Këdii këˈëm mnayajtuˈudukyëty ko mayë mduunk
1. ¿Tiko nääk tsyiptakxëty tˈanëëmëdë jäˈäy ko yaˈëxpëkandëp?
1 ¿Mtsiptakxëp xyˈanëëmëdë jäˈäy ko myaˈëxpëkaampy mët ko mayë mduunk mˈayoˈon xymyëdaty? Jyantsy myënëjkxypy kajaa tiempë parë nyaˈëxpëjkëm tuˈugë jäˈäy, pes tsojkëp jawyiin niˈëxpëjkëm, ninëjkxëm ets nbudëjkëm parë wyimbatët. Apostëlë Pablo ojts jyënaˈany ko yajtuunë jyukyˈäjtënë parë ttukniˈˈijxë tëyˈäjtënë ja jäˈäyëty diˈib Tesalónica (1 Tes. 2:7, 8). ¿Ti mbäät nduˈunëm parë tiempë njuˈtëm ets nyaˈëxpëjkëmë jäˈäy?
2. ¿Wiˈix mbäät nyajtuˈunëmë tiempë pën ntsojkëmë Jyobaa?
2 Tsojkëbë tiempë parë nmëduˈunëmë Jyobaa. Kanäk pëky jyaˈˈaty wiˈix nmëduˈunëmë Dios. Extëm tuˈuk tuˈugë sëmään, njuˈtëmë tiempë parë nëjkxëm mä naymyujkën, käjpxwäˈkxpë, parë nnuˈkxtakëm ets parë ngäjpxëmë Biiblyë. Nˈokwinmäˈäyëmë tyäˈädë: Oy tuˈugë kasäädë jäˈäy, jantsy mayë tyuunk tjamëdaty, jyuˈtypyë tiempë xondaˈakyˈää xondaˈakyjyot parë yajpääty mëdë jyamyëët. Pes nanduˈun ëtsäjtëm, pën mëk ntsojkëmë Jyobaa, taxyëp xondaˈakyˈää xondaˈakyjyot njuˈtëmë tiempë parë nmëduˈunëm (Éfes. 5:15-17; 1 Fwank 5:3). Jesus nyigäjpx ko diˈib tuk pëky jëjpˈam mä nmëduˈunëmë Jyobaa, yëˈë ko nmëmëdoˈojëmë ja anaˈamënë parë nyaˈëxpëjkëmë jäˈäy (Mat. 28:19, 20). Ko tyäˈädë nwinmäˈäyëm, yëˈë xypyudëkëyäˈänëm parë nduˈunëm diˈib të nyajtuknipëjkëm: nyaˈëxpëjkëmë jäˈäy.
3. ¿Ti mbäät nduˈunëm parë nyaˈëxpëjkëmë jäˈäy ko näˈäty kyaj mbäät ninëjkxëm?
3 Per ¿ti mbäät nduˈunëm pën nmëdäjtëm tuˈugë mëk päˈäm, tuunk o tuˈugë asignasyon wiinktsoo? Näägë nmëguˈukˈäjtëm diˈib pëjkëdëp yˈanmääytyëp ja diˈib yaˈëxpëjktëp ets nyiminëdët mä tyëjk. Ets nääk ko tsyoondë, myëgäjpxtëp ja jäˈäy mä telefënë o mä komputadoorë parë mëët yˈëxpëktë. Ets nääk ko kyamadäˈägäˈändë tninëjkxët ja diˈib yaˈëxpëjkypy, ta ttuknipëkyë nmëguˈukˈäjtëm diˈib seguurë nyinëjkxëp.
4. ¿Wiˈix ndukˈoyˈatäˈänëm pën nyaˈëxpëjkëmë jäˈäy?
4 Pablo jantsy jotkujk nyayjäˈäwë ko dyajtuunyë tiempë etsë jyot myëjää parë tpudëjkë jäˈäy ets ttuknijäˈäwë tëyˈäjtën (Apos. 20:35). Yëˈë jyamyajts pënaty pyudëjkë jam Tesalónica ets ta tmooyë dyoskujuyëmë Jyobaa (1 Tes. 1:2). Ëtsäjtëm nan nëjkxëp mëjwiin kajaa ndukxondakëmë Diosë tyuunk pën kyaj nasˈijxëm ets ja tuunk ayoˈon xyajtuˈudujkëm parë nyaˈëxpëjkëm tuˈugë jäˈäy.