¿Ti mbäät mbudëkëty parë mˈëxpëkët sëmään sëmään?
¿MTSIPTAKXËP xyˈëxpëkëdë Biiblyë sëmään sëmään? ¿O mtsipkaˈxp? Niˈamukë duˈun njäjtëm. Tijaty nduˈunëm tuˈuk tuˈugë xëëw, tsojkëp niduungëm. Extëm ko bom bom ntsiˈiw nxëjtsëm, tsojkëp njuˈtëmë tiempë, per ko net ntsiiwdäˈäyëm oy nnayjyäˈäwëm. Ko ngäjpxëmë Biiblyë oy nanduˈun xyajnayjyäˈäwëm, duˈunxyëp extëm ko ntsiiwdäˈäyëm (Éfesʉ. 5:26). Tijaty yää yajnigäjpxäämp mbäät mbudëkëty:
Yaˈoyë tuˈugë mbrogramë. Mëdiˈibë “niˈigyë jëjpˈam” mbäät ttuny tuˈugë Diosmëduumbë, yëˈë ko tˈëxpëkëdë Biiblyë (Filip. 1:10, TNM). Ets parë kyaj xyjyaˈaytyëgoyët näˈä mˈëxpëkäˈäny, kujayë ets këxˈoots mä mbäät pojën xyˈixy, extëm potsywyinm o mä mrefrijeradoor. Nan mbäät xypyëjktaˈagyë mˈalarmë mä mdelefënë parë mdukjamyatsëdët ti oorë mˈëxpëkäˈäny.
Ix nuˈun mˈëxpëkäˈäny. ¿Wiˈix mijts mˈëxpëky? ¿Madakp jeky mˈëxpëkët? ¿O jeˈeyë wanaty mˈëxpëkäˈäny, per janääm jatsojk? Mijts mnayˈixyˈäjtëp, pääty ko nety xyaˈoyë ja mbrogramë kujayë nuˈun mˈëxpëkäˈäny. Ets ¿ti mbäät xytyuny ko nety ttukjäˈty ja xëëw oorë mä të xytyukniwitsë mˈëxpëkäˈäny, per kyaj ja mˈääw mjot xyondaˈaky? Ëxpëk oy jeˈeyë 10 minutën, pes mbäät mbudëkëty kyaj ttimmëbäädët ko ninuˈun mgaˈëxpëkët. Oyë nety waanë të xytyukniwitsë mˈëxpëkäˈäny, waˈan nëjkx jeky mˈokˈëxpëjknë (Filip. 2:13).
Ix kontiempë ti mˈëxpëkaampy. Pën jaanëm xyˈijxpääty ti mˈëxpëkaampy mä nety të tpääty ja xëëw oorë, kyaj nety “yajxon ja xëëw” tiempë xyajtuny (Efesios. 5:16, TY). Oy ko xykyujayët mä tuˈugë listë tijaty mˈëxpëkaampy. Ets pën jam ti xyˈaknijawëyaˈany, kujayë nanduˈun. Pën mä jam mˈëxpëky jam ti kyaj oy xyjyaygyukë, kujayë parë mbäät ok xyˈëxpëky.
Mbäät xywyijtstëgatsy. Mëdiˈibën jëjpˈam, yëˈë ko mˈëxpëkët tuˈuk tuˈugë sëmään. Mbäät xywyijtstëgatsy, ja xëëw, ja oorë, ti mˈëxpëkaampy ets nanduˈun xyˈixy nuˈunën mˈëxpëkäˈäny.
Ko xëmë xyˈëxpëkëdë Biiblyë, mdukˈoyˈataampy mëjwiin kajaa. Nëjkxëp xymyëwingonyë Jyobaa, oy tijaty xytyunäˈäny ets mnayjyawëyanëp agujk jotkujk (Jos. 1:8).