ËXPËJKËN 8
Abrahán mëdë Sara myëmëdoowdë Dios
Naa jaayë Babel yajpaty jatuˈugë siudad diˈib xëwˈäjt Ur. Jam kyaj ijtyë jäˈäy tˈawdattë Jyobaa, yëˈë nety yˈawdäjttëbë wiink dios. Per tamë nety tuˈugë yetyëjk diˈib tsënaapy Ur, diˈib yˈawdäjtypyë Jyobaa, txëwˈäjty Abrahán.
Jyobaa tˈanmääyë Abrahán: “Mmastuˈudë mjëën mdëjk etsë mjiiky mëguˈuk, ets nëjkx mä ja lugäär diˈib ndukˈixaampy”. Ta netë Dios tyukwandakë: “Mjäˈtäˈäny extëm tuˈugë nasiongë mëjpë. Ets mët mijtskyëjxm, nmoˈoyaˈanyëtsë oyˈäjtënë niˈamukë naxwinyëdë jäˈäy”.
Abrahán kyaj nety tnijawë mä Jyobaa kyaxäˈänyëty, per myëbëjk extëm yˈanmääyë ets myëmëdoow. Ta nyaynyiˈˈijxë ets tyuˈudëjkë mëdë kyudëjk Sara, ja tyeety Taré, ets ja tsyojkmäänk Lot.
Abrahán ja netyë jyëmëjt 75 ko jyajty mët ja fyamilyë mä ja nax diˈibë netyë Jyobaa tukˈixanëp. Ja lugäär txëwˈäjty Canaán. Jyobaa ta jatëgok duˈunë Abrahán ttukwandaky: “Tukëˈëyë tyäˈädë nax diˈib mˈijxypy, yëˈëts nmoˈoyaambyë mˈuˈunk mˈënäˈk”. Perë Abrahán mëdë Sara të nety myëjjäˈäyëndë ets kyaj pënë yˈuˈunk yˈënäˈk. Pääty, ¿wiˈixë netyë Jyobaa tkuytyunäˈäny diˈib tukwandakë?
“Mëbëjkëngyëjxm ja Abrään tmëmëdooy ja Dios ko yaˈˈanmääy es pyëtsëmët mä ja nyax kyäjpn, es nyëjxët mä wiink nax diˈibë yˈaxäjëyaampy extëmë kumäˈäny, oy tkanijawë mä nyejxy” (Ebreeʉsʉty 11:8).