Mëgoxk pëky wiˈix mbäät nbatëmë jäˈäy diˈib ëxpëkäämp
1. Pën xytsyiptakxëm nbatëmë jäˈäy diˈib ëxpëkäämp, ¿ti mbäät nduˈunëm, ets tiko?
1 ¿Mtsiptakxëp xypyäädëdë jäˈäy diˈib yˈëxpëkaambyë Biiblyë? Pën duˈun, këdii mˈëxtëkëwaˈaky, ëxtääyˈadëˈëts. Pesë Jyobaa kyunuˈkxypy pënaty xëmë tuˈunxëbë tyuunk (Gal. 6:9). Tyää mëgoxk pëky yajnigäjpxäˈäny ti mbäät mbudëkëty.
2. ¿Wiˈix mbäät nidëyë nyajtëˈëwëmë jäˈäy parë nyaˈëxpëjktsondakëm?
2 Yajtëw nidëyë ja jäˈäy. Mayë jäˈäy nyijäˈäwëdëp ko nyajwäˈkxëmë rebistë Diˈib Xytyukˈawäˈänëm etsë ¡Despertad!, per kyaj tnijawëdë ko nan nyaˈëxpëjkëmë jäˈäy. Pääty, ko jatëgok mnëjkxët käjpxwäˈkxpë tëjkmdëjkm, ¿tiko xykyayajtëyë jäˈäy pën yˈëxpëkaambyë Biiblyë? Yajtëw nanduˈun ja jäˈäy diˈib jatëgok mnijëmbijtypy. Pën mˈanmääyëp ko kyaj, mbäät duˈunyëm xymyoˈoyë ëxpëjkpajn ets duˈunyëm xynyinëjkxët. Tuˈugë nmëguˈukˈäjtëm kanäk jëmëjtë nety kujk tmoˈoyë rebistë tuˈugë kasäädë jäˈäy. Ta tëgok ojts tmënëjkxyë rebistë mas jembyë, ets ko nety tsyoˈonë, ta wyinmääy ko mbäät dyajtëy pën kyaj ttsojkënyëˈattë tˈëxpëkäˈändë Biiblyë. Ta yˈatsoodë ko oy. Ets tyam të nyëbajnëdë.
3. ¿Tiko kyaj mbäät nwinmäˈäyëm ko pënaty nëjkxtëp mä naymyujkën tam pën yaˈëxpëkyëty? Nimaytyäˈäk.
3 Pënaty nëjkxtëp mä naymyujkën. Këdii mwinmay ko niˈamukë jäˈäy diˈib nëjkxtëp mä naymyujkën, tam pën yaˈëxpëkyëty. Tuˈugë nmëguˈukˈäjtëm jyënaˈany: “Naa nigujkwaˈkxy diˈibëts të nyaˈëxpëky japëts të nbääty mä naymyujkën”. Tuˈugë toxytyëjk diˈib kyaj nëgoo yˈagäjpxëty, ja nety kujk yoˈoynyë mäjmokx jëmëjt mä naymyujkën mëdë nyëëxëty diˈibë nety të nyëbajnëdë. Ja ijty meerë jyaˈty ko tyimtsoˈondäˈäganë ets tsyoony jantsy jeˈeyë jyëjpkëxy. Per tëgok, ta tuˈugë nmëguˈukˈäjtëm ojts yˈanëˈëmxëty pën kyaj ttsojkënyëˈaty yˈëxpëkäˈäny. Ja toxytyëjk ta yˈatsooy ko oy, ets ko ja tiempë nyajxy, ta nyëbejty. Ja diˈib yaˈëxpëjkë duˈun tkujäˈäyë: “¡Mëkëts njawë kojëts myäjmokx jëmëjtëp ngaˈˈanmääy parëts mëët nˈëxpëkët!”.
4. ¿Tijaty mbäät nduˈunëm parë nbatëmë jäˈäy diˈib ëxpëkäämp?
4 Yajnidëwë. ¿Mnijäˈäwëp ti tyuumpy tuˈugë nmëguˈukˈäjtëm ko tjamyëdatyë wiinkpë mä ja jäˈäy diˈib yaˈëxpëjkypy? Ko yˈëxpëjktäˈäytyë, ta dyajtëy ja jäˈäy pën kyaj pën tˈixyˈaty diˈib yˈëxpëkaambyë Biiblyë, per jawyiin tˈanëëmë ja myëguˈuk pën mbäät dyajtëy. Ko ja jäˈäy diˈib kanäkˈok kujk nninëjkxëm nmoˈoyëmë liibrë ¿Ti tukniˈijxëbë Biiblyë?, mbäät nyajtëˈëwëm: “¿Kyaj pën xyˈixyˈaty diˈib nanduˈun tsyojkënyëˈatëbë tyäˈädë liibrë?”. Näˈäty nan mbäädë prekursoor o käjpxwäˈkxpë ti yajtuˈudukyëty parë kyaj jäˈäy dyaˈëxpëkëdë diˈib tsyojkënyëˈajtypy. Pääty, ¿tiko mganayˈawanëty?
5. ¿Tiko yˈoyëty nyajtëˈëwëm ja nmëguˈukˈäjtëmë jyamyëët pën tsyojkënyëˈajtypy tˈëxpëkäˈänyë Biiblyë?
5 Nmëguˈukˈäjtëmë jyamyëët diˈib kyaj yˈëxpëky. Mä mnaymyujkën, ¿japë nmëguˈukˈäjtëm diˈib kyaj yˈëxpëkyë jyamyëët? Nääk kyaj ttsoktë ets ja jyamyëët tyukmëtmaytyäˈägëdët ja Diosë yˈAyuk, per mbäät tˈaxäjë ëxpëjkën ko nyinëjkxëdët diˈib kyaj tjiiky tmëguˈugëty. Oy ko jawyiin nyajtëˈëwëm ja nmëguˈukˈäjtëm parë nnijäˈäwëm wiˈix mbäät nˈanmäˈäyëm ja jyamyëët ets näˈä mbäät ninëjkxëm.
6. ¿Tiko jyëjpˈamëty nuˈkxtakëm parë nbatëmë jäˈäy diˈib yˈëxpëkaambyë Biiblyë?
6 Amdowë Jyobaa naybyudëkë. Ninäˈä mgawinmayët ko kyaj tsyobääty ko mnuˈkxtaˈaky (Sant. 5:16). Jyobaa wyandakypy ko myëdooˈitaambyë nuˈkxtakën pën yëˈë nˈamdoˈojëm diˈib tuˈugyëp mët diˈib yëˈë tsyejpy (1 Fwank 5:14). Tuˈugë nmëguˈukˈäjtëm diˈib jantsy mayë tyuunk, ojts tˈanëëmë Jyobaa parë tpäädët pën yaˈëxpëkëp. Ja nyëdoˈoxy, ta nanduˈun tmënuˈkxtakyë Jyobaa. ¿Tiko? Yëˈko myëjotmaybyat ko ja nyaˈay tkamëdatëdë tiempë parë tpudëkët ja jäˈäy, ets mas pën myëdäjtypy kanäk pëkyë jotmay. Ko nyajxy majtsk sëmään, ta nimajtsk ja nyuˈkxtakën yaˈˈatsoojëmbijttë, pes tuˈugë prekursoora ojts tpääty tuˈugë yetyëjk diˈib yˈëxpëkaambyë Biiblyë, ta ojts ttuknipëky ja nmëguˈukˈäjtëm parë yëˈë dyaˈëxpëkët. Tyäˈädë nmëguˈukˈäjtëmë nyëdoˈoxy jyënaˈany: “Pënaty winmääytyëp ko kyaj mbäät tuˈugë jäˈäy dyaˈëxpëktë, nˈanmääytyëbëts parë xëmë nyuˈkxtäˈäktët ets tnigäjpxtët ti naybyudëkë tsyojktëp. Ninäˈäts ngawinmääytyë agujk jotkujk nyajpäättët extëm tyam”. Mijts nan mbäät xypyaatyë jäˈäy diˈib ëxpëkäämp pën kyaj mˈëxtëkëwaˈaky. Ets nëjkxëp agujk jotkujk mnayjawëty ko tuˈugë jäˈäy xypyudëkët parë tˈyoˈoyët ja “tuˈu diˈibë nëjxp mä ja jikyˈäjtënë winë xëë winë tiempë” (Mat. 7:13, 14).