DIˈIB MIIMP MÄ NYIˈAK: ¡NNIJAWË TI TUKNIˈˈIJXËBË BIIBLYË!

Mbäät niˈamukë jäˈäy tˈëxpëktë Biiblyë

Ëëtsëty, Jyobaa tyestiigëty yëˈëjëts yajtukˈëxkäjptëp kojëts nˈëwäˈkx ngäjpxwäˈkxtë. Per ¿mnijäˈäwëbë nety ko oy mä pën tsyoonët nbudëjkëdëbëts parë tjaygyukëdë Biiblyë?

Tuˈugë yetyëjk tˈëxpëkyë Biiblyë mä tyuny

Mä jëmëjt 2014, ja tuktujk miyonk naxyë Jyobaa tyestiigëty të dyaˈëxpëktë naa taxtujk miyonk ja kujkmë jäˈäy mä 240 paˈis etsë yˈit lyugäär.a Jantsy nimayë jäˈäy diˈib yˈëxpëjktëbë Biiblyë abëtsemy nyaxwinyëdë.

Parëts duˈunë jäˈäy nyaˈëxpëktë, jats nyajkojtë 1,500 miyongë ëxpëjkpajn jëmëjt jëmëjt, extëmë Biiblyë, liibrë, rebistë etsë foyetë naa 700 ayuk. Duˈuntsoo mbäädë jäˈäy ttukˈoyˈattë ko tˈëxpëktëdë Biiblyë mä ja ayuk diˈib tsyojkënyëˈajtypy.

“Ninuˈunëts ijty ngatsojkënyëˈaty nˈëxpëkäˈäny, per tyam oyëts të nnayjawëty. Mëjwiin kajaajëts të xypyudëkë diˈibëts të njaty.” (Katlego diˈib Sudáfrica)

“Kojëts nˈëxpëjky, yaˈˈatsoowëmbijtääy tijatyëts nyajtëëw ets mëjwiin kajaats tijaty njäjty.” (Berta diˈib Nëwinm)

“Nˈëxpëjkyëts mäjëtsë ndëjk ets näˈäts ndimjënany. ¡Kyaj nety ti diˈibëts mbäät nˈakˈamdoy!” (Eziquiel diˈib Brasil)

“Jats ijty nˈëxpëky 15 minutë axtë kujkm oorë, ets näˈäty mas jeky. Këˈëmëtsë nety njënäˈäny nuˈunëts nˈëxpëkäˈäny.” (Viniana diˈib Australia)

“¡Kyajts nmëbëkany pën namayˈäjtën ja ëxpëjkën!” (Aimé diˈib Benín)

“Diˈibëts xyaˈëxpëjk mëkëts xymyëmaˈkxtujky ets yˈijty jantsy oyjyaˈay... Naymyaaybyëjkëts mëët.” (Karen diˈib Irlanda del Norte)

“Mayë jäˈäy tˈëxpëktë Biiblyë, per kyaj jyäˈttë Jyobaa tyestiigë.” (Denton diˈib Inglaterra)

DIˈIBË JÄˈÄY XËMË YAJTËËDËP MÄ WIˈIX NYAˈËXPËJKËM

¿Wiˈix myaˈëxpëktë?

Yëˈë yaˈëxpëjkp tijaty myaytyakypyë Biiblyë. Extëm nˈokpëjtakëm, Biiblyë nyigajpxypy pënën Dios, wiˈix jyaˈayˈaty, ti txëˈaty, mä yajpääty ets pën mbäät mëët nnaymyaˈayëm. Pënaty ëxpëjktëp, yajtukniˈˈijxëdëp mä tyäˈädë yaˈˈatsoojëmbity mä Biiblyë ets tijaty aknayajtëëwëdëp.

Yëˈëjëts nyajtuundëbë liibrë extëm ¿Ti tëyˈäjtën jantsy tukniˈijxëbë Biiblyë?b Tyäˈädë liibrë pyëtsëëmy parë jäˈäy tjaygyukët ja tëyˈäjtën diˈib wingëjxy myaytyakypyë Biiblyë. Myëmiimbyë kapitulo diˈib myaytyakypyë Dios, Jesukristë, tiko jyaˈˈatyë ayoˈon jotmay, oˈk tëgoˈoyën, wiˈix nuˈkxtakëm ets kanäk pëky tijaty tmaytyaˈaky.

¿Näˈä ets mää myaˈëxpëktë?

Mijts mnigäjpxëp näˈä ets mä mˈëxpëkäˈäny.

¿Nuˈun jyeky tëgok tëgok myaˈëxpëktë?

Nuˈun mmadaˈaky, duˈunëtsë jäˈäy nyaˈëxpëktë nuˈun myadaˈaky. May ja jeˈeyë yˈëxpëktë naa tuk oorë sëmään sëmään. Per ta nääk diˈib jeˈeyë ëxpëjktëp naa mäjk minutë o mäjmokx minutë.

¿Nuˈun yajnimëjuyë?

Ninuˈun. Namayˈäjtënë mˈëxpëkët ets myajmoˈoyëdë ëxpëjkpajn. Pesë Jesus tˈanmääyë yˈëxpëjkpëty: “Miits mˈaxäjëdë [...] nadëˈënyë, nan katë myajmëjuytyë” (Matewʉ 10:8).

¿Nuˈun jyeky?

Mbäät mˈëxpëky nuˈun mˈëxpëkäˈäny. Yëˈë liibrë ¿Ti tëyˈäjtën jantsy tukniˈijxëbë Biiblyë? ja tmëminy 19 kapitulo. Mbäät xywyinˈixy diˈibë mˈëxpëkaampy ets myajtukˈëxpëkët nuˈun mmadaˈaky.

¿Tsojkëbëts nDestiigëˈatët?

Kyaj. Nwintsëˈkëdëpts ti niduˈuk niduˈugë jäˈäy myëbëkandëp. Per ko xynyijawët tijatyë Biiblyë myaytyakypy, mbäät mbudëkëty parë xywyinˈixët diˈib oy.

¿Mä mbäät niˈigyë xyˈaknijawë?

Mä sitio diˈibëts nmëdäjttëp mä Internet jw.org mbäät xynyijawë tijatyëts nmëbëjktëp ets nduundëp.

¿Mä myajkujayët?

Kanäk pëky jyaˈˈaty wiˈix mbäät tuˈugë jäˈäy tˈamdoy parë tˈëxpëkëdë Biiblyë: mä Internet, mä telefënë o tjäˈäyët tuˈugë neky

Mbäät xyajtuktuky ja neky diˈib miimp mä sitio jw.org.
Nan mbäät xykyexyë neky mä tuˈugë direksion diˈib miimp mä pajina 2.
Ja tuk pëky, mbäät xyˈëxtäˈäyë Jyobaa tyestiigëty diˈib tsënaapy mä mˈit mlugäär.

a Ta jäˈäy diˈib yˈëxpëjktëbë Biiblyë tuk grupaty.

b Yëˈë yajpëtsëëmbyë Jyobaa tyestiigëty. Tyäˈädë liibrë diˈib myëmiimpy 224 pajina ja kujk kyojy naxy 230 miyonk, ets naxy 260 ayuk.

WIˈIXË FAMYLYË PYUDËKËDË

“Kojëtsë nnëdoˈoxy tˈëxpëjktsondakyë Biiblyë, mëjwiin kajaa nyayajtëgäjtsë. Oˈoˈyëtsë ntsënäˈäy njukyˈäjtën. Nnijawëyanëts ti nety yˈëxpëjkypy, tajëts nanduˈun ndëjkë ëxpëjkpë. Tijatyëts njäjt, yëˈëts xypyudëjkë parëts oy njäˈäyˈatët. Kojëts nˈëxpëkyë Biiblyë, yëˈë diˈibëtsë nfamilyë yajtuˈukmujkë.” (Eziquiel)

“Kojëts nˈëxpëjktsondakyë Biiblyë, tajëts nmastutyë droogë, nëë ets parëts kyaj pojënë njotˈambëkët. Tyam, mas wäˈätsëtsë njëën ndëjk nyaˈity ets ak lugäär mëëdëts tijaty nbëjtaˈaky. Ntsejpyëts niˈigyë nfamilyë ets jotkujkëts nnayjawëty kojëts tijaty ndukmëduny. Tyam, mas jotkujkëts nnayjawëty.” (Karen)

“Kojëts nˈëxpëjktsondakyë Biiblyë, mayëtsë jäˈäy xykyäjpxpattë. Perë nyaˈayëts kyaj wiˈix jyënany. Duˈunëts xyˈanmääy: Kyajts nmëjpëjtaˈaky wiˈixë jäˈäy jyënäˈändë. Diˈibëts nmëjpëjtakypy, yëˈë ko mbudëjkëp. Ëxpëjkˈadëˈëts. Ninäˈänëmtsë nety duˈunë nfamilyë kyajotkujkˈaty.” (Viniana)