Nˈokˈyaˈˈabëtsëˈëmëm ja oybyë ayuk ets nˈoknimaytyakëm yajxon
1. ¿Ti oybyë ijxpajtën yäjkë Pablo?
1 “Kuytyun yajxon [...] ja mduunk extëm ja Diosë myëduumbë.” (2 Tim. 4:5.) Pablo, mbäädë nety duˈun tˈanëëmë Timoteo mët ko yëˈë të nety duˈun tnastunë. Pes tëgëkˈok ttuunyë byäjë wiink it wiink naxwinyëdë, naa ja mä jëmëjt 47 ets 56. Ets mä Apostʉlʉty kanäkˈok jap yajnigajpxy ko Pablo ojts mëjwiin kajaa tyuny parë ojts dyaˈˈabëtsëmy ja oybyë ayuk ets tnimaytyaky yajxon (Apos. 23:11; 28:23). ¿Wiˈix mbäät nbanëjkxëmë yˈijxpajtën?
2. ¿Wiˈix mbäät yajxon nyaˈˈabëtsëˈëmëm mä ngäjpxwäˈkxëm tëjkmdëjkm?
2 Ko ngäjpxwäˈkxëm tëjkmdëjkm. Ta jäˈäy diˈib kyajnëm ttimmëdowdë Diosë yˈayuk, ets parë nbatëm tsojkëp ninëjkxëm wiink oorë. Nan mbäät tsuu nëjkxëm käjpxwäˈkxpë o sääbëdë domingë parë nbatëm ja diˈib nyigëbäjkˈäjtypyë fyamilyë. Oy ko nduˈunëmë mëjää parë nmëtmaytyakëmë jäˈäy mä tuˈuk tuˈugë tëjk, pääty yˈoyëty ngujäˈäyëm pënaty kyaj të nbatëm parë nnijëmbijtëm wiink oorë. Ets pën të duˈun njatuˈunëm ets kyaj pën të nbatëm, oy ko nnikakëm tuˈugë neky o nmëgäjpxëm mä telefënë.
3. Ets mijts, ¿mäjaty mbäät mgäjpxwaˈkxy?
3 Ko ngäjpxwäˈkxëm oymyääjëty ets mä mayjyaˈay. Ëtsäjtëm Jyobaa tyestiigëty, nduknijäˈäwëmë jäˈäy diˈib myëdowaampy ja “wijyˈäjtën diˈib tëyˈäjtën”. Näˈäty käjpxwäˈkxëm “nëˈääy tuˈääy” o mä jäˈäy “jyuy tyooktë” (Prov. 1:20, 21). Nan käjpxwäˈkxëm myentrës nˈijxëmë tuunk ayoˈon. Duˈun nyaˈijtëmë jot winmäˈäny mä Diosë tyuunk ets nyaˈˈabëtsëˈëmëm ja oybyë ayuk (Apos. 10:42; 17:17; 18:5; 20:20, 21, 24).
4. ¿Wiˈix mbäät xypyudëjkëm ko nnuˈkxtakëm ets ko nbawinmäˈäyëm tijaty nˈëxpëjkëm parë nyaˈˈabëtsëˈëmëm mä ngäjpxwäˈkxëm?
4 Näˈäty waˈan kyaj nimaytyäˈägäˈänëmë Diosë yˈayuk mët ko nwintsoytyuˈunˈäjtëm o jam ti xyajtuˈudujkëm, perë Jyobaa jyaygyujkëp wiˈix nyaˈijx nyajpatëm (Sal. 103:14). Pääty, pën duˈun njäjtëm, oy ko nˈamdoˈojëmë Jyobaa jotmëkˈäjtën parë mbäädë jäˈäy nmëtmaytyakëm (Apos. 4:29, 31). Ko nˈëxpëjkëm naytyuˈugë Biiblyë ets nbawinmäˈäyëm, nan mbäät xypyudëjkëm parë nˈijxëm nuˈunën jyëjpˈamëty ngäjpxwäˈkxëm ja oybyë ayuk (Filip. 3:8). ¡Ets yëˈë xypyudëkëyäˈänëm parë ndukˈijt ndukxoˈonëmë tyäˈädë tuunk!
5. ¿Ti mbäät nduˈunëm parë yˈadëwët extëm ojts ja kugajpxy Joel tnaskäjpxë?
5 Ja kugajpxy Joel ojts tnaskäjpxë ko mä kyajäˈtynyëmë Jyobaa myëj xëë diˈib atsëˈëk ajawë, yëˈë kyäjpn jyantsy yˈëwäˈkxäˈän jyantsy kyäjpxwäˈkxäˈändë, ets nitii kyayajtuˈudukäˈänëdë (Joel 2:2, 7-9). Pääty, nˈokˈyaˈˈabëtsëˈëmëmë tyäˈädë tuunk diˈib ninäˈä jatëgok kyayajtuunëmbitäˈäny.