Hulda pyat mëdiˈibë nety yajtëgoyˈajtypy

KOXYËP tyëgëk tyaxk jëmëjtëp ojts mnëjkxy Indonesia mä tuˈugë lugäär mëdiˈibë xyëwˈäjtypy Sangir Besar, waˈanxyëp jap xypyattë nidëgëëgë nmëguˈukˈäjtëm. Mä yäˈädë lugäär duˈunë nety japë jäˈäy yˈixyˈatëdë ko yëˈë tukniˈˈijxëdëbë Biiblyë, per koxyëp ojts jap mnëjkxy kyaj nety jap yëˈë ttundë. ¿Ti nety jap tyuunkˈäjttëp?

Yëˈë ijtyë tsää kyoonmujktëp mejnybyëˈääy ets ta twojptäˈäktë mutskaty. Ta ijty tmënëjkxtë mä tyëjk ets dyajnipattë mä tuˈugë mëj xäˈk, jam ijty ja karrë nëjkx dyajtsoony parë tmënëjkxy mä ja karreteerë tuˈu yajwindamë.

Niduˈugë yäˈädë nmëguˈukˈäjtëm ja txëwˈaty Hulda ets yëˈë ijty mas niˈigyë tsääwojp, duˈun tˈixy ja fyamilyë. Per ta jyënany ko jatëgok ttoogët ja tsää yëˈë nety jyuyaampy tuˈugë tyabletë parë mbäät tmëdatyë aplikasion JW Library^®. Hulda nyijäˈäwëbë nety ko mbäät pyudëkëtyë yäˈädë aplikasion mä yˈëwaˈkxy kyäjpxwaˈkxy mët ko myëmiimbyë bideo, ëxpëjkpajn ets mbäät nanduˈun yajxon tjaygyukë Biiblyë.

Pääty tuk poˈo naxy ja tsää twojpy jopy jopy naa majtsk oorën ets ta ojts dyajkaˈpxy tuk karrë, duˈun tpaty ja meeny parë tjuuy ja tyabletë.

Hulda duˈun tnimaytyaky: “Nëgooyëts ojts nˈanuˈkxënë etsëts xynyipëjknë ja tsääwojpk. Per kojëts njuuy ja ndabletë etsëts nˈijxy ko mbäädëts xypyudëkë parëts oy nˈëwäˈkx ngäjpxwäˈkxët etsëts nˈëxpëkët tijaty naxäämp mä reunyonk ndimyjyaˈaytyëgooyëts kots xynyipëky ja tsääwojpk”. Nanduˈun jyënany ko pudëjkë mëjwiin kajaa ja tyabletë ko tsyondakyë COVID 19 parë ojts nyaygyonektaratyëty reunyonk ets yˈëwaˈkxy kyäjpxwaˈkxy. Ndukxondakëm ko Hulda tpaty mëdiˈibë nety yajtëgoyˈajtypy.