Noˈee ojts dyajkojy tuˈugë arkë

NOˈEE myëdäjtë nyëdoˈoxy ets tëgëëgë myäänk. Ja myäänk ja txëˈäjttë Sem, Kam ets Jafet. Tyäˈädë myäängëty ak tamë nyëdoˈoxy. Päätyë Noˈee ja wyinëˈäjttë niduktujk.

Ta netë Dios tˈanmääyë Noˈee ets dyajkojët tuˈugë arkë mëj dëˈën extëm tuˈugë barkë, jeˈeyë ko dëˈën kyëxëˈëgët extëm tuˈugë käjë mëjpë diˈib yeny. Yaˈanmääjy ets tkojët tëgëk nikëˈëy ets tpëjtäˈägët kanäägë kuartë mä yëˈë yˈitët mëdë yˈuˈunk yˈënäˈk, etsë jëyujk animal, ets nandëˈën mä yˈitëdë jeˈxy peky.

Dios tˈanmääyë Noˈee: Yajxonë arkë xyaˈoyët extëm kyaj mbäädë nëë tyuktëkëty yëˈko ngaxaambyëtsë mëj ayoˈonduu ets dyajkutëgoyët tëgekyë diˈib jap Naxwiiny. Niˈamukë diˈib kyaj tyëkë arkoty oogëp.

Noˈee mëdë yˈuˈunk yˈënäˈk myëmëdoodë Dios ta tniwäˈkëdë arkë. Per ja wiingatypyë jäˈäy jeˈeyë nyëxik tyukxikëdë. Dëˈënyëm yˈaxëkjäˈäyˈäjttë. Nipën tkamëbejky ko ja Noˈee tjamaytyaky ti netyë Dios tyunaampy.

Kom mëj ja arkë, jeky tjantsy tyuunkˈäjttë. Koonëm kanäk jëmëjt nyajxy taanëm tkojˈabajttë. Ta netë Dios tˈanmääyë Noˈee ets dyajtëkëdë jëyujk animal mä ja arkë, nääk dyajtëkët nimajtskaty yaˈaybyë etsë toˈoxypyë ets nääk dyajtëkët nijëxtujkaty. Nandëˈën yaˈanmääjy ets dyajtëkët kexy kaˈpxyë joon jëyujk. Noˈee dëˈënën meerë ttuuny extëmë Dios yˈanmääyë.

Ok, ta Noˈee mëdë yˈuˈunk yˈënäˈk tyëjkëdë mä ja arkë. Ta netë Dios dyaˈadujky ja tëjkˈää. Japë Noˈee mëdë yˈuˈunk yˈënäˈk yˈawijxtë. Ok winmay koxyëp mijts nan tap xyˈawixyë ayoˈonduu. ¿Ok minëbëdaa ja ayoˈonduu dëˈën extëmë netyë Dios të jyënaˈany?