Jyobaats xypyudëjkëdë ko tyuunë ja tsip ets ko nyajxy

Paul: Jantsy agujk jotkujkëts nayjyäˈäwëdë ko nobiembrë poˈo mä jëmëjt 1985, nyajkajxtëts mä ja paˈis mätsë nety ndunäˈändë misioneerë jap Liberia, (África Occidental). Ko ja abionk myëjäjtëdë Senegal, Anne duˈun tnimaytyaky: “Jeˈeyë nety yˈaktëgoyˈaty ja tuk oorë parëts njäˈttët Liberia”. Per tajëts ojts nyaˈˈanëëmëdë: “Ninuˈun mnëjkxtë Liberia yaayë mjënäjktäˈäytyët mët ko të japë gobiernë yajnibëdëˈëky”. Japyëts ojts nwëˈëmdë Senegal mäjk xëëw mët ja misioneerëty mëdiˈibë nety jap tuundëp. Nnijäˈäwëdëts ko Liberia nëgooyë nety japë jäˈäy nyayaˈoˈkëndë ets ko ja gobiernë të nety tniˈanaˈamë parë nipën kyapëtsëmët mä jyëën tyëjk mët ko mbäädë netyë jäˈäy yaˈoogëdë.

Anne: Kyajëts mä nëgoo njety nyëjkxäˈändë mët ko tsëˈkëdëbëts. Duˈunëts të ndimymyutskˈaty, axtë tsëˈkëbëts ninaxëdë karreteerë. Per nbëjktaktëtsë nwinmäˈäny ko nëjkxandëbëts määjëtsë nety të nyajkaxtë.

Paul: Ëjts mëdë Anne, japëts nyaˈk nbajttë Inglaterra. Kojëts ojts nyajkäˈpxtë sekundaaryë, tajëts nduundëjkëdë prekursoor, pes aduˈugëtsë nety ja nxëëw ndiempë nyajtunäˈändë määjëts nmëdundë Jyobaa. Ja ndääk ndeetyëtyëts nan xytyukmëtsojktëts parëts duˈun ndundët. Kotsë netyë njëmëjt 19, tajëts nyajwooy Betel. Ets kojëts nbëjky mëdë Anne mä jëmëjt 1982, ta nanduˈun yajwooy Betel.

Anne: Jantsy jotkujkëtsë nety nayjyawëdë kojëts ndundë Betel, per mëdiˈibëtsë nety niˈigyë ntsojkënyëˈäjttëp, yëˈë kojëts ndunäˈändë mä tyëgoyˈatyë naybyudëkë. Kom jam Betel yëˈëjëts mëët nduundë nmëguˈukˈäjtëm mëdiˈibë nety të tyundë misioneerë, tajëts niˈigyëts ja nˈääw njot jyënandë parëts duˈun ndunäˈändë. Pääty nuˈun nyajxy tëgëëk jëmëjt, ux uxëts njantsy nmënuˈkxtäˈäktë Jyobaa parëts duˈun ndundët. Jantsy agujk jotkujkëts nayjyäˈäwëdë ko mä jëmëjt 1985, nyajwoowdëts Galaad mä klase 79 ets japëts nyajkajxtë Liberia, África Occidental.

XYPYUDËJKËDËTS KO JA NMËGUˈUKˈÄJTËM DYAˈIJXËDË TSOJKËN

Paul: Ko jatëgok ja abionk tyuundëjkë mëdiˈibë nëjkxp Liberia, tajëts jap ojts nëjkxtë. Kojëts jap njäjttë, duˈunyëmë nety japë jotmay, pes kyaj nety mbäät pën pyëtsëmy koots. Jantsy jeˈeyë ijty ja jäˈäyëty mëdiˈibë yajpattëp määyoty tmëdowdë ja karrë mëk myuˈuy, duˈunyë pyëyëˈkwäˈkxtäˈäytyë mët ko jyantsy tsyëˈëgëdë. Ëëtsëty yëˈëjëts ijty ngäjpxtëp ux uxë Salmos parëts këdiibë nëgoo ntsëˈëk njawëdët. Per oyë nety duˈun ja jotmay jyapˈaty, duˈunyëmëts jap agujk jotkujk nDiosmëduundë. Ja ngudëjkëts yëˈë ijty nëjkxp jënˈayeˈepy tëjkˈayeˈebyë ets ëjts yëˈëjëts ijty mëët nduny Betel ja nmëguˈukˈäjtëm John Charuka. Mëjwiin kajaats tijaty xytyukniˈˈijxë, pes nyijäˈäwëbë nety wiˈix ja nmëguˈukˈäjtëm twinguwäˈägëdë amay jotmay.

Anne: Jap Liberia nëgooyëts ojts nˈyujnëdë mët ko ja nmëguˈukˈäjtëmëty jantsy oy jyaˈayˈattë, ajëëky amëguˈugëty, xytsyojktëbëts ets oy Diosmëdundë. Pojënëts ojts mëët naymyëyujëdë ets duˈunëts njäˈäwëdë extëmtsë nfamilyë. Xypyudëjkëdëts mëjwiin kajaa ets ja jäˈäyëty nëgooyë ijty tˈoymyëdoownëdë ja Diosë yˈääw yˈayuk, kyaj ijty tˈoyjyawëdë kojëts jeˈeyë tuk ratë nmëtmaytyäˈäktë. Nëˈääy tuˈääy, nbattëbëts ijtyë jäˈäy mëdiˈibë nyimaytyaktëbë Biiblyë ets kyajts xynyekytsyiptakxëdë nmëtmaytyaktsoondët. Jantsy nimayëts ijtyë jäˈäy mëdiˈibëts nyaˈëxpëjktë ets kyajts nˈokmadaknëdë nyaˈëxpëjktäˈäytyët. ¡Jantsy oyëts jap nduundë!

JYOBAA YËˈËTS XYJYOTMËKMOOYTYË KOJËTS NTSËˈËK NJÄˈÄWËDË

Paul: Ja yˈijty taxk jëmëjt mä kyaj nëgoo pën tsyiptuuny, per mä jëmëjt 1989, ta ja tsip yˈamëktaky ets niˈigyë ja jotmay myëjwindëjkë. 2 äämbë julië mä jëmëjt 1990, ta ja axëkjäˈäytyëjkëty tjaˈabëjktë ja it lugäär mëdiˈibë najamyë wëˈëmp Betel. Tëgëëk poˈo nyajxy määjëts kyaj pën mëët nmaytyaktë, ni ja nfamilyëtyëts ets ni ja nmëguˈukˈäjtëmëty mëdiˈibë yajpattëp mä Betel jap Estados Unidos. Nëgooyë nety axëëk ja jäˈäy yˈadëtsnëdë, amääytyak ja käˈäyën ukën ets yaˈˈaguanëˈäjttë ja toxytyëjkjäˈäyëty. Mëjwiin kajaa ojts ja jäˈäy tkuˈayowëdë, pes jaa jyejky ja jotmay 14 jëmëjt.

Anne: Ojts ja jäˈäy nyaynyibëdëˈëgëdë ets nyayaˈoˈk nyayajtëgooyëdë. Ja axëkjäˈäytyëjkëty atsëˈëk ajawë nety nyayxyojxëndë, ak tujnmëët jyëdijnëdë ets tyëjkëndë maˈtspë jënoty tëgoty. Näägë jäˈäy jyënandë ko duˈunë nety ja myëguˈuk të dyaˈooktë extëm ko jäˈäy “dyaˈoogyë tutk këtsey”. Ja axëkjäˈäytyëjk yaˈˈadujktë ja nëˈë tuˈu ets pënaty kaˈˈagandëp jamyë dyajjäämˈoˈk dyajnaxˈoˈktë ets tnijëbijpajttë may oˈkpë naa jamyë mä nety yajpäätyë Betel. Oˈktë nanduˈunë nmëguˈukˈäjtëm axtë nimajtskë misioneerëty.

Nimayë nmëguˈukˈäjtëm pyëjktaktë jyukyˈäjtën oˈkën jëjpˈam, duˈun ja betelitëty etsë misioneerëty ko dyuˈtstë ja myëguˈuktëjk mëdiˈibë nety ja axëkjäˈäytyëjkëty yaˈooganëdëp. Ëëtsëty nˈyuˈtstëts Betel nimayë nmëguˈukˈäjtëmëty, extëm määjëtsë nguartë jaˈajëts nˈijttë nidaxtujk.

Paul: Bom bom ijty ja axëkjäˈäytyëjk myindë Betel parëts xyajtëwdë pën kyajëts jap pën nˈyuˈutstë. Kojëts duˈun nˈijxtë, tajëts ojts naygyäjpxëdë wiˈixëts nyaygyuentëˈatäˈänëdë. Ko ijty ja axëkjäˈäytyëjk myindë, nimajtsk ja nmëguˈukˈäjtëm mëdiˈibë ijxwoˈondëp mä bentanë ets nimajtsk mëdiˈibë nyibëtsëëmdëp. Ko ja nimajtskpë nmëguˈukˈäjtëm mëdiˈibë pëtsëëmdëp dyaˈittë ja kyëˈë winduuy, yëˈë yˈandijpy ko ja axëkjäˈäytyëjkëty kyaj atsip tyimtëkëyäˈändë. Per ko ja mëdiˈibë ijxwoˈondëp mä bentanë tˈixtë ko ja nimajtskpë nmëguˈukˈäjtëm të tpëjktäˈäktë ja kyëˈë jëxkëˈp, yëˈë yˈandijpy ko ja axëkjäˈäytyëjk atsip tyëkëyäˈändë, ta ijty pojˈam ja myëguˈuktëjk dyuˈutstë.

Anne: Ko nyajxy kanääk sëmään, ta atsip ja axëkjäˈäytyëjkëty tyëjkëdë Betel ak tujn mëët. Tajëts pojën ndëjkëdë mä banyë mët tuˈuk ja nmëguˈukˈäjtëm, ta oywiˈix tyëjkë mä tuˈugë ropeerë mëdiˈibë nety myëdäjtypyë yuˈtstakn. Ja axëkjäˈäytyëjk ojts pyattë määjëtsë nety nyajpäättë ets amëjääw tjantsy kyojxtë ja tëjkˈääw. Perë Paul, ta tˈanmääy: “Tapëtsë ngudëjk mä banyë”. Per kojëts ojts nyajneˈemy mätsë nety nyajkuˈaduky ja nmëguˈukˈäjtëm, tats njantsy tsyëˈkë ets ntsëyuuybyëjkyëts, kyajtsë nety mbäät ja tëjkˈääw nˈokˈyaˈˈawatsnë mët ko mbäädë nety tpëktë kuentë. Netyëtsë Jyobaa nmënuˈkxtaky etsëts nˈanmääy parëts xypyudëkët. Pääty kojëts nyaˈˈawatsy ja tëjkˈääw kyajtsë nety nekytsyëˈëgë. Niduˈuk amëjääwëts ojts xynyastijë ets tyëjkë mä banyë, ta ttukˈijx ttukwoˈonë ja ropeerë per kyaj pën tpaty, ta ojts nyëjkxtë mä wiinkpë kuartë ets nanduˈun ttukˈijx ttukwoˈonëdë, per kyaj pën tpattë.

DUˈUNYËM OJTS JYAJY TYËˈKXY JA TËYˈÄJTËN

Paul: Ko kanääk poˈo nyajxy, amääytyak ja käˈäy ukën. Yëˈëyëts ngäˈäyënˈäjt nˈukënˈäjttë ja tekstë mëdiˈibë jopy jopy yajkäjpxp, ets yëˈëjëts mëdiˈibëts xymyëjääwmooytyë.

Per koxyëp ojts yˈagëjxënë ja käˈäy ukën ets ja nëë, taxyëbëts ojts ntsoˈonëdë Betel. Ets ja nmëguˈukˈäjtëmëty mëdiˈibëtsë nety nˈyuˈtstëp ojtsxyëp ja jäˈäy yaˈoogëdë. Perë Jyobaa xymyooytyëts tijatyëts nyajtëgoyˈäjttë extëmtsë nety kyaj ndimyˈëwxit ndimyjyëjpˈixtë ets yëˈëts xymyëjääwmoˈoytyë parëts kyaj nëgoo ntsëˈk njäˈäwëdë.

Oyë nety kyëxëˈëky ko kyaj yˈokˈoyëyanë ja amay jotmay, ëëtsëty yëˈëtsë nety xyjyotkujkmooytyëp ja tëyˈäjtën. Oyë nety ja nmëguˈukˈäjtëm kyaˈak pyuttë, duˈunyëm mëkë myëbëjkën tmëdäjttë ets kyaj nëgoo tsyëˈkëdë. Nääk jyënandë ko extëm nety jam jyattë yëˈë nety pudëkëyanëdëp parë tmëmadäˈäktët ko myinët ja mëj ayoˈon. Pënaty tuundëp mëjjäˈäy ets ja ënäˈktëjkëty, pyudëjkëdë ja myëguˈuktëjk amëk jotmëk. Ets ja nmëguˈukˈäjtëmëty mëdiˈibë nety të tkugaˈaktë ja tsip tuˈugyë nyayaˈijtëdë, yˈëxtääytyë winmäˈäny wiˈix mbäädë jäˈäy ttukmëtmaytyäˈäktë ja Diosë yˈayuk ets ojts tkojtë oywiˈix ja salonk jap yuugoty parë ryeunyonkˈattët. Ko duˈun ttuundë yëˈë mëdiˈibë pudëjkëdë oyë nety jam nuˈunë amay jotmay jyamˈaty. Määjëtsë nety jam nyajwäˈkxtë ja naybyudëkë, amutskˈäjttëtsë njot ngorasoon kojëts nˈijxtë ko ja nmëguˈukˈäjtëmëty kyaj yëˈë tˈamdowdë ja wyit, yëˈë yˈamdoowdëp ja bolsë o ja motsyilë mëdiˈibë mbäät dyajtundë ko nyëjkxtë tëjkˈayeˈebyë. Ja jäˈäyëty mon tukë nety nyayjyawëdë ko tˈixtë ja tsip tyunyë, pääty jyantsy myëdowandë ko yajtukmëtmaytyäˈäktë ja oybyë ayuk ets yajmonyˈijx yajmonyjyäˈäwëdë ko Jyobaa tyestiigëty duˈunyëm agujk jotkujk yajpäättë ets naytsyojkëdëp nixim niyam oyë nety ja jäˈäy jeˈeyë tsyiptundë (Mat. 5:​14-16). Ko duˈunyëm ja nmëguˈukˈäjtëm ojts tnimaytyäˈäktë ja oybyë ayuk, ta nääk ja axëkjäˈäytyëjk ojts tyëjkëndë Diosmëduumbë.

XYPYUDËJKËDËTSË JYOBAA KOTS NIKAKTË JA NMËGUˈUKˈÄJTËMËTY

Paul: Mëgoxkˈokëts nbëtsëëmdë Liberia, tëgëkˈok tsojkëts njëmbijttë ets majtskˈok tuk jëmëjtatyëts njajktë. Tuˈugë misioneerë duˈun tnimaytyaky wiˈixëtsë nety nayjyawëdë: “Jap Galaad yajtukniˈˈijxëdëts ko tsojkëbëts winë ääw winë jot nbudëkëdët ja nmëguˈukˈäjtëm mäjatyëts nyajkaxtë ets duˈuntsën nduundë. Pääty kojëts ojts nikaˈaktë mä meerë dyajnaxtë amay jotmay, jantsy mon tukëts nayjyäˈäwëdë”. Per oyëtsë nety wiink paˈis të nëjkxtë duˈunyëmëts nbudëjkëdë.

Anne: Mayë poˈo mä jëmëjt 1996, tajëts ojts nimäjtaxk nmëtsoondë karroty may ja neky mëdiˈibë nety yajmëdäjtp Betel parëts nˈyuˈutsäˈändë käjpnbëˈam. Per määjëtsë nety nduˈuyeˈeytyë, ta ja jäˈäy nyaynyibëdëˈkëdë, dyaˈˈadujktë ja tuˈu, tyëjkëdë tujpë etsëts ojts nidëgëëk xyajjënaktë karroty etsë Paul ta ojts yajmënëjkxy. Kyajëts nekynyijäˈäwëdë tiijëts ndundëp, per tats nˈijxtë ko ja Paul myiny mayjyaˈayoty ets jyantsy wyindaxy, duˈunëts nwinmääytyë ko waˈanë nety ja jäˈäy të tyujˈyëty, per kyaj nety dyuˈunëty pääty myiiny yeˈeybyë. Päätytyëmë nety wyindaxy mët ko amëjääw tuˈugë jäˈäy jyëbijpëtsëëmë karroty.

Tajëts nˈijxtë ko nimayë jäˈäy pyattë mä ja soldäädë kyarrë ets tajëts ojts nanduˈun oywiˈix naygyëxtëyëdë. Ja tsyofeer amëjääw dyajtsoˈony ja karrë mët ko jyantsy tsyëˈëgë ets kyaj ojts tˈokmëdoownë oyëts njaˈˈanmääytyë parë dyajwäˈkˈwëˈëmët. Kojëts njënäjktë, jeˈeyëtsë nety ja ngëˈë ndeky tsyëyuuynyëdë mët ko mëkëtsë nety të njantsy nyaygyumatsëdë ets të nayˈatsëˈëgëdëts.

Paul: Tëjëtsë nety yˈaxëˈkëtyaˈay ja nwitëtyëts ets të kyëˈtstäˈäy, kyajëts nmëbëkandë kojëts ja jäˈäy kyaj xyaˈoˈktë. Jamyëts nmäädë elikoptrë pëˈääy mëdiˈibë nety të yajtuktujjëtyaˈay ets jakumbom yëˈëts xymyënëjkxtë Sierra Leona. Jotkujkëts nayjyäˈäwëdë kojëts kyaj wiˈix njäjttë, per nmëjotmaybyattëts ja nmëguˈukˈäjtëmëty mëdiˈibë Liberia.

JYOBAATS XYMYËJÄÄWMOOYTYË PARËTS NWINGUWÄˈKËDË JATUˈUGË JOTMAY

Anne: Kojëts njäjttë mä ja Betel mëdiˈibë Freetown jap Sierra Leona, seguurëts nayjyäˈäwëdë ets oyëts nyaˈijxˈijt nyajkuentëˈäjttë. Per tajëts njamyajtstääy wiˈixëtsë nety të njat të ngëbattë Liberia. Bom bom, jeˈeyëtsë nety ntsëˈkënë etsëts njawë ko tamëts ti xyjyatäˈäny xykyëbatäˈäny, kyajtsë nety oy ja njot nwinmäˈäny yˈoktuunë. Ajotkumonëts ijty njotwijy etsëts njantsy tsyëˈëgë, jeˈeyëts ja njot niniˈkx njäˈäwënë tëtykyëm etsëts njantsy pyëxikyëty ets axtë xejyˈadujkpëts. Paul tajëts ijty xymyëneny ets nyuˈkxtaˈaky, nˈëwdëts ja kantikë axtë koonëmëts njotkujkë. Duˈunëts nayjyäˈäwë ko lokëjatanëbëts ets ko kyajts mbäät nˈoktuunë misioneerë.

Per ninäˈäts ngajäˈäytyëgooy ko mä taabë sëmään pyëtsëëmy majtskë rebistë mëdiˈibëts xypyudëjkë. Tuˈuk yëˈë ja ¡Despertad! 8 äämbë junië 1996, ja artikulo mëdiˈibë xyëwˈäjtypy “Qué hacer ante los ataques de pánico”. Kojëts ojts ngajpxy, taanëmëts njaygyujkë tijëtsë nety xyjyäjtp. Ets ja tuˈuk, yëˈë ja rebistë La Atalaya 15 äämbë mayë 1996, ja artikulo mëdiˈibë xyëwˈäjtypy “¿De dónde proviene su fuerza?”. Jap ojts yajnimaytyaˈaky ko duˈun extëm tuˈugë totk mëdiˈibë tukˈaduˈumë kyakn të tsyayuty mbäät duˈunyëm kyaagëdity ets tˈëxtäˈäy ja jyeˈkxy, ëtsäjtëm mbäät duˈunyëm nbudëjkëm ja nmëguˈukˈäjtëmëty oyë nety axëëk të njäjt të ngëbajtëm mëk ko Jyobaa xytyukpudëjkëm ja yˈespiritë santë. Jats meerë Jyobaa xypyudëjkë etsëts xymyëjääwmooy määjëtsë nety nyajtëgoyˈaty (Mat. 24:45). Ja tuk pëky mëdiˈibëts nanduˈun xypyudëjkë, yëˈë kojëts ojts nbayeˈey mä ëxpëjkpajn ti mbäät nduˈunëm ko duˈumbë jotmay nbatëm etsëts ojts nmäˈkxtäˈäy mä tuˈugë karpetë. Ko tiempë nyajxy, tajëts kyaj ojts nëgoo nˈokjamyajtsnë wiˈixëtsë nety të njaty të ngëbety.

JYOBAATS XYPYUDËJKËDË KOJËTS NYAJKAJXTË WIINKTSOOW

Paul: Mä kyëxanë 2004, jatsë nety nyaˈˈabatanëdë 20 jëmëjt jap Liberia. Tëgok tëgokëts ijty jap njëmbittë jantsy jotkujkëts nayjyawëdë, mët ko duˈunëts njawëdë extëmtsë njäˈttë määjëtsë njëën ndëjk. Të nety xyaˈamnë ja tsip ets tapë nety yajtukniwijtsënë parë Betel yaˈˈagojëyaˈany, kojëts nyaˈˈanëmääytyë ajotkumonë parëts nëjkxtët wiinktsoow.

Ojtsëts xytsyiptakxëdë ntsoondët mët ko mëkëts nety ja nmëguˈuktëjk ntsoktë ets duˈunëts njäˈäwëndë extëmtsë nfamilyë. Per kom tëtsë nety nˈokˈijxpëdë wiˈixëtsë Jyobaa xypyudëjkëdë kots ojts nmastuˈuttë ja nfamilyë parëts ojts nëjkxtë Galaad, päätyëts ngupëjktë ko nëjkxandëbëts Ghana.

Anne: Jëëy yaxtëts kojëts ojts ntsoˈonëdë Liberia, per xyjyotkujkmooytyëts ko Frank, tuˈugë nmëguˈukˈäjtëm mëdiˈibë myëjjäˈäy myëˈˈënäˈkënë, xyˈanmääytyëts: “¡Jäˈäytyëgooytyëgëts!” Per ta jatëgok jyënany: “Nijäˈäwëdëbëts ko kyajëts xyjyaˈaytyëgoyäˈändë, per tsoktë winë ääw winë mjot ja mmëguˈuktëjk mëdiˈibë Ghana, mët ko yëˈëjënë Jyobaa jam mgajxëdëp”. Kojëts duˈunë yäˈädë nmëguˈukˈäjtëm xyˈanmääytyë, yëˈëjëts xypyudëjkëdë parëts nˈijxwëˈëmdët ja it lugäär ets ja nmëguˈukˈäjtëmëty.

Paul: Jantsy pojˈamëts ojts nmëyujtë ja nmëguˈukˈäjtëm mëdiˈibë tsënääytyëp Ghana. Jantsy nimayë nety japë Testiigëty ets xymyooytyëtsë ijxpajtën wiˈix Diosmëdundë ets wiˈixë mëbëjkën tmëdattë. Per määjëtsë nety të nˈijnëdë 13 jëmëjt Ghana, tajëts nyaˈˈanëmääytyë etsëts nëjkxtët mä Betel mëdiˈibë Kenia, África Oriental. Nbaˈˈayoowdëts ja nmëguˈukˈäjtëmëty mäjatyëts nDiosmëduundë, per pojˈamëts jatëgok ojts nmëyujtë mëdiˈibë Kenia. Yääts tyam nDiosmëdundë ets tëgoyˈäjtp nanduˈun naybyudëkë.

TËJËTS TIJATY NJATTË MÄJATYËTS TË NDIOSMËDUNDË

Anne: Nuˈunëts kujk nDiosmëduny, tëjëts nbäätyë amay jotmayë mëjwiin kajaabë ets tëjëts nyajnaxyë mëk tsëˈëgë. Ko mnayˈatsëˈëk mnayˈajawëty, mbäät ok myajˈyubety myajpäˈämbetyëty ets myajmony myajtukyëty, etsë Jyobaa kyaj mbäät xykyuwäˈänëm mëjˈäjtëngyëjxm. Koogoots nmëdoy muumë jäˈäy tyujy, tats xyjyantsy tyukminyë tsëˈëgë etsëts ja ngëˈë xyujxtäˈäy. Per ndukˈijxpejtypyëtsë Jyobaa, pes yëˈëts mëdiˈibëts xymyoobyë jot mëjääw ets yëˈë yajtuumbyë nmëguˈukˈäjtëmëty. Tëts nanduˈun nˈixy ko pën duˈunyëmëts nˈëxpëky, nnuˈkxtaˈagyëts, nëjkxyëts reunyonk ets jënˈayeˈepy tëjkˈayeˈebyë, yëˈëts xypyudëjkëdëp parëts ndundë määjëts nyajkaxtë

Paul: Näˈätyëts pën xyajtëwdë: “¿Mˈoyˈijxtëp ja lugäär mä mdundë?”. Tuˈuk tuˈugë paˈis ak oy yˈixëty, per mbäät pojën jyëmbity kutsëˈëgë. Pääty mëdiˈibëts mas nmëyujtëp mä tuˈugë paˈis, yëˈë ja nmëguˈukˈäjtëm mëdiˈibëts njäˈäwëdëp extëmëts nfamilyë. Pes mëdiˈibë tyuˈugyë xyaˈijtëm, yëˈë ko ntsojkëmë Jyobaa, oy mä ntsoˈonëm ets oy wiˈixëm ja kostumbrë nmëdäjtëm. Duˈunëtsë nety nwinmaytyë ko ëjtsëts nmëjääwmoˈoyandëp, per yëˈëjëts të xymyëjääwmoˈoytyë.

Tëgok tëgokëts nëjkxtë mä tuˈugë paˈis, xyajmonyˈijx xyajmonyjyäˈäwëbëts wiˈixë Jyobaa tuˈugyë dyaˈity ja nyax kyäjpn. Pääty ko nDiosmëduˈunëm, nmëdatäˈänëm nimayë jëëky mëguˈuk. Ijtëm seguurë ko pën duˈunyëm ndukˈijxpajtëmë Jyobaa, yëˈë xymyoˈoyäˈänëm ja jot mëjääw mëdiˈibë nyajtëgoyˈäjtëm (Filip. 4:13).