¿Tiko Jyobaa tyestiigëty kyaj tmëjtundë Diosˈuˈunk xëëw?
Extëmë jäˈäy jyënäˈändë ets extëm tyëyˈäjtënëty
Extëmë jäˈäy jyënäˈändë: Jyobaa tyestiigëty kyaj tmëjtundë Diosˈuˈunk xëëw yëˈko kyaj tmëbëktë Jesus.
Extëm tyëyˈäjtënëty: Ëëtsëty nmëbëjktëbëtsë Jesus ets ijttëbëts seguurë ko mët yëˈëgyëjxm yajpäädäˈänyë nitsokën (Apostʉlʉty o Hechos 4:12).
Extëmë jäˈäy jyënäˈändë: Yajnaywyäˈkxëdëbë familyë mët ko jäˈäy ttukniˈˈixëdë ko kyaj mbäät tmëjtundë Diosˈuˈunk xëëw.
Extëm tyëyˈäjtënëty: Mëkëts nyajtsobäättë familyë ets yëˈëts nyajtuundëbë Biiblyë parëts nbudëkëdë ets tuˈugyë yˈittët.
Extëmë jäˈäy jyënäˈändë: Kyaj ttukxondäˈäktë Diosˈuˈunk xëëw, kyaj ti nyaynyamoˈoyëdë, kyaj yajpäättë tuˈugyë ets agujk jotkujk.
Extëm tyëyˈäjtënëty: Nduundëbëtsë mëjääw parëts tuˈugyë nyajpäättë ets oyjyaˈaytyaktëbëts nuˈunë xëëw jëmëjt tyuˈuyeˈey (Proverbios 11:25; Romanʉs 12:18). Extëm nˈokpëjtakëm, kyajtsë meeny sentääbë nˈamdowdë mäts nduˈukmuktë ets kots ngäjpxwäˈkxtë, pes yëˈëts nmëmëdoowdëp extëmë Jesus jyënany: “Mˈaxäjëdë tyäˈädë mëkˈäjtën nadëˈënyë, nan katë myajmëjuytyë ko dëˈën xytyundët” (Matewʉ 10:8). Nan ngäjpxwäˈkxtëbëts ko Diosë yˈAnaˈam Kyutujkën yëˈëyë yajjaˈˈataambyë tuˈugyëˈäjtën (Matewʉ 10:7).
¿Tiko Jyobaa tyestiigëty kyaj tmëjtundë Diosˈuˈunk xëëw?
Jesus yëˈë ojts tniˈanaˈamë parë yajjamyatsëdë yˈoˈkën xëëw ets kyaj ko myaxuˈunkˈäjty (Lukʉs 22:19, 20).
Ni yëˈë ja Jesusë yˈapostëlëty ets ni pënaty tim jawyiin panëjkxëdë tkamëjtuundë Diosˈuˈunk xëëw. Yëˈë Diccionario del cristianismo jyënaˈany ko tyäˈädë xëëw jam “tsyondaky Roma mä jëmëjt 330” mä ndiempëˈäjtëm, ja nety të nyäjxnë majtsk mëgoˈpx jëmëjt mä yˈoˈky ja tim oˈkpë apostëlë.
Kyaj mä yajnigajpxy ko Jesus myaxuˈunkˈäjty 25 äämbë disiembrë; Biiblyë kyaj tnigajpxy ti poˈo myaxuˈunkˈäjty.
Nmëbëjktëbëts ko Dios kyaj ttukjotkëdaˈaky ko jäˈäy ttundë Diosˈuˈunk xëëw, pes yëˈë yajtsondaktë pënatyë nety kyaj tpanëjkxtë Kristë ets tsyoony mä ja kostumbrë diˈibë nety tyuundëp (2 Korintʉ 6:17).
¿Tiko kyaj ttundë Diosˈuˈunk xëëw extëmë jäˈäy ttundë?
Mayë jäˈäy tmëjtundë Diosˈuˈunk xëëw oy tjanijawëdë ko kyaj myiny mä Biiblyë ets ko yëˈë yajtsondaktë pënaty kyaj ojts tpanëjkxtë Kristë. Wyinmaytyë ko kyaj tyim wiˈixëty ets kom ak duˈunë jäˈäy ttundë, ta nenduˈun yëˈëjëty tmëjtundë.
Biiblyë xyˈanmäˈäyëm parë nyajtuˈunëmë jot winmäˈäny ets nwinˈijxëm ti diˈib ndunäˈänëm (Romanʉs 12:1, 2). Nan xytyukniˈˈijxëm parë nyajtsobatëm ja tëyˈäjtën (Fwank 4:23, 24). Nguentëpëjtaktëbëts extëmtsë jäˈäy xynyimaytyäˈäktë, per kyajts ngutëjäˈändë Biiblyë parëts ndundët diˈibë mayjyaˈay tyuundëp.
Kyajts nmëjtundë Diosˈuˈunk xëëw, per nwintsëˈkëdëbëts ti niduˈuk niduˈugë jäˈäy tyunandëp. Pääty, naˈijxtëbëts pënaty myëjtunandëp.