Tiko dyajtëgooytyë ja yˈit lyugäärë tsujpë

OK IX ti yam tuun jäjtëp. Tam yajkajxpëtsëëmnëdë Adán mëdë Eevʉ jam Eden. ¿Mnijäˈäp tiko?

Yëˈko mëk axëëk të yˈadëˈëtstë. Ets päätyë Jyobaa yam yˈëxkaxëdë. ¿Mnijäˈäp ti tyuundë Adán mëdë Eevʉ?

Yëˈë tyuundë diˈibë Dios anmääyëdë ets kyaj ttundët. Dios yˈanmääyëdë ko mbäät tjëˈxtë tëgekyë ja ujts tëëmp diˈib jamˈäjtp mä ja it lugäärë tsujpë. Per mä tuˈugë ujts kepy Dios yˈanmääyëdë ko kyaj tjëˈxtët ja tyëëmp, pën jyëˈxtëp ooktëp. Pesë tadë ujts kepy yëˈë netyë Diosë jyaˈa. Ets nijäˈäjëm ko axëëk ko nixäjëmë wiink jäˈäyë jyaˈa, ¿këdii? Wenë, ¿wiˈixë dëˈën tyuun jyäjtë?

Tuˈugë xëë mä netyë Eevʉ yajpääty naytyuˈuk mä ja it lugäärë tsujpë, ojts myëgajxyëty tuˈugë tsäˈäny. ¡Ok pawinmay! Ja tsäˈäny tˈanmääyë Eevʉ ets tjëˈxët ja ujts tëëmp diˈibë netyë Dios të yˈanëˈëmxëty ko kyaj tjëˈxët. Wenë, ko Jyobaa ojts dyajkojˈyë tsäˈäny kyaj tpëjtaky ets kyäjxët. Pääty, wiink jäˈäyë nety diˈib yajkajxypyë tsäˈäny. ¿Pëndaa?

Kyaj yëˈëjëtyë Adán. Yëˈë nety tuˈugë anklës diˈib kyaj yaˈixy. Jamyats ko Jyobaa të nety näˈäbë dyajkojnë may anklës mä tkayajkojynyëmë Naxwinyëdë. Tuˈuk diˈib nayajjëmbijtë mëj këjxm. Tyëjkë winmaabyë ko yëˈëxyëp anaˈamp extëmë Dios ets ko yëˈëxyëp yajmëmëdoop ets kyaj yëˈëjëty Jyobaa. Yëˈë dëˈën diˈib yajkäjx ja tsäˈäny.

Tyäˈädë anklës wyinˈëˈënë Eevʉ, tyukmëbëjk ko tˈanmääjy ko dëˈën yˈitët extëmë Dios pën jyeˈxypy ja ujts tëëmp. Pääty ojts tjeˈxy ets nandëˈënë Adán. Adán mëdë Eevʉ kyaj tmëmëdoodë Dios, ets pääty dyajtëgooytyë ja tsujpë it lugäär.

Per jäˈtäämp tuˈugë xëë mä Dios dyajjëmbitäˈäny tëgekyë Naxwinyëdë mëk tsuj, dëˈën extëmë nety ja it lugäärë tsujpë diˈib xyëˈäjt Eden. Ok xynyijawëyaˈany wiˈix mijts mbäät mjamˈaty ets nandëˈën xyaˈoyëdë Naxwinyëdë. Minë net nˈokˈijxëm wiˈixë jyäjt kyëbajttë ja Adán mëdë Eevʉ.