Nˈokjäjtëm wiˈix mas oy ngäjpxwäˈkxëm
1. ¿Ti ijxpajtënë xytyukˈijxëm ko tsojkëp niˈigyë nduˈunëmë mëjää parë mas oy ngäjpxwäˈkxëm?
1 Dios mëduumbë, tsojkëp niˈigyë ttundëdë mëjää parë oy kyäjpxwäˈkxtët. Päätyë Jesus ojts ttukniˈˈixë ets tpudëjkë ja yˈëxpëjkpëty parë oy kyäjpxwäˈkxtët (Luk. 9:1-5; 10:1-11). Nanduˈun ttuundë Áquila mëdë Priscila, ojts twowdë Apolos parë dyaˈëxpëjktë “waanë oy mët ja Jesusë yˈëxpëjkën” (Apos. 18:24-26). Pablo nan yˈanmääyë Timoteo, diˈibë nety jeky kujk kyäjpxwäˈkxnë parë ttunëdë mëjää ets mas oy yaˈëxpëkët ets duˈun ja jäˈäy tpëktëdë kuentë (1 Tim. 4:13-15). Ëtsäjtëm, nan tsojkëp njäjtëm wiˈix mas oy ngäjpxwäˈkxëm, oy jeky o waanë kujk nmëduˈunëmë nWintsënˈäjtëm.
2. ¿Ti mbäät nduˈunëm parë njäjtëm tijaty mä nmëguˈukˈäjtëm?
2 Nˈokˈijxëm wiˈix ttundë nmëguˈukˈäjtëm. Tuk pëky wiˈix mbäät njäjtëm tijaty, yëˈë ko nˈijxëm wiˈix ja nmëguˈukˈäjtëm ttundë (Prov. 27:17). Pääty ko mëët nëjkxëm käjpxwäˈkxpë, nˈokmëdooˈijtëm yajxon wiˈix tmëtmaytyaˈagyë jäˈäy. Nan nˈokˈyajtëˈëwëm wiˈix ttundë pënaty jantsy oy käjpxwäˈkxtëp ets nˈokmëdooˈijtëm yajxon wiˈix xyˈanmäˈäyëm (Prov. 1:5). ¿Xytsyiptakxëm nnijëmbijtëmë jäˈäy, nyaˈëxpëjktsondakëm o jam ti wiinkpë mä nduˈunëmë Diosë tyuunk? Pën duˈun, nˈokmaytyakëm mët ja diˈib nyikëjxmˈäjtypy ja grupë o mët tuˈugë nmëguˈukˈäjtëm diˈib jeky kujk kyäjpxwaˈkxy parë xypyudëjkëm. Nˈokjamyajtsëm nanduˈun ko mbäät xypyudëjkëmë Diosë myëjää parë mas oy nduˈunëm. Pääty nˈokˈamdoˈojëm xëmë ko nuˈkxtakëm (Luk. 11:13).
3. ¿Wiˈix mbäät nnayjäˈäwëm ko nyajmoˈoyëmë käjpxwijën oy të ngaˈˈamdoˈojëm?
3 Kyaj nyajpojkëm ko nyajmoˈoyëm tuˈugë käjpxwijën diˈib kyaj të nˈamdoˈojëm (Ecl. 7:9). Ets duˈun extëmë Apolos, nˈokkupëjkëm ja naybyudëkë mëdë tudaˈakyˈat ets nˈokmëjjäˈäwëm. Duˈunë nety nyajnigëxëˈkëmë wijyˈäjtën (Prov. 12:15).
4. ¿Tiko jyëjpˈamëty ets niˈigyë njäjtëm parë oy ngäjpxwäˈkxëm?
4 Yajmëjpëtsëëmbyë Dios ko niˈigyë nwimbajtëm. Jesus pyëjtak tuˈugë ijxpajtën parë ojts tpudëkë ja yˈëxpëjkpëty ets oy kyäjpxwäˈkxtët. Jyënany ko yëˈë duˈun extëmë uubës kepy, ets ja yˈëxpëjkpëty diˈib nëjkxandëp tsäjpotm duˈun extëm ja yˈaay xyeˈentsy diˈib yajkypyë tyëëm, diˈibë Tyeety kyupoˈtypy parë “niˈigyë yˈaktëëmpˈatët” (Fwank 15:2). Ets duˈun extëm diˈib ja uubës kepy jyaˈäjtypy, tsyejpy ets niˈigyë tyëëmpˈatët, nanduˈunë Jyobaa tsyejpy parë niˈigyë ngäjpxwäˈkxëm (Eb. 13:15). ¿Wiˈix wyimbëtsëmäˈäny ko mas oy ngäjpxwäˈkxëm? Jesus jyënaˈany: “Yëˈë nDeetyëts yaˈijxëp yëˈë myëjˈäjtën ko miits mdëëmpˈattë oy” (Fwank 15:8).