¿Duˈun extëmë manik ko mˈëwaˈkxy mgäjpxwaˈkxy?

MËJWIIN kajaa tsyobääty ko nˈëwäˈkx ngäjpxwäˈkxëm, per kyaj niˈamukë jäˈäy dyajtsobäättë. Axtë pënaty yˈoymyëdoowdëbë Diosë yˈAyuk wyinmaytyë ko kyaj tyim jëjpˈamëty ets mëët nˈëxpëjkëm.

Duˈun jyajtyë Gavin, diˈib ijty xëmë nëjkxp mä reunyonk, per kyaj tkupëjky ets pën yaˈëxpëkëdët. Yëˈë jyënaˈany: “Kyajts ijty nëgoo nnijawë Biiblyë, ets tsoytyuumbëts ko pën tpëkëdë kuentë ko kyajts nnijawë. Kyajtsë nety ntseky etsëts pën xywyinˈëënët ets nan kyajtsë nety ndunäˈäny nituˈugë kompromisë”. Wiˈix mˈokwinmay, ¿waˈandaa netyë Gavin mbäät yajpudëkë? Mbäät, mët ko tijatyë Biiblyë tukniˈˈijxëp mbäät pyudëkëtyë jäˈäy. Päätyë Jyobaa tˈanmääy ja israelitëty ko duˈun ja yˈääw yˈayuk extëmë “määnikën” ets extëmë “tuu kyëdaˈagyën naxkëjxy” (Deuteronomio 31:19, 30; 32:2, Mʉgoxpʉ ja̱ noky mʉdiˈibʉ jyaayʉn Moisés). Min nˈokˈijxëm taxk pëky wiˈixë manik yajnimaytyaˈaky parë nanduˈun ëtsäjtëm nmëtmaytyakëm oytyim pënëty (1 Timotee 2:3, 4).

¿TIKO YAˈIJXKIJPXYË MËDË MANIK KO NGÄJPXWÄˈKXËM?

Yëˈë manik kyaj mëk kyaˈay mä ääy ujts. Manik wanaty wanaty koots tyuˈukmuky ääygyëjxy ujtskëjxy ets yëˈë poj yajmiimpy. ¿Tiko Biiblyë jyënaˈany ko Jyobaa yˈääw yˈayuk duˈun extëmë manik? Yëˈko yuunk naxypy ets tsuj yajxon ojts tmëgajpxy pënaty mëduunëp. ¿Wiˈix mbäät nbanëjkxëmë yˈijxpajtën mä ngäjpxwäˈkxëm? Ko nwintsëˈkëm wiˈixë jäˈäy tmëdatyë myëbëjkën ets ko nbudëjkëm parë këˈëm twinmayët ets tˈixët ti tyunaampy. Mbäädë jäˈäy tkupëky wiˈix nˈanmäˈäyëm, pën yˈijxtëp ko jantsy naytyukjotmaytyuˈunëm. Ko duˈun nduˈunëm, nëjkxëp oy wyimbëtsëmy mä ngäjpxwäˈkxëm.

Manik yajnijk yajxaˈamp. Ko ngäjpxwäˈkxëm mbäädë jäˈäy yajniky yajxeemyëty extëmë manik, per net pën oy yajnayjawëty extëm nˈanmäˈäyëm. ¿Wiˈix mbäät nduˈunëm? Taaˈäjtp kanäk pëky wiˈix mbäädë jäˈäy nbudëjkëm parë tnijawëdë Biiblyë. Gavin diˈib të yˈokˈyajmaytyakpë, ojtsë Chris jyaˈˈanëˈëmxëty pën yˈëxpëkaambyë Biiblyë, per kyaj mëktaˈaky tˈanmääy parë yˈëxpëkët. Niˈigyë ttuunyë mëjää parë Gavin oy nyayjawëdët tëgok tëgok tnimaytyäˈäktë Biiblyë. Ta ttukmëtmaytyaky ko mä Biiblyë tap tuk pëky diˈib xëmë yajmaytyakp, ets ko tnijawët, ta mas oy tjaygyukët tijaty näjxp mä reunyonk. Chris, nan tyukmëtmaytyak ko diˈib yëˈë pudëjkë parë tmëbëjky ko Biiblyë tëyˈäjtën myaytyaˈaky, yëˈë ko tˈëxpëjky wiˈix yˈadëëdäˈäy tijaty jap yajnaskäjpxë. Ta jantsy kanäkˈok tnimaytyaktë wiˈix tijaty të yˈadëy. Gavin yˈoymyëdoowë ets ta tkupëjky parë mëët yˈëxpëkët.

Jëjpˈamë manik parë jyaˈˈatëdë jukyˈäjtën. Jap Israel jäjtp tuˈugë tiempë mä mëk jyantsy yˈany ets tëˈëtsë it naxwinyëdë, ets näjxp kanäk poˈo mä kyaj nyekytyuˈuy. Koxyëbë manik kyakäˈäy, niˈkxtaapyxyëbë ääy ujts ets tëtstaapyxyëp. Mä Biiblyë ojts yajnaskäjpxë ko mä ndiempëˈäjtëm, jaˈˈatandëbë jäˈäy diˈib jyantsy myëdowandëbë Diosë yˈayuk (Amós 8:11). Duˈunxyëp extëm jyantsy tyëëtsëdë. Päätyë Biiblyë jyënaˈany ko pënaty nëjkxandëp tsäjpotm, yˈitäˈändë “extëmë Jyobaa myanik” ko ttukmëtmaytyäˈäktëdë jäˈäy tijaty kunuˈkxën yajminaambyë Diosë Kyutujkën (Miqueas 5:7). Etsë wiinkpë borreegë yëˈë pudëjkëdëp mä tyäˈädë tuunk (Fwank 10:16). Duˈunë duˈun, ko jäˈäy ndukninëjkxëmë tyäˈädë oybyë ayuk, duˈunxyëp extëm yajjukypyëkëdë. ¿Nyajtsobatëmë tyäˈädë oybyë ayuk?

Manik yëˈë Jyobaa kyunuˈkxën (Deuteronomio 33:13). Nanduˈun ko ngäjpxwäˈkxëm, yëˈë tuˈugë kunuˈkxën parë pënaty yˈaxäjëdëp ja tëyˈäjtën. Extëmë Gavin, tyukˈoyˈäjt ko tyëjkë ëxpëjkpë, pes yaˈˈatsoowëmbijt tijatyë nety nayajtëëwëp. Ko waanë yˈijty, ta nyëbejty, ets tyam mëdë kyudëjk, diˈib xyëˈäjtypy Joyce, tˈëwäˈkx tkäjpxwäˈkxtë ja oybyë ayuk diˈib nyimaytyakypy ja Diosë Kyutujkën.

NˈOKˈYAJTSOBATËM KO NGÄJPXWÄˈKXËM

Pën nˈijxkijpxyëm mëdë manik ko ngäjpxwäˈkxëm, ta nˈijxëm ko kyaj nëgoobë nyajtuˈunëm ja jot mëjää ets ja xëëw tiempë. ¿Tiko duˈun njënäˈänëm? Yëˈko tuk tsunyë manik kyaj mbäät dyajxoogyë nax, per ko jantsy may kyaˈay yajtsäˈämëtyaabyë naxwinyëdë. Mbäät nwinmäˈäyëm ko nëgoobë nduˈunëm mä ngäjpxwäˈkxëm, per ko yaˈˈawijtsmuky mët diˈib tyuundëp miyonkˈamë Dios mëduumbë, ta ja oybyë ayuk yajkäjpxwaˈkxy “mä tëgekyë naxwinyëdë” (Matewʉ 24:14). Extëm nˈijxëm, ko nˈëwäˈkx ngäjpxwäˈkxëm yëˈë Jyobaa kyunuˈkxën. Ets duˈun extëmë manik, mbäädë jäˈäy yajnayjawëty oy, yajniky yajxeemyëty ets myoˈoyëtyë jyukyˈäjtën.