Nˈokniˈˈijxtutëmë myëbëjkënë
1. Mä tadë sëmään 19 äämbë oktuubrë, ¿ti yaˈëxpëkäämp mä Yaˈëxpëkyë Biiblyë mä Naymyujkën?
1 Mä tadë sëmään 19 äämbë oktuubrë 2015, yaˈëxpëjktsondäˈägäˈänyë liibrë Nˈokniˈˈijxtutëmë myëbëjkënë mä Yaˈëxpëkyë Biiblyë mä Naymyujkën. Tyäˈädë liibrë yëˈë myaytyakypy 14 yetyëjk etsë toxytyëjk diˈib xëmë myëduundë Dios. Ko ngäjpxëm, ta nnijäˈäwëm ko jantsy jukyˈäjttë ets pyattë amay jotmay mët ko xëmë tmëduundë Jyobaa. Ets nan mbäät xypyudëjkëm mä jukyˈäjtën (Eb. 6:12).
2. ¿Tijaty myëmiimbyë liibrë Nˈokniˈˈijxtutëmë myëbëjkënë?
2 ¿Tijaty myëmiimbyë tyäˈädë liibrë? Myëmiimpy ja tiempë näˈä duˈun tyuun jyäjtë etsë mapë parë nnijäˈäwëm mä tsyënääytyë ets ti tiempë jyukyˈäjttë. Ets mä tuˈuk tuˈugë kapitulo myëmiimpy mä jyënaˈany, “Nˈokwinmäˈäyëmë tyäˈädë yajtëˈëwën”, tyäˈädë xypyudëjkëm parë nbawinmäˈäyëm ets nguytyuˈunëm diˈib njäjtëm. Nan myëmiimpy mayë dibujë tsujjatypyë diˈib të yˈoyë parë mbäät nnayjäˈäwëm ko tam jyawë nyajpatëm.
3. ¿Ti mbäät nduˈunëm parë xypyudëjkëm mä yaˈëxpëkäˈänyë tyäˈädë liibrë?
3 ¿Wiˈix mbäät xypyudëjkëm? Mä tyäˈädë liibrë tyimtsondaˈaky myiny ja neky diˈib ojts xytyuknijäˈäyëm Diˈib wyooyoˈoytyëbë Jyobaa tyestiigëty, jap xyˈanmäˈäyëm: “Pawinmaytyë wiˈix nyayjäˈäwëdë ja Dios mëduumbëty ko twinguwäˈkëdë jotmay, ets tixyëp mduundëp koxyëp miitsëty duˈun mjäjttë”. Perë tyäˈädë kyaj yëˈë tˈandijy ets nëgoobë nwinmäˈäytyëˈëwëm tijaty yajmaytyakp, yëˈë duˈun yˈandijpy nbawinmäˈäyëm wiˈixë Biiblyë tmaytyaˈaky ets naybyëjtakëm extëmxyëp ëtsäjtëm duˈun njäjtëm. Parë duˈun nduˈunëm, tsojkëp njuˈtëmë tiempë (Neh. 8:8). Ets ko yaˈëxpëkëdë tyäˈädë ets wyëˈëmët mä kyujkwaˈkxyë kapitulo, ta ja diˈib yajnäjxypy ja tuk sëmään, ttukˈajamyatsëdë nmëguˈukˈäjtëm naa tuk minutën diˈibë nety të yaˈëxpëky tyuk sëmäänëp. Nan mbäät dyajtëy tuˈuk o majtsk pën kyaj tmëminy mä jyënaˈany, “Nˈokwinmäˈäyëmë tyäˈädë yajtëˈëwën”.
4. ¿Tiko jyëjpˈamëty ets nˈëxpëjkëmë liibrë Nˈokniˈˈijxtutëmë myëbëjkënë?
4 Satanásë jyaˈay yˈëxtaabyë winmäˈäny wiˈix tuˈuk tuˈugë xëë dyajtëgoyëdë mëbëjkën o dyajkujënakët. Tyäˈädë liibrë ets diˈibaty miimp mä Diˈib Xytyukˈawäˈänëm mä jyënaˈany Nˈokniˈˈijxtutëmë myëbëjkënë, yëˈë diˈibë Jyobaa xytyukmayˈäjtëm parë nyajkëktëjkëmë mëbëjkën (Sant. 1:17). Pääty, nˈoknaytyukpudëjkëm niˈamukë ko nëjkxëm mä Yaˈëxpëkyë Biiblyë mä Naymyujkën ets ko ngomentaräjtëm.