Ëxpëk parë tijaty xyjyatët

Mä jam nˈëxpëjkëm oy ko nnayajtëˈëwëm: “¿Tijaty mëdiˈibëts njataampy?”. Ets oy ko duˈun nduˈunëm. Ko ëtsäjtëm ti niˈëxpëjkëm yëˈë parë tii njatäˈänëm, pääty oy ko nasˈijxëm etsë Jyobaa xytyuknijäˈäwëm ti yëˈë tsyojkypy ets njäjtëm. ¿Wiˈix mbäät nduˈunëm?

Amëdowë Jyobaa wijyˈäjtën. Oy ko niˈigyë tijaty xyˈaknijawët ets kyaj yëˈëyë xymyëwëˈëmët mëdiˈibë mjäjtypy (Prov. 3:​5, 6). Amëdowë Jyobaa naybyudëkë parë xyjyaˈaygyukët mëdiˈibë mdukniˈˈixëyanëp mä jam mˈëxpëky (Sant. 1:5).

Nasˈixë etsë Jyobaa yˈääw yˈAyuk mbudëkëdët mä mjukyˈäjtën. “Yëˈë Dios ja yˈayuk myëdäjtypy ja mëkˈäjtën” (Eb. 4:12). Ko tëgok tëgok ngäjpxëmë Biiblyë mbäät tijaty xytyukniˈˈijxëm mëdiˈibë nety kyaj nnijäˈäwëm. Ets mbäät xypyudëjkëm kanääk pëky, per net pen ëtsäjtëm ngupëjkëm ko njantsy yajtëgoyˈäjtëm parë Dios tijaty xytyukniˈˈijxëm.

Nˈokkukäjpxëm tijatyë Jyobaa xytyukniˈˈijxëm. Tijatyë Jyobaa xytyukniˈˈijxëm mä nyax kyäjpn duˈun yëˈë extëmë “oyëtypë kääky uuky, xu’kxëtypë” (Is. 25:​6, TY). Këdii winˈixy xykyajpxy tijatyë Diosë nyax kyäjpn yajpëtsëëmpy mët ko mwinmay ko kyaj mbudëkëyaˈanyëty. Pen mduumpy duˈun, duˈunë nety xynyasˈixë parë Dios mbudëkëdët ets xyaˈoyëdë mjäˈäyˈäjtën ets nëjkxëp mas niˈigyë xytyukxondaˈaky mä mˈëxpëky.