Abra̱a̱n yajwinmäˈänyˈixy pën myëdäjtypyë mëbëjkën

¿MˈIJXYPY ti yam tyuunambyë Abra̱a̱n? Tamë tsujkn tmëdaty, ets dëˈën kyëxeˈeky extëmë yˈuˈunk dyaˈoogäˈäny. ¿Mnijäˈäp tiko? Min jawyiin nˈokˈijxëm wiˈixë Abra̱a̱n mëdë Saarʉ tpattë yˈuˈunk.

Jamyats ko Dios yˈanmääyëdë ko tpäädäˈändë yˈuˈunk, ¿per wiˈixën tpäättëdë yˈuˈunk ets pënë Abra̱a̱n mëdë Saarʉ të netyë myëjäˈäyëndë? Wenë, oyë nety yëˈë të myëjäˈäyëndë, Abra̱a̱n myëbëjk ko Dios mbäät ttuny extëmë nety të yˈanëˈëmxëty. Pääty min nˈokˈijxëm ti net tuun jäjtë.

Ko jyëmëjtpejty, ta tpattë yˈuˈunk diˈib tyukxëˈäjttë Isa̱a̱. Abra̱a̱n ja netyë jyëmëjt 100 etsë Saarʉ 90. ¡Dëˈënë Dios tkuytyuunyë wyandakën!

Ko ja Isa̱a̱ ojts yaˈknë, ta Jyobaa twinmäˈänyˈixany ja Abra̱a̱n pën jantsy mëbëjkëbë nety. Ta ojts tmëgajxy: ¡Abra̱a̱n! Ta ja Abra̱a̱n yˈatsoojy: ¡Tyamtsa ëjts! Ta tˈanmääjy: Mëtsoonë Isa̱a̱, tadë mduˈukˈuˈunk, ets nëjx mä tadë kopk diˈib ndukˈixaampy. Jam xyaˈoogët ets xytyukwintsëˈëgëdëts.

¡Mëk jyotmaytyuktëjkë Abra̱a̱n ko dëˈën yaˈanmääjy, yëˈko mëkë netyë yˈuˈunk ttsoky! Jamyats ko Dios të nety tyukwandaˈagyëty ko ja yˈuˈunk yˈënäˈk yëˈë diˈibë nety tsëënëyandëp jam Kanán. ¿Per wiˈixë dëˈën jam ja yˈuˈunk yˈënäˈk tsyëënëdët ets pën oˈkp ja Isa̱a̱? Tyäˈädë yëˈë diˈib kyaj tjaygyujkë Abra̱a̱n, per oy tkajaygyujkë myëmëdoojë Dios.

Ko jyäjttë mä ja kopk ta Abra̱a̱n tkëtsiimy tkëwëˈënyë Isa̱a̱, ets dyajpejty mä nety jam të tniˈixë ets dyaˈoogäˈäny. Ta net tjuˈty ja tsyujkn. Tamë nety të ttuknixäjëˈknë, ko netyë ja Dios myëgäjxë mët yëˈëgyëjxm tuˈugë anklës ets yˈanmääyë: ¡Abra̱a̱n, Abra̱a̱n! Ta ja Abra̱a̱n yˈatsoojy: ¡Tyamtsa ëjts!

Ta ja Dios yˈanmääyë: Katë wiˈix xytyunyë mˈuˈunk, tyamtsë net të njantsy ixy ko xymyëbëjkpëts, yëˈko ix tëts xyjamoˈoyaˈanyëtsë mˈuˈunk, tadë mduˈukˈuˈunk.

¡Mëjwiin kajaajë Abra̱a̱n tjantsy myëdäjtyë mëbëjkënë mä Dios! Myëbëjk ko Jyobaa mbäät ttuny ti tyim tunaampy, ets mbäät axtë ja Isa̱a̱ dyajpëdeˈeky pën oˈkp. Perë Dios jeˈeyë nety twinmäˈänyˈixäˈänyë Abra̱a̱n pën jantsy mëbëjkëp. Pääty tˈanmääjy ko oy yëˈë tyukwintsëˈëgëdët tuˈugë borreegë diˈibë nety të dyajtäˈtspeky ujtsoty.