwinmäˈäyëm ko nëjkxëm käjpxwäˈkxpë mä të tsyuˈujënë?
3 Nˈoknaygyuentˈäjtëm. Ko nëjkxëm käjpxwäˈkxpë mä të tsyuˈujënë, tsojkëp nwinmäˈäyëm ti mbäät nduˈunëm. Extëm nˈokpëjtakëm, ko njäjtëm meerë mä japë jäˈäy ti ttundë, extëm tap kyaytyë, mbäät nˈanmäˈäyëm: “Tyamëts jatëgok naxët”. Ets pën të kyootsënë, oy ko ja jäˈäy nnaytyukˈijxëm, nˈanmäˈäyëm pën ëtsäjtëm ets netyë ndukmëtmaytyakëm tiko ninëjkxëm. Nan oy ko nimajtskaty nëjkxëm käjpxwäˈkxpë, kyaj nmëjagamgakëm ja grupë diˈib mëët ngäjpxwäˈkxëm ets jam nëjkxëm mä jyamˈatyë tëˈkx jäjjën ets kyaj mä lugäär diˈib aduˈuktuuy. Kyaj yˈoyëty ko jäˈäy ninëjkxëm tim koots, pes waˈan myäˈäjanëdë (2 Kor. 6:3). Ets mä lugäär diˈib kutsëˈëgë nan oy ko ngäjpxwäˈkxëm mä kyajnëm kyootsë (Prov. 22:3).
4. ¿Wiˈix wyimbëtsëmy ko nëjkxëm tsuu käjpxwäˈkxpë?
4 ¿Wiˈix wyimbëtsëmy? Niˈigyë ndukxondakëmë Diosë tyuunk ko nbatëmë jäˈäy diˈib nmëtmaytyakëm. Ets mientrës mas niˈigyë nimaytyakëm ja oybyë ayuk, ta mas nimay tnijawëdët ja tëyˈäjtënë ets nyitsoˈoktët (1 Tim. 2:3, 4). ¿Mbäädë net ndukniwijtsëm parë nëjkxëm tsuu käjpxwäˈkxpë?